Awa Pangɔ Kwa 7 - Fana Ngbangɔ 1987

Tɛnɛ mɛ Etieni atɛnɛ

¹ Kota gbia tɛ awa lungɔ Nzapa na ye ahũnda Etieni ya: “Se tɛnɛ mɛ mɔ tɛnɛ la?”

² La Etieni agbinya ya: “Ato mbi na ayata mbi, ĩ ma la! Uzu ya kotara e Abrahama agwe adu kɔdɔrɔ ka Karana ko, Nzapa mɛ na ndima asi ndo gbɛlɛ lo ka sese ti Mezopotamia.

³ Ko Nzapa apa ndo hɛ̃ lo ya: ‘Zia sese tɛ mɔ, na asongo mɔ, ko mɔ nɔ ka sese mɛ mbi na fangɔ na mɔ.’

⁴ La Abrahama azia sese tɛ lo ti Kaldea, anɔ adu kɔdɔrɔ ka Karana. So pɛni, to Abrahama akpi, la Nzapa ahã Abrahama so Karana ato lo ya, lo du so ya kɔdɔrɔ olo ĩ da na olo mɛ.

⁵ Ta Nzapa ahɛ̃ lo ndo tɛ lo nvɛni ya, lo du da ma. Ta Nzapa ahɛ̃ nga lo nyi ndo ya, lo kpã gɛrɛ lo da ma. Kanda Nzapa ako ndo kapa hɛ̃ lo ya, ni na hɛ̃ngɔ lo sese, wa na pɛ kwá tɛ lo ko, sese ni angbã tɛ atara lo. