Aebreo 10 - Fana Ngbangɔ 1987

¹ Atɔrɔke mɛ Ayuda ndoli na se nyɔ ndia tɛ la ko, adu bo lo limɔ ti abɛta ye mɛ na gangɔ gesi, ko ta aye mɛ ala ndoli adu abɛta ye nvɛni ma. Azi mɛ ndoi tɛrɛ la ka tɛ Nzapa ko, ala ndolu Nzapa bo na ngĩ lɛ aye kɔi buru kɔi kɔi. Ko ta ala lengbi ti tingɔ abɛta anzɔ azi ka lɛ Nzapa na lo ti ngĩ lɛ aye mɛ ala ndolu na lo ma.

² Wa se adu ya, aye mɛ azi ndolu na Nzapa alengbi ti kpongɔ siɔ ye tɛ la fani kɔi ti buai ko, ale ala hĩnga ya, ta ani ti de awa lingɔ siɔ ye ma, ko ale ala zia nga lungɔ lo na ye.

³ Ti biani ko, buru kɔi kɔi, azi ndoda bɛ la na siɔ ye tɛ la na lo ti aye mɛ ala ndolu na Nzapa.

⁴ Ta sanga ma, ta mɛnɛ tɛrɛ ato bagara, nga na mɛnɛ tɛrɛ ato ngasã alengbi ti onzingɔ asiɔ ye bɛ gbɔ ma.

⁵ Nda mɛ na ngoi ti gangɔ tɛ Yezo ge lɛ sese ko, lo pa ndo hɛ̃ Nzapa ya: “Ta mɔ ndoye aye mɛ alu na mɔ ma. Ko mɔ li tɛrɛ mbi ya, mbi ka ni hɛ̃ mɔ.

⁶ Asa mɛ andozɔ, alu na mɔ, Bere aye mɛ andolu na mɔ ya, aonzi na asiɔ ye tɛ azi ko, Ta bɛ mɔ ndode nga na lo ni ma.

⁷ La mbi pa ya: ‘Oo Nzapa, ba mbi lo mɛ, Mbi ga ya, mbi li ye mɛ bɛ mɔ ndoye, Nga ma se mɛ asu na ni na lo tɛ mbi ka ya buku ti ndia!’ ”

⁸ Ti uzu, Kristo apa ya: “Aye mɛ andolu na mɔ, na asa mɛ andozɔ alu na mɔ, nga na aye mɛ andolu na mɔ ya, aonzi na asiɔ ye tɛ azi ko, ta mɔ ndoye ni ma, ta bɛ mɔ ndode nga na lo ni ma.” Kanda aye ni ko zu ko, andolu ni na se nyɔ ndia.

⁹ Ti sɛ, Kristo apa ya: “Oo Nzapa, ba mbi lo mɛ, mbi ga ya, mbi li ye mɛ bɛ mɔ ndoye.” Ko na lo ni la Nzapa aho ngbina lege ti lungɔ lo na ye, akpã Kristo na se lɛ ni ya, Kristo aka tɛrɛ lo hɛ̃ ni.

¹⁰ Yezo Kristo ali ndo ye mɛ bɛ Nzapa aye, lo ka ndo tɛrɛ lo nvɛni, lo lu na Nzapa fani kɔi ti buai, ko na lo ni la lo kpo asiɔ ye tɛ e.

¹¹ Bi kɔi kɔi, azi zu mɛ awa lungɔ Nzapa na ye ndolo na gɛrɛ la so lingɔ kwa tɛ la. Ko fani sĩni ko, ala ndolu bo ngĩ lɛ aye kɔi, ko ta aye ni ko adu aye mɛ alengbi ti onzingɔ asiɔ ye bɛ gbɔ ma.

¹² Kanda tɛ Yezo Kristo ko, lo ka ndo tɛrɛ lo hɛ̃ Nzapa fani kɔi ti buai so onzingɔ asiɔ ye tɛ azi. So pɛni, lo gwe lo du na ndo kɔti ti Nzapa.

¹³ Na olo ko, lo du kai, lo ndoku ya, Nzapa anwɔ awa kɛ̃ngɔ ni, akpã na gbe gɛrɛ ni.

