Awa Pangɔ Kwa 9 - Fana Ngbangɔ 1987

Saulo agbinya bɛ lo aye lo tɛ Yezo

¹ Kanda Saulo ndogi ndo kɔdɛ ngoi zu ya, ni kpɔ awa yengɔ lo tɛ Gbia Yezo. Mbanga lá kɔi ko, lo nɔ ka tɛ kota gbia tɛ awa lungɔ Nzapa na ye,

² lo hũndã lo ya: “Hɛ̃ mbi mbɛti mbi nɔ na ni hɛ agbia ti ya da sambela ndɛ̃ ndɛ̃ ndɛ̃ mɛ ka Damasi. Mbɛti mɛ afa ya, se mbi tã akɔli na awe ti kɔdɔrɔ mɛ amu lege tɛ Yezo ko, mbi gbɔ̃nɔ la, mbi ga na la ge Yeruzalɛmɛ.” La ala hɛ̃ lo mbɛti ni.

³ Lo hã nɔ, lo ɔ. Lo ĩ doli na Damasi ko, bo ngoi kɔi, ye kɔi mɛ nga ma lá, alo ka ndozu asũ bai so gunda lo.

⁴ La lo hã, lo ti, ko lo ma legɔ̃ Gbia so ndoili lo ya: “Saulo, Saulo, nda mɛ mɔ ndohɛ̃ mbi pɛnɔ so nɛ?”

⁵ La Saulo ahũnda ya: “Gbia, mɔ na?” Lo gbinya hɛ̃ lo ya: “Mbi Yezo mɛ mɔ ndohɛ̃ mbi pɛnɔ la.

⁶ Wa lo ndozu, mɔ gwe ka kɔdɔrɔ. Ngoi mɛ se mɔ si kai ko, azi na pangɔ hɛ̃ mɔ ye mɛ mɔ lengbi ti lingɔ ni.”

⁷ Azi mɛ ndo Saulo na la anɔ lege kɔi adɔ alonga, zema aha la. Ala ma legɔ̃ zo, kanda ta ala hũ ndo zo ma.

⁸ Saulo agɔ̃ vu alo, azara lɛ lo, ta lo hũ ndo ma. Azi ko agbɔ̃ ti lo, agwe na lo ka Damasi.

⁹ Na pɛ bi ta ko, lo ha hũngɔ ndo gba, ta lo ndotɛ ndo ye ma, ta lo ndonyɔ ndo nga ye kɔi ma.

¹⁰ Mbanga wa yengɔ lo tɛ Yezo kɔi ndo ka Damasi, ili lo la Ananiasi. Gbia Yezo aga ndo ka li lo na ya suma, aili lo ya: “Ananiasi!” La Ananiasi agbinya hɛ̃ lo ya: “Gbia, mbi lo mɛ.”

¹¹ La Gbia apa hɛ̃ lo ya: “Gwe bo na olo ka ta lege mɛ andoili ya: ‘lege mɛ mbiri mbiri’, ko mɔ gi kɔli kɔi, ili lo la Saulo, lo wa Tarsi, lo ka ya da tɛ Yudasi, lo ndovɔrɔ Nzapa na olo mɛ.

¹² Na ya suma tɛ Saulo ko, lo hũ kɔli kɔi mɛ ili lo la Ananiasi so ndoli ka ya da, ko Ananiasi akpã ti lo na ndo lo ya, lo ti hũ ndo.”

¹³ La Ananiasi agbinya hɛ̃ lo ya: “Gbia, azi gba apa lo tɛ kɔli olo hɛ̃ mbi, ala pa nga asiɔ ye zu mɛ lo li tɛrɛ azi tɛ mɔ mɛ ka Yeruzalɛmɛ.

¹⁴ Ko lo ga ge na lo mɛ ya, agbia tɛ awa lungɔ Nzapa na ye ahɛ̃ lo nyɔ ya, lo gbɔ̃nɔ azi zu mɛ ndovɔrɔ mɔ.”

¹⁵ La Gbia apa hɛ̃ Ananiasi ya: “Nɔ bo nɔngɔ, ta sanga ma, mbi sara zo olo, ko mbi na kpãngɔ lo ya, lo pa lo tɛ mbi hɛ̃ Ayuda, na azi ti sese mɛ ndɛ̃, nga na agbia tɛ la ya, ala hĩnga mbi.

¹⁶ Mbi nvɛni na fangɔ lo na se mɛ lo na hũngɔ na pɛnɔ na lo tɛ mbi.”

