Efɛzɛ 2 - Fana Ngbangɔ 1987

Nzapa aso e na lo ti nzɔ̃ bɛ tɛ lo

¹ Ndo uzu ko, ĩ ndo azi mɛ tɔrɔ tɛrɛ ĩ akpi, na lo mɛ ya, ĩ ndoli ndo asiɔ ye.

² Ĩ mu ndo se li ye tɛ azi ti lɛ sese olo. Ĩ ndotɔndɔ ndo gbia tɛ asiɔ tɔrɔ mɛ ndodu ka lɛ yanga yenge, ko na olo ko, gbia ni ko la adu tɔrɔ mɛ ndoli kwa ka ya bɛ azi mɛ ndokɛ̃ tɔndɔngɔ Nzapa.

³ E zu ndo nga ma azi ni ko, e ndoli ndo asiɔ ye mɛ e ndodu na gwɛ̃ ni. E ndoli ndo ye na se gwɛ̃ ti tɛrɛ e, e ndoli ndo nga ye na se bɛ e. Na lo ni ndo la Nzapa ali ngɔnzɔ hɛ̃ e ya, ale ngbanga ati gbanda na e, nga ma se mɛ gbanda ngbanga ati na azi mɛ ndɛ̃.

⁴ Kanda Nzapa ndoma vundu tɛ e sĩ, lo ndoye nga e ma wo ma,

⁵ ko ngoi mɛ ndo e du azi mɛ tɔrɔ tɛrɛ e akpi na lo ti asiɔ ye tɛ e ko, lo bombi e na Yezo Kristo, lo so e na ya kwá kɔi. Na lo ti nzɔ̃ bɛ tɛ Nzapa ndo la Nzapa aso ĩ.

⁶ Nzapa aso e na Yezo Kristo na ya kwá, akpã e ya, e na lo e lɛ gbia ka yayu, na lo mɛ ya, e na Yezo Kristo e ti bo kɔi.

⁷ Lo li ndo so ti ndo Yezo Kristo, so fangɔ na azi mɛ gbanda aga gesi ya, ni na kota nzɔ̃ bɛ sĩ nvɛni.

⁸ Nzapa aso ndo ĩ na lo ti nzɔ̃ bɛ tɛ lo, ta sanga ma, ĩ ye lo tɛ Yezo Kristo. Ko ta ĩ lua songɔ kwá ni na lo nguru tɛ ĩ nvɛni ma, kanda lo so ndo ĩ gɛgɛrɛ,

⁹ ko ta adu ya, ĩ li ndo kwa ma. Ko ta zo alengbi ti gondangɔ tɛrɛ lo na lo ni ma.

¹⁰ Nzapa la ali ya, e ti afana azi, na lo mɛ ya, e na Yezo Kristo e ti bo kɔi. Lo li so ya, e li anzɔ̃ kwa. Lo pia ndo lo kpã anzɔ̃ kwa ni ko ya e li ni.

Ayuda na awa ndɛ ati bo kɔi

¹¹ Ĩ azi mɛ ta ĩ Ayuda ma, ĩ da bɛ ĩ na se mɛ ndo ĩ da uzu. Ĩ ndo azi mɛ Ayuda ndoili ĩ ya awa popo, ko ala ndoilingbi ndo tɛ la tɛrɛ la ya, ani awa ganza. Ko ganza ni ndofa bo ye mɛ azi ndoli na tɛrɛ la.

¹² Wa na ngoi ko ndo ko, ta ĩ hĩnga ndo Mɛsia ma. Ta ĩ ndo na li nɔ tɛ azi tɛ Nzapa ma, ĩ tɛ ĩ ndo awa ndɛ̃. Ngoi mɛ ndo Nzapa na azi tɛ lo agbe ngbanga ko, lo ko ndo kapa hɛ̃ la, ko ta kapa ni adu ndo na lo tɛ ĩ ma. Ĩ ndodu ndo ge lɛ sese, ta ĩ hĩnga ndo Nzapa ma, ta ĩ ndolɛndɛrɛ ndo nga ye kɔi ma.

¹³ Ndo uzu ko, ĩ ndo yɔngɔrɔni na Nzapa, kanda na olo ko, ĩ na Yezo Kristo ĩ ti bo kɔi, na lo mɛnɛ tɛrɛ lo mɛ ndo lo sa so ĩ. Na lo ni ko, ĩ ti ndũ na Nzapa.

¹⁴ Yezo Kristo nvɛni ndo la akpã mangbingɔ na popo tɛ e Ayuda na azi mɛ ta Ayuda ma. Ayuda na azi mɛ ta Ayuda ma akɛ̃ngbi ndo sĩ, popo tɛ la akangbi ndo. Yezo Kristo ĩ kpi ko, lo bombi la ya, ala ti bo kɔi, ko lo ho kɛ̃ngbingɔ mɛ ndo na popo tɛ la.

¹⁵ Lo ho ndo ndia tɛ Ayuda so bombingɔ Ayuda na azi mɛ ta Ayuda ma, ya ala ti bo zo kɔi mɛ fanani, na lo mɛ ya, ala na lo ati nga bo kɔi. Na lo ni la lo kpa mangbingɔ na popo tɛ la.

¹⁶ Na lo kwá mɛ ndo lo kpi na ndo krusi ko, lo ho kɛ̃ngbingɔ mɛ ndo na popo tɛ la, lo bombi la ya, ala ti bo kɔi, lo tongbi nga songo na popo tɛ la na Nzapa.

¹⁷ Na lo ni la Yezo Kristo aga apa Nzɔ Pa ti mangbingɔ hɛ̃. Ĩ mɛ ndo yɔngɔrɔni na Nzapa, nga hɛ̃ e mɛ ndũ na Nzapa.

¹⁸ Na lo tɛ lo ko, e Ayuda na ĩ azi mɛ ta ĩ Ayuda ma, e lengbi ti singɔ ka gbɛlɛ Nzapa na lo nguru tɛ Tɔrɔ Santo ko kɔi.

¹⁹ Na lo ni ko, ĩ azi mɛ ta ĩ Ayuda ma, ta ĩ de awa ndɛ̃, bere azi mɛ alo katɛ ma. Kanda na olo ko, ĩ ti azi ti Kɔdɔrɔ tɛ Nzapa, ĩ nga na popo tɛ azi ti nda se wa tɛ lo.

²⁰ Ĩ du nga ma atɛ̃nɛ mɛ awa na da. Ko awa pangɔ kwa tɛ Yezo Kristo na awa pangɔ nyɔ Nzapa adu tɛ la ndo nga ma gu gɛrɛ da ni. Wa Yezo Kristo nvɛni la nga ma tɛ́nɛ ti nda ngɔrɔ da.

²¹ Lo la lo ndokpengba na da ni zu, lo nga la lo ndoli ya, kwa ti da ni adɔ nɔ, wa ati kota da Nzapa mɛ santo, ko kota da Nzapa ni adu na lo tɛ Gbia Nzapa.

²² Nga ma la ĩ na Yezo Kristo ĩ ti bo kɔi ko, ĩ nga ĩ du nga ma atɛnɛ mɛ awa na da, ko Tɔrɔ Santo tɛ Nzapa ndodu ya da ni.