Aebreo 9 - Fana Ngbangɔ 1987

Se vɔrɔngɔ Nzapa ge lɛ sese nga na se vɔrɔngɔ lo ka yayu

¹ Kɔzo ngbanga ndo na andia mɛ ndofa azi na lege ti vɔrɔngɔ Nzapa. Ko azi ndolɛkɛ ndo mbanga gbágbá kɔi ge lɛ sese ya, avɔrɔ Nzapa da.

² Andowa ndo gofa ti tandi so ya gbágbá ni. Andomu ndo ma bɔngɔ mɛ lau, afa na ya gofa ni, ko ya ni ati sɛ. Andoili ndo ya gofa ti uzu ya: “Ndo mɛ santo.” Ndo ni ko adu ndo mɛ andokpã na mɔinda, nga na mɛsa, ko andokpã mapa na ndo mɛsa ni, alu na Nzapa.

³ Mbanga ya gofa ni ka pɛ ma bɔngɔ ni, andoili ndo ya gofa ni ko ya: “Ndo mɛ santo sĩ nvɛni.”

⁴ Andokpã ndo mɛsa ti wɔrɔ, ko andozɔ yɔmbɔ ndo ni. Akpã nga ndo sandugu kɔi mɛ alɛkɛ tɛrɛ ni zu na wɔrɔ. Ko sandugu ni ndofa ndo ngbanga mɛ Nzapa na azi tɛ lo agbe. Aye mɛ ndo akpã na ya sandugu ni lo mɛ: ta kɔi mɛ alɛkɛ na wɔrɔ, na tɛ mɛ ili ni la manɛ na ya ta ni, na ngómbé tɛ Arona mɛ ndo kugbe ako tɛrɛ ni, nga na atɛnɛ mɛ asu andia ti ngbanga na lɛ ni.

⁵ Alɛkɛ angbilondo nga ma aangelo mɛ na ndima akpã so ndo sandugu ni, so fangɔ ya, Nzapa ndodu ndo ko. Aangelo ni azara ya kpange ti la na ndo mɛ andolu Nzapa na ye da ya, lo ka lɛ ndo siɔ ye tɛ azi. Ko ta ngoi ti kambisangɔ lo ti aye ni ko zu lo mɛ ma.

⁶ Ngoi mɛ aye zu adɛ̃ wɛ ko, awa lungɔ Nzapa na ye so ndoli ka ya da ti uzu bi kɔi kɔi so lingɔ kwa tɛ la.

⁷ Ko bo kota gbia tɛ awa lungɔ Nzapa na ye la ndoli tɛ lo ka ya da ti sɛ. Lo ndoli kai bo fani kɔi na ya buru kɔi. Na lingɔ lo kai ko, lo ndomu mɛnɛ tɛrɛ sa, lo li na ni so lungɔ na Nzapa. Lo ndolu mɛnɛ ni ya, Nzapa aka lɛ lo ndo asiɔ ye mɛ ni nvɛni ni li, ko Nzapa aka nga lɛ lo ndo asiɔ ye mɛ azi mɛ ndɛ̃ ali na ndo li la.

⁸ Na lo ni ko, Tɔrɔ Santo ndofa ya, oko la ya da ti uzu ade bo dazu lá kwɛ ko, ta lege ade azi ya, azi ali ka ndo mɛ Santo sĩ nvɛni ma.

⁹ Aye ni ko ndofa aye mɛ ndosi na olo mɛ. Oko afa ya, aye mɛ azi ndohɛ̃ Nzapa, nga na asa mɛ ala ndolu na lo ko, ta alengbi ti gbinyangɔ bɛ la ya, ala ti abɛta anzɔ̃ azi ka lɛ Nzapa ma.

