Filipɛ 3 - Fana Ngbangɔ 1987

Se ti tingɔ bɛta zo ka lɛ Nzapa

¹ Aya bua, na olo ko, ĩ saba, na lo mɛ ya, ĩ azi tɛ Gbia Yezo. Ta mbi ndonzɛ̃ na sungɔ tɛnɛ mɛ ndo mbi su hɛ̃ ĩ uzu ma, ko adu nzɔ̃ni na lo tɛ ĩ.

² Ĩ du na kpengba lɛ na lo tɛ azi mɛ ndoli siɔ ye, ala nga ma ambo nyingɔ, ala nga azi mɛ ndoda bɛ la bo na fangɔ afɔ̃ la na ganza!

³ E la afa e na bɛta ganza, kanda ta ala ma. Ta sanga ma, e ndovɔrɔ Nzapa na lo nguru tɛ Tɔrɔ Santo tɛ lo, e ndosaba nga na lo tɛ Yezo Kristo, ko ta e ndokpã bɛ e na ndo se li ye tɛ azi ma.

⁴ Ko se adu ya, se li ye tɛ azi adu ngbondo ye ko, ale mbi lengbi nga ti kpãngɔ bɛ mbi na ndo ni. Se zo ada bɛ lo ya, nga ma la ni ndokpã bɛ ni na ndo se li ye tɛ azi ko, ni bɛta zo, ko mbi hĩnga tɛ mbi ya, mbi bɛta zo mbi ɔ lo.

⁵ Ĩ ba ambanga ye mɛ afa ya, mbi bɛta zo lo mɛ: awa dúngɔ mbi adu Ayuda, alengbi ya, mbi wa Izrayɛlɛ, mbi ale tɛ Benzami, akotara mbi ndo abɛta awa Izrayɛlɛ. Adu ndo mbi, ĩ la so pɛni pɔsɔ kɔi ko, afa mbi ganza. Adu lo ti ndia tɛ e Ayuda ko, mbi ndo na li nɔ tɛ Afarizeo.

⁶ Mbi ndotɔndɔ ndo se li ye tɛ e na seni, ko na lo ni ndo la mbi ndohɛ̃ pɛnɔ hɛ̃ awa Kristo. Se adu ya, Nzapa ndomu zo ka lɛ lo ya, lo bɛta zo na lo ti tɔndɔngɔ ndia na seni ko, ta zo alengbi ndo ti belangɔ mbi ma, na lo mɛ ya, mbi ndotɔndɔ ndia na seni.

⁷ Mbi ndomu ndo aye ni ko ge lɛ mbi ngbondoni, kanda na olo ko, mbi ndomu ni gɛgɛrɛ na lo tɛ Yezo Kristo.

⁸ Ko ta adu bo aye ni ko la mbi ndomu ni nga ma ye mɛ gɛgɛrɛ ma, kanda aye zu mɛ mbi na ni la mbi ndomu ni nga ma ye mɛ gɛgɛrɛ. Ta sanga ma, se mbi hĩnga Gbia tɛ mbi Yezo Kristo ko, oko aɔ aye mɛ ndɛ̃ zu. Na lo tɛ lo ko, mbi kɛ̃ aye mɛ ndɛ̃ zu. Mbi ndomu aye ni ko nga ma ambumbusɛ ye ya, mbi hĩnga Yezo Kristo nzɔ̃ni,

⁹ ko du tɛ mbi na tɛ lo ati nga bo kɔi. Ta mbi ti dɛ mbi mu tɛrɛ mbi ya, mbi bɛta zo ka lɛ Nzapa, na lo mɛ ya, mbi ndotɔndɔ ndia tɛ e Ayuda ma. Kanda adu na lo mɛ ya, mbi ye lo tɛ Yezo Kristo, la mbi ti bɛta zo ka lɛ Nzapa. Nzapa la amu mbi ya, mbi bɛta zo, na lo mɛ ya, mbi ye lo tɛ Yezo.

