Aebreo 12 - Fana Ngbangɔ 1987

To e Nzapa

¹ Tɛ e ko, atemwɛ ni ko butu butu aka e kɛrɛrɛ, ala ndoba nga e. Wa é zia alo zu ko la ndogbanzi e ya, ta e dɔ nɔ na seni ma. Asiɔ ye mɛ alakata bɛ e ko, é zia ni, ko kpɛ mɛ Nzapa akpã e ya e kpɛ ko, ale e kpɛ kpɛ ni na mimi bɛ.

² Ale e ndoba bo Yezo, lo la lo li ya, e ye lo tɛ ni, ko lo ndoli nga ya, e ngbã bo na yengɔ lo tɛ ni ngbĩi e si ka ndani gbɔ. Ngoi mɛ ndo aye hongɔ lo ka ndo krusi ko, lo gbe ndo bɛ lo, ta kamɛnɛ agbɔ̃ ndo nga lo na lo ti gi tɛrɛ kwá ni ko ma, na lo mɛ ya, lo hĩnga ndo ya, ni na luangɔ dengɔ bɛ ka tɛ Nzapa. Na olo mɛ ko, lo du na ndo kɔti ti Nzapa, ka ndo mɛ Nzapa ndole gbia tɛ lo da.

³ Ĩ da bɛ ĩ bo na lo, ĩ́ da nga bɛ ĩ na se ko ndo lo gbe na bɛ lo na ya pɛnɔ mɛ awa lingɔ siɔ ye ahɛ̃ lo. Wa ta ĩ ye ya, azi asa mi bɛ ĩ ma, ta ĩ nzɛ̃ nga ma.

⁴ Ta sanga ma, ĩ na asiɔ azi ĩ ndotiri to, kanda ta ĩ dɛ ĩ tiri to ni ngbĩi, ko zo kɔi so popo tɛ ĩ akpi da ma.

⁵ Nzapa atɛnɛ tɛnɛ so sangɔ nguru bɛ ĩ, nga ma se mɛ to nyingambi ndotɛnɛ na tɛnɛ so sangɔ nguru bɛ nyi lo. Wa ta bɛ ĩ ali na tɛnɛ mɛ Nzapa atɛnɛ ma. Tɛnɛ ni lo mɛ: “Nyi mbi, etumbu mɛ mbi Gbia mbi ndohɛ̃ mɔ ko, Ta mɔ mu ni ka le mɔ gɛgɛrɛ ma. Ta mɔ nzɛ̃ nga na ngoi ko la mbi ndobela mɔ ma.

⁶ Ta sanga ma, mbi Gbia mbi ndohɛ̃ etumbu hɛ̃ zo ko la bɛ mbi aye lo. Mbi ndosɔ̃ zo zu ko la mbi hĩnga ya, lo nyi mbi.”

⁷ Ale ĩ gbe bɛ ĩ na ya apɛnɔ mɛ ĩ ndohũ. Apɛnɔ ni ko adu nga ma etumbu mɛ to nyingambi ndohɛ̃ nyi lo. Apɛnɔ ni ndofa ya, Nzapa ndomu ĩ ya, ĩ aya ni. Nyingambi mɛ ta to lo ndohɛ̃ lo etumbu ma na? Ta nyingambi ni da ma!

⁸ Nzapa ndohɛ̃ etumbu hɛ̃ aya lo zu. Wa se ta lo hɛ̃ ĩ etumbu ma ko, afa ya, ta ĩ abɛta aya lo ma, ko afa nga ya, ĩ du aya wanda.

⁹ Ato e mɛ ge le sese ndohɛ̃ ndo e etumbu, ko e ndotɔndɔ ndo la. Ko singa na ala mɛ e ndotɔndɔ ndo la, o singa na To e mɛ ka yayu ma! Ale e ndobi tɛrɛ e hɛ̃ lo, wadila e lua du ti kaka.

