Kɔlɔsɛ 2 - Fana Ngbangɔ 1987

¹ Ĩ awa Kristo ti Kɔlɔsɛ, na ĩ azi ti kɔdɔrɔ ti Laodisea, nga na ĩ azi zu mɛ ta ĩ dɛ ĩ hĩnga mbi ma ko, mbi ye ya ale ĩ zu ĩ hĩnga ya, kwa mɛ mbi ndoli na lo tɛ ĩ ko, adu kpengbani nvɛni.

² Mbi ndoli kwa ni ya, mbi sa nguru bɛ ĩ, ĩ yengbi na bɛ ĩ kɔi, wa ĩ ti bo kɔi, ĩ du nga na bɛta kɔdɛ, wa ĩ hĩnga lo tɛ Nzapa nzɔ̃ni, ló mɛ ndo lo hɔndɛ na azi. Eó ni adu Yezo Kristo nvɛni.

³ Yezo Kristo la ndohɛ̃ e ndara zu, lo ndoli nga ya, e hĩnga aye zu. Ko ndara mɛ lo ndohɛ̃ e, nga na aye mɛ lo ndoli ya e hĩnga ko, adu ngbondoni sĩ.

⁴ Mbi pa hɛ̃ ĩ so ya, ta ĩ ye zo ahanda ĩ na atɛnɛ ti poroso ma.

⁵ Abɛ se mbi du yɔngɔrɔni na ĩ ko, bɛ mbi na ndo ĩ, ko bɛ mbi ndode na lo ko la ĩ ndodɔ nɔ na lege tɛ Nzapa na seni, nga na lo ko la ĩ ndobaba bo yengɔ lo tɛ Yezo Kristo kpengbani.

Ale du tɛ ĩ adu nga ma tɛ Yezo Kristo

⁶ Wa nga ma la ĩ ye ya, Yezo Kristo adu Gbia tɛ ĩ ko, ale du tɛ ĩ adu nga ma tɛ lo.

⁷ Ale ĩ fɔ̃ tɛrɛ ĩ na lo, nga ma se mɛ mbatana kɛkɛ ndoli ka ya sese. Ale ĩ kpengba na lo tɛ lo, nga ma se mɛ da ndokpengba na lo ti gu gɛrɛ da. Ale ĩ kpengba na ya lo yengɔ tɛ ĩ, nga ma se ko ndo aha na ĩ. Ale ĩ ndohɛ̃ nga Nzapa sia kɔli ma wo ma.

⁸ Ale ĩ du na kpengba lɛ, so azi ahanda ĩ na atɛnɛ ti ndara mɛ adu gɛgɛrɛ, ko ĩ ti ambɛ tɛ la. Ndara ni ko adu ndara tɛ azi ti lɛ sese, adu nga ndara tɛ atɔrɔ mɛ ka lɛ ndozu, kanda ta adu ndara tɛ Yezo Kristo ma.

⁹ Ngoi mɛ ndo Yezo amu tɛrɛ zo ko, du tɛ Nzapa na ndima tɛ lo zu na ya tɛrɛ Yezo.

¹⁰ Ko ĩ lua du tɛ Yezo zu, na lo mɛ ya, ĩ na lo ĩ ti bo kɔi. Atɔrɔ zu mɛ na nguru, ndole nga gbia ka lɛ ndozu ko, lo Gbia ti ndo la.

¹¹ Nga ma la ĩ na lo ĩ ti bo kɔi ko, afa ndo ĩ ganza, ko ta adu ganza mɛ azi ndofa ma, kanda adu ganza mɛ alo ka tɛ Yezo Kristo, ganza mɛ ndohã gwɛ̃ ti tɛrɛ zo azi.

¹² Ngoi mɛ ndo ahɛ̃ ĩ batisimɔ ko, adu nga ma ahɔ ndo ĩ na Yezo Kristo kɔi, ko Nzapa aso nga ĩ na lo kɔi, na lo mɛ ya, ĩ ye lo ti nguru mɛ Nzapa aso na Yezo Kristo na pɛ kwa.

