Kɔlɔsɛ 3 - Fana Ngbangɔ 1987

¹ Nzapa aso ndo ĩ na Yezo Kristo na pɛ kwa kɔi. Ko ale ĩ gi aye mɛ ka yayu, ka ndo mɛ Yezo Kristo adu da, ka ndo kɔti ti Nzapa.

² Ta ĩ kpa bɛ ĩ na ndo aye ti lɛ sese ma, kanda ale ĩ kpa bɛ ĩ na ndo aye ti yayu.

³ Ta sanga ma, ĩ kpili ndo, ĩ so, ko ĩ ndodu fana du tɛ ĩ ndoni kɔi na Kristo ka tɛ Nzapa, ko ta azi ndohũ du ni ko ma.

⁴ Yezo Kristo lo bɛta du tɛ ĩ. Ko ngoi mɛ gbanda lo ga lo fa tɛrɛ lo ko, bɛta du tɛ ĩ asi yango, ko ĩ lua nga ndima ndoni kɔi na lo.

Ngbina du na fana du

⁵ Na lo ni ko, ĩ hã gwɛ̃ ti lingɔ asiɔ ye ti lɛ sese zu mɛ ka bɛ ĩ, ĩ zi. Asiɔ ye ni lo mɛ: siɔ ye ti kamɛnɛ, na pite, na gwɛ̃ ti tɛrɛ, na siɔ gwɛ̃ ye, nga na gwɛ̃ ye, (ta sanga ma, dungɔ na gwɛ̃ ye adu nga ma vɔrɔngɔ angbilondo).

⁶ Adu na lo ti gi tɛrɛ asiɔ ye ni ko gbanda la ngɔnzɔ agbɔ̃ Nzapa, ko lo hɛ̃ etumbu hɛ̃ azi mɛ ndokɛ̃ mangɔ nyɔ lo.

⁷ Ngoi mɛ ndo asiɔ ye ni ako ndo bɛ ĩ ko, se du tɛ ĩ ndo la.

⁸ Ko na olo ko, ale ĩ dɔ aye olo zu ĩ zia. Aye ni lo mɛ: ta ĩ li ngɔnzɔ ma, ta ĩ li ya ngɔnzɔ agbɔ̃ afɔ̃ ĩ ma. Ta ĩ guru zo ma, ta ĩ tɛnɛ nga tɛnɛ ti kamɛnɛ ma.

⁹ Ta ĩ pa nvɛnɛ hɛ̃ afɔ̃ ĩ ma, ta sanga ma, ĩ zia ndo ngbina du tɛ ĩ, na ngbina se li ye tɛ ĩ,

¹⁰ ko ĩ mu du ti fanani. Nzapa mɛ ali e la ndolɛkɛ fana du ni ngoi zu ya, ati nga ma du tɛ ni, ko ĩ hĩnga ni nzɔ̃ni nvɛni.

¹¹ Na lo ni ko, ta ɔngbingɔ na popo tɛ Ayuda na azi mɛ ta Ayuda ma, ta ɔngbingɔ na popo tɛ azi mɛ afa ganza na awa popo ma, ta ɔngbingɔ na popo tɛ azi mɛ le la adɛ na ya mbingo, na azi mɛ ta ahĩnga mbɛti ma, ta ɔngbingɔ nga na popo tɛ ambɛ na abɔrɔ ma. Ta sanga ma, Yezo Kristo na ndo azi kwɛ, lo nga na ya bɛ azi tɛ lo zu.

¹² Ĩ du nga ava Nzapa, Nzapa ndoye ĩ, lo sara nga ĩ lo kpa azi tɛ lo. Na lo ni ko, ale ĩ ma vundu tɛ afɔ̃ ĩ, ĩ du na nzɔ̃ bɛ, ĩ ngara tɛrɛ ĩ, í du adede azi, ĩ du nga na yɔngɔrɔ bɛ.

