Awa Pangɔ Kwa 8 - Fana Ngbangɔ 1987

¹ Saulo aye lo kwá mɛ aho na Etieni. Bo na lá ni ko, azi ato nda hɛ̃ngɔ kota pɛnɔ hɛ̃ azi ti Eklezia ti Yeruzalɛmɛ. La awa yengɔ lo tɛ Yezo zu agundu tuuu, agwe ka sese ti Yudea, nga ka sese ti Samaria. Wenge bo awa pangɔ kwa tɛ Yezo ndo la angbã tɛ la so ndo ko.

Saulo ahɛ̃ pɛnɔ hɛ azi ti Eklezia

² Azi mɛ ndohɛ̃ tɛrɛ la so vɔrɔngɔ Nzapa aga amu kinda tɛ Etieni ahɔ, ko ala to ndo kwá tɛ lo sĩ.

³ Tɛ Saulo ko, lo ndogia ndo azi ti Eklezia sĩ. Lo ndoli ndo na ya da kɔi kɔi, lo gbɔ̃nɔ akɔli na awe mɛ awa yengɔ lo tɛ Yezo, lo sa la bɔlɔkɔ.

Filipo apa Nzɔ̃ Pa tɛ Yezo ka Samaria

⁴ Awa yengɔ lo tɛ Yezo mɛ ndo agundu tuuu ko, ala ndofɔnɔ ndo, ko ala so ndopa Nzɔ̃ Pa tɛ Yezo.

⁵ Filipo anɔ ka mbanga ya kɔdɔrɔ kɔi ti Samaria. Lo ĩ si kai ko, lo to nda pangɔ tɛnɛ tɛ Mɛsia hɛ̃ azi ti kɔdɔrɔ ni.

⁶ Azi zu ĩ ma tɛnɛ mɛ Filipo atɛnɛ, ala ĩ hũ nga aye ti kpɛnɛ mɛ lo li ko, ala zi ma la, ama lo.

⁷ Lo sara awa ngã gba mɛ ndo asiɔ tɔrɔ asa tɛrɛ la, ko asiɔ tɔrɔ ni asi ndo na dɛrɛngɔ kɔngɔ kauuu! Lo sara nga ndo awa ngbengule na awa zɛ̃, ko zɛ̃ tɛ la awe.

⁸ Na lo ni ko, bɛ azi ti kɔdɔrɔ ni ade ndo sĩ.

⁹ Mbanga kɔli kɔi ili lo Simɔ, lo ndodu ndo uzu so ya kɔdɔrɔ ni ko. Lo ndoha ndo biando, ko azi ti Samaria ndobema ndo na lo ni. Lo ndomu ndo tɛrɛ lo ya, ni kota zo,

¹⁰ ko aya kɔli na akangba zu ndozi ndo ma la, so mangɔ lo. Ala ndopa ndo ya: “Zo kɔli olo, lo nguru tɛ Nzapa, nguru mɛ andoili ya, ‘Kota nguru.’ ”

¹¹ Ala ndozi ma la, so mangɔ lo, ta sanga ma, ala ya ndo bemangɔ na lo ti biando mɛ lo ndohãna gã.

¹² Ko ngoi mɛ ndo akɔli na awe ĩ ye lo Nzɔ̃ Pa mɛ ndo Filipo ndopa na lo ti lo Lɛngɔ Gbia tɛ Nzapa, nga na lo tɛ Yezo Kristo ko, ala mu batisimɔ.

¹³ Simɔ nvɛni aye nga ndo lo tɛ Yezo, ko lo mu nga batisimɔ. Lo ngbã ndo na tɔ̃nda Filipo, ko lo ĩ hũ akukuna ye na aye ti kpɛnɛ mɛ Filipo ndoli ko, lo bema sĩ.

¹⁴ Awa pangɔ kwa tɛ Yezo mɛ ndo ka Yeruzalɛmɛ ĩ ma ya, azi ti sese ti Samaria aye tɛnɛ tɛ Nzapa ko, ala to Petro na Yoanɛ hɛ̃ la.

