Galatia 2 - Fana Ngbangɔ 1987

Polo ana ambanga awa pangɔ kwa tɛ Yezo atɛnr tɛnɛ

¹ Aɔ ndo so pɛni buru sui kɔi ndoni siɔ, la mbi e na Barnabasi e ti e gwe ka Yeruzalɛmɛ. Mbi mu nga ndo Tito e na lo e ɔ.

² Mbi nɔ ndo ka Yeruzalɛmɛ, na lo mɛ ya, Nzapa apa ndo hɛ̃ mbi ya, mbi nɔ kai. Ngoi mɛ mbi si kai ko, bo mbi na awa batangɔ azi ti Eklezia ndo la e gbe lingo. Na ngoi ti lingo ni ko, mbi kambisa ndo hɛ̃ la Nzɔ̃ Pa mɛ mbi ndopa hɛ̃ azi mɛ ta Ayuda ma. Ta mbi ye ndo ya, kwa mɛ ndo mbi li, bere omɛ mbi ndoli ati gɛgɛrɛ ma.

³ Tito mɛ mbi na lo e ndofɔnɔ ko, lo zo ti sese ti Grɛsɛ, ko ta awa batangɔ azi ti Eklezia ahɛ̃ ndo nyɔ ya, afa lo ganza ma.

⁴ Ambanga awa nvɛnɛ mɛ apa ya, ani awa Kristo ko, ala li na poroso na li nɔ tɛ e, ala separa ya, ale afa Tito ganza. Awa nvɛnɛ ni ko ali ndo na li nɔ tɛ e nga ma awa ginɔ so bɛmbɛngɔ se mɛ e ti abɔrɔ, na lo mɛ ya, e na Yezo Kristo e ti bo kɔi. Awa nvɛnɛ ni ko asepara bingɔ e ambɛ.

⁵ Kanda ta e bi tɛrɛ e hɛ̃ la bɛ kɔi ma. E li so ya, e bata bɛta lo ti Nzɔ̃ Pa na seni hɛ̃ ĩ.

⁶ Awa Kristo ndohũ awa batangɔ azi ti Eklezia ka lɛ la ya, ala azi ti ndima. Wa bere ala azi ti ndima ee, bere ta ala azi ti ndima ma ee, ge lɛ mbi adu bo gɛgɛrɛ. Ta sanga ma, Nzapa ndohũ tɛ lo azi ka lɛ lo bo kwɛ kɔi. Ko mbi pa ya, ta awa batangɔ azi ti Eklezia ni ko aha mbi na lo mɛ ndɛ̃ na ndo Nzɔ̃ Pa mɛ mbi ndopa ma.

⁷ Kanda ala hũ ya, se ko la Nzapa ahɛ̃ Petro kwa ya, lo pa Nzɔ̃ Pa hɛ̃ Ayuda ko, se mɛ nga Nzapa ahɛ̃ mbi kwa ya, mbi pa Nzɔ̃ Pa hɛ̃ azi mɛ ta Ayuda ma la.

⁸ Ta sanga ma, se ko la Nzapa akpã Petro ya, lo du wa pangɔ kwa tɛ ni hɛ̃ Ayuda ko, se mɛ nga Nzapa akpã mbi ya, mbi du wa pangɔ kwa tɛ ni hɛ̃ azi mɛ ta Ayuda ma la.

⁹ Zaki, na Petro, na Yoanɛ mɛ azi ndomu la nga ma ala agbia tɛ azi ti Eklezia ko, ala hĩnga ya, Nzapa la ahɛ̃ mbi kwa ni ko. Na lo ni ndo la ala gbɔ̃ ti mbi, agbɔ̃ nga ti Barnabasi, abala e so fangɔ ya, e na ani e ti bo kɔi. E na la zu e mangbi ya, mbi e na Barnabasi e nɔ tɛ e, e li kwa ka tɛ azi mɛ ta Ayuda ma, ko ala nɔ tɛ la, ali kwa ka tɛ Ayuda.

¹⁰ Ala hũnda ndo e bo ya, ta bɛ e ali na zangɔ azi ti Eklezia tɛ la mɛ awa yɛlɛ ma. Ko ye mɛ ndo mbi hɛ̃ tɛrɛ mbi so lingɔ ni la.

Polo abela Petro ka kɔdɔrɔ ti Antiɔsɛ

¹¹ Ngoi mɛ Petro aga ka Antiɔsɛ ko, mbi kɛ̃ ndo tɛnɛ hɛ̃ lo na gbɛlɛ azi zu, na lo mɛ ya, ye mɛ ndo lo li ko, adu siɔni.

