Efɛzɛ 4 - Fana Ngbangɔ 1987

Azi ti Eklezia adu ngbonga tɛrɛ Yezo

¹ La mbi mɛ wa bɔlɔkɔ na lo ti kwa tɛ Gbia mɛ mbi ndoli, mbi gbɔ̃ gɛrɛ ĩ ya, ale se li ye tɛ ĩ adu nzɔ̃ni, nga ma se mɛ ndo Nzapa aye na ni na ngoi mɛ ndo lo ili na ĩ.

² Ale ĩ ngara tɛrɛ ĩ hɛ̃ afɔ̃ ĩ ngoi zu, í du adede azi, ĩ du na yɔngɔrɔ bɛ, ĩ du nga na yengbingɔ. Ko se afɔ̃ ĩ ali ĩ siɔni ko, ĩ gbe bɛ ĩ.

³ Tɔrɔ Santo abombi ndo ĩ kɔi, ko ĩ li kpengbani ya, ĩ du na mangbingɔ na popo tɛ ĩ, wadila ĩ ngba bo kɔi.

⁴ Azi ti Eklezia adu nga ma ngbonga tɛrɛ Yezo mɛ adu bo kɔi, Tɔrɔ Santo bo kɔi, nga ma se mɛ ĩ ndolɛndɛrɛ bo ye kɔi mɛ ndo Nzapa aili ĩ ya ĩ lua ni.

⁵ Gbia tɛ e bo kɔi, lo yengɔ tɛ e bo kɔi, batisimɔ mɛ e mu bo kɔi.

⁶ Nzapa bo kɔi, lo To azi zu, lo ndole gbia na ndo azi zu, lo ndoli kwa tɛ lo na se kɔdɛ zu, lo ndodu nga na ya bɛ azi tɛ lo zu.

⁷ Zo kɔi kɔi na popo tɛ e alua nguru kwa ndɛ̃ ndɛ̃ ndɛ̃, nga ma se mɛ ndo Yezo Kristo ahɛ̃ na ni hɛ̃ e.

⁸ Asu ka ya Buku tɛ Nzapa ya: “Ngoi mɛ ndo lo ma ka yayu ko, Lo mu ndo awa kɛ̃ngɔ lo mɛ lo nwɔ la, lo ɔ na ni, Lo hɛ̃ nga nguru kwa hɛ̃ azi ti lɛ sese.”

⁹ “Lo ma ndo ka yayu,” alengbi na nɛ? Alengbi ya, ndo uzu ko, lo zu ngbĩi ge tise.

¹⁰ Zo mɛ ndo azu ge tise ko, nga bo lo ndo la lo ma ka yayu ya, ni du gbia ti ndo aye zu.

¹¹ Lo ndo la lo hɛ̃ azi nguru kwa ndɛ̃ ndɛ̃ ndɛ̃. Lo hɛ̃ ambanga nguru kwa ti pangɔ kwa tɛ lo, lo hɛ̃ ambanga nguru kwa ti pangɔ nyɔ Nzapa, lo hɛ̃ ambanga nguru kwa ti pangɔ Nzɔ̃ Pa, lo hɛ̃ nga ambanga mɛ ndɛ̃ nguru kwa ti batangɔ awa Kristo, ko awa batangɔ awa Kristo ni la ndoha lo tɛ Nzapa.

¹² Lo hɛ̃ ndo azi nguru kwa ni ya, ala za awa Kristo na lingɔ kwa tɛ Nzapa, wadila awa Kristo amai na ya lo yengɔ tɛ la.

¹³ Wa e zu e ti gbanda bo kɔi biani, na lo mɛ ya, e ye lo tɛ Yezo Kristo Nyi Nzapa na bɛ e kɔi, e zu e hĩnga nga lo. Ko lɛ e azi gbanda na lege tɛ Nzapa, e ti nga gbanda kwɛ kɔi nga ma lo.

¹⁴ Wa se mɛ gbanda ta e ti e du nga ma ayangambi ma la. Ta e ti e yu gbanda ndo na lo ti nvɛnɛ mɛ awa poroso ndohanda na azi ya, ala yu ndo ma. Ta e ye gbanda ya, ye mɛ ala ndoha ayuru e, nga ma se mɛ ngu na yá ndoyuru na ngɔ yenge yenge ma.

¹⁵ Kanda ale e ye afɔ̃ e, ko e pa bɛta lo tɛ Nzapa hɛ̃ la, wadila e mai na se kɔdɛ zu, ko e ti nga ma Yezo mɛ bɛ li azi ti Eklezia.

¹⁶ Na lo tɛ lo la azi tɛ lo zu abombi tɛrɛ la ndoni kɔi, ati bo kɔi, nga ma se mɛ apɛnzɛ tɛrɛ ndɛ̃ ndɛ̃ ndɛ̃ agungbi na ni kpengbani. Wa ngoi mɛ se apɛnzɛ tɛrɛ kɔi kɔi ali kwa tɛ la na seni ko, ngbonga tɛrɛ zu amai. Ko se tɛ awa Kristo nga la: ngoi mɛ se ala li kwa tɛ la, wa azi ti Eklezia amai na lege ti yengbingɔ.

