Aebreo 2 - Fana Ngbangɔ 1987

Ta e ba tɛnɛ tɛ Nzapa ka lɛ e gɛgɛrɛ ma

¹ Oko Nzapa atɛnɛ tɛnɛ hɛ̃ e na nyɔ Nyi lo ko, ale e gbɔ̃ tɛnɛ mɛ ndo e ma kpengbani buai, so e yu lege.

² Tɛnɛ tɛ lo mɛ ndo aangelo apa hɛ̃ akotara e ko, tɛnɛ ni ngbondoni. Ko azi zu ko ndo la ta akpã bɛ la ndo tɛnɛ ni ma, bere akɛ̃ nga nyɔ lo ko, ala lua ndo etumbu mɛ alengbi na la.

³ E ma tɛnɛ mɛ adu tɛnɛ ti songɔ kwa, wa se e ba tɛnɛ ni ko ka lɛ e gegɛrɛ ko, Nzapa bo na hɛ̃ngɔ e etumbu, ta kɔdɛ ti e kpɛngɔ etumbu ni da ma. Gbia Yezo nvɛni ndo la apa tɛnɛ ni ko kɔzoni. So pɛni, azi mɛ ndo ama ka nyɔ lo aye ya, tɛnɛ ni adu ngbondoni.

⁴ Nzapa ali ndo akukuna ye, na aye ti kpɛnɛ ndɛ̃ ndɛ̃ ndɛ̃ so fangɔ ya, tɛnɛ mɛ ndo ala tɛnɛ adu bɛta tɛnɛ. Lo kangbi ndo nga azi na nguru kwa tɛ Tɔrɔ Santo nga ma se mɛ bɛ lo aye, so fangɔ ya adu bɛta tɛnɛ.

Wa fangɔ azi na lege ti songɔ kwa

⁵ Ta aangelo la Nzapa akpã la ya, ala lɛ gbia na ndo fana sese mɛ e ndopa lo ni ma, kanda adu azi la Nzapa akpã la.

⁶ Ta sanga ma, asu ka ya Buku tɛ Nzapa na ndo kɔi ya, mbanga zo kɔi apa ya: “Oo Nzapa, zo adu gɛgɛrɛ, Ko mɔ ndoda bɛ mɔ na lo ya nɛ? Zo adu ye gɛgɛrɛ, Mɔ ndobata lo na lo nɛ?

⁷ Mɔ kpã zo gbe gɛrɛ aangelo na pɛ ngoi yakere, Mɔ gonda zo, mɔ hɛ̃ nga lo ndima, Nga ma se mɛ andoli tɛrɛ gbia.

⁸ Mɔ kpã lo gbia ti ndo aye zu.” Ngoi mɛ apa ya, Nzapa akpã zo “gbia ti ndo aye zu” ko, alengbi ya, lo kpã aye zu na gbɛ gɛrɛ zo, ko ta ye kɔi mɛ lo su wenge ni da ma. Kanda na ngoi olo e da ko, ta e dɛ e hũ zo mɛ adu gbia ti ndo aye zu wɛ ma.

⁹ Kanda ye mɛ e hũ lo mɛ: Nzapa akpã ndo Yezo na gbɛ gɛrɛ aangelo na pɛ ngoi yakere ya, Yezo akpi so azi zu, na lo ti nzɔ̃ bɛ tɛ Nzapa. Na olo ko, Nzapa agonda lo, ahɛ̃ nga lo ndima na lo ti pɛnɔ ti kwa mɛ ndo lo hũ.

¹⁰ Nzapa la ali aye zu, lo nga la lo ndobata aye ni ko. Ko nzɔ̃ni ndo la lo li ya, na lege ti pɛnɔ ko, Yezo ati bɛta nzɔ zo. Lo li ndo so ya, azi gba ati aya Nzapa, wa Yezo adɛ uzu tɛ la, lo si na la ka ndo ti ndima tɛ Nzapa. Ta sanga ma, Yezo la afa la na lege ti songɔ kwá.

¹¹ Yezo mɛ ndokpo asiɔ ye tɛ azi, na azi mɛ Yezo ndokpo asiɔ ye tɛ la ko, To la kɔi bo la Nzapa. Nda mɛ ta kamɛnɛ ndogbɔ̃ Yezo na ilingɔ la ya, ala ayata ni ma la.

¹² Yezo apa ya: “Oo Nzapa, mbi na pangɔ lo tɛ mɔ hɛ̃ ayata mbi, Mbi na gondangɔ mɔ na gbɛlɛ azi mɛ abombi tɛrɛ la so vɔrɔngɔ mɔ.”

¹³ Lo pa ya: “Mbi na kpãngɔ bɛ mbi ndo Nzapa.” Lo pa nga ya: “Ĩ ba mbi na ayangambi mɛ Nzapa ahɛ̃ la hɛ̃ mbi lo mɛ.”

¹⁴ Ayangambi mɛ Yezo ndopa lo tɛ la ko, adu azi ti lɛ sese olo mɛ. Na lo ni ko, lo nvɛni lo mu nga ndo tɛrɛ zo, lo ti nga ma la. Lo li ndo so ya, ni kpi, wa ni nwɔ Satana mɛ na nguru ti kpɔngɔ azi.

¹⁵ Yezo ali ndo nga so ya, ni tɔ̃ azi mɛ ati nga ma ambɛ na lo ti mbɛtɔ ti kwá, na ngoi mɛ ala de lɛ la ngɛ̃.

¹⁶ Ti biani ko, ta Yezo aga so zangɔ aangelo ma, lo ga so zangɔ azi ti lɛ sese ko la ala atara Abrahama.

¹⁷ Nda mɛ ndo ale lo ti kwɛ kɔi nga ma ayata lo azi la. Ale lo ti ndo nga ma la, wadila lo ti kota gbia tɛ awa lungɔ Nzapa na ye na lo tɛ la. Ale lo li ndo so, wadila lo li kwa ka gbɛlɛ Nzapa bɛ lo kɔi, ko lo ma nga vundu tɛ azi, lo tiɔ sende ti siɔ ye tɛ la.

¹⁸ Ko na olo mɛ ko, Yezo alengbi ti zangɔ azi mɛ Satana ndotara bɛ la, na lo mɛ ya, Satana atara ndo nga bɛ lo nvɛni, lo hũ nga ndo pɛnɔ.