Kɔlɔsɛ 1 - Fana Ngbangɔ 1987

Balangɔ

¹ Mbi Polo mɛ Nzapa asara mbi na se bɛ lo nvɛni akpa ya, mbi du wa pangɔ kwa tɛ Yezo Kristo, nga na Timɔte mɛ nyita e wa Kristo la e to mbɛti olo hɛ̃ ĩ.

² E to mbɛti ni hɛ̃ ĩ azi tɛ Nzapa mɛ ka kɔdɔrɔ ti Kɔlɔsɛ, ĩ mɛ nga ayata e awa Kristo mɛ ĩ ye lo tɛ Yezo na bɛ ĩ kɔi. E bala ĩ. To e Nzapa ali be nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

Polo abĩ sia kɔli bɛ Nzapa

³ Ngoi mɛ e ndosambela na lo tɛ ĩ ko, e ndohɛ̃ sia kɔli ngoi zu hɛ̃ Nzapa mɛ To Gbia tɛ e Yezo Kristo.

⁴ Ta sanga ma, e ma pa ti yengɔ mɛ ĩ ye na lo tɛ Yezo Kristo, nga na pa ti yengɔ mɛ ĩ ye na azi tɛ Nzapa zu,

⁵ na lo mɛ ya, ĩ ndolɛndɛrɛ anzɔ̃ ye mɛ Nzapa abata hɛ̃ ĩ ka yayu. Ti kɔzoni, na ngoi mɛ ndo ĩ ma na Nzɔ̃ Pa mɛ adu bɛta lo tɛ Nzapa ko, apa ndo hɛ̃ ĩ lo ti anzɔ̃ ye ni ko.

⁶ Nzɔ̃ Pa ni ndomu lɛ sese zu, ko lɛ kwa ni ndosi yango, kwɛ kɔi nga ma se ko ndo asi na ni ka tɛ ĩ, na lá ko ndo ĩ ma na lo ti bɛta nzɔ̃ bɛ tɛ Nzapa ti kɔzoni, ko ĩ hĩnga ni biani nvɛni.

⁷ Epafrasi ndo la aha ĩ na Nzɔ̃ Pa ni lo fɔ̃ e ti kpɔ̃ bɛ e, lo nga la e na lo e ndoli kwa tɛ Gbia. Lo ndoli kwa tɛ Yezo Kristo ka tɛ ĩ na se lɛ e na bɛ lo kɔi.

⁸ Lo pa hɛ̃ e ya, ĩ ndoye afɔ̃ ĩ na lo nguru tɛ Tɔrɔ Santo.

⁹ Na lo ni la ato na lá ko ndo e ma na pa tɛ ĩ ko, ta e ndozia sambelangɔ na lo tɛ ĩ ma. E ndohũnda Nzapa ya, lo sa kɔdɛ gba na bɛ ĩ, wa ĩ hĩnga nga ye mɛ bɛ lo aye, ko ĩ hĩnga ye ni na ndara zu nga na kɔdɛ zu mɛ Tɔrɔ Santo ndohɛ̃ zo,

¹⁰ wa se mɛ ĩ du du mɛ Gbia Yezo aye, ko ĩ li nga ye zu mɛ ndode bɛ lo la. Ĩ na lingɔ anzɔ̃ ye ndɛ̃ ndɛ̃ ndɛ̃, ko ĩ nga na hĩngangɔ Nzapa ɔngɔ ti uzu.

¹¹ E ndohũnda nga Nzapa ya, lo kpengba na bɛ ĩ nzɔ̃ni na lo nguru tɛ lo mɛ na ndima, wadila na ya lo zu ko, ĩ gbe bɛ ĩ, ĩ du nga na yɔngɔrɔ bɛ.

¹² Ale ĩ hɛ̃ sia kɔli hɛ̃ To e Nzapa na dengɔ bɛ, na lo ko la lo zi lege hɛ̃ ĩ ya, ĩ lengbi nga ti Iuangɔ anzɔ̃ ye mɛ ni bata hɛ̃ azi tɛ ni ka Kɔdɔrɔ tɛ ni mɛ na ya vuru ndo.

¹³ Lo kpata e ka ti Satana mɛ gbia ti mbingo. Lo mu e lo kpa ka Kɔdɔrɔ Gbia tɛ Nyi lo ti kpɔ̃ bɛ lo.

¹⁴ Na lo tɛ Nyi lo ni la Nzapa atɔ̃ e na ya siɔ ye, aka nga lɛ lo ndo asiɔ ye tɛ e.

Yezo Kristo adu Gbia ti ndo aye zu

¹⁵ Ta zo kɔi ahũ Nzapa ma, kanda Yezo Kristo mɛ azi ahũ lo ko, lo limɔ tɛ Nzapa. Lo kɔzo Nyi Nzapa, lo ɔ azi zu, lo ɔ nga aye zu mɛ Nzapa ali.

