Aebreo 11 - Fana Ngbangɔ 1987

Yengɔ lo tɛ Nzapa

¹ Se zo aye lo tɛ Nzapa ko, lo hĩnga nzɔ̃ni ya, ni na luangɔ aye mɛ ni ndolɛndɛrɛ, ko lo hĩnga nga nzɔ̃ni ya, aye mɛ ta ni ndohũ ma ko, aye ni ko dazu biani.

² Azi ti uzu aye ndo lo tɛ Nzapa, ko na lo ni ndo la bɛ Nzapa ade na lo tɛ la.

³ E ye lo tɛ Nzapa, ko na lo ni la e hĩnga ya, Nzapa ali sese na tɛnɛ ti nyɔ lo. Ko oko afa ya, na lege ti tɛnɛ mɛ ta zo ndohũ na le lo ma, la Nzapa ali aye ti le sese mɛ zo ndohũ.

⁴ Abɛlɛ aye ndo lo tɛ Nzapa, ko na lo ni ndo la lo lu ye mɛ nzɔ̃ni buai aɔ ye mɛ nyita lo Kaina alu na Nzapa. Na lo ti lo yengɔ tɛ Abɛlɛ ndo la Nzapa apa ya, Abɛlɛ adu bɛta zo, ta sanga ma, Nzapa nvɛni aye ndo aye mɛ Abɛlɛ alu na lo. Abɛlɛ aye ndo lo tɛ Nzapa, ko na lo ni ndo la bɛ se lo kpi ndo wɛ ko, lo dɛ bo lo fa e na lege ti yengɔ lo tɛ Nzapa.

⁵ Enɔki aye ndo lo tɛ Nzapa, ko na lo ni ndo la ta lo kpi kwá ma. Nzapa amu ndo lo lɛ lo ngɛ̃, ya lo du ka tɛ ni. Ta azi ti hũ ndo lo ma, na lo mɛ ya, Nzapa amu ndo lo. Buku tɛ Nzapa apa ya, uzu ti Nzapa mungɔ Enɔki ndo ko, bɛ Nzapa ndode ndo na lo tɛ lo.

⁶ Ko se ta zo aye lo tɛ Nzapa ma ko, ta bɛ Nzapa alengbi ti dengɔ na lo tɛ lo ma. Ti biani, zo ko ai tɛrɛ lo ka tɛ Nzapa ko, ale lo ye ya, Nzapa da, ale lo ye nga ya, Nzapa ndohɛ̃ mbana gɛrɛ hɛ̃ azi mɛ ndogi lege tɛ lo.

⁷ Noa aye ndo lo tɛ Nzapa, ko na lo ni ndo la lo ma nyɔ Nzapa na ngoi mɛ ndo Nzapa atisa lo ya, ngu na gbɔngɔ lɛ sese zu. Abɛ se ta lo dɛ ndo lo hũ ngu ni na lɛ lo ma ko, lo lɛkɛ ndo kota masua, nga ma se mɛ Nzapa apa na ni hɛ̃ lo, lo na azi ti nda se wa tɛ lo ali ya ni, ko ala so ndo kwá ti ngu. Se mɛ ndo Noa aye na lo tɛ Nzapa afa ndo ya, azi mɛ ndɛ̃ ali siɔ ye, ko nga na lo ti lo yengɔ tɛ lo ndo la Nzapa amu lo ya, lo bɛta zo.

⁸ Abrahama aye ndo lo tɛ Nzapa, ko na lo ni ndo la lo ma nyɔ Nzapa, na ngoi mɛ ndo Nzapa aili lo. Lo dɔ ndo sese tɛ lo nvɛni lo zia, lo nɔ ka sese mɛ ndɛ̃ mɛ Nzapa asepara hɛ̃ngɔ lo ya, angbã ndũ ye tɛ lo. Abɛ nga ta lo hĩnga sese mɛ ndo lo na gwengɔ da ma ko, lo hã ndo nɔ lo ɔ.

