Galatia 3 - Fana Ngbangɔ 1987

Ta tɔndɔngɔ ndia ndoso zo ma

¹ Oo awa Galatia, ĩ du awa buba! Zo mɛ adɔ ĩ na li na? Kwá mɛ Yezo akpi ka ndo krusi ko, mbi kambisa ló ni yango na gbɛlɛ ĩ.

² Wa mbi na hũndangɔ ĩ na tɛnɛ kɔi, ko mbi ye ya, ĩ gbinya ni hɛ̃ mbi. Tɛnɛ ni lo mɛ: Tɔrɔ Santo mɛ Nzapa ahɛ̃ ĩ ko, lo hɛ̃ lo hɛ̃ ĩ, na lo mɛ ya, ĩ tɔndɔ ndia tɛ Mɔizɛ? Ipɔ, ta seni la ma. Nzapa ahɛ̃ ĩ Tɔrɔ Santo, na lo mɛ ya, ĩ ma Nzɔ̃ Pa, ĩ ye nga ló ni.

³ Wa kɔdɛ mɛ ĩ du awa buba so sia? Ndo uzu ko, ĩ ndoko ndo tɛrɛ ĩ na Tɔrɔ Santo. Ko na olo ko, ĩ zia kongɔ tɛrɛ ĩ na lo, ĩ ndoli ye na nguru tɛ ĩ nvɛni ya nɛ?

⁴ Anzɔ̃ lo mɛ ndo Nzapa ali tɛrɛ ĩ ko, ĩ hũ ka lɛ ĩ ya, adu gɛgɛrɛ? Mbi hĩnga ya, ta adu gɛgɛrɛ ma.

⁵ Ngoi mɛ Nzapa ahɛ̃ ĩ Tɔrɔ Santo tɛ lo, ali nga aye ti kpɛnɛ na popo tɛ ĩ ko, ĩ da bɛ ĩ ya, lo li so, na lo mɛ ya, ĩ tɔndɔ ndia? Ipɔ! Kanda lo li so, na lo mɛ ya, ĩ ma Nzɔ̃ Pa, ĩ ye nga ló ni.

⁶ Adu nga ma se mɛ asu na lo tɛ Abrahama ka ya Buku tɛ Nzapa ya: “Abrahama aye ndo lo tɛ Nzapa, ko na lo ni ko, Nzapa amu ndo lo ka lɛ lo ya, lo bɛta zo.”

⁷ Na lo ni ko, ale ĩ hĩnga ya, azi mɛ aye lo tɛ Nzapa la adu abɛta atara Abrahama.

⁸ Apia ndo asu ka ya Buku tɛ Nzapa gã ya, Nzapa amu gbanda azi mɛ ta Ayuda ma ka lɛ lo ya, ala abɛta azi, na lo mɛ ya, ala ye lo tɛ lo. Na lo ni ndo Ĩa Nzapa apia apa nzɔ̃ tɛnɛ hɛ̃ Abrahama ya: “Mbi Nzapa, mbi sunu gbanda azi zu mɛ so lɛ sese ti ndo mɔ.”

⁹ Abrahama aye ndo lo tɛ Nzapa, ko Nzapa asunu ndo lo. Ko azi zu ko la aye lo tɛ Nzapa ko, lo nga na sunungɔ la nga ma se mɛ ndo lo sunu na Abrahama.

¹⁰ Wa tɛ azi ko ndogi ya, ani tɔndɔ ndia, wadila Nzapa amu ani ka lɛ lo ya, ani abɛta azi ko, Nzapa azonga la wɛ. Ta sanga ma, asu ka ya Buku tɛ Nzapa ya: “Zo ko la ta ndobaba tɔndɔngɔ atɛnɛ zu mɛ asu ka ya buku ti ndia ma ko, Nzapa azonga lo.”

¹¹ Ko adu yango ya, ta Nzapa ndomu zo ka lɛ lo ya, lo bɛta zo, na lo mɛ ya, zo ni ndotɔndɔ ndia ma. Ta sanga ma, Buku tɛ Nzapa apa ya: “Zo ko la Nzapa ndomu lo ka le lo ya, lo bɛta zo, na lo mɛ ya, lo ye lo tɛ ni Nzapa ko, zo mɛ gbanda alua bɛta du la.”

¹² Tɔndɔngɔ ndia aɔngbi na yengɔ lo tɛ Nzapa. Adu nga ma se mɛ asu ka ya Buku tɛ Nzapa ya: “Zo ko la ndotɔndɔ alo ti ndia ko, lo na luangɔ bɛta du na lo ni.”

¹³ E du azi ti zonga, na lo mɛ ya, ta e tɔndɔ alo ti ndia ma. Ko Yezo Kristo aga ndo ya, Nzapa azonga ni na se le e. Lo li ndo so, la lo kpo zonga ni na tɛrɛ e, lo zi. Ta sanga ma, asu ka ya Buku tɛ Nzapa ya: “Nzapa azonga zo zu ko la agbe lo ka ndo kɛkɛ.”

¹⁴ Yezo ali ndo so ya, azi mɛ ta Ayuda ma alua nga anzɔ̃ ye mɛ ndo Nzapa ako kapa ti hɛ̃ngɔ hɛ̃ Abrahama. Lo li ndo nga so ya, e ye lo tɛ ni, wadila e lua Tɔrɔ Santo mɛ ndo Nzapa ako kapa ti hɛ̃ngɔ hɛ̃ e.