¹⁶ Ta sanga ma, ti ndo lo ndo la Nzapa ali aye zu mɛ ka yayu na omɛ ge tise, aye mɛ azi ndohũ na aye mɛ ta azi ndohũ ma, atɔrɔ zu mɛ na ndima, na nguru, ndole nga gbia ka lɛ ndozu. Nzapa ali aye zu ti ndo Yezo Kristo, nga na lo tɛ Yezo Kristo.

¹⁷ Yezo ndo da uzu ti aye zu, na lo tɛ lo la aye zu abombi tɛrɛ la ndoni kɔi.

¹⁸ Lo bɛ li azi ti Eklezia, ko azi ti Eklezia adu ngbonga tɛrɛ lo. Eklezia ato na ndo lo. Lo la Nzapa aso ndo lo kɔzoni na pɛ kwa, ya lo du Gbia ti ye zu.

¹⁹ Ta sanga ma, Nzapa ahɛ̃ nyɔ lo ya, du tɛ ni zu adu na ya tɛrɛ Nyi ni.

²⁰ Lo hɛ̃ nga nyɔ lo ya, ni tongbi songo na popo tɛ ni na azi, nga na aye zu ti ndo Nyi ni. Lo tongbi songo ni na lege ti kwá mɛ ndo Nyi lo akpi ka ndo krusi. Ko na lo ni ko, lo kpã mangbìngɔ na popo tɛ lo na azi, nga na aye zu mɛ ge tise, nga na aye zu mɛ ka ndozu.

²¹ Ndo uzu ko, ĩ ndo nga yɔngɔrɔni na Nzapa, ĩ ndo awa kɛ̃ngɔ lo na lo ti asiɔ dangɔ bɛ mɛ ndo ĩ na ni, nga na lo ti asiɔ ye mɛ ndo ĩ ndoli.

²² Ko na lo ni ko, Nzapa atongbi songo na popo tɛ lo na ĩ, na lege ti kwá mɛ ndo Nyi lo amu tɛrɛ zo akpi. Lo tongbi songo ni ya, ĩ ti azi tɛ ni, azi mɛ na vuru bɛ, azi mɛ ta ali ye mɛ ni lengbi ti belangɔ la na lo ni ma.

²³ Ko ale ĩ ngbã bo na yengɔ lo tɛ Yezo Kristo, ko ĩ ngbã na ni ka ka ka, ta ĩ zia ma. Ale ĩ lɛndɛrɛ bo tɛnɛ ti Nzɔ̃ Pa mɛ ndo ĩ ma. Nzɔ̃ Pa ni la apa hɛ̃ azi zu mɛ ge lɛ sese, ko nga bo Nzɔ̃ Pa ni la mbi Polo mbi ti wa pangɔ ni.

Kwa mɛ Nzapa ali? Polo ya lo li hɛ azi ti Eklezia

²⁴ Na olo ko, mbi ndosaba na lo ti apɛnɔ mɛ mbi ndohũ na lo tɛ ĩ. Ta sanga ma, mbi ndohũ apɛnɔ ni ko na ngbonga tɛrɛ mbi ya, mbi gu na nyɔ apɛnɔ mɛ ndo Yezo Kristo ahũ na lo tɛ azi ti Eklezia mɛ adu nga ma ngbonga tɛrɛ lo.

²⁵ Mbi ti wa kwa tɛ azi ti Eklezia, Nzapa la ahɛ̃ mbi kwa ni ko ya, mbi li na lo tɛ ĩ. Kwa mɛ lo hɛ̃ mbi la, kwa ti pangɔ hɛ̃ azi tɛnɛ tɛ lo zu.

²⁶ Tɛnɛ ni adu lo mɛ ndo lo hɔndɛ na azi zu gã, ko tɛnɛ ni nga la lo fa na azi tɛ lo na olo mɛ.

²⁷ Ta sanga ma, lo ye fangɔ na la ya, lo mɛ ndo ni hɔndɛ na azi ko, adu lo mɛ nzɔ̃ni buai, lo mɛ aɔ aye zu, ko lo ni adu na lo tɛ azi zu. Lo ni lo mɛ: Yezo Kristo ndodu ka ya bɛ ĩ, na lo ni ko, ĩ ndolɛndɛrɛ ya, ĩ lua nga gbanda ndima ka tɛ Nzapa.

²⁸ Ko Yezo Kristo la e ndopa lo tɛ lo hɛ̃ azi. E ndotisa zo kɔi kɔi, e ndoha nga zo kɔi kɔi na ndara zu ya, zo zu ko la ana Yezo Kristo ati bo kɔi ko, zo ni ati nga ma zo mɛ Iɛ lo azi biani na lege tɛ Nzapa.

²⁹ Mbi ndoli kpengbani sĩ na nguru mɛ Yezo Kristo ahɛ̃ mbi ya, mbi onzi na kwa ni.