⁹ Lo ye ndo lo tɛ Nzapa, ko na lo ni ndo la lo nɔ lo du kɔdɔrɔ ka sese mɛ ndo Nzapa ako kapa ni hɛ̃ lo, ko lo ti ndo nga ma wa ndɛ̃. Lo ndola ndo na gbe gofa ti tandi. Nzapa ako nga ndo kapa ni ko hɛ̃ Izaki na Yakobo, ko ala ndola ndo na gbe gofa ti tandi nga ma Abrahama.

¹⁰ Abrahama ndoku ndo ya, Nzapa ahɛ̃ ni kɔdɔrɔ mɛ Nzapa nvɛni la ali, kɔdɔrɔ mɛ ta ndogbɛ̃ ma.

¹¹ Abrahama aye ndo lo tɛ Nzapa, ko na lo ni ndo la lo lua nguru, lo dú nyi, na ngoi mɛ ndo buru tɛ lo na tɛ ya lo Sara ti dúngɔ nyi aɔ we. Abrahama ahĩnga ndo biani ya, ta Nzapa na wezangɔ kapa mɛ lo ko hɛ̃ ni ma.

¹² Na lo ni ndo la, bo na lo tɛ zo kɔi mɛ ndo ati tɛ lo bange we ko, atara lo asu kpaya kpaya nga ma atongolo ka lɛ ndozu, nga ma mbutu ti nyɔ kota ngu.

¹³ Azi ko zu angbã ndo bo na lo yengɔ lo tɛ Nzapa ka bɛ la, akpili na ni. Ta ala lua ndo aye mɛ Nzapa ako kapa ni hɛ̃ la ma. Kanda ala du ndo ka yɔngɔrɔni, ahũ aye ni ko bo na lɛ la, ko bɛ la ade ndo na lo ni. Ko ala pa ndo ya, ge lɛ sese ko, ani du nga awa ndɛ̃, ani du nga ma azi mɛ akpɛlɛ kɔdɔrɔ tɛ la.

¹⁴ Azi ko ndo atɛnɛ tɛnɛ nga so ko, ala fa yango ya, ani ndogi kɔdɔrɔ mɛ adu kɔdɔrɔ tɛ ani nvɛni.

¹⁵ Se adu ndo ya, bɛ la asɔ so kɔdɔrɔ mɛ ala zia ko, ale ala diri ndo ka kɔdɔrɔ ni ko.

¹⁶ Ti biani ko, ala ndo na gwɛ̃ ti kɔdɔrɔ mɛ ndɛ̃, kɔdɔrɔ mɛ nzɔ̃ni buai aɔ akɔdɔrɔ zu, alengbi ya, ala ndo na gwɛ̃ ti kɔdɔrɔ mɛ ka yayu. Nda mɛ ndo ta kamɛnɛ agbɔ̃ Nzapa na lo ko la ala ndoili lo ya, lo Nzapa tɛ ani ma la. Ta sanga ma, lo lɛkɛ ndo kɔdɔrɔ hɛ̃ la.

^17-18 Nzapa ako ndo kapa hɛ̃ Abrahama, apa hɛ̃ lo ya, lo lua gbanda atara lo ti ndo nyi lo Izaki. Ko Nzapa atara ndo bɛ Abrahama, apa hɛ̃ lo ya, lo ho nyi lo Izaki, lo lu na ni. Oko la Abrahama aye ndo lo tɛ Nzapa ko, Abrahama aye ndo amu ngbongi nyi lo Izaki, anɔ na lo ya, ni ho lo, ni lu na Nzapa.

¹⁹ Abrahama ada ndo bɛ lo ya, Nzapa na nguru ti songɔ Izaki na pɛ kwá. Ti biani ko, Izaki ati ndo nga ma zo mɛ akpi we, la Nzapa aso lo na popo tɛ awa kwáni, adiri na lo hɛ̃ Abrahama.

²⁰ Izaki aye ndo lo tɛ Nzapa, ko na lo ni ndo la lo sunu Yakobo na Ezau, lo tɛnɛ tɛnɛ ti alo mɛ na singɔ na la gesi.

