Filipɛ 2 - Fana Ngbangɔ 1987

Ale ĩ mu nzɔ̃ Iɛ lo tɛ Yezo Kristo

¹ Ĩ ti azi tɛ Yezo Kristo, nda mɛ ĩ lua kpengba bɛ la. Lo ndoye ĩ, nda mɛ lo ndosa nguru bɛ ĩ la. Ĩ na Tɔrɔ Santo ĩ ndodu ndoni kɔi, ĩ ndoyengbi, ĩ ndoma nga vundu tɛ afɔ̃ ĩ awa Kristo.

² Nga ma la adu so ko, ale ĩ ndoyengbi, ĩ du bɛ ĩ kɔi, nyɔ ĩ ase nga kɔi. Se ĩ li so, wadila dengɔ bɛ tɛ mbi ati kotani.

³ Na ya kwa mɛ ĩ ndoli ko, ale ta ĩ kpã bɛ ĩ ya, ĩ ɔ afɔ̃ ĩ awa Kristo, bere ĩ du na yakɛ ma. Kanda ale ĩ bi tɛrɛ ĩ hɛ̃ afɔ̃ ĩ, ko ale zo kɔi kɔi amu afɔ̃ lo nga ma azi mɛ aɔ lo nvɛni.

⁴ Ale ta zo kɔi kɔi ali ye mɛ nzɔ̃ni bo na lo tɛ lo nvɛni ma, kanda ale lo li nga ye mɛ nzɔ̃ni na lo tɛ afɔ̃ lo.

⁵ Na popo tɛ ĩ ko, ale bɛ ĩ adu nga ma bɛ Yezo Kristo. Ĩ ba se bɛ lo ndo lo mɛ:

⁶ Abɛ du tɛ lo na tɛ Nzapa ndo bo kɔi ko, Ta lo ndoha ndo tɛrɛ lo na Nzapa ya, Ni na lo ani lengbi ma.

⁷ Kanda lo dɔ ndo ndima tɛ lo, Lo zia na se bɛ lo nvɛni, lo ti nga ma mbɛ. Lo ti ndo zo nvɛni, lo mu ndo tɛrɛ zo.

⁸ Lo ngara ndo tɛrɛ lo, lo ma ndo nyɔ Nzapa, Ngbĩi lo kpi ka ndo krusi.

⁹ Nda mɛ ndo Nzapa ahɛ̃ lo kota ndima la. Nzapa ahɛ̃ lo ili, ko ili ni aɔ aili kwɛ zu.

¹⁰ Nzapa ali ndo so ya, wa gbanda ko, Aangelo, na azi, na atɔrɔ, Ala zu mɛ ka yayu, ge lɛ sese, nga ka gbɛ sese, Ama ili Yezo, ko ala zu aga akuku gbɛlɛ lo, avɔrɔ lo.

¹¹ Wa gbanda ko, ala zu apa na nyɔ la ya, Yezo Kristo lo Gbia. Na lo ni gbanda ko, To lo Nzapa alua ndima.

Kwa tɛ awa Kristo

¹² Akwa mbi ti kpɔ̃ bɛ mbi, ngoi mɛ ndo mbi dɛ ka tɛ ĩ ko, ĩ ndoma ndo nyɔ mbi ngoi zu. Nga ma ta mbi ka tɔ̃nda ĩ na olo mɛ ma ko, adu nzɔ̃ni buai ya, ĩ ti ma nga nyɔ mbi nga ma se ti uzu. Ĩ mu lege ti songɔ kwá, ko ale ĩ li kwa hɛ̃ Nzapa na mbɛtɔ,

¹³ ta sanga ma, Nzapa ndoli kwa ka ya bɛ ĩ ngoi zu ya, ĩ ye aye mɛ bɛ ni ndode na lo ni, ko ĩ li nga aye ni ko.

¹⁴ Na ya kwa tɛ ĩ zu ko, ta ĩ dema tɛrɛ ĩ, bere ĩ pa pa na lo ni ma.

¹⁵ Se ĩ li nga so, wadila na popo tɛ awa nvɛnɛ na asiɔ azi ti le sese olo ko, bɛ ĩ adu vuruni pa pa pa, ĩ ti nga abɛta aya Nzapa, ko ta Nzapa abela ĩ na lo ye kɔi ma. Ale ĩ ndodu na popo tɛ la nga ma atongolo mɛ ndosũ ka le ndozu.