¹⁴ Na lo ti tɛrɛ lo mɛ ndo lo ka hɛ̃ Nzapa bo fani kɔi ko, lo kpo siɔ ye tɛ azi lo zi, ala ti abɛta anzɔ̃ azi ti buai ka lɛ Nzapa.

¹⁵ Se mɛ nga Tɔrɔ Santo apa na ni hɛ̃ e la. Tɔrɔ Santo apa ya Nzapa anɛ uzu ya:

¹⁶ “Ĩ ba ngbanga mɛ gbanda mbi Gbia Nzapa e na la E gbe na pɛ bi ni ko lo mɛ: Mbi kpã gbanda andia tɛ mbi ka ya bɛ la, Wa ala hĩnga ni.”

¹⁷ So pɛni, Nzapa anɛ nga ya: “Ta mbi ti mbi da gbanda bɛ mbi na asiɔ ye tɛ la ma.”

¹⁸ Wa oko Nzapa aka ndo lɛ lo ndo asiɔ ye tɛ azi wɛ ko, adu kwa gɛgɛrɛ ya, azi ti lu lo na ye, wa lo ka lɛ lo ndo asiɔ ye tɛ la.

E i tɛrɛ e ka tɛ Nzapa

¹⁹ Na lo ni ko, ayata e awa Kristo, oko mɛnɛ tɛrɛ Yezo asa, lo kpi ko, lege azi wɛ ya, e li ka ndo mɛ santo sĩ nvɛni.

²⁰ Yezo asuru ndo ya ma bɔngɔ mɛ afa lege ti e, ko lo zi fana lege hɛ̃ e ya, e li ka ndo mɛ e lengbi ti luangɔ na bɛta du. Bɔngɔ mɛ ndo ya ni asuru ko, alengbi na tɛrɛ Yezo nvɛni.

²¹ E na kota gbia tɛ awa lungɔ Nzapa na ye, lo bɛ li azi tɛ Nzapa.

²² Asiɔ ye zu mɛ e li, ko andokpã bɛ e ngbũ ko, mɛnɛ tɛrɛ lo akpo ni azi. Lo kpo nga tɛrɛ e na ngu mɛ lɛ ni ngio ngio. Na lo ni ko, ale e i tɛrɛ e ka tɛ Nzapa na bɛ e kɔi, é ye nga lo tɛ lo na bɛ e kɔi.

²³ Nzapa ako kapa hɛ̃ e, ko ta lo na wezangɔ kapa ni ma. Na lo ni ko, ale e ngbã bo na lɛndɛrɛngɔ kapa mɛ e ndopa lo ni, ta e dɛ kitɛ ni ma.

²⁴ Ale e ndodu na kpengba lɛ na popo tɛ e ya, e tinga wá na gbe afɔ̃ e ya, e na la e yengbi aɔ ti uzu, ko e li nga anzɔ̃ kwa.

²⁵ Ale ta e awa Kristo e dɔ nɔngɔ bombi tɛ e, e zia ma. Ambanga azi adɔ nɔngɔ bombi azia, ko ta e li nga ma se tɛ la ma. Kanda ale e ndosangbi nguru bɛ e, ko ale e ndosa nguru ni ndoni ndoni, na lo mɛ ya, ĩ hũ ka lɛ ĩ ya, lá ti diringɔ tɛ Gbia Yezo adoli.

²⁶ E hĩnga bɛta lo tɛ Nzapa, wa se e baba bo lingɔ siɔ ye na sana ko, ta ye mɛ ndɛ̃ mɛ e lengbi ti mungɔ, lungɔ na Nzapa, ya aonzi asiɔ ye tɛ e da ma.

²⁷ Se e li nga so ko, ale e ndodu na mbɛtɔ so kungɔ ye mɛ gbanda Nzapa ali tɛrɛ e: alengbi ya, lo fa gbanda ngbanga lo bi li e, ko lo sa nga e na ya wá mɛ ndoza lau lau, wá mɛ ndogbiri awa kɛ̃ngɔ lo.

²⁸ Ĩ hĩnga ya, zo ko la akɛ̃ tɔndɔngɔ ndia tɛ Mɔizɛ, ko se azi sɛ bere ta aye ya, lo li siɔni ko, ale aho lo, ta ama vundu tɛ lo ma.

