Kɔlɔsɛ 4 - Fana Ngbangɔ 1987

¹ Ĩ ato gbia ambɛ, ale ĩ li bɛta ye tɛrɛ ambɛ tɛ ĩ, ĩ li nga ye mɛ mbiri mbiri tɛrɛ la. Ale ĩ hĩnga ya, ĩ nga na To Gbia ĩ ka yayu.

Wangɔ

² Ta ĩ nzɛ̃ na sambelangɔ Nzapa ma, ta ĩ wo na lɛ ĩ na ya sambela mɛ ĩ ndosambela na lo ma. Ale ĩ ndohɛ̃ lo sia kɔli.

³ Ale ĩ sambela nga lo na lo tɛ e ya, lo zi hɛ̃ e lege, ko e pa hɛ̃ azi lo tɛ Yezo Kristo mɛ Nzapa ahɔndɛ na azi. Adu na lo ti pangɔ lo ni la mbi na olo ge ya bɔlɔkɔ.

⁴ Ale ĩ sambela Nzapa hɛ̃ mbi ya, mbi pa lo ni yango hɛ̃ azi na se mɛ alengbi, wa ala hĩnga.

⁵ Ale ĩ du na ndara na popo tɛ apaganɔ, ĩ li nzɔ̃ ye ngoi zu mɛ se ĩ lua lege ti lingɔ ni.

⁶ Ale tɛnɛ tɛ ĩ adu tɛnɛ mɛ ndode bɛ zo ngoi zu, ale tɛnɛ ni adu na mongo. Ale ĩ hĩnga nga gbinyangɔ tɛnɛ hɛ̃ zo kɔi kɔi na kɔdɛ mɛ nzɔ̃ni.

Ndangba balangɔ

⁷ Tisikɛ na pangɔ hɛ̃ ĩ pa tɛ mbi zu. Lo nyita e wa Kristo ti kpɔ̃ bɛ e. Lo ndoli kwa tɛ Gbia Yezo Kristo na bɛ lo kɔi, lo nga la e na lo e ndoli kwa tɛ Gbia.

⁸ Mbi to lo nvɛni hɛ̃ ĩ ya, lo pa hɛ̃ ĩ se mɛ e da ge, ko lo ti lo sa nga nguru bɛ ĩ.

⁹ Lo na mbanga wa tɛ ĩ Onezimɛ mɛ bɛta nyita e wa Kristo ti kpɔ̃ bɛ e la na gangɔ ka tɛ ĩ. Ala na pangɔ hɛ̃ ĩ alo zu mɛ ndosi ge.

¹⁰ Aristarkɛ mɛ e na lo ge ya bɔlɔkɔ, na Marko mɛ nyingambi tɛ nyita Barnabasi ko, ala bala ĩ. Se lo Marko lo si ka tɛ ĩ ko, ĩ yamba lo nzɔ̃ni. Adu tɛnɛ mɛ ndo mbi pia mbi pa hɛ̃ ĩ la.

¹¹ Mbanga kɔli kɔi mɛ ili lo Yezo, andoili nga lo ya Yustusi ko, lo bala nga ĩ. Na popo tɛ Ayuda mɛ agbinya bɛ la aye lo tɛ Yezo Kristo ko, bo azi ko ota la e na la e ndoli kwa ti lo Lɛngɔ Gbia tɛ Nzapa. Ala zu ndo na bɛ mbi sĩ.

¹² Epafrasi mɛ mbanga wa tɛ ĩ abala ĩ. Lo wa kwa tɛ Yezo Kristo, ta lo ndonzɛ̃ na sambelangɔ Nzapa kpengbani na lo tɛ ĩ ma. Lo ndosambela na lo tɛ ĩ ya, lɛ ĩ azi na lege tɛ Nzapa, ĩ ngbã na yengɔ lo tɛ Nzapa kpengbani, ko ĩ hĩnga nga lingɔ ye zu mɛ Nzapa ndoye.

¹³ Tɛnɛ mɛ mbi lengbi ti tɛnɛngɔ na lo tɛ Epafrasi lo mɛ: lo ndohũ pɛnɔ sĩ na ya kwa tɛ lo na lo tɛ ĩ, na lo tɛ awa Laodisea, nga na lo tɛ awa Ierapolisi.

¹⁴ Luka mɛ mɔnganga tɛ e ti kpɔ̃ bɛ e, na Damasi abala ĩ.

¹⁵ Ĩ bala hɛ̃ e ayata e awa Kristo ti Laodisea, ĩ bala nga hɛ̃ e Nimfa mɛ nyita e ti wali, nga na azi ti Eklezia mɛ ndobombi tɛrɛ la ka ya da tɛ lo so vɔrɔngɔ Nzapa.

¹⁶ Ngoi mɛ gbanda ĩ di mbɛti olo wɛ ko, í to ni ka tɛ awa Kristo ti Laodisea ya, ala di nga ni. Ko mbɛti mɛ mbi to nga hɛ̃ awa Kristo ti Laodisea, ngoi ko la ala to ni hɛ̃ ĩ ko, ĩ nvɛni ĩ di nga ni na gbɛlɛ azi.

¹⁷ Ale ĩ pa hɛ̃ Arsipɛ ya, kwa mɛ Gbia Yezo ahɛ̃ lo ko, ale lo li ni nzɔ̃ni, ta lo zia ni wawa ma.

¹⁸ Mbi bala ĩ. Na ndo olo ti balangɔ ĩ ko, mbi Polo la mbi su tɛnɛ ni na ti mbi nvɛni. Ale ĩ da bɛ ĩ na mbi ge ya bɔlɔkɔ. Nzapa ali bɛ nzɔ̃ bɛ hɛ̃ ĩ ma ke!