¹⁷ La Ananiasi amu lege aɔ. Lo nɔ lo si ka ya da ni ko, lo kpã ti lo ndo Saulo, lo pa hɛ̃ lo ya: “Saulo nyi bua, Gbia Yezo mɛ ndo asi gbɛlɛ mɔ ka ta lege mɛ ndo mɔ lo da, mɔ ga ko, lo to mbi ya, mɔ ti hũ ndo, ko Tɔrɔ Santo asa nguru tɛrɛ mɔ.”

¹⁸ Bo na ngoi ni ko, ye kɔi nga ma kaya kpĩ alo ka lɛ Saulo ati, la lo hũ ndo. Lo lo ndozu, Ananiasi ahɛ̃ lo batisimɔ.

¹⁹ So pɛni, lo tɛ ye, la lo ti lo lua nguru. Saulo ala ndo bi yakere ka tɛ awa yengɔ lo tɛ Yezo mɛ ndo ka kɔdɔrɔ ti Damasi.

Saulo apa Nzɔ̃ Pa tɛ Yezo ka Damasi

²⁰ Bo na ngoi ni ko, lo to nda pangɔ Nzɔ̃ Pa tɛ Yezo na ya da sambela ndɛ̃ ndɛ̃ ndɛ̃. Lo pa ndo ya, Yezo adu Nyi Nzapa.

²¹ Azi zu mɛ ndo ama lo, abema, ko ala pa ya: “Ta zo mɛ ndo ndohɛ̃ kpengba pɛnɔ hɛ̃ azi mɛ aye lo tɛ Yezo ka Yeruzalɛmɛ lo ma? Ko lo ga ge ya, ni gbɔ̃nɔ la, ni gwe na la hɛ̃ agbia tɛ awa lungɔ Nzapa na ye. Ta seni la ma?”

²² Kanda nguru mɛ ndo Saulo ndopa na Nzɔ̃ Pa tɛ Yezo ndomai ndo bo maingɔ. Ngoi mɛ ndo lo pa hɛ̃ Ayuda mɛ ndodu ka Damasi ya, Yezo lo Mɛsia ko, ala gi ndo kɔdɛ ti gbinyangɔ na tɛnɛ hɛ̃ lo gba.

²³ Ĩ la so pɛni yakere ko, Ayuda amangbi ya, ani gbɔ̃ Saulo, ani ho lo.

²⁴ Kanda apia ndo atisa Saulo na lo ni. Bi na lá ko, azi ndodu ndo so batangɔ agu lege mɛ ali ka kɔdɔrɔ ti Damasi ya, se lo ga ti kpɛngɔ gwengɔ ko, ani gbɔ̃ lo, ani ho lo.

²⁵ Kanda ĩ da na bi ko, ava Saulo amu lo, ama na lo ti tɛrɛ gbágbá mɛ aka kɔdɔrɔ kɛrɛrɛ, akpã lo na ya sakpa, ato kpu tɛrɛ ni, azu na lo. La lo kpɛ, lo gwe.

Saulo asi ka Yeruzalɛmɛ

²⁶ Ngoi mɛ Saulo ĩ si ka Yeruzalɛmɛ ko, lo gi ndo kɔdɛ ya, ni li na li nɔ tɛ awa yengɔ lo tɛ Yezo, ko mbɛtɔ tɛ lo ndogbɔ̃ ndo la zu, ta sanga ma, ala ndoda ndo bɛ la ya, ta lo ye lo tɛ Yezo kpa ma.

²⁷ La Barnabasi amu lo, anɔ na lo ka tɛ awa pangɔ kwa tɛ Yezo. Lo kambisa hɛ̃ la se mɛ ndo Saulo ahũ na Gbia Yezo ka ta lege, lo kambisa nga hɛ̃ la se mɛ ndo Gbia atɛnɛ na tɛnɛ hɛ̃ lo. Lo pa nga hɛ̃ la se mɛ ndo Saulo apa Nzɔ̃ Pa na se nyɔ Yezo na kpengba bɛ ka Damasi.

²⁸ Ato na ngoi ko la Saulo ali na li nɔ tɛ la. Lo ana la ndofɔnɔ ndo ka Yeruzalɛmɛ, ko lo ndopa ndo lo tɛ Gbia Yezo na kpengba bɛ.