²¹ Yakobo aye ndo lo tɛ Nzapa, ko na lo ni ndo la, na ngoi mɛ lo ĩ doli ti kpingɔ ko, lo sunu aya Yozɛfu ti kɔli sɛ. So pɛni, lo ko tɛrɛ na li ngómbé tɛ lo, lo vɔrɔ Nzapa.

²² Yozɛfu aye ndo lo tɛ Nzapa, ko na lo ni ndo la, na ngoi mɛ lo ĩ doli ti kpingɔ ko, lo tɛnɛ tɛnɛ hɛ̃ awa Izrayɛlɛ ya, na mbanga lá kɔi gbanda ko, ala lo gbanda ka Egipito agwe. Lo pa nga ndo hɛ̃ la ye mɛ ala lengbi ti lingɔ na abio tɛrɛ lo, na ngoi ti ala longɔ kai gwengɔ.

²³ Awa dúngɔ Mɔizɛ aye ndo lo tɛ Nzapa, ko na lo ni ndo la, ta mbɛtɔ agbɔ la ma, ko ala kɛ̃ ndo tɔndɔngɔ ndia mɛ gbia ti Egipito alu. Na ngoi mɛ ndo ala ĩ dú Mɔizɛ, ala ĩ hũ ya lo dɛ̃ sĩ ko, ala hɔndɛ lo nzɛ̃ ta.

²⁴ Mɔizɛ aye ndo lo tɛ Nzapa, ko na lo ni ndo la, na ngoi mɛ ndo lo ĩ ti kangba ko, lo kɛ̃ ndo ya, ta aili ni ya, ni nyingambi tɛ nyi wali mɛ gbia ti Egipito adú ma.

²⁵ Lo ye ndo ya, abombi ni na azi tɛ Nzapa, agia ani kɔi. Lo kɛ̃ ndo ya, ta ni saba na ya siɔ ye ma, ta sanga ma, ta gi tɛrɛ sabangɔ ni ko ndoninga ma.

²⁶ Lo hũ ndo ya, nzɔ̃ni ale asamana na ni, nga ma se mɛ ndo na samanangɔ na Mɛsia. Ko gi tɛrɛ samanangɔ ni ko la ni hũ ka le ni ngbondoni aɔ luangɔ nwa ti Egipito. Ta sanga ma, lo kpã ndo lɛ lo na ndo mbana gɛrɛ lo mɛ ndo Nzapa na hɛ̃ngɔ lo.

²⁷ Mɔizɛ aye ndo lo tɛ Nzapa, ko na lo ni ndo la lo hã ka sese ti Egipito lo ɔ, ko ta mbɛtɔ agbɔ̃ ndo lo na lo ti ngɔnzɔ mɛ ndo agbɔ̃ gbia ti Egipito ma. Mɔizɛ agbe ndo bɛ lo, ko adu ndo nga ma lo hũ Nzapa mɛ ta zo ndohũ lo na lɛ lo ma.

²⁸ Mɔizɛ aye ndo lo tɛ Nzapa, ko na lo ni ndo la lo kpã yenga mɛ andoili ya “Lipandasi tɛ Ayuda”. Lo hɛ̃ ndo nyɔ ya, amu mɛnɛ tɛrɛ asa, ahĩni na nyɔ ngise kɔi kɔi ya, so angelo mɛ wa kpɔngɔ azi aga akpɔ akɔzo aya kɔli tɛ awa Izrayɛlɛ.

²⁹ Awa Izrayɛlɛ aye ndo lo tɛ Nzapa, ko na lo ni ndo la, na ngoi mɛ ala ga na gɛrɛ la so kongɔ ngu mɛ andoili ya Bengba Ngu ko, ngu ni aulɛ ndo, ko ala ɔ ndo na kuru sese. Ko ngoi mɛ awa Egipito aga ya, ani ɔ nga ma se tɛ awa Izrayɛlɛ ko, ngu amu ndo la, akpɔ la.

³⁰ Awa Izrayɛlɛ aye ndo lo tɛ Nzapa, ko na lo ni ndo la, na ngoi mɛ ala ĩ mu bi mbara mbara ĩ ngoro na gbágbá ti briki mɛ aka kɔdɔrɔ ti Yeriko ko, gbágbá ni akara ndo asa tise.