Ta ndia agbɛ̃ kapa tɛ Nzapa ma

¹⁵ Aya bua, tɛnɛ ko mbi tɛnɛ hɛ̃ ĩ ko, mbi ye kambisangɔ nda ni hɛ̃ ĩ. Mbi na mungɔ tɛnɛ kɔi mɛ azi zu ahĩnga, ko mbi pa hɛ ĩ. Tɛnɛ ni lo mɛ: se azi sɛ amangbi, agbe ngbangɔ ko, ta zo kɔi alengbi ti gbɛ̃ngɔ ngbangɔ ni, bere kpãngɔ tɛnɛ mɛ ndɛ̃ na ndo ni ma.

¹⁶ Ko se mɛ nga ndo Nzapa na Abrahama agbe na ngbangɔ la. Nzapa ako ndo kapa hɛ̃ Abrahama, ako nga hɛ̃ tara Abrahama. Ta asu ka ya Buku tɛ Nzapa ya: “Ako nga kapa ni hɛ̃ atara lo” ma. Buku apa bo lo tɛ tara Abrahama kɔi, ko tara lo ni la Kristo.

¹⁷ Tɛnɛ mɛ mbi ye tɛnɛngɔ lo mɛ: Nzapa na Abrahama agbe ndo ngbangɔ. Ko lo ko ndo kapa ya, ta ni na gbɛ̃ngɔ ngbangɔ ni ma. Aɔ ndo so pɛ kapa ni buru ngbangbo siɔ ndoni sui ta, la lo lu ndia hɛ̃ Ayuda. Ko ta ndia ni alengbi ti hongɔ ngbangɔ mɛ ndo Nzapa na Abrahama agbe ma. Ta ndia ni alengbi nga ti gbɛ̃ngɔ kapa mɛ ndo lo ko hɛ̃ Abrahama ma.

¹⁸ Se adu ya, Nzapa ndohɛ̃ azi ye, na lo mɛ ya, ala ndotɔndɔ ndia ko, ale afa ya, ye mɛ lo ndohɛ azi ko, ta adu na lo ti kapa mɛ lo ko ma. Kanda Nzapa ali ndo nzɔ̃ bɛ hɛ̃ Abrahama na lo ti kapa mɛ ndo lo ko hɛ̃ Abrahama.

¹⁹ Wa Nzapa alu ndo ndia hɛ̃ e Ayuda ya nɛ? Lo lu ndo ndia hɛ̃ e so fangɔ e na aye mɛ ta ndode bɛ lo ma. Ta lo lu ndia ni ya, angbã buai ma, lo lu ndo ndia ni ko so kungɔ na tara Abrahama mɛ ndo lo ko kapa hɛ̃ lo. Adu ti ndo aangelo ndo la Nzapa alu ndia ni hɛ̃ azi, ko zo kɔi alɛkɛ ndo popo tɛ Nzapa na azi.

²⁰ Na se mɛ e hĩnga ko, zo la ndolɛkɛ popo tɛ azi. Kanda na ngoi mɛ ndo Nzapa ako kapa hɛ̃ Abrahama ko, lo nvɛni ndo la lo ko kapa ni. Ta lo ko ndo kapa ni ti ndo wa lɛkɛngɔ popo tɛ lo na azi ma.

Nda mɛ Nzapa alu ndia hɛ azi

²¹ Oko alengbi ya, atɛnɛ ti ndia aɔngbi na kapa tɛ Nzapa? Ipɔ! Se adu ya, ndia mɛ ndo Nzapa alu hɛ̃ azi aso ndo la ko, ale ala ti ndo abɛta azi ka le Nzapa na lege ti ndia.

²² Buku tɛ Nzapa apa ya, siɔ ye ndole gbia ndo azi ti lɛ sese zu. Adu ndo so ya, Nzapa ahɛ̃ anzɔ̃ ye mɛ ndo lo ko kapa ni hɛ̃ azi mɛ aye lo tɛ Yezo Kristo, na lo ti lo yengɔ mɛ ka bɛ la.

²³ Ndo uzu, na ngoi mɛ ta lege azi ya, azi aye lo tɛ Yezo Kristo ma ko, ndia abata ndo e nga ma e awa bɔlɔkɔ, so kungɔ ya, Nzapa afa e na lege ti yengɔ lo tɛ Yezo Kristo.

²⁴ Na lo ni ko, ndia adu ndo nga ma zo mɛ abata e, ngbĩi asi na ngoi mɛ Kristo aga atã e ya, e ye lo tɛ lo, wa Nzapa amu e ka lɛ lo ya, e abɛta azi.

²⁵ Na olo ko, lege azi, e ye lo tɛ Yezo Kristo, ko kwa tɛ ndia ti batangɔ e awɛ.

²⁶ Ĩ zu ĩ du aya Nzapa, na lo mɛ ya, ĩ ye lo tɛ Yezo Kristo, ĩ na Yezo Kristo ĩ ti bo kɔi.

²⁷ Ti biani, ĩ zu mɛ ndo ĩ mu batisimɔ, ya ĩ na Yezo Kristo ĩ ti bo kɔi ko, ĩ mu nga du tɛ lo wɛ.

²⁸ Na lo ni ko, Ayuda na azi mɛ ta Ayuda ma ko, ta ɔngbingɔ na popo tɛ la ma, ta ɔngbingɔ na popo tɛ ambɛ na abɔrɔ ma, ta ɔngbingɔ nga na popo tɛ akɔli na awe ma. Ĩ zu ĩ ti bo kɔi, na lo mɛ ya, ĩ na Yezo Kristo ĩ ti bo kɔi.

²⁹ Oko la ĩ du azi tɛ Yezo Kristo ko, afa ya, ĩ du nga atara Abrahama, ko ĩ na luangɔ ye mɛ Nzapa ako kapa ti hɛ̃ngɔ atara Abrahama.