Galatia 1 - Fana Ngbangɔ 1987

Balangɔ

^1-2 Mbi Polo mɛ Nzapa akpa mbi wa pangɔ kwa tɛ Yezo Kristo, na ayata e awa Kristo zu mɛ ge la e bombi, e to mbɛti olo hɛ̃ ĩ azi ti Eklezia ndɛ̃ ndɛ̃ ndɛ̃ mɛ ka sese ti Galatia. E bala ĩ. Ta zo la akpã mbi Polo wa pangɔ kwa tɛ Yezo Kristo ma, ta zo nga la ali ya, mbi ti wa pangɔ kwa tɛ Yezo Kristo ma. Kanda adu Yezo Kristo, na To lo Nzapa mɛ ndo aso lo na pɛ kwá la akpã mbi.

³ To e Nzapa, na Gbia tɛ e Yezo Kristo ali bɛ nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

⁴ Kristo aka ndo tɛrɛ lo nvɛni ya, ni so e na ya asiɔ ye tɛ e, wadila ni tɔ̃ e na ya asiɔ ye ti lɛ sese olo. Lo li ndo so nga ma se mɛ bɛ To e Nzapa aye.

⁵ É gonda bɛ Nzapa buru na buru ma ke! Seni la.

Nzɔ̃ Pa adu bo ngengereni kɔi

⁶ Nzapa aili ndo ĩ na lo ti nzɔ̃ bɛ mɛ Yezo Kristo ali hɛ̃ ĩ, ko mbi bema sĩ na lo ko la, ĩ dɔ lege tɛ lo bo so hiɔ ĩ zia, ko ĩ ti ĩ ye lo ti Nzɔ̃ Pa mɛ ndɛ̃.

⁷ Ti biani ko, ta Nzɔ̃ Pa mɛ ndɛ̃ da ma. Ko ambanga azi ndogia ya li ĩ, ala ndoye gbinyangɔ Nzɔ̃ Pa tɛ Yezo Kristo.

⁸ Wa se zo apa hɛ̃ ĩ Nzɔ̃ Pa mɛ aɔngbi na Nzɔ̃ Pa mɛ ndo e pa hɛ̃ ĩ, ko bɛ se adu e, bere, angelo mɛ alo ka yayu ko, Nzapa azonga bɛ lo ma ke!

⁹ E pa ndo tɛnɛ kɔi hɛ̃ ĩ we, ko mbi diri ndo ni na olo mɛ. Tɛnɛ ni lo mɛ: se zo apa hɛ̃. Ĩ Nzɔ̃ Pa mɛ aɔngbi na omɛ ndo e pa hɛ̃ ĩ ko, Nzapa azonga bɛ lo ma ke!

¹⁰ Oko afa ya, mbi ndogi ya, azi agonda mbi? Ipɔ, mbi ndosepara tɛ mbi ya, adu bo Nzapa wa agonda mbi. Ko mbi ndogi nga kɔdɛ ya, mbi li ye mɛ ndode bɛ azi? Ipɔ. Se adu ya, mbi ti ndogi kɔdɛ ya, mbi li ye mɛ ndode bɛ azi ko, ale ta mbi du wa kwa tɛ Yezo Kristo ma.

Se mɛ Polo ati wa pangɔ kwa tɛ Yezo Kristo

¹¹ Aya bua, mbi pa hɛ̃ ĩ ya, Nzɔ̃ Pa mɛ mbi ndopa ko, ta adu tɛnɛ mɛ zo ako na bɛ lo ma.

¹² Ta mbi ma ni ka nyɔ zo ma, ta zo nga la aha na mbi ma. Yezo Kristo la afa na mbi.

¹³ Ĩ ma pa ti sé du tɛ mbi, na ngoi mɛ ndo mbi ndotɔndɔ na ló Nzapa tɛ e Ayuda. Ĩ hĩnga se mɛ ndo mbi ndohɛ̃ na kpengba pɛnɔ hɛ̃ azi ti Eklezia tɛ Nzapa. Ĩ hĩnga nga se mɛ ndo mbi ndoli kpengbani ya, mbi gundu ya la.

¹⁴ Afɔ̃ mbi Ayuda ma wo ma mɛ ndo buru tɛ mbi na tɛ la kɔi ko, mbi ɔ ndo la na tɔndɔngɔ ndia ti ló Nzapa tɛ e Ayuda. Mbi ndohɛ̃ ndo tɛrɛ mbi sĩ so tɔndɔngɔ sé du tɛ akotara e.

¹⁵ Kanda na ngoi mɛ ndo mbi de ka ya ta mbi ko, Nzapa apia asara mbi na nzɔ̃ bɛ tɛ lo akpa. Lo ili nga mbi ya, mbi li kwa hɛ̃ ni.

¹⁶ Kanda ĩ ti na ngoi mɛ bɛ lo aye ko, lo fa mbi na Nyi lo ya, mbi pa Nzɔ̃ Pa tɛ lo hɛ̃ azi mɛ ta Ayuda ma. Ko ta mbi nɔ ka tɛ zo ya, mbi hũnda zo na ndo na ló ni ma.

¹⁷ Ta mbi nɔ nga ndo ka Yeruzalɛmɛ ya, mbi ba azi mɛ ati awa pangɔ kwa tɛ Yezo uzu tɛ mbi, wa e na la e tɛnɛ tɛnɛ ma. Kanda mbi nɔ ndo bo ka sese ti Arabia. So pɛni, mbi diri ka kɔdɔrɔ ti Damasi.

¹⁸ Aɔ so pɛni buru ta la mbi gwe ka Yeruzalɛmɛ ya, mbi na Petro, e hĩngangbi. Mbi la ka tɛ lo pɔsɔ sɛ.

¹⁹ Ta mbi hũ mbanga wa pangɔ kwa tɛ Yezo kɔi na lɛ mbi ma, kanda bo Zaki mɛ nyita Gbia Yezo la mbi hũ lo.

²⁰ Tɛnɛ mɛ mbi su hɛ̃ ĩ ko, adu biani. Na lɛ Nzapa ko, mbi pa hɛ̃ ĩ ya, ta mbi pa nvɛnɛ ma.

²¹ So pɛni, mbi gwe ka sese ti Siria na ti Silisia.

²² Ko na ya bi ni ko zu ko, ta azi ti Eklezia tɛ Yezo Kristo mɛ so sese ti Yudea ahĩnga mbi ma.

²³ Ala ma ndo bo tɛnɛ mɛ azi ndotɛnɛ na ili mbi ya: “Zo mɛ ndo ndohɛ̃ e pɛnɔ, ndoli nga kpengbani ya, ni kpɔ azi mɛ aye lo tɛ Yezo ko, na olo ko, lo ti wa pangɔ Nzɔ̃ Pa tɛ Yezo.”

²⁴ Ko ala ndogonda ndo Nzapa na lo tɛ mbi.