Efɛzɛ 6 - Fana Ngbangɔ 1987

Se du tɛ ayangambi na tɛ awa dúngɔ la

¹ Ayangambi, ĩ du aya Gbia Nzapa, na lo ni ko, ĩ ma nyɔ ato ĩ na ata ĩ, ta sanga ma, adu nzɔ̃ni.

² Kɔzo ndia mɛ ndo Nzapa alu, ako nga kapa ndo ni lo mɛ: “Tɔndɔ to mɔ na ta mɔ,

³ wadila mɔ du na dengɔ bɛ, ko mɔ la mburu gba ge lɛ sese.”

⁴ Wa ĩ ato ayangambi, ta ĩ li ya ngɔnzɔ agbɔ̃ aya ĩ ma. Kanda ale ĩ kã la na hɛ̃ngɔ la nzɔ̃ kɔdɛ nga na nzɔ̃ wangɔ, nga ma se mɛ ndo Gbia Yezo aha na ni.

Se du tɛ ambɛ na tɛ ato gbia la

⁵ Ĩ ambɛ, ĩ ma nyɔ ato gbia ĩ mɛ ge lɛ sese, ĩ kpɛ la, ĩ tɔndɔ la, í li kwa hɛ̃ la na bɛ ĩ kɔi, nga ma se mɛ ĩ ndoli na kwa hɛ̃ Yezo Kristo.

⁶ Ta ĩ li kwa ni na bɛ ĩ kɔi bo na ngoi ko la lɛ la na tɛrɛ ĩ, ya bɛ la ade ma. Ĩ hĩnga ya, ĩ ambɛ tɛ Yezo Kristo, ko ye mɛ bɛ Nzapa aye ko, ĩ li na bɛ ĩ kɔi.

⁷ Ale ĩ li kwa tɛ ĩ ti mbɛ na nzɔ̃ bɛ, ma bere ĩ ndoli ni hɛ̃ Gbia Yezo. Kanda ta ĩ li kwa ni ma bere ĩ ndoli ni bo hɛ̃ azi ma.

⁸ Ĩ hĩnga ya, nzɔ̃ ye mɛ zo kɔi kɔi ndoli, bɛ se zo ni adu mbɛ bere bɔrɔ ko, Gbia na hɛ̃ngɔ lo mbana gɛrɛ lo, lengbingɔ na nzɔ̃ ye mɛ lo li.

⁹ Wa ĩ ato gbia ambɛ, ĩ li nga ambɛ tɛ ĩ nzɔ̃ni, ta ĩ gia bɛ la ma. Ale ĩ hĩnga ya, ĩ na ambɛ tɛ ĩ zu, ĩ du azi tɛ Gbia kɔi mɛ ka yayu, ko azi zu ka lɛ lo bo kwɛ kɔi.

Aye ti to tɛ wa Kristo

¹⁰ Ti kɔngɔ nda ni ko, mbi na pangɔ hɛ̃ ĩ so mɛ: ale ĩ gi ya, ĩ lua nguru ka ti Gbia Yezo, wa nguru ni akpengba na ĩ ka ka ka.

¹¹ Aye ti to zu mɛ Nzapa ahɛ̃ ĩ ko, ĩ gbɔ̃ ni so ti ĩ ya, ngoi mɛ Satana atara handangɔ ĩ ko, ĩ gbe bɛ ĩ.

¹² Ta sanga ma, to mɛ e ndotiri ko, ta e na azi la e ndotiri ma, kanda e na asiɔ tɔrɔ la e ndotiri. Adu asiɔ tɔrɔ mɛ na nguru ka lɛ ndozu, ndole nga gbia ge lɛ sese olo mɛ na ya mbingo.

¹³ Na lo ni ko, ĩ lɔ aye ti to zu mɛ Nzapa ahɛ̃ ĩ ya, na ngoi ko la siɔ bi asi na ĩ, wa tiringɔ ĩ na to atiri ĩ ko, ĩ lengbi ti tiringɔ lo na to, ko ta ĩ kpɛ lo ma. Wa ngoi ko la ĩ tiri to ni ngbĩi ĩ si ka nda ni gbɔ ko, ĩ siɔ gɛrɛ ĩ kpa.

