Aebreo 6 - Fana Ngbangɔ 1987

¹ Na lo ni, akɔzo alo mɛ ndo aha na e na lo tɛ Yezo Kristo wɛ ko, ta e ti e manda ni ma. E gwe bo uzu, é manda alo mɛ alengbi na azi mɛ lɛ la azi na lege tɛ Nzapa. Akɔzo alo ni ko adu nga ma gu gɛrɛ da mɛ ndo awa wɛ, ko ta andowa gu gɛrɛ da fani se ma. Akɔzo alo ni ko lo mɛ: lo ti gbinyangɔ bɛ, na lo ti ziangɔ asiɔ ye mɛ ndoto zo ya kwá, na lo ti yengɔ lo tɛ Nzapa,

² na lo ti batisimɔ ndɛ̃ ndɛ̃ ndɛ̃ mɛ azi ndomu, na lo ti kpãngɔ ti ndo zo ya, Nzapa asunu lo na ya kwa tɛ lo, na lo ti songɔ na pɛ kwá, nga na lo ti ngbanga tɛ azi mɛ gbanda Nzapa afa. Lo fa gbanda ngbanga, ko ngbanga ni angbã kaka.

³ E gwe uzu, oko adu ye mɛ se Nzapa aye ko, e li ni la.

⁴ Ĩ hĩnga ya, se azi adɔ yengɔ lo tɛ Yezo azia, akɛ̃ nga ni buai ko, ta kɔdɛ mɛ ya, awa la, ko ala ti gbinya bɛ la da ma. Ta sanga ma, ala dɔ ndo nɔ na ya vuru ndo tɛ Nzapa. Ala lua ndo anzɔ̃ ye ti ti Nzapa, ala lua nga ndo Tɔrɔ Santo.

⁵ Ala ma ndo ka gbɛ tɛrɛ la ya, tɛnɛ tɛ Nzapa adu nzɔ̃ni, ala lua nga ndo nguru ti lɛngɔ gbia tɛ Nzapa mɛ gbanda na singɔ.

⁶ Abɛ nga so ko, ala ti diri ndoli siɔ ye. Ko ta kɔdɛ mɛ ya, ati awa la, ko ala gbinya bɛ la da ma. Ye ko la ala li ko, adu nga ma ala ti ndogɔngɔ Nyi Nzapa ka ndo krusi, ko ala ndoguru nga lo na gbɛlɛ azi.

⁷ Ngoi ko la sese ndonyɔ ngu mɛ ndoni fani sĩni ko, sese ahɛ̃ nzɔ̃ tɛ mɛ alengbi ti zangɔ azi mɛ alu ni, ko oko afa ya, Nzapa asunu sese ni.

⁸ Wa se sã ti kĩ nga na asiɔ sã ako na sese ni ko, sese ni ati gɛgɛrɛ. Nzapa na zóngangɔ sese ni bo lo mɛ, ko lo nga na zɔngɔ ni na wá, ya ni gbɛ̃ ni.

⁹ Aya bua, bɛ se e tɛnɛ nga so ko, ta e ndokpã bɛ e ngbũ na lo tɛ ĩ ma. E hĩnga ya, ĩ ndodɔ nɔ na nzɔ̃ lege mɛ adu lege ti songɔ kwá.

¹⁰ Nzapa ndoli ye na seni, kwa mɛ ndo ĩ li hɛ̃ ayata ĩ awa Kristo, ko ĩ dɛ ĩ li ni kpɔ ko, ta bɛ lo na lingɔ na ni ma. Kwa ni ndofa yengɔ mɛ ĩ ye na lo.

¹¹ Kanda e ndosepara ya, zo kɔi kɔi na popo tɛ ĩ ali kwa ni na gonvɛnɛ, ko lo li bo ni ngbĩi asi ka nda ni, wa gbanda aye zu mɛ ĩ ndolɛndɛrɛ ko, ĩ lua ni zu na seni.

¹² Ta e ye ya ĩ ti awa ndɛkɔ ma. E ye ya, ĩ mu se li ye tɛ azi mɛ aye lo tɛ Nzapa. Ala ndogbe bɛ la, ko Nzapa ndohɛ̃ la ye mɛ lo ko kapa ni.

Kapa tɛ Nzapa ndoti na se nyɔ lo

¹³ Ngoi mɛ ndo Nzapa ako kapa hɛ̃ Abrahama ko, lo nyɔ ndo nga ngɛ. Lo nyɔ ndo ngɛ ni na ili lo nvɛni, na lo mɛ ya, ta zo mɛ ndɛ̃ mɛ aɔ lo, ya lo nyɔ ngɛ na ili lo da ma.

¹⁴ Lo pa ndo ya: “Biani, mbi sunu gbanda mɔ, ko mbi li gbanda ya, atara mɔ asu kpaya kpaya.”

¹⁵ Abrahama adu ndo na yɔngɔrɔ bɛ so kungɔ ya, kapa ni ati na seni, ko lo lua ndo ye mɛ Nzapa ako kapa ni hɛ̃ lo.

¹⁶ Ngoi ko la azi ndonyɔ ngɛ ko, ala ndonyɔ ni na ili zo mɛ aɔ la. Ko ngɛ ndoonzi kitɛ na popo tɛ la.

¹⁷ Azi mɛ ndo Nzapa ako kapa ti hɛ̃ngɔ la ye ko, lo ye ndo fangɔ na la yango ya, ta ni na diringɔ na nyɔ ni bɛ gbɔ ma. Nda mɛ ndo lo ko kapa, lo nyɔ nga ngɛ la.

¹⁸ Na lo ti ngɛ mɛ ndo Nzapa anyɔ, nga na lo ti kapa mɛ ndo lo ko ko, ta lo lengbi ti diringɔ na nyɔ lo ma, ta lo lengbi nga ti pangɔ nvɛnɛ ma. Na lo ni la e mɛ e kpɛ, e nɔ ka tɛ Nzapa ya, lo bata e ko, lo sa nguru ma wo ma na bɛ e ya, e kpã bɛ e kpengbani na ndo ye mɛ lo ko kapa ni hɛ̃ e.

¹⁹ Ye mɛ e ndokpã bɛ e ndo ni ka tɛ Nzapa ko, ye ni ko ndogbɔ̃ tɔrɔ tɛrɛ e kpengbani, nga ma se mɛ andozi nwa agwe gbe ngu ya, agbɔ̃ masua kpengbani alo na ni tise. Na lo ni ko, e lengbi ti ɔngɔ ka pɛ ma bɔngɔ mɛ akangbi ya kota da Nzapa, ko e si ka ndo ti santo sĩ nvɛni mɛ Nzapa da.

²⁰ Yezo anɔ ndo kai uzu tɛ e, ko lo nɔ ndo kai so e. Lo ti kota gbia tɛ awa lungɔ Nzapa na ye, nga ma Mɛlkisedɛkɛ, ko lo ngbã na lingɔ kwa tɛ lo buru na buru.