Aebreo 7 - Fana Ngbangɔ 1987

Mɛlkisedɛkɛ wa lungɔ Nzapa na ye

¹ Mɛlkisedɛkɛ ni ndo gbia ti kɔdɔrɔ mɛ ili ni la Salɛmɛ, lo nga ndo wa lungɔ Nzapa mɛ ka yayu na ye. Mbanga lá kɔi ko, Abrahama agwe to, anwɔ agbia mɛ ndɛ̃. Ngoi mɛ lo lo kai lo so ndodiri ko, Mɛlkisedɛkɛ anɔ, angoro lo, asunu nga lo.

² Ko na ya aye sui kɔi zu mɛ ndo Abrahama alua ka lɛ to ko, lo hɛ̃ ndo ye kɔi hɛ̃ Mɛlkisedɛkɛ. Ti uzu, nda ili ti Mɛlkisedɛkɛ ni la: “Gbia mɛ ndoli ye na seni.” Lo nga gbia ti Salɛmɛ, alengbi ya, “Gbia mɛ ndokpã mangbingɔ na popo tɛ azi.”

³ Ta ahĩnga ndo to lo, bere ta lo, bere kotara lo kɔi ma. Ta ndo kɔi mɛ atɛnɛ na tɛnɛ ti dúngɔ lo, bere ti kwá tɛ lo da ma. Lo nga ma Nyi Nzapa, ta sanga ma, kwa tɛ lo ti lungɔ Nzapa na ye angbã buru na buru.

⁴ Wa ĩ ba hĩ, Mɛlkisedɛkɛ adu zo ti ndima! Ko na ya aye sui kɔi zu mɛ ndo kɔzo kotara e Abrahama alua ka lɛ to ko, lo hɛ̃ ndo kɔi hɛ̃ Mɛlkisedɛkɛ.

⁵ Atara Levi mɛ awa lungɔ Nzapa na ye na se nyɔ ndia ko, ahɛ̃ ndo nyɔ hɛ̃ la ya, ala sɔrɔ ye kɔi na ya aye sui kɔi zu ka ti awa Izrayɛlɛ. Alengbi ya, awa lungɔ Nzapa na ye ndosɔrɔ ndo aye ni ko ka ti ayata la nvɛni mɛ ndo nga atara Abrahama.

⁶ Ta Mɛlkisedɛkɛ ndo tara Levi ma, kanda Abrahama ahɛ̃ ndo lo ye kɔi na ya aye sui kɔi zu mɛ ndo lo lua ka lɛ to. Na ndo ni ko, Mɛlkisedɛkɛ asunu nga ndo Abrahama mɛ Nzapa ako kapa hɛ̃ lo.

⁷ Zo mɛ ndosunu fɔ̃ lo la aɔ fɔ̃ lo mɛ lo sunu lo, oko ta kitɛ da ma.

⁸ Wa tɛ awa lungɔ Nzapa na ye mɛ ndosɔrɔ ye kɔi na ya aye sui kɔi zu na ti azi ko, ala ndokpili kwá. Kanda tɛ Mɛlkisedɛkɛ mɛ ndo alua ye na ti Abrahama ko, ta lo kpi ndo kwá ma, nga ma se mɛ Buku tɛ Nzapa apa na ni.

⁹ E lengbi ti pangɔ ya, na ngoi mɛ ndo Abrahama ahɛ̃ Mɛlkisedɛkɛ ye kɔi na ya aye sui kɔi zu mɛ lo lua ka le to ko, Levi ahɛ̃ nga ndo tɛ lo. Levi adu zo mɛ ndo atara lo ndosɔrɔ ye kɔi na ya aye sui kɔi na ti azi.

¹⁰ Ta sanga ma, abɛ se ta ade ndo adú Levi ma ko, afa ya, lo ndo na ya tɛrɛ kotara lo Abrahama, na ngoi mɛ Mɛlkisedɛkɛ anɔ so ngorongɔ Abrahama.

¹¹ Ngoi mɛ ndo Nzapa alu ndia hɛ̃ awa lzrayɛlɛ ko, lo sara ndo atara Levi lo kpã la ya, ala du awa lungɔ ni Nzapa na ye. Wa se adu ya, atara Levi ali ndo kwa mɛ Nzapa ahɛ̃ la na seni lai ko, ale awa lungɔ lo na ye adu ndo bo na li nɔ tɛ Arona. Ko ta lo lengbi ndo ti tongɔ zo mɛ ndɛ̃ mɛ na li nɔ tɛ Mɛlkisedɛkɛ ya, lo lu ni na ye ma.

¹² Ta sanga ma, na ngoi mɛ ndo Nzapa akpã zo ti li nɔ mɛ ndɛ̃ ya, lo du wa lungɔ ni Nzapa na ye ko, ale agbinya nga ndo ndia.

¹³ Gbia tɛ e Yezo mɛ e ndotɛnɛ tɛnɛ tɛ lo ko, lo na ya ale mɛ ndɛ̃, ta zo kɔi na ya ale tɛ lo ali kwa ti lungɔ Nzapa na ye bɛ gbɔ ma.

