Aebreo 5 - Fana Ngbangɔ 1987

¹ Na popo tɛ azi ko, Nzapa ndosara kota gbia tɛ awa lungɔ lo na ye akpã ya, lo li kwa hɛ̃ ni na lo tɛ azi. Lo ndolu Nzapa na ye ya, Nzapa aka lɛ lo ndo asiɔ ye mɛ afɔ̃ ni ali.

² Zo mɛ wa lungɔ Nzapa na ye ko, lo nvɛni nga zo mɛ bɛ lo woni. Na lo ni ko, lo lengbi ti rnangɔ vundu tɛ azi zu mɛ ta ahĩnga lo tɛ Nzapa ma. Lo lengbi nga ti mangɔ vundu tɛ azi zu mɛ ayu lege tɛ Nzapa.

³ Oko lo nvɛni nga zo mɛ bɛ lo woni ko, ta lo ndolu Nzapa na ye ya, Nzapa aka lɛ lo bo na ndo asiɔ ye tɛ azi mɛ ndɛ̃ ma. Kanda ale wa lungɔ Nzapa na ye alu nga Nzapa na ye ya, Nzapa aka lɛ lo na ndo asiɔ ye tɛ ni nvɛni.

⁴ Ta zo ndogbɔ̃ lo ti dungɔ kota wa lungɔ Nzapa na ye gbɔ̃ngɔ ya, ni kpã tɛrɛ ni nvɛni, wa ni lua ndima ma. Nzapa la ndoili zo ya, lo du wa lungɔ ni na ye, nga ma se ko ndo lo ili na Arona.

⁵ Se mɛ ndo nga ta Yezo Kristo agbɔ̃ lo ti dungɔ kota gbia tɛ awa lungɔ Nzapa na ye gbɔ̃ngɔ, ya ni kpã na tɛrɛ ni nvɛni, wa ni lua ndima ma la. Nzapa la apa hɛ̃ lo ya: “Mɔ Nyi mbi, ko na lá olo mɛ ko, Mbi pa ya mbi To mɔ.”

⁶ Nzapa apa nga na ndo mɛ ndɛ̃ na ya Buku tɛ lo ya: “Mɔ na dungɔ wa lungɔ mbi Nzapa na ye Buru na buru nga ma Mɛlkisedɛkɛ.”

⁷ Ngoi mɛ ndo Yezo ge lɛ sese ko, lo hĩnga ndo ya, Nzapa na nguru ti songɔ ni na ya kwá. Ko na ya sambela tɛ lo ko, lo ndovɔrɔ ndo tɛrɛ lo hɛ̃ Nzapa na kɔngɔ nga na tongɔ to. Ko Nzapa ama ndo lo, na lo mɛ ya, lo bi ndo tɛrɛ lo hɛ̃ Nzapa.

⁸ Abɛ nga lo ndo Nyi Nzapa ko, lo ti ndo wa mangɔ nyɔ To lo Nzapa na lege ti apɛnɔ zu mɛ ndo lo hũ.

⁹ Ngoi mɛ lo ĩ ti bɛta nzɔ̃ zo wɛ ko, lo ti nga Wa songɔ azi zu mɛ ndoma nyɔ lo, la azi ni alua songɔ kwá ti kaka.

¹⁰ Ko Nzapa akpã ndo lo kota gbia tɛ awa lungɔ Nzapa na ye, nga ma Mɛlkisedɛkɛ.

Ĩ du na kpengba lɛ so ĩ dɔ lege tɛ Nzapa ĩ zia

¹¹ E na tɛnɛ ma wo ma ti tɛnɛngɔ hɛ̃ ĩ na ndo tɛnɛ olo mɛ, ko adu kpengbani ya, e kambisa nda tɛnɛ ni hɛ̃ ĩ, ta sanga ma, ta ĩ ndoma nda tɛnɛ hiɔ ma.

¹² Ĩ manda alo ti tɛnɛ tɛ Nzapa aɔ ngoi yɔngɔrɔni. Ko adu ndo ya, ĩ ti awa hangɔ ni na azi. Kanda ta ĩ dɛ ĩ hĩnga alo ni nzɔ̃ni ma, ko ale ati aha ĩ na akɔzo alo ti tɛnɛ tɛ Nzapa mɛ ndo aha na ĩ uzu. Oko afa ya, ta ĩ de ĩ kpengba ti tɛngɔ kpengba tɛ ma, ĩ dɛ nga ma ayangambi mɛ ndoã mɛ.

¹³ Zo ko la adɛ ã mɛ kpɔ ko, lo dɛ bo nyingambi, ta lo lengbi ti hĩngangɔ bɛta tɛnɛ na tɛnɛ ti nvɛnɛ ma.

¹⁴ Kanda kpengba tɛ alengbi na akangba. Ala ndobinga bɛ la, wa ala hĩnga ye mɛ nzɔ̃ni na ye mɛ siɔni.