Aebreo 8 - Fana Ngbangɔ 1987

Yezo kota gbia tɛ awa lungɔ Nzapa na ye na lo tɛ e

¹ Tɛnɛ mɛ e ndotɛnɛ ko, ĩ ma ngbondo tɛnɛ mɛ na ya ni lo mɛ: nzɔ̃ni la e na kota gbia tɛ awa lungɔ Nzapa na ye. Lo ndoli kwa hɛ̃ Nzapa na lo tɛ e. Lo ka yayu, lo du na ndo kɔti ti Gbia Nzapa, Nzapa mɛ nguru tɛ lo aɔ nguru zu.

² Kota gbia tɛ awa lungɔ Nzapa na ye ndoli kwa tɛ lo na ndo mɛ santo, alengbi ya, lo ndoli kwa ni na gbe bɛta gofa ti tandi mɛ Gbia Nzapa nvɛni awa. Ta zo la awa gofa ni ma.

³ Zo ko la ndokpã lo gbia tɛ awa lungɔ Nzapa na ye ko, andokpã lo ya, lo lu Nzapa na ye, ko ale kota gbia tɛ awa lungɔ Nzapa na ye mɛ ndoli kwa na lo tɛ e, adu nga na ye ti lungɔ na Nzapa.

⁴ Se adu ya, lo du ge le sese ko, ale ta lo du bɛ wa lungɔ Nzapa na ye ma, na lo mɛ ya, ge lɛ sese ko, awa lungɔ Nzapa na ye mɛ ndolu lo na ye na se nyɔ ndia tɛ Ayuda ko, ala da.

⁵ Kwa mɛ awa lungɔ Nzapa na ye ndoli ko, adu bo limɔ ti alo mɛ ka yayu. Ko nga bo ló mɛ ndo asi na Mɔizɛ la. Ngoi mɛ ndo Mɔizɛ aga so wangɔ gofa ti tandi ko, Nzapa apa ndo hẽ lo ya: “Wa gofa ni bo na seni zu, nga ma se mɛ mbi fa na mɔ ka ndo hɔtɔ.”

⁶ Ko na olo ko, Nzapa ahɛ̃ Yezo kwa mɛ aɔ kwa tɛ awa lungɔ Nzapa na ye. Ta sanga ma, Yezo la alɛkɛ popo tɛ Nzapa na azi na lege ti fana ngbanga mɛ aɔ ngbangɔ ti uzu. Ko na lo ti fana ngbangɔ ni ko la Nzapa ako hɛ̃ e anzɔ̃ kapa mɛ aɔ akapa ti uzu.

⁷ Se adu ya, kɔzo ngbangɔ ali ndo kwa na seni ko, ale ta agi ndo lege ti gbengɔ ngbangɔ ti sɛ ma.

⁸ Ko e hũ ya, ta ngbangɔ ni ko ali ndo kwa na seni ma, na lo mɛ ya, ta Ayuda azia ndo lingɔ asiɔ ye ma. Ko Nzapa abela ndo la na lo ni, nga ma se mɛ lo pa na ni ya: “Lá kɔi gbanda ko, Mbi Gbia na awa Izrayelɛ, nga na ale tɛ Yuda E gbe gbanda fana ngbangɔ.

⁹ Ta ngbangɔ ni adu gbanda nga ma ngbangɔ Mɛ ndo mbi na akotara la e gbe, Na ngoi mɛ ndo mbi gbɔ̃ ti la ka Egipito mbi si na la ma. Ngbangɔ ti uzu mɛ ndo mbi na la e gbe ko, ala weza ndo ni. Na lo ni ndo la mbi dɔ la, mbi zia. Mbi Gbia tɛ la mbi pa so.

¹⁰ Wa ĩ ba ngbangɔ mɛ gbanda mbi na awa Izrayelɛ E gbe na ngoi ni ko lo mɛ: Mbi kpã gbanda andia tɛ mbi ka ya bɛ la, Wa ala hĩnga ndia ni. Mbi du gbanda Nzapa tɛ la, Ko ala du gbanda azi tɛ mbi.

¹¹ Ko adu gbanda kwa gɛgɛrɛ ya, Zo kɔi na popo tɛ la ati aha fɔ̃ lo na lo tɛ mbi, Apa nga hɛ̃ fɔ̃ lo ya, lo hĩnga mbi Gbia Nzapa. Ta sanga ma, azi zu ahĩnga gbanda mbi. Ato ka ndo ambumbusɛ azi, asi ka ndo akokɛnɛ azi ko, Ala zu ahĩnga gbanda mbi.

¹² Mbi ka gbanda le mbi ndo asiɔ ye tɛ la. Ko ta mbi ti mbi da gbanda bɛ mbi na ni ma.”

¹³ Ngoi mɛ Nzapa ĩ tɛnɛ tɛnɛ na lo ti fana ngbanga ko, afa ya, kɔzo ngbanga ati ngbinani. Ko ye ko la ati ngbinani, agbe nga ko, angbã yakere, ye ni ko amumana.