Efɛzɛ 1 - Fana Ngbangɔ 1987

Balangɔ

¹ Mbi Polo mɛ Nzapa asara mbi na se bɛ lo nvɛni akpã ya, mbi du wa pangɔ kwa tɛ Yezo Kristo, la mbi to mbɛti olo hɛ̃ ĩ azi tɛ Nzapa mɛ ka Efɛzɛ, ĩ mɛ ĩ ye lo tɛ Yezo Kristo, ĩ na lo ĩ ti nga bo kɔi. Mbi bala ĩ.

² To e Nzapa na Gbia tɛ e Yezo Kristo ali bɛ nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

Anzɔ̃ ye mɛ Nzapa ahɛ̃ e ti ndo Yezo

³ E gonda Nzapa mɛ To Gbia tɛ e Yezo Kristo! Lo sunu e, lo hɛ̃ nga e anzɔ̃ ye zu ka yayu. Lo hɛ̃ e anzɔ̃ ye ni ko zu ya, aza tɔrɔ tɛrɛ e, na lo mɛ ya, e na Yezo Kristo e ti bo kɔi.

⁴ Uzu ti Nzapa lingɔ sese ko, lo pia ndo lo sara e lo kpa ya, e na Yezo Kristo e ti bo kɔi, wadila bɛ e ati vuruni, ko ta ni bela e na lo ye kɔi ma.

⁵ Lo ye e, la lo pia ndo lo hɛ̃ nyɔ lo ya, e ti aya ni, na lo ye ko la Yezo Kristo ali tɛrɛ e. Lo li ndo so, na lo mɛ ya, bɛ lo ade na lo ni.

⁶ Lo li ndo so ya, e gonda ni na lo ti nzɔ̃ bɛ tɛ ni mɛ kotani buai. Lo li ndo nzɔ̃ bɛ ni hɛ̃ e gɛgɛrɛ, na lo mɛ ya, e na Nyi lo ti kpɔ̃ bɛ lo e ti bo kɔi.

⁷ Na lo kwa tɛ Yezo Kristo la Nzapa atɔ̃ e na ya siɔ ye, lo ka nga lɛ lo ndo siɔ ye tɛ e. Ye mɛ ndo Nzapa ali ko, afa ya, kota nzɔ̃ bɛ

⁸ mɛ lo li hɛ̃ e ko, aɔ nyɔ kpɔ̃ ni. Lo hɛ̃ e ndara nga na kɔdɛ sĩ ya,

⁹ e hĩnga na lo mɛ ndo lo hɔndɛ na azi gã. Lo hɛ̃ ndo nyɔ lo ya, ni li gbanda ló ni ko na se bɛ ni ti ndo Yezo Kristo.

¹⁰ Se ngoi alengbi gbanda ko, ló mɛ gbanda lo li lo mɛ: lo bombi gbanda aye mɛ ka yayu zu na omɛ ge tise zu ya, Yezo Kristo adu Gbia na ndo ni.

¹¹ Nzapa ndoli ye zu nga ma se mɛ lo hɛ̃ na nyɔ lo, lo ndoli nga ni na se bɛ lo nvɛni. Lo pia ndo lo sara e Ayuda lo kpã ya, e na Yezo Kristo e ti bo kɔi.

¹² Lo li ndo so ya, e mɛ ndo e lɛndɛrɛ Yezo Kristo kɔzoni ko, e gonda ni Nzapa na lo ti kota ndima tɛ ni.

¹³ Nzapa aso ndo ĩ mɛ ta ĩ Ayuda ma, ĩ mɛ ĩ ti nga azi tɛ lo na lo ti Nzɔ̃ Pa mɛ ĩ ma. Ngoi mɛ ndo ĩ ma na Nzɔ̃ Pa mɛ adu bɛta tɛnɛ ko, ĩ ye ndo lo tɛ Yezo Kristo, la Nzapa ahɛ̃ nga ĩ Tɔrɔ Santo mɛ ndo lo ko kapa ni. Tɔrɔ Santo adu nga ma nda tɛ Nzapa mɛ lo minya tɛrɛ ĩ, so fangɔ ya, ĩ azi tɛ ni.

¹⁴ Nzapa ahɛ̃ e Tɔrɔ Santo ni ya, adu nga ma nzango so fangɔ ya, ni na hɛ̃ngɔ e anzɔ̃ ye mɛ ndo ni ko kapa ni hɛ̃ azi tɛ ni. Lo pa hɛ̃ e ya, ti biani, e lua gbanda anzɔ̃ ye ni, na ngoi mɛ gbanda ni onzi songɔ e. Wa é gonda lo na lo ti kota ndima tɛ lo!

Sambela tɛ Polo

¹⁵ Na lo ni la, ngoi mɛ mbi ma ya, ĩ dɛ bo na yengɔ lo tɛ Yezo Kristo kpɔ, ĩ ndoye nga azi tɛ Nzapa zu ko,

¹⁶ mbi ndohɛ̃ sia kɔli hɛ̃ Nzapa ngoi zu na lo tɛ ĩ. Na ngoi sambela tɛ mbi ko, mbi ndosambela nga hɛ̃ ĩ.

¹⁷ To e Nzapa mɛ na ndima, lo mɛ ndo Gbia tɛ e Yezo Kristo ndovɔrɔ ko, mbi ndohũnda lo ya, lo hɛ̃ ĩ Tɔrɔ Santo, ko Tɔrɔ Santo ni asa ndara bɛ ĩ, wa ĩ hĩnga lo nzɔ̃ni.

¹⁸ Mbi ndohũnda lo ya, lɛ ĩ azi yango ngbɛ̃, wadila ĩ hĩnga anzɔ̃ ye mɛ ĩ lengbi ti lɛndɛrɛngɔ ni. Adu anzɔ̃ ye mɛ ndo lo Nzapa lo pa ya, ĩ na luangɔ ni. Lo pa ndo ni na ngoi mɛ ndo lo ili na ĩ. Mbi ndohũnda lo ya, ĩ hĩnga ya, anzɔ̃ ye mɛ lo bata hɛ̃ azi tɛ lo ko, adu nzɔ̃ni buai.

¹⁹ Mbi ndohũnda nga lo ya, ĩ hĩnga nguru tɛ lo mɛ kotani sĩ, ko ĩ hĩnga nga se mɛ lo ndoza e na nguru ni ko, e mɛ awa yengɔ lo tɛ lo. Nguru ni adu bo kpengba nguru mɛ lo fa,

²⁰ na ngoi mɛ ndo lo so na Yezo Kristo na pɛ kwá, lo kpã lo na ndo kɔti ti lo ka yayu.

²¹ Kai ko, Nzapa akpã Yezo Gbia na ndo atɔrɔ zu mɛ na ndima, na nguru, ala mɛ ndolɛ nga gbia ka lɛ ndozu. Ko ili Yezo aɔ aili zu mɛ azi ndodi na ngoi olo, nga na omɛ azi na dingɔ na ngoi mɛ gbanda na gangɔ.

²² Nzapa akpã ndo lo na ndo aye zu, akpã ndo nga lo bɛ li azi ti Eklezia.

²³ Ko azi ti Eklezia adu nga ma ngbonga tɛrɛ lo. Yezo Kristo ndosa nguru tɛ lo na lɛ sese zu, kanda na ya Eklezia la nguru ni ndosi yango.