¹⁴ E hĩnga nzɔ̃ni ya, adú ndo lo na ya ale tɛ Yuda, ko ngoi mɛ ndo Mɔizɛ atɛnɛ tɛnɛ na lo tɛ awa lungɔ Nzapa na ye ko, ta lo tɛnɛ ndo tɛnɛ kɔi na lo ti ale tɛ Yuda ma.

Mbanga wa Iungɔ Nzapa na ye mɛ lo nga ma Mɛlkisedɛkɛ

¹⁵ Ko ĩ ba ye mɛ afa nga alo ko zu yango lo mɛ: mbanga wa lungɔ Nzapa na ye aga wɛ, lo nga ma Mɛlkisedɛkɛ.

¹⁶ Ta akpã ndo lo wa lungɔ Nzapa na ye na se nyɔ ndia mɛ aba ale tɛ awa lungɔ Nzapa na ye ma. Kanda lo ti ndo wa lungɔ Nzapa na ye, na lo mɛ ya, lo na nguru ti ngbãngɔ lɛ lo ngẽ buru na buru.

¹⁷ Ta sanga ma, Buku tɛ Nzapa apa ya: “Mɔ na dungɔ wa lungɔ Nzapa na ye Buru na buru nga ma Mɛlkisedɛkɛ.”

¹⁸ Na lo ni la Nzapa aho ndo ngbina ndia, na lo mɛ ya, ta ndia ni ko ndo na nguru ma, ta ndia ni alengbi nga ndo ti lingɔ ye kɔi ma.

¹⁹ Ti biani ko, ta ndia tɛ Mɔizɛ ali ndo ya, zo ati bɛta nzɔ̃ zo ka lɛ Nzapa ma. Kanda nzɔ̃ lo kɔi mɛ aɔ ndia tɛ Mɔizɛ da, ko e ndolɛndɛrɛ nzɔ̃ lo ni. Na lo ni ko, e lengbi ti ingɔ tɛrɛ e ka tɛ Nzapa.

²⁰ Mbanga ye kɔi mɛ ndɛ̃ nga da: adu ngɛ mɛ ndo Nzapa anyɔ. Na ngoi mɛ ndo ambanga azi ati awa lungɔ Nzapa na ye ko, ta Nzapa anyɔ ndo ngɛ ma.

²¹ Kanda ngoi mɛ lo ĩ kpã Yezo wa lungɔ lo na ye ko, lo nyɔ ndo ngɛ hɛ̃ Yezo ya: “Mbi Gbia Nzapa mbi nyɔ ngɛ wɛ ya: ‘Mɔ na dungɔ wa lungɔ mbi na ye buru na buru.’ Ta mbi na diringɔ na nyɔ mbi ma.”

²² Na lo ni ko, Yezo adu nga ma nzango mɛ ndofa ya, ta Nzapa aweza gbanda fana ngbanga mɛ lo na azi agbe ma. Fana ngbanga ni nzɔ̃ni aɔ ngbina ngbanga.

²³ Mbanga ɔngbingɔ mɛ ndɛ̃ lo mɛ: awa lungɔ Nzapa na ye ndokpili ndo, ko ala ndodɔ ndo lingɔ kwa tɛ la azia, nda mɛ ndo ala ti ma wo ma la.

²⁴ Kanda Yezo ndongbã lɛ lo ngɛ̃ buru na buru, ko ta lo zia kwa tɛ lo ti lungɔ Nzapa na ye ya, zo mɛ ndɛ̃ ali ma.

²⁵ Na lo ni la lo lengbi ti songɔ azi mɛ ndoi tɛrɛ la ka tɛ Nzapa ti ndo lo. Lo lengbi ti songɔ la ti buai, ta sanga ma, lo ndongbã lɛ lo ngɛ̃ buru na buru so sambelangɔ Nzapa na lo tɛ la.

²⁶ Yezo ndo la zo mɛ alengbi ti dungɔ kota gbia tɛ awa lungɔ Nzapa na ye na lo tɛ e. Lo santo, ta lo li siɔ ye bɛ kɔi ma, bɛ lo vuruni. Nzapa ahã ndo lo na popo tɛ awa lingɔ siɔ ye, aya lo, akpã ka yayu.

²⁷ Ta Yezo nga ma azi mɛ ndɛ̃ mɛ akota gbia tɛ awa lungɔ Nzapa na ye ma. Ta adu ya, lo ndolu Nzapa na ye lá kɔi kɔi na lo ti siɔ ye tɛ lo nvɛni uzu, wa so pɛni ko, lo lu Nzapa na ye na lo ti siɔ ye tɛ azi mɛ ndɛ̃ ma. Lo lu ndo Nzapa na ye bo fani kɔi ti buai, na ngoi mɛ ndo lo ka tɛrɛ lo nvɛni hɛ̃ Nzapa.

²⁸ Azi mɛ ndo ati awa lungɔ Nzapa na ye, na se nyɔ ndia tɛ Mɔizɛ ko, ta ala du ndo abɛta anzɔ̃ azi ma. Ko na pɛ ndia tɛ Mɔizɛ ko, Nzapa anyɔ ndo ngɛ, ko lo kpã Nyi lo mɛ bɛta nzɔ̃ zo ti buai ya, lo du kota gbia tɛ awa lungɔ ni Nzapa na ye buru na buru.