Aebreo 13 - Fana Ngbangɔ 1987

Du mɛ ndode bɛ Nzapa

¹ Ale ĩ ngbã bo na yengbingɔ nga ma se tɛ zo na nyita lo.

² Ta bɛ ĩ ali na yambangɔ azi mɛ ndoga ka tɛ ĩ ma. Ti biani ko, ambanga azi ayamba ndo awa fɔnɔ, kanda awa fɔnɔ ni adu aangelo. Ko ta azi ni ko ahĩnga ndo ya, adu aangelo ma.

³ Ale ĩ ndoda bɛ ĩ na azi mɛ ka ya bɔlɔkɔ, ma bere ĩ na la ka ya bɔlɔkɔ. Ale ĩ ndoda nga bɛ ĩ na azi mɛ andogia la, ma bere abombi ĩ na la la andogia ĩ.

⁴ Ale azi zu ndotɔndɔ tɛnɛ mɛ Nzapa atɛnɛ na lo ti dungbingɔ tɛ kɔli na wali. Ale ta kɔli mɛ ya lo da, bere wali mɛ kɔ lo da, ati kɔmbɛ ma. Nzapa afa gbanda ngbanga tɛ azi mɛ ndoli siɔ ye ti kamɛnɛ. Lo fa nga gbanda ngbanga tɛ awa tingɔ kɔmbɛ.

⁵ Na ya du tɛ ĩ ko, ta ĩ ye ya, gwɛ̃ ti faranga ako ndo bɛ ĩ ma. Ĩ du na dengɔ bɛ na lo ti aye mɛ ĩ na ni. Ta sanga ma, Nzapa nvɛni apa ya: “Ta mbi na ziangɔ mɔ bɛ gbɔ ma, ta bɛ mbi nga na lingɔ na mɔ bɛ gbɔ ma.”

⁶ Na lo ni la e lengbi ti pangɔ na kpengba bɛ, nga ma se mɛ Buku tɛ Nzapa apa na ni ya: “Gbia la ndoza mbi, Ta mbi na dungɔ na mbɛtɔ ma! Ta zo alengbi nga ti lingɔ mbi na ye ma.”

⁷ Angbina azi tɛ ĩ mɛ ndo awa batangɔ azi ti Eklezia ko, ta bɛ ĩ ali na la ma, ala ndo la apa hɛ̃ ĩ tɛnɛ tɛ Nzapa. Ale ĩ da bɛ ĩ na sé du tɛ la, nga na se kwa mɛ ndo ala kpili. Ale ĩ ye lo tɛ Nzapa na bɛ ĩ kɔi nga ma se tɛ la.

⁸ Se ko ndo la Yezo da uzu ko, se mɛ lo da na olo la, ko se mɛ nga gbanda lo ngbã na ni ngoi zu la.

⁹ Ambanga azi ndoha afana lo kɔndɛ kɔndɛ, wa ta ĩ ye ya, ala handa ĩ ma, so ĩ yu lege. Nzɔ̃ni ale nzɔ̃ bɛ mɛ Nzapa ndoli hɛ̃ e akpengba na bɛ e, kanda ta lo ti tɔndɔngɔ andia ti tɛ ti tɛngɔ alengbi ti kpengbangɔ na bɛ e ma. Ta azi ko la ndotɔndɔ andia ni ko alengbi ti luangɔ ye kɔi ti zangɔ la bɛ gbɔ ma.

¹⁰ Ayuda mɛ awa lungɔ Nzapa na ye ka ya da Nzapa ko, ta ala lengbi ti tɛngɔ ye mɛ andolu na Nzapa na ndo mɛsa tɛ e ma.

¹¹ Zo mɛ wa Yuda ko, lo nga kota gbia tɛ awa lungɔ Nzapa na ye ko, lo ndomu mɛnɛ tɛrɛ asa, lo li na ni ka ndo mɛ santo sĩ nvɛni ya, ni lu na Nzapa. Lo ndoli so ya, Nzapa aka lɛ lo ndo asiɔ ye tɛ azi. So pɛni ko, azi amu kinda tɛ asa ni ko so ya kɔdɔrɔ, asi na ni, azɔ.

¹² Nda mɛ ndo amu Yezo so ya kɔdɔrɔ ti Yeruzalɛmɛ asi na lo, aho lo la. Lo kpi ndo ya, ni kpo siɔ ye tɛ azi na mɛnɛ tɛrɛ ni nvɛni.