¹⁶ Ko ale du tɛ ĩ adu nga so, wa ĩ pa hɛ̃ la tɛnɛ mɛ ndohɛ̃ azi bɛta du. Se ĩ li nga so, wa ada gbanda na la ko Yezo Kristo adiri aga ko, mbi saba gbɛlɛ lo kela kela na lo tɛ ĩ. Ta sanga ma, ye ko ĩ li ko, afa ya, ta kpengba kwa mɛ ndo mbi li adu gɛgɛrɛ ma.

¹⁷ Yengɔ lo tɛ Yezo Kristo mɛ ka bɛ ĩ adu nga ma ye mɛ ĩ lu na Nzapa. Bere se aho mbi ko, mɛnɛ tɛrɛ mbi mɛ na sangɔ, na dungɔ nga ma ye mɛ mbi lu na Nzapa na ndo ye mɛ ĩ lu nga na lo. Se adu so ko, bɛ mbi na dengɔ na lo ni, ko mbi nga na kpãngɔ ĩ na ya dengɔ bɛ tɛ mbi.

¹⁸ Se mɛ nga ale bɛ ĩ ndode, ko ĩ kpa nga mbi na ya dengɔ bɛ tɛ ĩ la.

Timɔte na Epafroditɛ

¹⁹ Mbi ndolɛnderɛ ya, se Gbia Yezo aye, na pɛ nyi ngoi ko, mbi to Timɔte ka tɛ ĩ. Wa se lo diri lo ga, lo pa pa tɛ ĩ hɛ̃ mbi, wadila nguru agbɔ̃ mbi nvɛni.

²⁰ Ge ko, zo mɛ ya, bɛ lo ada na ĩ, bere bɛ lo asɔ so ĩ ngĩi ko, ta zo ni dazu ma, wenge bo Timɔte kɔi.

²¹ Azi mɛ ndɛ̃ zu ndoli ye mɛ nzɔ̃ni bo na lo tɛ la nvɛni, kanda ta ala ndoli ye mɛ nzɔ̃ni na lo tɛ Yezo Kristo ma.

²² Ĩ nvɛni ĩ hĩnga sé nzɔ̃ du tɛ Timɔte. E na lo e li ndo kwa ti pangɔ Nzɔ̃ Pa tɛ Yezo Kristo ndoni kɔi. Lo za ndo mbi na ya kwa ni ko, nga ma se mɛ nyingambi ndoza na to lo.

²³ Mbi ndolɛndɛrɛ ya, ngoi mɛ gbanda mbi hĩnga ye mɛ na singɔ na mbi, wa mbi to lo hiɔ ka tɛ ĩ.

²⁴ Mbi hĩnga biani ya, se Gbia Yezo aye ko, angbã yakere, ko mbi nvɛni mbi ga so bangɔ ĩ.

²⁵ Nyita e Epafroditɛ mɛ ndo ĩ to lo ge tɛ mbi na aye mɛ ndo mbi zanga ko, e na lo e li ndo kwa ndoni kɔi, e na lo e tiri ndo nga to ti pangɔ Nzɔ̃ Pa tɛ Yezo Kristo ndoni kɔi. Ko mbi hũ ge lɛ mbi nzɔ̃ni ya, mbi diri mbi to lo ka tɛ ĩ.

²⁶ Lo ndosepara ma ya ma ya, ni ga ni ba ĩ zu. Ngoi mɛ ndo lo ma ya, ĩ ma pa ti nga tɛ ni ko, vundu agbɔ̃ ndo lo sĩ.

²⁷ Tɛrɛ lo asɔ ndo, ko angbã ndo yakere lo kpi. Kanda Nzapa ama ndo vundu tɛ lo. Ta Nzapa ama ndo bo vundu tɛ lo kɔi ma, kanda lo ma ndo nga vundu tɛ mbi. La lo sara Epafroditɛ ya, ta kota vundu mɛ ndɛ̃ ti gbɔ̃ mbi ma.

²⁸ Na lo ni la mbi li hiɔ mbi to lo ka tɛ ĩ ya, se ĩ hũ lo ko, bɛ ĩ ati de, wadila bɛ mbi azu.

²⁹ Wa na ngoi mɛ gbanda lo si kai ko, í yamba lo na dengɔ bɛ, na lo mɛ ya, lo nga zo tɛ Gbia Yezo. Ale ĩ tɔndɔ gi tɛrɛ azi mɛ nga ma lo,

³⁰ ta sanga ma, angba ndo yakere lo kpi na lo kwa tɛ Yezo Kristo. Kwá alu ndo lo, na ngoi mɛ ndo lo ga so hɛ̃ngɔ mbi tisa mɛ ndo ta ĩ nvɛni ĩ lengbi ti gangɔ na ni ma.