Efɛzɛ 3 - Fana Ngbangɔ 1987

Kwa mɛ Polo ali hɛ̃ azi mɛ ta Ayuda ma

¹ Nda mɛ mbi Polo mɛ mbi ti wa bɔlɔkɔ na lo kwa mɛ ndo mbi ndoli hɛ̃ Yezo Kristo na lo tɛ ĩ, mbi sambela Nzapa hɛ̃ ĩ la.

² Biani, ĩ ma ya, na lo nzɔ̃ bɛ tɛ Nzapa ko, Nzapa ahɛ̃ mbi kwa ti pangɔ Nzɔ̃ Pa hɛ̃ ĩ.

³ Nzapa afa mbi na lo mɛ ndo lo hɔndɛ na azi gã, ya mbi hĩnga ni, nga ma se mɛ mbi pia mbi su hɛ ĩ na nyi mbɛti olo.

⁴ Ngoi mɛ ĩ na dingɔ mbɛti ni ko, ĩ na hũngɔ ya, mbi hĩnga lo tɛ Yezo Kristo mɛ ndo Nzapa ahɔndɛ na azi.

⁵ Ndo uzu ko, ta Nzapa afa ndo lo ni na azi ma, kanda na olo ko, lo to Tɔrɔ Santo tɛ lo ya, lo fa ni na abɛta awa pangɔ kwa tɛ Yezo, lo fa nga na abɛta awa pangɔ nyɔ lo.

⁶ Ĩ ma lo ni lo mɛ: azi mɛ ta Ayuda ma alengbi nga ti luangɔ anzɔ̃ ye mɛ Nzapa abata hɛ̃ azi tɛ lo, nga ma se tɛ Ayuda. Ala na Ayuda ati bo apɛnzɛ ngbonga tɛrɛ kɔi, ko ala lua nga gbanda ngilɛ ye ti kapa mɛ ndo lo ko hɛ̃ azi tɛ lo ti ndo Yezo Kristo. Nzɔ̃ Pa la apa alo olo zu.

⁷ Na lo nzɔ̃ bɛ tɛ Nzapa ko, lo hɛ̃ mbi nguru kwa ya, mbi pa Nzɔ̃ Pa hɛ̃ azi. Lo hɛ̃ mbi nguru kwa ni na lo nguru tɛ lo nvɛni.

⁸ Mbi ndangba tɛ azi tɛ Nzapa zu. Bɛ se mbi du ndangba tɛ la zu ko, lo hɛ̃ mbi lege ya, tɛnɛ ti ngbondo nwa mɛ alo ka yamba ti Yezo Kristo ko, mbi pa ni hɛ̃ azi mɛ ta Ayuda ma. Ko ta zo alengbi ti hĩngangɔ se mɛ nwa ni akɔnɔ na ni ma.

⁹ Lo hɛ̃ mbi lege ya, lo mɛ ndo lo hɔndɛ na azi zu gã ko, mbi fa la na se mɛ lo ni alengbi ti tingɔ na seni. Nzapa mɛ ali aye zu ahɔndɛ ndo lo ni ya,

¹⁰ na olo ko, ni si na lo ni ti ndo azi ti Eklezia, ko atɔrɔ zu mɛ na nguru, ndole nga gbia ka lɛ ndozu ahũ azi ti Eklezia ni, wa ala hĩnga ndara tɛ Nzapa. Ndara ni ndodu na se kɔdɛ ndɛ̃ ndɛ̃ ndɛ̃.

¹¹ Nzapa ali ndo so na se bɛ lo, na ngoi mɛ ndo ta lo dɛ lo li sese ma, ko lo li ni ti ndo Gbia tɛ e Yezo Kristo.

¹² E na Yezo Kristo e ti bo kɔi, ko e ndoye nga lo tɛ lo. Na lo ni ko, e lengbi ti ingɔ tɛrɛ e ka tɛ Nzapa, ko ta bɛ e alengbi ti titiringɔ ma.

¹³ La mbi gbɔ̃ gɛrɛ ĩ ya, ta ĩ nzɛ̃ na lo ti pɛnɔ mɛ mbi ndohũ so ĩ ma. Ta sanga ma, se zo ahũ pɛnɔ so ĩ ko, adu kota ndima na lo tɛ ĩ.

Se mɛ Yezo Kristo ndoye na e

¹⁴ Nda mɛ mbi kuku gbɛlɛ To mbi Nzapa so vɔrɔngɔ lo la.

¹⁵ Adu na lo tɛ lo mɛ lo To e, la azi mɛ ka yayu, na ala mɛ ge tise ndodunga ka nda se wa tɛ la.

¹⁶ Nga ma la Nzapa na ndima sĩ ko, mbi ndohũnda lo ya, Tɔrɔ Santo tɛ lo asa nguru bɛ ĩ,

¹⁷ ko Yezo Kristo angbã nga ka ya bɛ ĩ, na lo mɛ ya, ĩ ye lo tɛ lo. Mbi ndohũnda lo ya, yengɔ mɛ ĩ ndoye na lo ali ya bɛ ĩ, nga ma se mɛ ambatana kɛkɛ ndoli ka ya sese. Ko yengɔ ni akpengba na ĩ, nga ma se mɛ gu gɛrɛ da ndokpengba na da.

¹⁸ Mbi ndohũnda lo ya, ĩ na azi tɛ Nzapa zu ĩ hĩnga ya, Yezo Kristo ndoye e aɔ maka nvɛni.

¹⁹ Mbi ndohũnda lo ya, ĩ hĩnga yengɔ mɛ Yezo Kristo ndoye na e. Wa ta zo alengbi ti hĩngangɔ ni zu na seni ma. Ko mbi ndohũnda nga lo ya, ye zu mɛ lo na ni ko, lo sa ni ka bɛ ĩ, ko asĩ ya bɛ ĩ.

²⁰ Nzapa alengbi ti lingɔ ye ɔngɔ ndo ye zu mɛ e ndohũnda, bere ɔngɔ ndo dangɔ bɛ tɛ e. Lo ndoli ni na nguru tɛ lo mɛ ndoli kwa ge ya tɛrɛ e.

²¹ E azi ti Eklezia mɛ e na Yezo Kristo e ti bo kɔi ko, ale e gonda Nzapa ngoi zu, buru na buru! Seni la.