¹⁰ Ato e mɛ ge lɛ sese ndohɛ̃ ndo e etumbu mɛ ta ndoninga ma, ko ala ndohɛ̃ ndo e etumbu ni na se mɛ ala hũ ya adu nzɔ̃ni. Kanda Nzapa ndohɛ̃ e etumbu so lonzingɔ du tɛ e ya, e ti asanto nga ma ni.

¹¹ Na ngoi ko la andohɛ̃ e etumbu ko, ta e ndodu na dengɔ bɛ ma, e ndohũ ya, andoli e siɔni. Wa gbanda gesi, azi ko ndo la aye hũngɔ pɛnɔ ti etumbu ni ko, ala lua gbanda nzɔ̃ lo. Nzɔ̃ lo ni lo mɛ: bɛ la ade gbanda pii, ko du tɛ la ati nga gbanda mbiri mbiri.

Dungɔ na kpengba lɛ

¹² Ta ĩ du na mi ma, ĩ kpengba na tɛrɛ ĩ.

¹³ Ĩ dɔ nɔ na lege mɛ mbiri mbiri, so ĩ dɔ lege tɛ Nzapa ĩ zia, na lo ti gɛrɛ ĩ mɛ anzɛ̃nzɛ̃. Kanda ale ĩ dɔ nɔ na lege tɛ lo, wadila gɛrɛ ĩ akpengba.

¹⁴ Ale ĩ li kpengbani, ĩ na azi zu, í du na mangbingɔ. Ale ĩ li nga kpengbani ya, du tɛ ĩ adu mbiri mbiri ka lɛ Gbia Nzapa. Ta sanga ma, se ta du tɛ zo adu mbiri mbiri ma ko, ta zo ni ahũ gbanda le Nzapa ma.

¹⁵ Ale ĩ du na kpengba lɛ, so zo adɔ lege ti nzɔ̃ bɛ tɛ Nzapa azia. Ale ĩ du na kpengba lɛ, so zo ati nga ma bɛngɛ mɛ ndomai. Ko gi tɛrɛ zo ni ko ndosi na alo, ko alo ni ndogbɛ̃ azi gba.

¹⁶ Ĩ du na kpengba lɛ, so zo ali siɔ ye ti kamɛnɛ, bere so lo samana na ló tɛ Nzapa. Se zo ali nga so ko, lo ti nga ma Ezau mɛ ndo asamana na ló ti kɔzo tɛ lo mɛ na tɛrɛ lo. Lo mu ndo ló ti kɔzo ni, lo vɔ̃ na sɛmbɛ ti tɛ kɔi ka ti ngambi lo, lo tɛ.

¹⁷ Ko ĩ hĩnga ya, so pɛni ko, lo ye ndo ya, to ni asunu ni, ko to lo akɛ̃ ndo. Ta sanga ma, abɛ lo to ndo to ya, ni ti lua ló ti kɔzo tɛ ni mɛ ni ka ko, ta lo lua ndo ni ma.

¹⁸ Ale ĩ hĩnga ya, ndo mɛ ĩ da ko, ta adu nga ma hɔtɔ ti Sinai mɛ ndo awa Izrayɛlɛ ai tɛrɛ la ka tɔ̃ ni ma. Andohũ ndo hɔtɔ ni ko. Awa Izrayɛlɛ ahũ ndo wá aza ka ndo hɔtɔ ni ko lau lau, mbingo avu ndo ka ndo ni kpiti kpiti, ya aya ndo ka ndo ni vuku vuku!

¹⁹ Awa Izrayɛlɛ ama ndo mbana akpale ka ndo ni, ala ma nga ndo legɔ̃ Nzapa atɛnɛ tenɛ ka ndo ni. Ngoi mɛ ndo ala ĩ ma legɔ̃ lo wɛ ko, ala vɔrɔ ndo tɛrɛ la hɛ̃ lo ya, ta ani ye ya, lo ti tɛnɛ tɛnɛ mɛ ndɛ̃ ma.