¹⁰ Ye mɛ mbi ye bo la, ale mbi hĩnga Yezo Kristo, mbi hĩnga nga nguru mɛ ndo lo so na ni na pɛ kwa, ale mbi hũ pɛnɔ nga ma se tɛ lo, mbi kpi nga kwa nga ma se tɛ lo.

¹¹ Ko mbi ndokpã bɛ mbi ya, lo so gbanda mbi na pɛ kwá.

Mbana gɛrɛ e ndoku e ka yayu

¹² Ta mbi ndomu tɛrɛ mbi ya, mbana gɛrɛ mɛ mbi ndolɛndɛrɛ ko, mbi pia mbi lua ni wɛ ma, bere mbi ti nga bɛta nzɔ̃ zo wɛ ma. Kanda mbi ndoli kpengbani ya, mbi gwe uzu uzu, wadila mbi lua mbana gɛrɛ ni ko, ta sanga ma, Yezo Kristo aili ndo mbi ya, mbi ti zo tɛ ni.

¹³ Aya bua, mbi da bɛ mbi ya, ta mbi de mbi lua mbana gɛrɛ ni ko ma. Kanda ye kɔi mɛ mbi ndoli lo mɛ: bɛ mbi ali na aye mɛ ndo aɔ wɛ, ko mbi ndoli kpengbani ya, mbi lua mbana gɛrɛ mɛ ade ka gbɛlɛ mbi.

¹⁴ La mbi ndokpe paka piko ya, mbi si ka nda ni, mbi lua mbana gɛrɛ mɛ Nzapa ndoili e ya, e ga e lua ka yayu. Lo ndoili e ti ndo Yezo Kristo.

¹⁵ E azi zu ko la lɛ e azi na lege tɛ Nzapa ko, ale e du bo na se dangɔ bɛ ni ko. Kanda se ambanga azi na popo tɛ ĩ adu na dangɔ bɛ mɛ ndɛ̃ ko, Nzapa na zingɔ kɔdɛ tɛ la yango na ndo ni.

¹⁶ Abɛ nga sia ko, lege tɛ Nzapa mɛ ndo e ndoɔ ti da, ngbĩi e si na ni na olo ko, é ngbã bo na ɔngɔ ti da.

¹⁷ Aya bua, ale ĩ zu ĩ mu nzɔ̃ lɛ lo tɛ mbi. E fa ĩ ndo na nzɔ̃ lɛ lo, wa í ba sé du tɛ azi mɛ amu nzɔ̃ lɛ lo tɛ e.

¹⁸ Tɛnɛ mɛ mbi na tɛnɛngɔ hɛ̃ ĩ ko, mbi ndopa ndo ni hɛ̃ ĩ uzu fani sĩni, ko na olo ko, mbi na diringɔ pangɔ ni hɛ̃ ĩ na ngulɛ lɛ mbi. Tɛnɛ ni lo mɛ: du tɛ azi gba afa ya, ala kɛ̃ Yezo Kristo mɛ ndo akpi ka ndo krusi.

¹⁹ Gbanda ngbĩi ko, Nzapa na sanga la ka lifɛlo, ta sanga ma, ala ndohĩnga bo gwe ti ya la kɔi, ko ala ndomu ni nga ma nzapa tɛ la. Ala ndogonda tɛrɛ la na lo ye mɛ alengbi ti hɛ̃ngɔ la kamɛnɛ, ko ala ndokpã bɛ la bo na ndo aye ti sese olo.

²⁰ Kanda e du tɛ e azi ti Kɔdɔrɔ Gbia tɛ Nzapa, ko e ndoku na bɛ e fufu ya, Gbia Yezo Kristo, Wa songɔ e alo kai aga.

²¹ Ngoi mɛ gbanda lo ga ko, lo gbinyangbi gbanda tɛrɛ e mɛ e na ni ge lɛ sese, ati nga ma tɛrɛ lo ti ndima. Lo li gbanda nga so na nguru mɛ lo na ni ti lɛngɔ gbia na ndo aye zu.