Fana du

¹⁷ Wa mbi gbɔ̃ gɛrɛ ĩ na ili Gbia ya, ĩ ma tɛnɛ mɛ mbi na tenɛngɔ, tɛnɛ ni lo mɛ: ale ta ĩ ti du du nga ma apaganɔ ma. Ala ndodu bo na gɛgɛrɛ dangɔ bɛ,

¹⁸ ko kɔdɛ tɛ la adu na ya mbingo. Ta ala lengbi ti luangɔ bɛta du mɛ Nzapa ndohɛ̃ azi bɛ kɔi ma, na lo mɛ ya, ta ala hĩnga ye kɔi ma, kpengba li aɔ ndo la ɔngɔ.

¹⁹ Ta kamɛnɛ ti ndogbɔ̃ la bɛ gbɔ ma. Ala hɛ̃ tɛrɛ la so lingɔ siɔ ye, ko ala ndoli lɛ asiɔ ye ti kamɛnɛ ndɛ̃ ndɛ̃ ndɛ̃, ta ala ndofɔ̃ bɛ la ma.

²⁰ Wa tɛ ĩ ko, ta du tɛ Yezo Kristo mɛ ndo aha na ĩ adu nga so ma!

²¹ Biani, ĩ ma ndo lo tɛ lo mɛ apa hɛ̃ ĩ, aha nga ndo ĩ na bɛta lo tɛ lo.

²² Ale ĩ dɔ ngbina du tɛ ĩ, ĩ zia. Du ni ko andogbẽ ndo ĩ, na lo ti asiɔ gwɛ̃ ti tɛrɛ ĩ mɛ ndo ndohanda ĩ.

²³ Ale ĩ gbinya bɛ ĩ, ĩ gbinya nga dangɔ bɛ tɛ ĩ, ya ati fanani.

²⁴ Ale ĩ mu fana du mɛ Nzapa alɛkɛ na lo tɛ ĩ ya, adu nga ma tɛ ni. Du ni adu bɛtani, ko na lo ni ko, zo ali ye na seni, ali nga ye mɛ ndode bɛ Nzapa.

²⁵ Na lo ni ko, ĩ zia pangɔ nvɛnɛ! Ale zo kɔi kɔi atɛnɛ bɛta tɛnɛ hɛ̃ fɔ̃ lo, ta sanga ma, e kwɛ zu e du apɛnzɛ ngbonga tɛrɛ kɔi.

²⁶ Se ngɔnzɔ agbɔ̃ ĩ ko, ale ĩ du na kpengba lɛ, so ĩ li siɔ ye. Ko ta ĩ du na ngɔnzɔ ngbĩi la ati ma.

²⁷ Ta ĩ zi lege hɛ̃ Satana ya, lo handa ĩ ma.

²⁸ Ale zo mɛ ndo wa nzĩ azia nzĩngɔ ye, ale lo li kwa na ti lo nvɛni na se kɔdɛ mɛ alengbi, wa lo za na awa yɛlɛ.

²⁹ Ta ĩ tɛnɛ siɔ tɛnɛ bɛ kɔi ma, kanda ale ĩ tɛnɛ bo tɛnɛ mɛ alengbi ti zangɔ afɔ̃ ĩ ya ala mai na ya lo yengɔ tɛ la. Ale ĩ tɛnɛ nga tɛnɛ mɛ alengbi, wadila tɛnɛ ni adu nzɔ̃ni na lo tɛ afɔ̃ ĩ mɛ ndoma ĩ.

³⁰ Ta ĩ hɛ̃ vundu hɛ̃ Tɔrɔ Santo tɛ Nzapa ma, ta sanga ma, Tɔrɔ Santo adu nga ma nda tɛ Nzapa mɛ ndo lo minya tɛrɛ ĩ, so fangɔ ya, ĩ azi tɛ ni Nzapa. Tɔrɔ Santo ndofa nga ya, mbanga lá kɔi gbanda ko, Nzapa aso gbanda e.

³¹ Ale ĩ zia sese bɛ zu, ĩ zia ngɔnzɔ, ĩ zia lingɔ ya, ngɔnzɔ agbɔ̃ zo. Ĩ zia pangɔ pa na popo tɛ ĩ, ĩ zia gurungɔ afɔ̃ ĩ. Ta ĩ du na siɔ bɛ ma.

³² Kanda ale ĩ du na nzɔ̃ bɛ na ndo afɔ̃ ĩ, ko ĩ ma nga vundu hɛ̃ la. Ale ĩ ka lɛ ĩ ndo siɔ ye tɛ afɔ̃ ĩ, nga ma se mɛ ndo Nzapa aka na lɛ lo ndo siɔ ye tɛ ĩ, na lo ti ye mɛ Yezo Kristo ali terɛ ĩ.