Filipɛ 4 - Fana Ngbangɔ 1987

Ndangba wangɔ

¹ Aya bua ti kpɔ̃ bɛ mbi, wa ĩ ba se mɛ ale ĩ ndongbã bo na yengɔ lo tɛ Gbia la. Akwa mbi, mbi ndosepara ma ya ma ya, mbi diri mbi ga mbi ba ĩ. Ĩ ndohɛ̃ mbi dengɔ bɛ ma ya ma, ko na lo tɛ ĩ la mbi ndolɛndɛrɛ mbana gɛrɛ mɛ Nzapa na hɛ̃ngɔ mbi.

² Mɔ Evodia nga na mɔ Sɛntise, mbi gbɔ̃ gɛrɛ ĩ ya, ĩ du na mangbingɔ na popo tɛ ĩ, nga ma se tɛ awe mɛ ayata, ta sanga ma, ĩ du azi tɛ Gbia.

³ Mbɛni nga la mɔ mɛ bɛta kwa mbi, mɔ mɛ ndo e na mɔ e ndoli kwa ndoni kɔi, mbi hũnda mɔ ya, mɔ za Evodia na Sɛntisɛ. Ta sanga ma, mbi na la, na Klema, nga na afɔ̃ mbi mɛ ndɛ̃ zu mɛ ndo e na la e ndoli kwa tɛ Nzapa ndoni kɔi, e ndoli ndo kpengbani, la e ndopa Nzɔ̃ Pa tɛ Yezo Kristo hɛ̃ azi. Ko Nzapa asuru ndo ili azi mɛ e na la e ndoli kwa tɛ lo, ka ya buku mɛ andosuru na ili azi mɛ alua du ti kaka.

⁴ Ĩ saba ngoi zu, na lo mɛ ya, ĩ azi tɛ Gbia. Mbi ti mbi pa hɛ̃ ĩ fani mɛ ndɛ̃ ya, í saba!

⁵ Ĩ fa hɛ̃ azi zu ya, ĩ du adede azi. Angbã yakere Gbia aga.

⁶ Ta be ĩ angbã ngbũ na lo ye kɔi ma, kanda na ya alo zu mɛ asi na ĩ ko, ĩ hũnda Nzapa ya, lo hɛ̃ ĩ ye mɛ ĩ na gwɛ̃ ni, ko ĩ hũnda lo na ya sambela tɛ ĩ, ĩ hũnda nga lo na hɛ̃ngɔ lo sia kɔli.

⁷ Se ĩ li nga so, wa Nzapa ali ya, bɛ ĩ adu pii, ko bɛ pii ni aɔ kɔdɛ tɛ azi. Bɛ pii ni na batangɔ bɛ ĩ nga na dangɔ bɛ tɛ ĩ ya, ta ye kɔi ali ya, bɛ ĩ atitiri ma, na lo mɛ ya, ĩ azi tɛ Yezo Kristo.

⁸ Aya bua, mbi ye kɔngɔ nda tɛnɛ tɛ mbi so mɛ: ĩ da bɛ ĩ na anzɔ̃ ye mɛ azi alengbi ti gondangɔ ni. Anzɔ̃ ye ni lo mɛ: abɛta ye zu mɛ e ndotɔndɔ, aye mɛ mbiri mbiri, aye mɛ vuruni, aye mɛ bɛ azi ndode na lo ni, nga na aye ti ndima.

⁹ Aye mɛ ndo mbi ha na ĩ la ĩ ye lo ni ko, ĩ li ni. Atɛnɛ mɛ ndo ĩ ma na nyɔ mbi, na aye mɛ ndo ĩ hũ, mbi li ko, ĩ li nga ni, wadila Nzapa mɛ ndoli ya, bɛ e adu pii, adu ndoni kɔi na ĩ.

Polo ahɛ̃ sia kɔli hɛ awa Kristo ti Filipɛ

¹⁰ Bɛ mbi ndode ma ya ma, na lo mɛ ya, ĩ ti da bɛ ĩ na mbi, la ĩ to ye hɛ̃ mbi fani mɛ ndɛ̃. Ta mbi separa pangɔ ya, bɛ ĩ ali na mbi ma.

¹¹ Ko ta mbi pa so, na lo mɛ ya, mbi zanga ye ma. Tɛ mbi ko, mbi hĩnga ye mɛ mbi lengbi ti lingɔ, ya mbi du na dengɔ bɛ na ya alo zu mɛ ndosi na mbi.

¹² Se adu na ngoi mɛ mbi na yɛlɛ, bere mbi na nwa ko, mbi ndodu bo nzɔ̃ni. Bɛ se mbi du na ye ti tɛngɔ gba, bere gwɛ̃ agbɔ̃ mbi, bɛ se mbi du na ye aɔ nyɔ kpɔ̃ ni, bere ta mbi na ni gba ma ko, mbi hĩnga ye mɛ mbi lengbi ti lingɔ, ya mbi du na dengɔ bɛ na ndo kwɛ, nga na ya alo zu mɛ asi na mbi.

¹³ Mbi lengbi ti gbengɔ bɛ mbi na lingɔ aye ko zu, na lo nguru tɛ Yezo Kristo.

¹⁴ Ko ĩ li ndo nzɔ̃ni la ĩ za mbi na ya pɛnɔ mɛ mbi hũ.

¹⁵ Ĩ awa Filipɛ, ngoi mɛ ndo mbi to nda pangɔ Nzɔ̃ Pa ka sese ti Masedoanɛ, la mbi lo kai mbi ɔ ko, mbi hĩnga nzɔ̃ni ya, bo azi ti Eklezia tɛ ĩ kɔi ndo la aza mbi, bo ala ndo nga la ato ye hɛ̃ mbi. Na lo ni la Nzapa asunu ĩ.

¹⁶ Ngoi mɛ ndo mbi ga ka kɔdɔrɔ ti Tɛsalɔnikɛ, ye mɛ ndo mbi na gwɛ̃ ni ko, ĩ to ndo ni hɛ̃ mbi fani sɛ.

¹⁷ Ko ta adu ya, mbi ndogi bo ya, ĩ hɛ̃ mbi ye ma, kanda mbi ndosepara ya, Nzapa asunu ĩ na lo ye mɛ ĩ ndoto hɛ̃ mbi.

¹⁸ Aye zu mɛ ndo ĩ to hɛ̃ mbi na Epafroditɛ ko, mbi lua ni na olo, ko aye ni aɔ maka. Aye zu mɛ ndo mbi na gwɛ̃ ni ko, alengbi zu. Aye ko ndo ĩ to ko, adu nga ma aye mɛ na nzɔ̃ finya, aye mɛ alu na Nzapa, la lo ye ni, ko bɛ lo ndode na lo ni.

¹⁹ Nzapa tɛ e na nwa ma wo ma, lo na hɛ̃ngɔ ĩ ye zu mɛ ĩ na gwɛ̃ ni, lo na hɛ̃ngɔ ni ti ndo Yezo Kristo.

²⁰ E gonda bɛ To e Nzapa buru na buru ma ke!

Ndangba balangɔ

²¹ Ĩ bala hɛ̃ e azi tɛ Nzapa zu na ili Yezo Kristo. Awa Kristo mɛ e na la ge abala nga ĩ.

²² Azi tɛ Nzapa zu mɛ ge abala ĩ. Kanda azi mɛ abala ĩ sĩ la ala mɛ ndodu ka ya gbágbá tɛ kota gbia ti Roma.

²³ Gbia Yezo Kristo ali bɛ nzɔ̃ bɛ hɛ̃ ĩ zu ma ke!