¹⁰ Aye ko zu adu bo andia mɛ aba lo ti tɛ ti tɛngɔ, aba aye ti nyɔngɔ, aba nga atɔrɔke ndɛ̃ ndɛ̃ ndɛ̃ ti onzingɔ ló na tɛrɛ zo. Andia ni ko adu bo na lo ti aye ti lɛ sese, ko andia ni ko ade ali kwa, nga ka Nzapa ati alɛkɛ aye zu ati fanani hĩ wadila.

¹¹ Ko Kristo aga ndo nga ma kota gbia tɛ awa lungɔ Nzapa na ye. Na lo tɛ lo la e lua anzɔ̃ lo mɛ e na ni na olo. Ndo mɛ lo ndoli kwa tɛ lo da ko, adu ndo mɛ ngbondoni sĩ, adu nga bɛta nzɔ̃ ndo aɔ gofa ti tandi ti uzu. Ta azi la alɛkɛ ndo ni ko ma, alengbi ya, ta ndo ni so lɛ sese olo ma.

¹² Ngoi mɛ Kristo ali bo fani kɔi ti buai ka ndo mɛ Santo sĩ nvɛni ko, ta lo mu ndo mɛnɛ tɛrɛ ato ngasã ngbaga, na mɛnɛ tɛrɛ ambɔngu bagara la lo lu na Nzapa ma. Kanda lo lu ndo Nzapa na mɛnɛ tɛrɛ lo nvɛni. Na lo ni la lo so e ti kaka buai.

¹³ Andoho ato ngasã, na ato abagara, ko amu mɛnɛ tɛrɛ la, akĩkĩ na tɛrɛ azi mɛ abi ndia tɛ Ayuda. Andoho nga abagara, azɔ, ko amu mbi wá ni, ahĩni na tɛrɛ azi. Andoli nga so ya, aonzi lo na tɛrɛ azi ko la abi ndia.

¹⁴ Singa na mɛnɛ tɛrɛ asa mɛ aonzi lo na tɛrɛ azi, o singa na mɛnɛ tɛrɛ Kristo mɛ aɔ mɛnɛ tɛrɛ asa na nguru ma! Kristo ndo nga ma nyi ngasã ngbaga mɛ ta ye ti siɔni kɔi na tɛrɛ lo ma. Lo ka ndo tɛrɛ lo nvɛni na nguru tɛ Tɔrɔ Santo mɛ kaka, lo lu na Nzapa. Mɛnɛ tɛrɛ lo na kpongɔ bɛ e ya, ta e li agɛgɛrɛ ye ma, wadila e li kwa hɛ̃ Nzapa mɛ le lo ngɛ̃.

¹⁵ Na lo ni la Kristo adu wa lɛkɛngɔ popo tɛ Nzapa na azi na lege ti fana ngbanga. Lo li so ya, azi mɛ ndo Nzapa aili la ko, ala lua anzɔ̃ lo mɛ lo Nzapa lo ko kapa ni hɛ̃ la. Ko anzɔ̃ lo ni ko na ngbãngɔ ti la ti buai. Ala lengbi ti luangɔ anzɔ̃ lo ni, na lo mɛ ya, Kristo akpi ndo so tɔ̃ngɔ azi mɛ ndo ali asiɔ ye na ngoi ti ngbina ngbanga.

¹⁶ E hĩnga ya, se zo asu mbɛti mɛ afa se mɛ alengbi ti kangbingɔ na andũ ye tɛ lo na pɛ kwá tɛ lo ko, ale lo kpi hĩ, wadila akangbi aye tɛ lo.

¹⁷ Ta sanga ma, aye tɛ zo mɛ zo ndosu na mbɛti ya akangbi nga ma andũ ye ko, na ngoi mɛ lo dɛ lɛ lo ngɛ̃, ta alengbi ti kangbingɔ aye ni ma. Kanda bo na ngoi mɛ lo kpi hĩ, wa alengbi ti kangbingɔ aye ni.

¹⁸ Se tɛ ngbina ngbanga ndo nga la. Ko nga bo mɛnɛ tɛrɛ asa mɛ ndo ndosa, la alɛkɛ ngbina ngbanga.