¹³ Se afɔ̃ ĩ ali ĩ siɔni ko, í gbe bɛ ĩ, ĩ ka lɛ ĩ ndo siɔ ye mɛ ala li tɛrɛ ĩ. Ale ĩ ka lɛ ĩ ndo asiɔ ye tɛ afɔ̃ ĩ, nga ma se ko ndo la Gbia aka na lɛ lo ndo asiɔ ye tɛ ĩ.

¹⁴ Ko ye mɛ aɔ aye ko zu la: yengbingɔ, ta sanga ma, yengbingɔ la ndobombi ĩ ndoni kɔi nvɛni.

¹⁵ Mangbingɔ mɛ Yezo Kristo ndoli ya, adu na popo tɛ ĩ ko, abata bɛ ĩ ma ke! Ta sanga ma, Nzapa aili ĩ ya, ĩ du nga ma apɛnzɛ ngbonga tɛrɛ zo kɔi, ko ĩ du nga na mangbingɔ. Ale ĩ ndohɛ̃ nga lo sia kɔli.

¹⁶ Ngbondo tɛnɛ tɛ Yezo Kristo mɛ na anzɔ̃ lo da sĩ adu bɛ ka ya bɛ ĩ ma ke! Ale ĩ ndoha afɔ̃ ĩ na lo tɛ Nzapa, ĩ tisa nga la na ndara zu, ale ĩ ndoye bia hɛ̃ Nzapa na bɛ ĩ zu, ĩ ye bia ti ya Buku tɛ Nzapa, na abia Nzapa, nga na ambanga bia mɛ Tɔrɔ Santo afa na ĩ. Ale ĩ ndoye abia ni ko hɛ̃ Nzapa ndoni kɔi na hɛ̃ngɔ lo sia kɔli.

¹⁷ Aye zu mɛ ĩ ndoli, na atɛnɛ zu mɛ ĩ ndotɛnɛ ko, ale ĩ li ni na ili Gbia Yezo. Ale ĩ li nga ni ndoni kɔi na hɛ̃ngɔ sia kɔli hɛ̃ To e Nzapa ti ndo lo.

Se li ye tɛ awa Kristo

¹⁸ Ĩ awe kɔli, ale ĩ bi tɛrɛ ĩ hɛ̃ akɔ ĩ, ta sanga ma, adu nzɔ̃ni ka lɛ Gbia.

¹⁹ Ĩ akɔ we, ale ĩ ye awe ĩ, ta ĩ li ngɔnzɔ hɛ̃ la ma.

²⁰ Ĩ ayangambi, na ya alo zu ko, ale ĩ ma nyɔ awa dúngɔ ĩ, ta sanga ma, adu ye mɛ ndode bɛ Nzapa.

²¹ Ĩ ato aya, ale ta ĩ li ya ngɔnzɔ agbɔ̃ aya ĩ ma, so mi agbɔ̃ la.

²² Ĩ ambɛ, na ya alo zu ko, ale ĩ ma nyɔ ato gbia ĩ mɛ ge lɛ sese. Ta ĩ ma nyɔ la so dengɔ na bɛ la bo na ngoi mɛ lɛ la tɛrɛ ĩ ma, kanda ale ĩ ma nyɔ la na bɛ ĩ kɔi, na lo ti kpɛngɔ mɛ ĩ ndokpe na Gbia.

²³ Kwa zu mɛ ĩ ndoli, abɛ adu sia ko, ale ĩ li ni na bɛ ĩ kɔi, ma bere ĩ ndoli ni hɛ̃ Gbia, kanda ale ta ĩ li ni ma bere ĩ ndoli ni bo hɛ̃ azi ma.

²⁴ Ale ĩ hĩnga ya, Gbia ahɛ̃ ĩ gbanda mbana gɛrɛ ĩ: ĩ lua gbanda anzɔ̃ ye mɛ lo bata hɛ̃ azi tɛ lo. Ta sanga ma, Yezo Kristo la bɛta Gbia mɛ ĩ ndoli kwa hɛ̃ lo.

²⁵ Kanda zo ko ndoli ye siɔni ko, lo lua gbanda etumbu alengbi na siɔ ye mɛ lo li. Ta sanga ma, azi zu ka lɛ Nzapa bo kwɛ kɔi.