Filipɛ 1 - Fana Ngbangɔ 1987

Balangɔ

¹ Mbi Polo na Timɔte mɛ e awa kwa tɛ Yezo Kristo la e to mbɛti olo hɛ̃ ĩ azi tɛ Nzapa zu mɛ ĩ ye lo tɛ Yezo Kristo, ĩ mɛ ĩ ndodu ka kɔdɔrɔ ti Eilipɛ. E to nga mbɛti ni hɛ̃ ĩ awa batangɔ Eklezia, na ĩ adiakrɛ. E bala ĩ.

² To e Nzapa, na Gbia Yezo Kristo ali bɛ nzɔ̃ bɛ hɛ̃ ĩ, ala li bɛ nga ya, bɛ ĩ adu pii ma ke!

Polo asambela Nzapa na lo tɛ awa Kristo ti Filipɛ

³ Ngoi zu mɛ mbi ndoda bɛ mbi na ĩ ko, mbi ndohɛ̃ sia kɔli hɛ̃ Nzapa na lo tɛ ĩ zu.

⁴ Ngoi zu mɛ mbi ndosambela Nzapa na lo tɛ ĩ ko, mbi ndosambela lo na dengɔ bɛ.

⁵ Mbi ndohɛ̃ sia kɔli hɛ̃ Nzapa, na lo mɛ ya, ato na lá ko ndo ĩ ma na Nzɔ̃ Pa tɛ Yezo Kristo, ngbĩi asi na lá olo ko, ĩ za ndo mbi na pangɔ Nzɔ̃ Pa ni hɛ̃ azi.

⁶ Mbi hĩnga biani ya, Nzapa mɛ ato nda lingɔ nzɔ̃ kwa olo na ya bɛ ĩ ko, ta lo na ziangɔ ni ma. Kanda lo na lingɔ ni ngbĩi nga ka lá ko gbanda Yezo Kristo adiri aga, ko kwa ni awɛ.

⁷ Adu na seni ya, mbi da bɛ mbi na ĩ zu nga so, na lo mɛ ya, mbi ndoye ĩ sĩ nvɛni. Ta sanga ma, Nzapa ali nga hɛ̃ ĩ zu nzɔ̃ bɛ mɛ ndo lo li hɛ̃ mbi. Lo li ndo ni na ngoi mɛ ndo mbi tɔndɔ na nda lo ti Nzɔ̃ Pa ka gbɛlɛ awa fangɔ ngbanga. Na ngoi ni ndo ko, mbi wa ndo nga la ya, ala ye lo ti Nzɔ̃ Pa ni na bɛ la kɔi. Ko lo li nga nzɔ̃ bɛ ni na ngoi olo mɛ mbi ge ya bɔlɔkɔ.

⁸ Se mbi pa ya, mbi ye ĩ zu ko, Nzapa ahĩnga ya, adu bɛta tɛnɛ. Ko mbi ndoye ĩ nga ma se mɛ Yezo Kristo ndoye na ĩ.

⁹ Ĩ ma sambela mɛ mbi ndosambela na lo tɛ ĩ lo mɛ: mbi ndohũnda Nzapa ya, ale ĩ ti ndoyengbi aɔ ndo ti uzu. Se ĩ li nga so ko, ĩ hĩnga bɛta lo tɛ lo. Ko se ĩ hũ anzɔ̃ ye na asiɔ ye ko, ĩ hĩnga ni,

¹⁰ wadila ĩ sara anzɔ̃ ye, ko ĩ dɔ asiɔ ye ĩ zia. Se ĩ li nga so ko, na lá ko gbanda Kristo adiri aga ko, bɛ ĩ adu vuruni pa pa pa, ko ta Nzapa abela nga ĩ ma.

¹¹ Ĩ na lingɔ bo abɛta ye, na lo nguru tɛ Yezo Kristo. Wa na lo ni ko, azi agonda Nzapa, atɔndɔ nga lo.

Yezo Kristo aɔ aye kwɛ zu

¹² Mbi ye ya ĩ hĩnga ya, aye mɛ ali mbi ko, azi lege, la Nzɔ̃ Pa tɛ Yezo Kristo ndogwe bo ngoi zu uzu uzu.

¹³ Na lo ni la aturugu mɛ ndobata da tɛ kota gbia ti Roma, na azi mɛ ndɛ̃ zu ahĩnga ya, abi mbi bɔlɔkɔ, na lo mɛ ya, mbi wa kwa tɛ Yezo Kristo.

¹⁴ Ambanga awa Kristo gba ĩ hũ ya, abi mbi bɔlɔkɔ ko, nguru ti kpãngɔ bɛ la ndo Gbia Yezo Kristo ati agbɔ̃ la, ko ta ala ti ndopa tɛnɛ tɛ Nzapa na mbɛtɔ ma, ala ndopa ni na kpengba bɛ.

¹⁵ Adu biani ya, ambanga azi na popo tɛ la ndopa tɛnɛ tɛ Yezo Kristo, na lo mɛ ya, ala ndoli sɔbɛrɛ hɛ̃ mbi, ko ala ndosepara hɛ̃ngɔ mbi pɛnɔ, kanda ambanga mɛ ndɛ̃ ndopa ni na nzɔ̃ bɛ.