¹⁴ Wa í lɛkɛ tɛrɛ ĩ: ĩ tɛnɛ bɛta tɛnɛ, ta sanga ma, bɛta tɛnɛ adu nga ma gba mɛ zo agbe na gu ya lo so lɛkɛngɔ tɛrɛ lo ya, ni li kwa. Ale ĩ li ye na seni, ta sanga ma, lingɔ ye na seni adu nga ma bɔngɔ ti nwa mɛ ĩ yu na tɛrɛ ĩ, so gbanzingɔ ya, ta ye ti to akpɔ ĩ ma.

¹⁵ Ale ĩ du na gonvɛnɛ so pangɔ Nzɔ̃ Pa mɛ ndohɛ̃ azi bɛ pii. Oko adu nga ma ĩ yu pɔrɔ ya, ĩ dɔ nɔ nzɔ̃ni na lege tɛ Nzapa.

¹⁶ Ale ĩ baba bo yengɔ lo tɛ Gbia Yezo ngoi zu. Adu nga ma ĩ gbɔ̃ vara so ti ĩ, so gbanzingɔ ya, ta ambanza mɛ Satana agana na ĩ abɔrɔ ĩ ma, ko bɛ se wá adu na li ambanza ni ko, vara amingɔ wá ni.

¹⁷ Ĩ hĩnga ya Nzapa aso ĩ wɛ, ko oko adu nga ma ĩ yu kpɔtɔ ti nwa so batangɔ na li ĩ. Ale ĩ mu tɛnɛ tɛ Nzapa ĩ pa hɛ̃ azi. Tɛnɛ ni adu nga ma zabe mɛ Tɔrɔ Santo ahɛ̃ ĩ.

¹⁸ Ĩ li aye olo zu na sambelangɔ Nzapa, ko ĩ hũnda lo ya, lo za ĩ. Ale ĩ sambela Nzapa ngoi zu, nga ma se mɛ Tɔrɔ Santo afa na ĩ. Na lo ni ko, ĩ du na kpengba lɛ, ta ĩ nzɛ̃ nga bɛ fani kɔi ma. Ale ĩ sambela hɛ̃ azi tɛ Nzapa zu.

¹⁹ Ĩ sambela nga hɛ̃ mbi ya, na ngoi ti pangɔ Nzɔ̃ Pa ko, Nzapa ahɛ̃ mbi tɛnɛ mɛ alengbi ya mbi tɛnɛ, wadila Nzɔ̃ Pa mɛ ndo lo hɔndɛ na azi ko, mbi pa ni na kpengba bɛ.

²⁰ Mbi du wa pangɔ kwa tɛ Yezo Kristo, ya mbi pa Nzɔ̃ Pa hɛ̃ azi. Abɛ se mbi ge ya bɔlɔkɔ ko, mbi ndopa nga bo ni. Wa ĩ hũnda Nzapa ya, mbi pa ni na kpengba bɛ, nga ma se mɛ mbi lengbi ti pangɔ ni.

Ndangba balangɔ

²¹ Tisikɛ na pangɔ hɛ̃ ĩ pa tɛ mbi zu, wadila ĩ hĩnga se mɛ e ndodu na ni ge. Lo nyita e ti kpɔ̃ bɛ e, ko lo ndoli kwa tɛ Gbia Yezo na bɛ lo kɔi.

²² Nda mɛ mbi to lo nvɛni hɛ̃ ĩ ya, lo pa hɛ̃ ĩ se mɛ e ndodu na ni ge, ko lo sa nga nguru bɛ ĩ la.

²³ To e Nzapa na Gbia Yezo Kristo ali bɛ ya, bɛ ayata e awa Kristo adu pii ma ke! Ala li bɛ nga ya, ĩ yengbi, ko ĩ ye nga lo tɛ la na bɛ ĩ kɔi ma ke!

²⁴ Azi zu ko la bɛ la ndoye Gbia tɛ e Yezo Kristo buru na buru ko, Nzapa ali bɛ nzɔ̃ bɛ hɛ̃ la ma ke!