²⁹ Singa na zo mɛ se lo kɛ̃ tɔndɔngɔ ndia tɛ Mɔizɛ ko, ahɛ̃ lo etumbu, o singa na zo mɛ akɛ̃ nyɔ Nyi Nzapa ma! Se mɔ zo mɔ samana na Nyi Nzapa, mɔ samana nga na mɛnɛ tɛrɛ lo mɛ akpo asiɔ ye tɛ mɔ azi ko, etumbu tɛ mɔ asɔ gbanda sĩ nvɛni. Se mɔ zo mɔ guru nga Tɔrɔ Santo mɛ ndofa mɔ na se mɛ Nzapa ndoli na nzɔ̃ bɛ hɛ̃ mɔ ko, etumbu tɛ mɔ asɔ nga gbanda sĩ nvɛni!

³⁰ Ta sanga ma, e hĩnga ya, Nzapa la atɛnɛ tɛnɛ olo ya: “Azi ko la akɛ̃ mbi ko, mbi gɛ̃ gbanda kula ni. Asiɔ ye mɛ ala ndoli tɛrɛ mbi ko, mbi li nga ni gbanda tɛrɛ la.” Lo pa nga ya: “Mbi Gbia Nzapa, mbi fa gbanda ngbanga tɛ azi tɛ mbi.”

³¹ Wa zo ko gbanda la Nzapa mɛ le lo ngɛ̃ afa ngbanga abi li lo ko, pɛnɔ tɛ lo aɔ gbanda apɛnɔ zu.

³² Ale ĩ da bɛ ĩ na ngoi ko ndo ĩ da uzu, na ngoi mɛ ndo Nzapa azi lɛ ĩ. Ĩ hũ ndo apɛnɔ ma wo ma na ngoi ni ko, ko ĩ gbe nga ndo bɛ ĩ na ya apɛnɔ ni.

³³ Na mbanga ngoi ndo ko, andoguru ndo ĩ, andɔ̃sɔ̃ ndo ĩ na gbɛlɛ azi. Na mbanga ngoi mɛ ndɛ̃ ndo nga ko, ĩ bombi ndo tɛrɛ ĩ na azi mɛ ahɛ̃ la gi tɛrɛ apɛnɔ ni ko.

³⁴ Ĩ ndoma ndo vundu tɛ awa bɔlɔkɔ na lo ti apɛnɔ tɛ la. Ngoi mɛ ndo azi agbɔ̃ aye tɛ ĩ na ti ĩ ko, ĩ ye ndo na dengɔ bɛ ya, ala mu ni na ti ĩ. Ta sanga ma, ĩ hĩnga ya, ĩ na anzɔ̃ ye mɛ andongbã buru na buru.

³⁵ Na lo ni ko, ĩ ngbã bo na kpãngɔ bɛ ĩ na ndo Nzapa, na lo mɛ ya, ĩ na luangɔ kota mbana gɛrɛ ĩ mɛ lo bata hɛ̃ ĩ.

³⁶ Ko ale ĩ du na yɔngɔrɔ bɛ ya, ĩ li ye mɛ bɛ Nzapa aye, wadila ĩ lua ye mɛ lo ko kapa ni hɛ̃ ĩ.

³⁷ Ti biani, asu ka ya Buku tɛ Nzapa ya: “Zo ko e ma lo tɛ lo ya, lo ga gbanda ko, Angbã bo yakere nvɛni lo ga. Lo na gangɔ bo lo mɛ.

³⁸ Kanda zo mɛ bɛta zo ka lɛ mbi Nzapa ko, Lo na dungɔ lɛ lo ngɛ̃, Na lo mɛ ya, lo ye lo tɛ mbi. Wa se lo dɔ kpãngɔ be lo ndo mbi lo zia ko, Ta bɛ mbi na dengɔ na lo tɛ lo ma.”

³⁹ Azi ko la adɔ kpãngɔ bɛ la ndo Nzapa azia, amu lege mɛ ato la ka lifɛlo ko, ta e na li nɔ tɛ la ma. E tɛ e azi mɛ e ndokpã bɛ e ndo Nzapa, e mu nga lege ti songɔ kwá.