¹⁵ Ngoi mɛ Petro na Yoanɛ ĩ si ka Samaria ko, ala vɔrɔ Nzapa na lo tɛ awa yengɔ lo tɛ lo ya, lo to hɛ̃ la Tɔrɔ Santo.

¹⁶ Ta sanga ma, ta Tɔrɔ Santo ade ndo azu na ndo zo kɔi na popo tɛ la ma. Ala mu ndo bo batisimɔ na ili Gbia Yezo.

¹⁷ Petro na Yoanɛ akpã ti la ndo la, la ala lua Tɔrɔ Santo.

¹⁸ Simɔ ĩ hũ ya, awa yengɔ lo tɛ Yezo alua Tɔrɔ Santo na ngoi mɛ Petro na Yoanɛ akpã ti la ndo la ko, lo mu faranga ya ni hɛ̃ Petro na Yoanɛ.

¹⁹ Lo pa hɛ̃ la ya: “Ĩ hɛ̃ nga mbi nguru ni ko, wa zo ko la mbi kpa ti mbi ndo lo ko, lo lua nga Tɔrɔ Santo.”

²⁰ La Petro agbinya hɛ̃ lo ya: “Mɔ, na faranga tɛ mɔ zu, ĩ kpili bɛ ma ke! Ta sanga ma, mɔ ndoda bɛ mɔ ya, ye mɛ Nzapa ndohɛ̃ azi ko, alengbi ti vɔ̃ngɔ ni na faranga!

²¹ Ye mɛ e ndoli ko, ta kwa tɛ mɔ ya ni bɛ fani kɔi ma, ta sanga ma, ta bɛ mɔ nzɔ̃ni ka lɛ Nzapa ma.

²² Wa gbinya bɛ mɔ, mɔ zia siɔ ye mɛ fɛrɛ mɔ li, ko mɔ vɔrɔ Gbia Nzapa ya, se alengbi ko, lo ka Iɛ lo ndo siɔ dangɔ bɛ tɛ mɔ.

²³ Ta sanga ma, mbi hũ ya, mɔ ndoli sɔbɛre hɛ̃ e sĩ, ko siɔ ye ako nga ndo bɛ mɔ.”

²⁴ Simɔ ĩ ma so ko, lo gbinya hɛ̃ Petro na Yoanɛ ya: “Ĩ nvɛni, ĩ́ vɔrɔ Gbia na lo tɛ mbi ya, ta siɔ lo ati na mbi nga ma se ko fɛrɛ ĩ pa na ni ma.”

²⁵ Petro na Yoanɛ ĩ kɔ nda tɛnɛ mɛ ala hĩnga na lo tɛ Gbia Yezo, ala ĩ kɔ nda pangɔ tɛnɛ tɛ lo ko, ala mu lege ti diringɔ ka Yeruzalɛmɛ. Ngoi mɛ ndo ala so ta lege so ndogwe ko, ala ndopa Nzɔ̃ Pa hɛ̃ azi ma wo ma na ya kɔdɔrɔ ndɛ̃ ndɛ̃ ndɛ̃ ti sese ti Samaria.

Filipo apa Nzɔ̃ Pa hɛ kota wa kwa ti Etiopia

²⁶ Angelo tɛ Gbia apa hɛ̃ Filipo ya: “Lo ndozu, mɔ mu lege ti mbongo mɛ alo ka Yeruzalɛmɛ azu ka kɔdɔrɔ mɛ ili ni la Gaza. Lege ni aɔ ti be ndo.”

²⁷ Filipo ĩ ma so ko, lo lo, lo hã nɔ, lo ɔ. Ngoi mɛ lo so ndogwe ko, lo hũ kɔli kɔi asi gbɛlɛ lo. Kɔli ni wa Etiopia, lo kota wa kwa mɛ ndobata faranga tɛ Kandasɛ mɛ gbia wali ti sese ti Etiopia. Kɔli ko agwe ndo ka Yeruzalɛmɛ so vɔrɔngɔ Nzapa,

²⁸ ko diringɔ tɛ lo la. Lo du na ya pusu pusu mɛ ambarata ndogiɔ ni. Lo ndodi buku mɛ wa pangɔ nyɔ Nzapa Ezai asu.