¹³ Wa é lo so ya kɔdɔrɔ e si, é nɔ ka tɛ lo, ko abombi nga e na lo amumana e.

¹⁴ Ta sanga ma, ge lɛ sese olo ko, ta e na kɔdɔrɔ mɛ ndongbã buai ma. E ndogi kɔdɔrɔ ti kaka mɛ gbanda e du da.

¹⁵ Wa ale e gonda Nzapa ngoi zu ti ndo Yezo. Ko gondangɔ ni adu nga ma ye mɛ e mu e lu na lo. Alengbi ya, ale e gonda lo ngoi zu na atɛnɛ ti nyɔ e.

¹⁶ Ale ĩ ndoli anzɔ̃ lo na tɛrɛ afɔ̃ ĩ, ale ĩ ndoza nga afɔ̃ ĩ na aye mɛ ĩ na ni. Ta bɛ ĩ ali na lingɔ aye ni ko ma. Ta sanga ma, aye ni ko adu nga ma aye mɛ ĩ mu, ĩ lu na Nzapa. Ko aye ni ko la ndode bɛ Nzapa.

¹⁷ Ale ĩ ma nyɔ azi tɛ ĩ mɛ awa batangɔ azi ti Eklezia, ĩ bi nga tɛrɛ ĩ hɛ̃ la. Ta sanga ma, ala ndobata ĩ, ko ala kambisa nga gbanda hɛ̃ Nzapa se mɛ ndo ala bata na ĩ. Se ĩ ma nyɔ la, wadila ala li kwa tɛ la na dengɔ bɛ. Ta so ma ko, ala li kwa ni na sɔngɔ bɛ, ko se ala li kwa na sɔngɔ bɛ ko, ta alengbi ti zangɔ ĩ bɛ yakere ma.

¹⁸ Ĩ ngbã bo na sambelangɔ Nzapa hɛ̃ e. E hĩnga nzɔ̃ni ya, bɛ e vuruni. Ta sanga ma, e ndosepara ya, e li nzɔ̃ ye ngoi zu.

¹⁹ Mbi gbɔ̃ gɛrɛ ĩ nvɛni ya, ĩ sambela Nzapa, wa lo zi lege hɛ̃ mbi, ko mbi diri hiɔ ka tɛ ĩ.

Sambela

²⁰ Nzapa aso Gbia tɛ e Yezo Kristo na pɛ kwá. Yezo adu bɛta wa batangɔ angasã ngbaga, na lo mɛ ya, lo kpi ndo so e. Ko na lo ti mɛnɛ tɛrɛ lo mɛ asa, la Nzapa na azi agbe fana ngbanga mɛ ndongbã kaka.

²¹ Nzapa mɛ ndoli ya, bɛ zo adu pii ko, lo hɛ̃ bɛ ĩ nguru ti lingɔ anzɔ̃ lo zu ma ke! Lo li bɛ so ya, ĩ li aye mɛ bɛ lo ndoye ma ke! Lo li bɛ nga ya, na nguru tɛ Yezo Kristo ko, e li aye mɛ ndode bɛ lo ma ke! E gonda bɛ Yezo Kristo buru na buru ma ke! Seni la.

Kɔngɔ nda tɛnɛ

²² Aya bua, mbi gbɔ̃ gɛrɛ ĩ ya, atɛnɛ mɛ mbi tɛnɛ hɛ̃ ĩ so sangɔ nguru bɛ ĩ ko, ale ĩ gbe bɛ ĩ na lo ni. Ta sanga ma, atɛnɛ mɛ mbi tɛnɛ hɛ̃ ĩ na ya mbɛti olo ko, ta adu yɔngɔrɔni buai ma.

²³ Wa ale ĩ hĩnga ya, nyita e Timɔte mɛ ndo abi lo bɔlɔkɔ ko, azi lo we. Se lo ga hiɔ lo tã mbi ko, e na lo e bombi e ga so bangɔ ĩ.

²⁴ Ĩ pa hɛ̃ azi tɛ ĩ zu mɛ awa batangɔ azi ti Eklezia ya, mbi bala la. Ĩ bala nga hɛ̃ mbi azi tɛ Nzapa zu. Ayata e awa Kristo ti Italia abala ĩ.

²⁵ Nzapa ali bɛ nzɔ̃ bɛ hɛ̃ ĩ zu ma ke! Seni la.