¹⁶ Ala ndopa tɛnɛ ni na nzɔ̃ bɛ, na lo mɛ ya, ala ye mbi. Ko ala hĩnga ya, Nzapa azia kwa ti kambisangɔ nda lo ti Nzɔ̃ Pa na yamba ti mbi.

¹⁷ Ala ko la ndoli sɔbɛrɛ hɛ̃ mbi ko, ala ndopa tenɛ tɛ Yezo Kristo bɛ la sɛ sɛ, ko ala ndoye ya, ani ɔ mbi. Ala ndoda bɛ la ya, se ani li nga so ko, pɛnɔ tɛ mbi aɔ ndoni na ngoi olo mɛ mbi ge bɔlɔkɔ.

¹⁸ Ko ta li ye ma! Bɛ se ala pa tɛnɛ tɛ Yezo Kristo na nzɔ̃ bɛ, bere na siɔ bɛ ko, adu bo tɛnɛ tɛ lo la ala pa, ko bɛ mbi ndode bo dengɔ na lo ni. Biani, ta mbi na ziangɔ dungɔ na dengɔ bɛ na lo ni ma,

¹⁹ ta sanga ma, mbi hĩnga ya, na lo ti aye ko zu la Nzapa na songɔ mbi, na lo mɛ ya, ĩ ndosambela lo na lo tɛ mbi, ko Tɔrɔ tɛ Yezo Kristo ndoza nga mbi.

²⁰ Ye mɛ mbi ye, ko mbi ndoku na bɛ mbi fufu la, ale ta mbi li ye kɔi mɛ alengbi ti sangɔ kamɛnɛ lɛ mbi ma. Kanda na olo, bere na ngoi zu mɛ na gangɔ ko, mbi ye na bɛ mbi kɔi ya, se mbi ngbã lɛ mbi ngɛ̃, bere se mbi kpi ko, ale mbi du na kpengba be, wadila azi atɔndɔ Yezo Kristo na lo tɛ mbi.

²¹ Ta sanga ma, ngoi mɛ mbi de lɛ mbi ngɛ̃ ko, Yezo Kristo la aɔ aye kwɛ zu ge Ĩɛ mbi. Ko se mbi kpi ko, ati du nzɔ̃ni buai.

²² Kanda se mbi ngbã lɛ mbi ngɛ̃ ko, mbi na lingɔ kwa so zangɔ na azi. Nga ma la adu so ko, ta mbi hĩnga ye mɛ mbi ye na popo ti kpingɔ kwa, bere ngbãngɔ lɛ mbi ngɛ̃ ma.

²³ Bɛ mbi bo sɛ se: mbi separa kpingɔ kwá, wadila mbi na Yezo Kristo e du ndoni kɔi, ko ye mɛ nzɔ̃ni buai la.

²⁴ Kanda adu nzɔ̃ni buai na lo tɛ ĩ ya, mbi ngbã lɛ mbi ngɛ̃, wadila mbi za ĩ.

²⁵ Nga ma la adu nga so ko, mbi hĩnga ya, mbi na ngbãngɔ lɛ mbi ngɛ̃ biani. Mbi hĩnga nga ya, mbi na ĩ zu, e na ngbãngɔ ndoni kɔi ya, mbi za ĩ, wa ĩ ye lo tɛ Yezo Kristo aɔ ti uzu, ko bɛ ĩ ade nga.

²⁶ Wa na ngoi mɛ gbanda mbi diri mbi tã ĩ ko, ĩ gonda Kristo sĩ na lo tɛ mbi.

²⁷ Ye kɔi mɛ bo ngbondoni lo mɛ: ale sé du tɛ ĩ adu bo nga ma se mɛ Nzɔ̃ Pa tɛ Yezo Kristo apa na ni. Na lo ni ko, bɛ se mbi ga so bangɔ ĩ bere se ta mbi ga ma ko, mbi ye bo mangɔ ya, ĩ ngbã bo na yengɔ lo tɛ Yezo Kristo, ko bɛ ĩ adu kɔi, ko ĩ bombi nga tɛrɛ ĩ so lingɔ kwa, wadila Nzɔ̃ Pa tɛ lo agwe ngoi zu uzu uzu.

²⁸ Ta mbɛtɔ tɛ awa kɛ̃ngɔ ĩ agbɔ̃ ĩ bɛ gbɔ ma. Se ta mbɛtɔ tɛ la agbɔ̃ ĩ ma ko, ala hĩnga ya, Nzapa afa ngbanga abi li ani wɛ la. Kanda tɛ ĩ ko, ĩ hĩnga ya, ĩ mu lege ti songɔ kwá, ko Nzapa la afa lege ni na nguru tɛ lo.

²⁹ Ta sanga ma, Nzapa ahɛ̃ ĩ lege ya, ĩ ti azi tɛ Yezo Kristo. Ta lo hɛ̃ ĩ lege ya, ĩ ye bo lo tɛ Yezo Kristo kɔi ma, kanda lo hɛ̃ nga ĩ lege ya, ĩ hũ apɛnɔ na lo tɛ lo.

³⁰ Ĩ hũ ndo to mɛ mbi tiri, ko na olo ko, ĩ ma ya, mbi dɛ na tiringɔ to ni kpɔ, ko ĩ ndotiri nga bo to ni ko.