Aebreo 3 - Fana Ngbangɔ 1987

Yezo aɔ Mɔizɛ

¹ Ayata mbi awa Kristo, na lo ni ko, ĩ mɛ Nzapa aili nga ĩ ya, ĩ du azi tɛ ni ko, ale ĩ da bɛ ĩ bo na Yezo. Nzapa ato ndo lo ya, lo du kota gbia tɛ awa lungɔ ni na ye. Lo la lo za e na ya lo tɛ lo mɛ e ye, ko lo ni nga la e ndopa hɛ̃ azi.

² Nzapa akpã ndo Yezo ya, lo li kwa hɛ̃ ni. Ko Yezo ali ndo kwa ni bɛ lo kɔi, nga ma se ko ndo Mɔizɛ ali na ni so zangɔ azi ti ya da Nzapa.

³ Andogonda wa wangɔ da aɔ da nvɛni. Mɔizɛ lo zo ti ya da tɛ Nzapa, Yezo tɛ lo nga ma wa wangɔ da, ko ale agonda Yezo aɔ Mɔizɛ.

⁴ Ti biani, zo la ndowa da, kanda Nzapa la ali aye zu.

⁵ Mɔize ali ndo kwa bɛ lo kɔi so zangɔ azi ti ya da Nzapa, kanda lo tɛ lo ndo wa lingɔ kwa. Kwa mɛ ndo lo ndoli lo mɛ: Nzapa akpã ndo lo ya, tɛne mɛ ni Nzapa ni ye pangɔ hɛ̃ azi ko, ni pa ni hɛ̃ Mɔizɛ, wa Mɔizɛ apa ni hɛ̃ la.

⁶ Yezo Kristo lo Nyi Nzapa, lo bɛ li azi zu ti ya da tɛ Nzapa, ko lo li ndo kwa tɛ lo bɛ lo kɔi. Se e ngba bo na kpãngɔ bɛ e na ndo ye mɛ e ndolɛndɛrɛ, e ngbã nga na gbengɔ bɛ e, wadila e du azi ti ya da tɛ Nzapa.

Lo ti wɔngɔ trrɛ tɛ azi tɛ Nzapa

⁷ Na lo ni la, nga ma se mɛ Tɔrɔ Santo apa ya: “Na lá olo mɛ, se ĩ ma legɔ̃ Nzapa ko,

⁸ Ta ĩ li kpengba li nga ma se tɛ akotara ĩ Mɛ ndo atɔmbɔkɔ tɛrɛ lo, Na ngoi mɛ ndo ala ka bɛ ndo ma. Na ngoi ko ndo ko, ala tara ndo bɛ lo.

⁹ Nzapa apa ya: ‘Abɛ nga akotara ĩ ahũ ndo aye ti kpɛnɛ zu Mɛ ndo mbi li na ya buru sui siɔ ko, Ala kɛ̃ ndo kia, atara bɛ mbi.

¹⁰ Nda mɛ ndo ngɔnzɔ agbɔ̃ mbi hɛ̃ la la, Ko mbi pa ndo ya: Ala ndoyu ndo ngoi zu na ya dangɔ bɛ tɛ la, Ta ala ndohĩnga lege tɛ mbi bɛ gbɔ ma.

¹¹ Ngɔnzɔ agbɔ̃ ndo mbi hɛ̃ la, La mbi nyɔ ngɛ ya: Ndo mɛ mbi na azi e ndowɔ tɛrɛ e da ko, Ta ala si gbanda da bɛ gbɔ ma.’ ”

¹² Ayata mbi, ĩ du na kpengba lɛ, so mbanga zo na popo tɛ ĩ adu na siɔ bɛ, lo kɛ̃ yengɔ lo tɛ Nzapa, ko lo dɔ nga lege tɛ Nzapa mɛ lɛ lo ngɛ̃, lo zia.

¹³ Kanda ale ĩ ndosa nguru bɛ afɔ̃ ĩ lá kwɛ lá kwɛ, so Satana ahanda ĩ ya, ĩ li siɔ ye, ko ĩ ti awa kpengba li. Ale ĩ ndosa nguru bɛ afɔ̃ ĩ na ngoi ko la andotɛnɛ hɛ̃ e tɛnɛ ti ya Buku tɛ Nzapa na lo ti “lá olo mɛ.”

¹⁴ E ndokpã ndo bɛ e uzu na ndo Yezo, wa se e ngbã bo na kpãngɔ bɛ e na ndo lo nga ma se ti uzu, ngbĩi e si ka nda ni gbɔ, wadila e ti azi mɛ e na Yezo Kristo e ndoli kwa ndoni kɔi.

¹⁵ Ĩ ma tɛnɛ mɛ Buku tɛ Nzapa atɛnɛ lo mɛ: “Na lá olo mɛ, se ĩ ma legɔ̃ Nzapa ko, Ta ĩ li kpengba li nga ma se tɛ akotara ĩ Mɛ ndo atɔmbɔkɔ tɛrɛ lo ma.”

¹⁶ Azi mɛ ndo ama legɔ̃ Nzapa, la ala tɔmbɔkɔ tɛrɛ lo ko, adu ndo ana? Adu ndo azi mɛ Mɔizɛ amu la ka Egipito asi na ni.

¹⁷ Azi mɛ ndo ngɔnzɔ agbɔ̃ Nzapa hɛ̃ la buru sui siɔ ko, adu ndo ana? Adu ndo azi mɛ ali siɔ ye, ko na lo ni ndo la ala kpili ka bɛ ndo.

¹⁸ Ngoi mɛ ndo Nzapa anyɔ ngɛ ya: “Ndo mɛ mbi na azi e ndowɔ tɛrɛ e da ko, ta ala si gbanda da bɛ gbɔ ma”, ko lo nyɔ ndo ngɛ ni ko na lo tɛ ana? Lo nyɔ ndo ni na lo tɛ azi mɛ ndo atɔmbɔkɔ tɛrɛ lo.

¹⁹ Na lo ni ko, e hũ ya, ta ala si ndo ka ndo ti wɔngɔ na tɛrɛ ni ko ma, na lo mɛ ya, ala kɛ̃ ndo yengɔ lo tɛ Nzapa.