Efɛzɛ 5 - Fana Ngbangɔ 1987

Se du mɛ alengbi na awa Kristo

¹ Oko la ĩ du ayangambi mɛ Nzapa ndoye ĩ sĩ ko, ĩ li kpengbani ya, ĩ mu nzɔ lɛ lo tɛ lo.

² Ale ĩ ndoye afɔ̃ ĩ, nga ma se mɛ Kristo aye na e, akpi nga na lo tɛ e. Lo ka ndo tɛre lo, nga ma sa mɛ aho alu na Nzapa, ko bɛ Nzapa ade ndo na lo tɛ lo sĩ.

³ Ĩ azi tɛ Nzapa, na lo ni ko, ta alengbi ya, ĩ li siɔ ye ti kamɛnɛ bɛ kɔi ma, ta ĩ li siɔ ye kɔi, bere ĩ du na gwɛ̃ ye ma, ta ĩ tɛnɛ bɛ tɛnɛ ni ma.

⁴ Ta alengbi nga ya, ĩ tɛnɛ tɛnɛ ti kamɛnɛ ma, ta ĩ tɛnɛ tɛnɛ ti buba, bere tɛnɛ ti tongɔ siɔ sasa ma. Kanda ale ĩ hɛ̃ sia kɔli hɛ̃ Nzapa.

⁵ Ale ĩ hĩnga nzɔ̃ni ya, ta wa lingɔ siɔ ye ti kamɛnɛ bɛ kɔi, bere wa lingɔ siɔ ye bɛ kɔi, bere wa dungɔ na gwɛ̃ ye bɛ kɔi asi gbanda ka Kɔdɔrɔ Gbia tɛ Yezo Kristo na Nzapa bɛ gbɔ ma. Dungɔ na gwɛ̃ ye adu nga ma vɔrɔngɔ ngbilondo.

⁶ Ta zo ahanda ĩ na tɛnɛ ti nvɛnɛ ma. Adu na lo ti lingɔ gi tɛrɛ asiɔ ye olo la ngɔnzɔ agbɔ̃ gbanda Nzapa hɛ̃ awa kɛ̃ngɔ nyɔ lo.

⁷ Wa ta ĩ li na li nɔ tɛ gi tɛrɛ azi ko ma.

⁸ Ndo uzu ko, ĩ ndo na ya mbingo, kanda na olo ko, ĩ na ya vuru ndo, na lo mɛ ya, ĩ na Gbia ĩ ti bo kɔi. Na lo ni ko, ale ĩ li ya, du tɛ ĩ adu nga ma du tɛ azi mɛ na ya vuru ndo.

⁹ Ta sanga ma, vuru ndo ndohɛ̃ zo anzɔ̃ ye ndɛ̃ ndɛ̃ ndɛ̃, na abɛta ye ndɛ̃ ndɛ̃ ndɛ̃, nga na abɛrɛ ye ndɛ̃ ndɛ̃ ndɛ̃.

¹⁰ Ale ĩ li kpengbani ya, ĩ hĩnga ye mɛ ndode bɛ Gbia.

¹¹ Ta ĩ li na li nɔ tɛ awa lingɔ gɛgɛrɛ ye ti ya mbingo ma, kanda ale ĩ si na siɔ ye tɛ la yango.

¹² Asiɔ ye mɛ ala ndoli, bɛ se zo atɛnɛ tɛnɛ ni na gbe mbingo ko, kamɛnɛ ni agbɔ̃ lo.

¹³ Ngoi mɛ aye olo asi yango ngbɛ̃, wa e hĩnga se mɛ awa lingɔ gɛgɛrɛ ye ndodu na ni.

¹⁴ Ta sanga ma, lo mɛ afa tɛrɛ lo yango ndoti vuru ndo. Na lo ni la andopa ya: “Mɔ zo ko la mɔ la langɔ ko, zingɔ, Lo ndozu na popo tɛ azi mɛ akpili, Wa Yezo Kristo avuru na ndo hɛ̃ mɔ.”

¹⁵ Wa ĩ bata li ĩ nzɔ̃ni na ya du tɛ ĩ. Ta se li ye tɛ ĩ adu nga ma se li ye tɛ azi ko la ta ahĩnga ndo ma, kanda ale se li ye tɛ ĩ adu nga ma se tɛ awa ndara.

¹⁶ Na ngoi olo mɛ ko, azi ndoli siɔ ye sĩ, wa ĩ gi kɔdɛ ya, ĩ li nzɔ̃ ye ngoi zu.