¹² Ti biani, ndo uzu ko, Petro na awa Kristo mɛ ta Ayuda ma ndotɛ ndo ye ndoni kɔi. Kanda ngoi mɛ Zaki ĩ to ambanga azi ka Antiɔsɛ, Petro ĩ hũ so ko, lo lo ka popo tɛ awa Kristo mɛ ta Ayuda ma lo si. Lo kɛ̃ nga ndo tɛngɔ ye ndoni kɔi na la, na lo mɛ ya, lo kpɛ ndo mbɛtɔ tɛ azi mɛ aye ya, ale afa awa Kristo zu ganza.

¹³ Ambanga Ayuda mɛ awa Kristo ato nda lingɔ nga aye na poroso nga ma Petro. Barnabasi nvɛni aye nga ndo, amu se li ye ti poroso tɛ la.

¹⁴ Ngoi mɛ mbi hũ ya, ala dɔ lege ti bɛta lo ti Nzɔ̃ Pa azia, ko ta ala ndoli nga ni na seni ma ko, mbi pa hɛ̃ Petro na gbɛlɛ azi zu ya: “Mɔ Petro, mɔ du wa Yuda, ko ta mɔ ndodu ge Antiɔsɛ nga ma se tɛ awa Yuda ma. Mɔ ndodu nga ma se tɛ azi mɛ ta Ayuda ma. Ko nda mɛ mɔ ndogbɔ̃ la na nguru ya, ala du nga ma se tɛ Ayuda nɛ?”

Nzapa ndoso azi na lo mɛ ya ala ye lo tɛ Yezo

¹⁵ E du tɛ e abɛta Ayuda nvɛni, ta e du azi ti sese mɛ ndɛ̃ ma. Ala la ayu ndia tɛ Mɔizɛ.

¹⁶ E hĩnga ya, Nzapa ndomu zo ka lɛ lo ya, lo bɛta zo, na lo mɛ ya, zo ni ko aye lo tɛ Yezo Kristo. Kanda ta lo ndomu zo ka lɛ lo ya, lo bɛta zo, na lo mɛ ya, zo ni ko atɔndɔ ndia tɛ Mɔizɛ ma. E ye nga lo tɛ Yezo Kristo, ya Nzapa amu e ka lɛ lo ya, e abɛta azi. Wa ta adu na lo mɛ ya, e tɔndɔ ndia ma. Ta sanga ma, ta Nzapa ndomu zo ka lɛ lo ya, lo bɛta zo, na lo mɛ ya, zo ni ko atɔndɔ ndia ma.

¹⁷ E Ayuda e ndogi kɔdɛ ya, e ti abɛta azi ka lɛ Nzapa, na lo mɛ ya, e na Yezo Kristo e ti bo kɔi. Wa na ngoi ko la e ndogi kɔdɛ ya, e ti abɛta azi, ko se e yu ndia tɛ Mɔizɛ, nga ma se tɛ azi mɛ ta Ayuda ma ko, afa ya, Yezo la afa e na lege ti lingɔ siɔ ye? Ipɔ, ta seni la ma!

¹⁸ Se zo azia tɔndɔngɔ ndia tɛ Mɔizɛ, so pɛni, se lo ti diri lo tɔndɔ ndia ni ko, afa ya, lo mu ndia ni ka lɛ lo ngbondoni, ko afa nga ya, lo li siɔ ye ka lɛ Nzapa.

¹⁹ Na ndo tɛnɛ ko ti ndia ko, mbi ti tɛ mbi nga ma zo mɛ akpi wɛ. Ta ndia ni ade na nguru ndo mbi ma. Ndia la aho mbi. Ko adu nga so ya, mbi du lɛ mbi ngɛ̃ so gondangɔ Nzapa. Kwá mɛ ndo Yezo akpi ka ndo krusi ko, adu nga ma mbi na lo e kpi ndo ndoni kɔi, wadila

²⁰ ta mbi ti du le mbi ngɛ̃ ma. Kanda dungɔ le ngɛ̃ mɛ mbi da ko, Kristo la ndodu ni na ya tɛrɛ mbi. Du mɛ mbi ndodu na olo so lɛ sese ko, mbi ndodu ni na kpãngɔ bɛ mbi na ndo Nyi Nzapa mɛ aye mbi, aka nga tɛrɛ lo so mbi.

²¹ Ta mbi kɛ̃ nzɔ̃ bɛ mɛ Nzapa ali hɛ̃ mbi ma. Se adu ya Nzapa ndomu zo ka lɛ lo ya, lo bɛta zo, na lo mɛ ya, zo ni ko ndotɔndɔ ndia ko, ale afa ya, kwa mɛ ndo Yezo Kristo akpi adu gɛgɛrɛ.