¹⁹ Ti biani, Mɔizɛ ĩ pa tɛnɛ ti ndia kɔi kɔi hɛ̃ azi zu we ko, lo mu mɛnɛ tɛrɛ ambɔngu bagara mɛ aho hongɔ, aalingbi na ngu, lo mu nga mbambu kɛkɛ mɛ ili ni la izɔpɛ, lo bombi na kwa tɛrɛ ngasã ngbaga mɛ ahĩni bengba langi tɛrɛ ni, lo do na mɛnɛ ni, lo kĩ na tɛrɛ buku ti ndia, nga na tɛrɛ azi zu.

²⁰ Lo pa ya: “Mɛnɛ olo afa ya, ĩ na Nzapa ĩ gbe ngbanga. Ko Nzapa ahɛ̃ nyɔ hɛ̃ ĩ ya, ĩ tɔndɔ andia ti ngbanga ni.”

²¹ Mɔizɛ akĩkĩ ndo nga mɛnɛ ni na ndo gofa ti tandi, nga na ndo aye zu mɛ ndo andomu avɔrɔ na Nzapa.

²² Na se nyɔ ndia tɛ Ayuda ko, andomu mɛnɛ tɛrɛ asa, akĩkĩ na tɛrɛ aye sĩni ya, aye ni ko ati nzɔ̃ni ka lɛ Nzapa. Ko se ta mɛnɛ asa tise ma ko, ta Nzapa aka nga lɛ lo ndo asiɔ ye tɛ azi ma.

Mɛnɛ tɛrɛ Yezo Kristo ndohã siɔ ye

²³ Aye zu mɛ ndo andomu avɔrɔ na Nzapa ge lɛ sese ko, adu bo limɔ ti abɛta ye mɛ andovɔrɔ na lo ka yayu. Andomu ndo mɛnɛ tɛrɛ asa, akĩkĩ na tɛrɛ aye ni ko ya, ati nzɔ̃ni ka lɛ Nzapa. Wa na lo ti abɛta ye mɛ andovɔrɔ na Nzapa ka yayu ko, ale mɛnɛ tɛrɛ Yezo mɛ aɔ mɛnɛ tɛrɛ asa, asa nga na lo ni.

²⁴ Kota gbia tɛ awa lungɔ Nzapa na ye, ali ndo ka gbe gofa mɛ azi la awa ni, ko gofa ni ko adu bo limɔ ti ndo mɛ Nzapa ndodu da ka yayu. Kanda Yezo Kristo ali tɛ lo ka yayu nvɛni, ko lo ndole kongba tɛ e ka tɛ Nzapa.

²⁵ Buru kɔi kɔi ko, kota gbia tɛ awa lungɔ Nzapa na ye ndomu mɛnɛ tɛrɛ sa, lo li na ni ka ndo mɛ Santo sĩ nvɛni. Kanda tɛ Kristo ko, ta lo li ndo kai so kangɔ tɛrɛ lo fani sĩni ma.

²⁶ Se adu ya, lo ka ndo tɛrɛ lo fani sĩni ko, ale lo hũ ndo pɛnɔ fani sĩni, ato na ngoi ko ndo Nzapa ali na sese, asi na lá olo mɛ. Ti biani ko, lo ga na olo mɛ bo fani kɔi ti buai na ngoi mɛ sese adoli ti wɛngɔ, lo ka tɛrɛ lo so hãngɔ siɔ ye zingɔ.

²⁷ Zo zu ndokpi kwá bo fani kɔi, so pɛni wa Nzapa afa ngbanga tɛ lo.

²⁸ Ko se mɛ nga Kristo aka tɛrɛ lo bo fani kɔi so hãngɔ siɔ ye tɛ azi gba zingɔ la. Lo diri gbanda lo ga, ta lo ga gbanda so hãngɔ siɔ ye zingɔ ma, kanda lo ga gbanda so songɔ azi mɛ ndoku lo.