³¹ Rahaba ndo ngbabo, lo ye ndo lo tɛ Nzapa, lo yamba ndo awa Izrayɛlɛ mɛ awa ginɔ, lo li la nzɔ̃ni. Ko na lo ni ndo la, na ngoi mɛ awa Izrayɛlɛ aga so kpɔngɔ azi mɛ akɛ̃ nyɔ Nzapa ko, ta ala ho ndo Rahaba ma.

³² Wa tɛnɛ mɛ mbi ti tɛnɛ nɛ? Ta mbi na ngoi ti tɛnɛngɔ tɛnɛ na lo tɛ Gedeona, na Barakɛ, na Samisona, na Yɛfɛte, na Davidi, na Samuɛlɛ, nga na awa pangɔ nyɔ Nzapa ma.

³³ Ala ye ndo lo tɛ Nzapa, ko na lo ni ndo la ala nwɔ azi, amu akɔdɔrɔ tɛ la na ngoi ti to. Ala ndoli ndo ye na seni, ko Nzapa ahɛ̃ ndo la ye mɛ lo ko kapa ni hɛ̃ la. Ala vĩ ndo yanga abamara,

³⁴ ala mingɔ ndo wá mɛ ndoza lau lau. Ngoi mɛ ndo azi aye kpɔngɔ la na zabe ko, ala kpɛle ndo, ko ala so ndo kwá. Ta ala ndo awa nguru ma, ko ala ti ndo awa nguru. Na ngoi ti to ndo ko, ta zo ndolo ndo gbɛlɛ la ma, ala nwɔ ndo aturugu ti akɔdɔrɔ mɛ ndɛ̃.

³⁵ Ambanga awe aye nga ndo lo tɛ Nzapa, ko na lo ni ndo la Nzapa aso azi tɛ la mɛ ndo akpili, ko ala hũ ndo azi ni na ngoi mɛ Nzapa adiri na azi tɛ la hɛ̃ la. Kanda tɛ ambanga azi mɛ ndo aye lo tɛ Nzapa ko, ahɛ̃ ndo la pɛnɔ kpengbani ya, se ta ala zia lo tɛ Nzapa ma ko, akpɔ la. Ko azi ni ko akɛ̃ ndo ya, ta ani zia lo tɛ Nzapa ma. Ala ye ndo ya, nzɔ̃ni ale ani kpili, wadila Nzapa aso ani, ko ani lua du mɛ nzɔ̃ni buai.

³⁶ Tɛ ambanga ko, ae ndo la, asɔ̃ ndo la na fimbo. Agbele ndo ambanga na nzingiri, asa la bɔlɔkɔ.

³⁷ Aboroka ndo ambanga na tɛnɛ, aho la. Asuru ndo ya ambanga na sii. Akpɔ ndo ambanga na zabe. Agia ndo bɛ ambanga, ahɛ̃ la pɛnɔ, ko ala ndofɔnɔ ndo ye ye na apɔrɔ angasã, bere apɔrɔ angasã ngbaga na tɛrɛ la, ala ndo awa yɛlɛ.

³⁸ Ala ndofɔnɔ ndo ka bɛ ndo, ka ndo hɔtɔ, ala ndolangana ndo na ya do tɛ́nɛ, nga na ya kɔdu. Ko ta lɛ sese olo alengbi na anzɔ̃ azi nga ma la ma.

³⁹ Azi ni ko zu aye ndo lo tɛ Nzapa, ko na lo ni ndo la bɛ Nzapa ade na lo tɛ la. Ko ta ala lua ndo ye mɛ Nzapa ako kapa ni hɛ̃ la ma.

⁴⁰ Ta sanga ma, Nzapa apia ndo alɛkɛ lege ati nzɔ̃ni hɛ̃ e, lo ye ndo ya, nzɔ̃ni ale ni bombi e na la zu, ko e ti abɛta anzɔ̃ azi ka lɛ ni.