Aebreo 4 - Fana Ngbangɔ 1987

¹ Nzapa ako kapa hɛ̃ e ya, e lengbi ti singɔ ka ndo mɛ ni ndowɔ na tɛrɛ ni, ko e na ni e wɔ tɛrɛ e da. Wa na lo ni ko, ĩ du na kpengba lɛ, so mbanga zo na popo tɛ ĩ azanga singɔ ka ndo ni ko.

² Ta sanga ma, e ma Nzɔ̃ Pa nga ma se ko ndo akotara e ama na ni na ngoi mɛ ndo ala ka bɛ ndo. Ala ma ndo ni, kanda ta nzɔ̃ pa ni aza ndo la ma. Ta sanga ma, na ngoi mɛ ndo ala ma pa ni ko, ta ala ye ndo lo ni ma.

³ Kanda e azi ko la e ye lo Nzɔ̃ Pa ni ko, e na singɔ ka ndo ti wɔngɔ na tɛrɛ ni. Nzapa apa ndo lo ti ndo ni ko ya: “Ngɔnzɔ agbɔ̃ ndo mbi hɛ̃ la, ko mbi nyɔ ndo ngɛ ya: ‘Ndo mɛ mbi na azi e ndowɔ tɛrɛ e da ko, Ta ala si gbanda da bɛ gbɔ ma!’ ” Abɛ lo onzi ndo kwa tɛ lo na ngoi mɛ ndo lo li sese we ko, lo tɛnɛ ndo tɛnɛ ni ko.

⁴ Asu tɛnɛ na mbanga ndo kɔi na ya Buku tɛ Nzapa na lo ti bi ti mbara mbara ya: “Ngoi mɛ ndo Nzapa ĩ kɔ nda kwa tɛ lo zu, ĩ ti na bi ti mbara mbara ko, lo wɔ ndo tɛrɛ lo.”

⁵ Ko nga bo atɛnɛ ni ko la apa na ngoi mɛ Nzapa atɛnɛ ya: “Ndo mɛ mbi na azi e ndowɔ tɛrɛ e da ko, Ta ala si gbanda da bɛ gbɔ ma.”

⁶ Azi ko ndo la ama Nzɔ̃ Pa uzu ko, ta ala si ndo ka ndo ti wɔngɔ tɛrɛ ni ma, na lo mɛ ya, ta ala ma ndo nyɔ Nzapa ma. Ko na lo ni la Nzapa azi lege hɛ̃ azi mɛ ndɛ̃ ya, ala si ka ndo ni ko.

⁷ Nda mɛ Nzapa ati ko bi mɛ ndɛ̃, ko lo di ili bi ni ko ya: “lá olo mɛ” la. Aɔ ndo buru gba, la lo kpa tɛnɛ na nyɔ Davidi na lo ti bi ni ko. Ko ĩ ma ndo tɛnɛ ni ko wɛ. Tɛnɛ ni lo mɛ: “Na lá olo mɛ, se ĩ ma legɔ̃ Nzapa ko, Ta ĩ li kpengba li ma.”

⁸ Ti biani, se adu ndo ya, Yosue anɔ na azi ngbĩi asi na la ka ndo ti wɔngɔ na tɛrɛ ni ko, ale ta Nzapa ati tɛnɛ ndo tɛnɛ na lo ti mbanga bi mɛ ndɛ̃ ma.

⁹ Ko azi tɛ Nzapa alengbi ti wɔngɔ tɛrɛ la, nga ma se ko ndo Nzapa awɔ tɛrɛ lo na bi ti mbara mbara.

¹⁰ Ta sanga ma, zo ko asi ka ndo mɛ Nzapa na azi ndowɔ tɛrɛ la da ko, lo na wɔngɔ tɛrɛ lo na pɛ kwa tɛ lo mɛ lo onzi, nga ma se ko ndo Nzapa awɔ tɛrɛ lo na pɛ kwa tɛ lo.

¹¹ Na lo ni ko, ale e li kpengbani ya, e si ka ndo ni ko, ko é li nga ya, ta zo kɔi na popo tɛ e akɛ̃ nyɔ Nzapa ma, so ta lo si kai ma, nga ma se tɛ akotara e mɛ ndo akɛ̃ nyɔ lo, na ngoi mɛ ndo ala ka bɛ ndo, ko na lo ni ko, ta ala si ndo ka ndo ni ko ma.

¹² Ta sanga ma, tɛnɛ tɛ Nzapa adu nga ma ye mɛ ndokuma zo, tɛnɛ ni nga na nguru. Tɛnɛ ni aɔ̃, aɔ zabe mɛ ndoɔ̃ mbage na mbage. Tɛnɛ ni ndoli bɛ zo. Tɛnɛ ni adu nga ma zabe mɛ zo ndomu, akangbi na ndo mɛ abio atengbi da, ko lo si na ndo lolo. Tɛnɛ ni ndosi na dangɔ bɛ tɛ zo nga na gwɛ̃ ye mɛ ka bɛ zo yango.

¹³ Ta ye kɔi mɛ zo alengbi ti hɔndɛngɔ na Nzapa da ma. Aye zu mɛ Nzapa ali ndosi ka lɛ lo yango ngbɛ̃. Ko e kambisa gbanda hɛ̃ lo aye zu mɛ e ndoli.

Yezo lo kota gbia tɛ awa lungɔ Nzapa na ye

¹⁴ E na kota gbia tɛ awa lungɔ Nzapa na ye, lo ma ndo ngbĩi lo si ka gbɛlɛ Nzapa nvɛni, lo Nyi Nzapa, ili lo la Yezo. Na lo ni ko, lo tɛ lo mɛ e ye, la e ndopa hɛ̃ azi ko, ale e ngbã bo na yengɔ lo ni kpengbani.

¹⁵ E na kota gbia tɛ awa lungɔ Nzapa na ye, lo ndoma vundu tɛ e, na lo mɛ ya, Satana atara ndo bɛ lo na ya alo zu, nga ma se mɛ lo ndotara na bɛ e. Kanda tɛ lo ko, ta lo li ndo siɔ ye kɔi ma.

¹⁶ Na lo ni ko, ale ta bɛ e atitiri ma, kanda ale e i tɛrɛ e ka tɛ Gbia Nzapa mɛ ndoli nzɔ̃ bɛ hɛ̃ azi. E i tɛrɛ e ka tɛ lo, wa lo ka lɛ lo ndo asiɔ ye tɛ e, lo li nzɔ̃ bɛ hɛ̃ e, ko lo za nga e na ngoi mɛ e na gwɛ̃ ni.