¹⁷ Nda mɛ ale ta ĩ du awa buba ma la, kanda ale ĩ li kpengbani ya, ĩ hĩnga ye mɛ Gbia aye ya ĩ li.

¹⁸ Ta ĩ nyɔ kana agbɔ̃ ĩ ma, so agbɛ̃ du tɛ ĩ. Kanda ale ĩ ye ya, Tɔrɔ Santo asa nguru bɛ ĩ sĩ ngoi zu.

¹⁹ Ale ĩ ye hɛ̃ afɔ̃ ĩ abia ti ya Buku tɛ Nzapa, na abia Nzapa, nga na ambanga bia mɛ Tɔrɔ Santo afa na ĩ. Ĩ ye bia hɛ̃ Gbia, ĩ gonda lo na bɛ ĩ kɔi.

²⁰ Ngoi zu ko, ale ĩ ndohɛ̃ sia kɔli hɛ̃ To e Nzapa, na ili Gbia tɛ e Yezo Kristo na lo ye zu.

Se du tɛ awe kɔli na akɔ Ia

²¹ Ale ĩ bi tɛrɛ ĩ hɛ̃ afɔ̃ ĩ, na lo mɛ ya, ĩ du azi mɛ ĩ ndotɔndɔ Yezo Kristo.

²² Ĩ awe kɔli, ale ĩ bi tɛrɛ ĩ hɛ̃ akɔ ĩ, ko afa ya, ĩ bi nga tɛrɛ ĩ hɛ̃ Yezo Kristo.

²³ Ta sanga ma, kɔ wali adu gbia ti ndo ya lo, nga ma se mɛ Yezo Kristo adu Gbia ti ndo azi ti Eklezia. Lo nvɛni nga Wa songɔ azi ti Eklezia mɛ adu nga ma apɛnzɛ ngbonga tɛrɛ lo.

²⁴ Na lo ni ko, ale awe kɔli abi tɛrɛ la hɛ̃ akɔ la na ya lo zu, nga ma se mɛ azi ti Eklezia ndobi na tɛrɛ la hɛ̃ Yezo Kristo.

²⁵ Ĩ akɔ awe, ĩ ye awe ĩ nga ma se mɛ ndo Yezo Kristo aye na azi ti Eklezia, aka nga na tɛrɛ lo na lo tɛ la.

²⁶ Lo ka ndo tɛrɛ lo ya, ni lɛkɛ bɛ azi ti Eklezia ati vuruni ka lɛ Nzapa. Lo kpo ndo la na batisimɔ ti ngu. Lo lɛkɛ ndo nga la ati abɛrɛ azi na lo tɛnɛ tɛ lo.

²⁷ Ta sanga ma, lo ye ndo ya, ka lɛ ni ko, azi ti Eklezia adu na ndima, adu azi mɛ bɛ la vuruni, adu nga abɛrɛ azi ti buai. Ta lo ye ndo ya, azi ti Eklezia adu na siɔ ye kɔi, bere ye kɔi agbɛ̃ la ma.

²⁸ Se tɛ akɔ awe nga la: ale ala ye awe la nga ma se mɛ ala ndoye na tɛrɛ la nvɛni. Kɔ wali ko la aye ya lo ko, afa ya, lo ye nga tɛrɛ lo nvɛni la.

²⁹ Ta sanga ma, ta zo ndokɛ̃ tɛrɛ lo nvɛni ma. Zo ndoka tɛrɛ lo na tɛ, ko lo ndobata nga ni nga ma se mɛ Yezo Kristo ndobata na e azi ti Eklezia,

³⁰ na lo mɛ ya, e nga ma apɛnzɛ tɛrɛ lo.

³¹ Asu ka ya Buku tɛ Nzapa ya: “Na lo ni ko, kɔli na ziangɔ to lo na ta lo, so dungɔ ana ya lo, ko ala zu se ati bo zo kɔi.”

³² Tɛnɛ olo mɛ asu ka ya Buku tɛ Nzapa ko, adu bɛta ngbondo tɛnɛ. Tɛ mbi ko, mbi da bɛ mbi ya, nda ni adu na lo tɛ Yezo Kristo na azi ti Eklezia.

³³ Ko adu nga na lo tɛ ĩ. Nda ni lo mɛ: ale kɔ wali kɔi kɔi aye ya lo, nga ma se mɛ lo ndoye na tɛrɛ lo nvɛni, ko ale ya kɔli atɔndɔ kɔ lo.