²⁹ Lo na Ayuda mɛ ndotɛnɛ yanga tɛ azi ti Grɛsɛ ndotɛnɛ ndo tɛnɛ, ndobimbi ndo nga tɛnɛ. Ko ala ndogi ndo kɔdɛ ya, ani ho lo.

³⁰ Awa yengɔ lo tɛ Yezo ĩ ma so ko, ala mu Saulo agwe na lo ka Sezarea, apa hɛ̃ lo ya, lo gwe ka Tarsi, la lo hã nɔ lo ɔ.

³¹ Azia ndo hɛ̃ngɔ pɛnɔ hɛ̃ azi zu mɛ ka ya Eklezia ti Yudea, na ti Galilea nga na ti Samaria, la ala lua bɛ pii. Ala ndomai ndo na ya lo yengɔ tɛ la, ala ndotɔndɔ ndo nga Gbia. Ala ndobu ndo bungɔ, na lo mɛ ya, Tɔrɔ Santo aza ndo la.

Petro asara ɛne

³² Petro ndofɔnɔ ndo so bangɔ awa yengɔ lo tɛ Yezo zu, ko mbanga la kɔi, lo nɔ so bangɔ ala mɛ ndodu ka kɔdɔrɔ ti Lida.

³³ Lo tã mbanga kɔli kɔi, ili lo Ɛne. Lo ndose bo ndo tange aɔ buru miambe, na lo mɛ ya, lo wa ngbengule.

³⁴ Petro apa hɛ̃ lo ya: “Ɛne, Yezo Kristo asara mɔ! Lo ndozu, mɔ̃ lɛkɛ tange tɛ mɔ.” Bo na ngoi ni ko, lo lo.

³⁵ Awa Lida zu, na azi ti lɛ nyama ti Sarona ahũ lo, la ala gbinya be la, aye lo tɛ Gbia Yezo.

Petro aso Dɔrkasi na pɛ kwá

³⁶ Ka kɔdɔrɔ ti Yope ndo ko, mbanga wali kɔi aye lo tɛ Yezo, ili lo la Tabita. (Bi ni na yanga tɛ azi ti Grɛsɛ la “Dɔrkasi”, Dɔrkasi adu sa mɛ ili ni la “ba”.) Ngoi zu, lo ndoli ndo nzɔ̃ li ye tɛrɛ afɔ̃ lo, ko lo ndoka ndo nga kaye hɛ̃ awa yɛlɛ.

³⁷ Na ngoi ko ndo ko, lo ti na nga, lo kpi. Ngoi mɛ ĩ kpo kinda tɛ lo wɛ ko, amu ni akpã ka ya da kɔi mɛ ka ndozu.

³⁸ Awa yengɔ lo tɛ Yezo mɛ ka Yope ĩ ma ya, Petro asi ka kɔdɔrɔ ti Lida mɛ ndũ na Yope ko, ala to akɔli se na kwa hɛ̃ Petro ya, se lo ye, lo ga bo gangɔ ka tɛ ani.

³⁹ Ala ĩ si kai, ĩ pa kwa ni hɛ̃ Petro ko, Petro na awa pangɔ kwa ko agwe bo na ngoi ni ko. Lo ĩ si kai ko, agwe na lo ka ya da mɛ ka ndozu. Awe muã ai tɛrɛ la ka tɔ̃nda lo, ala so ndoto to. Ala fa lo na andozu bɔngɔ, na akota bɔngɔ mɛ ndo Dɔrkasi alɛkɛ na ngoi mɛ ndo lo dɛ lɛ lo ngɛ̃.

⁴⁰ Petro apa hɛ̃ azi zu ya, ala si. Ala ĩ si wɛ ko, lo kuku, lo vɔrɔ Nzapa. So pɛni, lo sana tɛrɛ lo ka tɛ kinda, lo pa ya: “Tabita, lo ndozu!” Tabita azara lɛ lo. Lo ĩ hũ Petro ko, lo ya tɛrɛ lo, lo du na nda lo.

⁴¹ Petro agbɔ̃ ti lo, aza lo, la lo lo ndozu. Petro aili awa yengɔ lo tɛ Yezo, na awe muã, lo fa la na Tabita mɛ aso na pɛ kwá.

⁴² Pa ni ati gboo na lɛ kɔdɔrɔ ti Yope zu, ko azi gba aye ndo lo tɛ Gbia Yezo.

⁴³ Petro ala ndo so Yope bi gba, ka tɛ Simɔ mɛ wa lɛkɛngɔ pɔrɔ sa.