¹³ Ndo uzu ko, ĩ ndo azi mɛ tɔrɔ tɛrɛ ĩ akpi, na lo mɛ ya, ĩ ndoli ndo asiɔ ye, ĩ ndo awa popo, alengbi ya, ĩ ndo apaganɔ. Kanda na olo ko, Nzapa aso ĩ na Yezo Kristo na pɛ kwá. Lo ka lɛ lo ndo asiɔ ye zu mɛ e na ĩ na ni.

¹⁴ Ndo uzu ko, e ndo na sende li e, na lo mɛ ya, e bi ndo ndia tɛ Nzapa. La Nzapa atiɔ sende ni, ko adu ma bere lo minya ni na li Yezo, na ngoi mɛ ndo Yezo akpi ka ndo krusi.

¹⁵ Na lo kwá mɛ ndo Yezo Kristo akpi ka ndo krusi ko, Nzapa anwɔ nguru tɛ asiɔ tɔrɔ zu mɛ ndole nga gbia ka lɛ ndozu. Lo dɛ uzu tɛ la, lo dɔ la na nɔ na gbɛlɛ azi, ma bere ala awa bɔlɔkɔ, so fangɔ na azi ya, Nyi ni Yezo aɔ la.

¹⁶ Na lo ni ko, ta ĩ ye ya, zo agia bɛ ĩ na lo ye mɛ ĩ ndotɛ, nga na lo ye mɛ ĩ ndonyɔ ma. Ta ĩ ye nga ya, zo agia bɛ ĩ na lo ti aye mɛ ĩ ndoli na lá ti yenga, na fana nzɛ̃, nga na lá ti wɔngɔ tɛrɛ ma.

¹⁷ Ta aye ko zu adu abɛta ye ma, kanda adu limɔ ti bɛta ye mɛ na gangɔ gesi. Bɛta ye ni la Yezo Kristo.

¹⁸ Ambanga azi ndohɛ̃ pɛnɔ hɛ̃ tɛrɛ la nvɛni, ndovɔrɔ aangelo, ndokpã bo bɛ la ndo aye mɛ ala ndohũ na Suma. Ko ta ĩ ye ya, gi tɛrɛ azi ko agia bɛ ĩ ma, na lo mɛ ya, ta ĩ ndoli ye nga ma se tɛ la ma. Ala ndoyakɛ tɛrɛ la sĩ, ala ndoyakɛ tɛrɛ la ni sanga sanga, ko se dangɔ bɛ tɛ la adu nga ma se dangɔ be tɛ azi ti lɛ sese.

¹⁹ Ta ala ndofɔ̃ tɛrɛ la na Gbia Yezo Kristo ma. Yezo Kristo adu nga ma li zo, ko awa Kristo adu nga ma ngbonga tɛrɛ zo. Yezo la ndohɛ̃ nguru hɛ̃ awa Kristo, lo ndobombi la kɔi, ko ala ndomai nga ma se mɛ bɛ Nzapa aye.

Ĩ du azi mɛ ĩ na Yezo ĩ kpili la ĩ so kɔi

^20-21 Ĩ na Yezo Kristo ĩ kpili ndo kɔi, ko ta ĩ de na gbe ti atɔrɔ mɛ ka lɛ ndozu ma. Wa nda mɛ ĩ ndodu du tɛ ĩ nga ma tɛ azi ti lɛ sese nɛ? Ambanga azi ndolu andia ya: “Ta mɔ mu ye olo ma,” “Ta mɔ tara ye olo na nyɔ mɔ ma,” “Ta mɔ bɔrɔ tɛrɛ ye olo ma.” Ko nda mɛ ĩ ndotɔndɔ andia ni ko nɛ?

²² Andia ni ko adu na lo ti aye mɛ ndowɛ na ngoi mɛ azi ali ni na kwa. Andia ni na alo mɛ andoha, alo bo ka tɛ azi.

²³ Biani, azi ndomu andia ni nga ma andia mɛ na ndara, na lo mɛ ya, ala ndopa ya, ale zo avɔrɔ Nzapa, abi tɛrɛ lo, ahɛ̃ nga pɛnɔ hɛ̃ tɛrɛ lo. Kanda ta andia ni ndoza zo ya, zo afɔ̃ bɛ lo na ndo gwɛ̃ ti tɛrɛ lo ma.