²⁹ La Tɔrɔ Santo apa hɛ̃ Filipo ya: “ĩ tɛrɛ mɔ uzu ka tɔ̃ pusu pusu ko.”

³⁰ Filipo ĩ ma so ko, lo kpɛ, lo nɔ ka tɔ̃ ni, ko lo ma wa Etiopia so ndodi buku tɛ Ezai mɛ wa pangɔ nyɔ Nzapa. La lo hũnda wa Etiopia ko ya: “Mɔ ndoma nda tɛnɛ mɛ mɔ ndodi?”

³¹ Wa Etiopia agbinya hɛ̃ lo ya: “Se ta zo atɔndɔ nda ni hɛ̃ mbi ma ko, kɔdɛ mɛ mbi lengbi ti mangɔ ni nga sia?” La lo ili Filipo ya, lo ga lo ko ya pusu pusu, lo du so tɔ̃nda ni. Filipo ako ya ni adu.

³² Mbɛti ti ya buku mɛ wa Etiopia ndodi ndo lo mɛ: “Lo ndo nga ma nyi ngasã ngbaga mɛ andonɔ na ni ka ndo ti kpɔngɔ na asa. Lo ndo nga ma nyi ngasã ngbaga mɛ ndodu minyɔ na gbɛlɛ zo mɛ ndokiɔ kwa tɛrɛ lo. Lo du ndo kpɔ.

³³ Azi abi ndo kamɛnɛ lɛ lo, ta afa ndo ngbanga tɛ lo na seni ma. Ta zo atɛnɛ gbanda tɛnɛ tɛ atara lo ma! Ta sanga ma, aho ndo lo, ko ta lo dɛ so lɛ sese olo ma.”

³⁴ La wa Etiopia ahũnda Filipo ya: “Zo mɛ wa pangɔ nyɔ Nzapa ndotɛnɛ tɛnɛ tɛ lo na? Se mɔ ye ko, mɔ pa hɛ̃ mbi. Lo ndotɛnɛ tɛnɛ ti tɛrɛ lo nvɛni, bere ti tɛrɛ zo mɛ ndɛ̃?”

³⁵ La Filipo ato na ndo tɛne mɛ asu ka ya buku ni, apa Nzɔ̃ Pa tɛ Yezo hɛ̃ lo.

³⁶ Ngoi mɛ ala so ndogwe ko, ala si na ndo ngu kɔi, la wa Etiopia ahũnda Filipo ya: “Ba ngu lo mɛ, ko ye mɛ agbanzi mɔ na hɛ̃ngɔ mbi batisimɔ nɛ?” [

³⁷ Filipo agbinya hɛ̃ lo ya: “Se mɔ ye lo tɛ Yezo na be mɔ kɔi ko, mbi lengbi ti hɛngɔ mɔ batisimɔ.” La wa Etiopia apa hɛ̃ lo ya: “Mbi ye ya, Yezo Kristo lo Nyi Nzapa.”]

³⁸ So pɛni, wa Etiopia ahɛ̃ nyɔ ya, alo ti na pusu pusu. Pusu pusu ĩ dɔ ĩ lo ko, Filipo ana wa Etiopia ko zu se azu ka ya ngu, la Filipo ahɛ̃ lo batisimɔ.

³⁹ Ala ĩ lo ka ya ngu ĩ ko gegi ko, Tɔrɔ Santo tɛ Gbia aga amu Filipo aɔ na ni. Wa Etiopia ĩ de lɛ lo ko, ta lo ti hũ Filipo ma, la lo mu lege lo gwe na dengɔ be.

⁴⁰ Bo ngoi kɔi, Filipo ahũ ya ni si ka kɔdɔrɔ mɛ ili ni la Azotɛ, so pɛni lo ɔ na ndo kɔdɔrɔ kɔi kɔi so pangɔ Nzɔ̃ Pa tɛ Yezo. Lo gwe ndo ngbĩi, lo si ka kɔdɔrɔ mɛ ili ni la Sezarea.