Galatia 4 - Fana Ngbangɔ 1987

¹ Ĩ ma tɛnɛ mɛ mbi ye tɛnɛngɔ lo mɛ: na ngoi ko la zo mɛ alengbi ti mungɔ andũ ye tɛ to lo, ade nyingambi ko, lo bo kwɛ kɔi nga ma mbɛ, abɛ adu ya, lo la na dungɔ nvɛ̃ aye ni ko zu.

² Ngoi ko la lo dɛ nyingambi ko, lo na gbe ti awa batangɔ lo, ko awa batangɔ lo abata nga aye tɛ lo, ngbĩi nga ka lo ti na buru mɛ to lo ako kwɛ wadila.

³ Ko se tɛ e nga la. Ngoi mɛ ndo e dɛ nga ma ayangambi ko, e ndo nga ma ambɛ tɛ asiɔ tɔrɔ ti lɛ sese olo.

⁴ Ko ngoi mɛ ndo bi mɛ Nzapa ako ĩ lengbi ko, lo to Nyi lo ge lɛ sese. Zo wali kɔi adú ndo lo, ko Nyi lo ni abi ndo tɛre lo so tɔndɔngɔ ndia tɛ Mɔizɛ ya,

⁵ ni tɔ̃ e azi mɛ ndo e na gbe ti ndia ni ko, wadila e ti aya Nzapa.

⁶ Ye mɛ ndofa ya, ĩ du aya Nzapa lo mɛ: Nzapa ato Tɔrɔ tɛ Nyi lo ge ya bɛ e na ĩ, Tɔrɔ ni ndode kɔngɔ ya: “Baba.”

⁷ Na lo ni ko, ta ĩ ti dɛ ambɛ ma, kanda ĩ ti aya Nzapa. Ko oko la ĩ ti aya lo ko, lo hɛ̃ ĩ gbanda anzɔ̃ ye mɛ lo bata na lo tɛ aya lo.

Bɛ Polo angbã talele na ndo awa Galatia

⁸ Ndo uzu, na ngoi mɛ ta ĩ dɛ ĩ hĩnga Nzapa ma ko, ĩ ndo ambɛ tɛ asiɔ tɔrɔ mɛ ta abɛta nzapa ma.

⁹ Ko na olo ko, ĩ hĩnga Nzapa. Ipɔ, mbi separa pangɔ ya, na olo ko, Nzapa ahĩnga ĩ. Ko nga ma la ĩ hĩnga Nzapa ko, asiɔ tɔrɔ mɛ ta kwa tɛ la da ma, ta ala nga na nguru ma ko, kɔdɛ mɛ ĩ diri ka tɛ la sia? Kɔdɛ mɛ ĩ ye ya, ĩ ti diri ĩ ti ambɛ tɛ la sia?

¹⁰ Ĩ ndomu ambanga bi, na ambanga nzɛ̃, na ambanga ngoi, nga na ambanga buru ka lɛ ĩ ngbondoni!

¹¹ Ye mɛ mbɛtɔ ni ndogbɔ̃ mbi la, ale ta kwa mɛ ndo mbi li ka tɛ ĩ agwe gɛgɛrɛ ma.

¹² Aya bua, na lo ti tɛnɛ mɛ aba ndia ko, ale ĩ mu lɛ lo tɛ mbi nga ma se mɛ mbi mu na lɛ lo tɛ ĩ. Ndo uzu ko, ta ĩ li ndo mbi siɔni bɛ kɔi ma.

¹³ Ĩ hĩnga ya, mbi ngba ndo ka tɛ ĩ, ko ti kɔzoni mɛ ndo mbi pa Nzɔ̃ Pa hɛ̃ ĩ ko, adu ndo na lo mɛ ya, tɛrɛ mbi asɔ.

¹⁴ Ĩ hũ ndo pɛnɔ sĩ na lo ti ngã tɛ mbi. Ko ta ĩ samana ndo na mbi, bere ĩ kɛ̃ ndo mbi ma. Kanda ĩ yamba ndo mbi ma bere mbi angelo tɛ Nzapa, ma bere mbi Yezo Kristo.

¹⁵ Bɛ ĩ ndode ndo sĩ! Ko ati li sia? Tɛnɛ mɛ mbi lengbi ti tɛnɛngɔ na lo tɛ ĩ lo mɛ: se adu ya, andohã lɛ ko, ale ĩ hã ndo lɛ ĩ, ĩ hɛ̃ mbi!

¹⁶ Ĩ ndoda bɛ ĩ ya, na olo ko, mbi ti wa kɛ̃ngɔ ĩ, na lo mɛ ya, mbi ndopa hɛ̃ ĩ bɛta lo?

¹⁷ Azi ko la aye gbinyangɔ Nzɔ̃ Pa ko, ala ndohɛ̃ tɛrɛ la zu hɛ̃ ĩ, ko nda ni ko la ala ndohɛ̃ tɛrɛ la hɛ̃ ĩ ko, ta adu nzɔ̃ni ma. Ye mɛ ala ndosepara lingɔ lo mɛ: ala ndogi ya, ani kangbi popo tɛ mbi na ĩ, ko ĩ hɛ̃ nga tɛrɛ ĩ zu hɛ̃ ani.