²⁰ Ala pa ndo so, ta sanga ma, tɛnɛ mɛ ndo Nzapa atɛnɛ hɛ̃ la ko, ta ala lengbi ndo ti tɔndɔngɔ ni ma. Tɛnɛ ni lo mɛ: “Se zo ama ka ndo hɔtɔ olo, abɛ adu nga sa ko, ale aboroka lo na tɛ́nɛ aho.”

²¹ Ye mɛ ndo ala hũ ko, adu ndo ye ti mbɛtɔ sĩ. Ko abɛ nga Mɔizɛ ko, lo pa ndo ya: “Mbɛtɔ agbɔ̃ mbi sĩ, tɛrɛ mbi adɔ nga za za za!”

²² Kanda ndo mɛ ĩ i tɛrɛ ĩ ka tɔ̃ ni, adu hɔtɔ mɛ ili ni la Siona, ĩ i nga tɛrɛ ĩ ka tɔ̃ kɔdɔrɔ tɛ Nzapa mɛ lɛ lo ngɛ̃. Kɔdɔrɔ ni la Yeruzalɛmɛ mɛ ka yayu, ndo mɛ aangelo da hingo hingo.

²³ Ĩ li na li nɔ tɛ akɔzo aya Nzapa mɛ abombi tɛrɛ la ndoni kɔi, ala nga na dengɔ bɛ, ko Nzapa asuru ili la ka ya buku tɛ lo ka yayu. Ĩ si ka tɛ Nzapa mɛ wa fangɔ ngbanga tɛ azi zu. Ĩ i tɛrɛ ĩ na gbɛlɛ abɛta azi mɛ ndo akpili gã, ko Nzapa ali ya, ala ti abɛta anzɔ̃ azi.

²⁴ Ĩ i nga tɛrɛ ĩ ka tɔ̃ Yezo mɛ alɛkɛ popo tɛ Nzapa na azi, na lege ti fana ngbangɔ. Lo ndo la mɛnɛ tɛrɛ lo asa so kpongɔ asiɔ ye tɛ ĩ. Mɛnɛ ni ko afa e na lo mɛ nzɔ̃ni buai aɔ lo mɛ ndo mɛnɛ tɛ Abɛlɛ afa na e.

²⁵ Ĩ bata li ĩ! Ta ĩ kɛ̃ mangɔ zo ko la ndotɛnɛ tɛnɛ hɛ̃ ĩ ma. Ndo uzu ko, mbanga zo ndopa ndo nyɔ Nzapa so tisangɔ na azi ti lɛ sese. Ko azi ko ndo la akɛ̃ mangɔ tɛnɛ tɛ lo ko, ala lua ndo etumbu. Singa na azi ni ko, o singa na e ma! Se e kɛ̃ mangɔ nyɔ zo mɛ adu ka yayu ndotenɛ tɛnɛ hɛ̃ e ko, e lua nga etumbu.

²⁶ Ndo uzu ko, legɔ̃ lo ayingi ndo sese. Ko na olo ko, lo ko kapa hɛ̃ e ya, ta bo sese kɔi gbanda la ni na yingingɔ ni fani mɛ ndɛ̃ ma, kanda ni yingi nga gbanda ndozu.

²⁷ Tɛnɛ ko lo tɛnɛ ya: “fani mɛ ndɛ̃” ko, tɛnɛ ni afa ya, aye mɛ ndo lo li ko, lo yingi ni gbanda, ko aye ni amina. Wa aye mɛ ta alengbi ti yingingɔ ni ma angbã buai.

²⁸ Wa ale e ndohɛ̃ sia kɔli hɛ̃ Nzapa, na lo mɛ ya, e lua kɔdɔrɔ gbia mɛ ta alengbi ti yingingɔ ni ma. Ale e ndofa na lo ya, e ndohɛ̃ lo sia kɔli, na lege ti vɔrɔngɔ lo na se kɔdɛ mɛ alengbi ti dengɔ bɛ lo. E tɔndɔ lo, é kpɛ nga lo.

²⁹ Ti biani ko, Nzapa tɛ e adu nga ma wá mɛ ndogbi aye.