¹⁸ Adu nzɔ̃ni ya, azi ahɛ̃ tɛrɛ la zu hɛ̃ afɔ̃ la. Kanda ale hɛ̃ngɔ tɛrɛ ni adu na lo ti aye mɛ nzɔ̃ni, ko adu nga ngoi zu. Ta mbi ye ya, ĩ hɛ̃ tɛrɛ ĩ hɛ̃ mbi bo na ngoi mɛ mbi ka popo tɛ ĩ ma.

¹⁹ Aya mbi, mbi ti ndohũ kpengba pɛnɔ na lo tɛ ĩ, nga ma wali mɛ gwa atɛ lo. Ko mbi na hũngɔ pɛnɔ ni, ngbĩi nga ka sé du tɛ ĩ ati nga ma tɛ Yezo Kristo.

²⁰ Mbi separa ma wo ma ya, mbi du ka tɔ̃nda ĩ na olo mɛ, wa mbi hĩnga tɛnɛ mɛ mbi lengbi ti tɛnɛngɔ hɛ̃ ĩ. Ta sanga ma, bɛ mbi angbã talele na ndo ĩ!

Agarɛ na Sara

²¹ Ĩ azi ko la ĩ ndoye bingɔ tɛrɛ ĩ so tɔndɔngɔ ndia ko, ĩ pa hɛ̃ mbi hĩ, ta ĩ ma tɛnɛ mɛ ndia atɛnɛ ma?

²² Asu ka ya Buku tɛ Nzapa ya, Abrahama adú ndo ayangambi ti kɔli osɛ. Lo dú kɔi na wali mɛ mbɛ, lo dú omɛ ndɛ̃ na ya lo mɛ bɔrɔ. Ili wali mɛ mbɛ la Agarɛ, ili ya lo mɛ bɔrɔ la Sara.

²³ Nyi mɛ ndo Abrahama adú na wali mɛ mbɛ ko, ala dú ndo lo nga ma se mɛ azi zu ndodú na nyi. Kanda nyi mɛ ndo Abrahama na ya lo mɛ bɔrɔ adú ko, ala dú ndo lo na se kapa mɛ ndo Nzapa ako hɛ̃ la ya, ala na dúngɔ nyi kɔli.

²⁴ Tɛnɛ olo adu nga ma matɔ. Awe ko osɛ adu nga ma ngbangɔ osɛ. Na popo tɛ angbangɔ ko osɛ ko, Agarɛ mɛ mbɛ adu nga ma ngbangɔ mɛ ndo Nzapa na Mɔizɛ agbe ka ndo hɔtɔ ti Sinai. Agarɛ adú ayangambi mɛ ambɛ.

²⁵ Agarɛ adu nga ma hɔtɔ ti Sinai mɛ ka sese ti Arabia. Agarɛ adu nga ma kɔdɔrɔ mɛ andoili na olo ya Yeruzalɛmɛ. Ko awa Yeruzalɛmɛ zu adu ambɛ ti tɔndɔngɔ ndia.

²⁶ Kanda Yeruzalɛmɛ mɛ ka yayu adu nga ma ta e Sara mɛ bɔrɔ, awa Yeruzalɛmɛ ni ko adu tɛ la abɔrɔ.

²⁷ Ti biani, asu ka ya Buku tɛ Nzapa ya: “Mɔ ta ngombo, mɔ mɛ ta mɔ hũ pɛnɔ ti gwa bɛ gbɔ ma ko, Saba, e ngia na kɔngɔ. Ta sanga ma, wali ko la kɔ lo azia lo ko, Lo na dúngɔ aya gba, ɔngɔ wali mɛ ka ti kɔ lo.”

²⁸ Aya bua, wa tɛ ĩ ko, ĩ du ayangambi mɛ adú ĩ na se kapa mɛ Nzapa ako. Adú ĩ nga ma se mɛ ndo adú na Izaki na se kapa mɛ ndo Nzapa ako.

²⁹ Ndo uzu ko, nyi mɛ ndo adú lo nga ma se mɛ azi ndodú na nyi ko, nyi ni ko ahɛ̃ ndo pɛnɔ hɛ̃ nyi mɛ adú lo na nguru tɛ Tɔrɔ Santo. Ko seni nga na olo mɛ la.

³⁰ Kanda Buku tɛ Nzapa apa ya: “Nɛnɛ wali mɛ mbɛ na nyi lo, ala ɔ. Ta sanga ma, nyi kɔli ko la ta lo mbɛ ko, ta lo lengbi ti mungɔ ndũ ye tɛ to lo ma, kanda nyi kɔli mɛ ta lo bɔrɔ la alengbi ti mungɔ ndũ ye tɛ to lo.”

³¹ Aya bua, na lo ni ko, ta e du aya zo wali mɛ lo mbɛ ma, kanda e du tɛ e aya zo wali mɛ lo bɔrɔ.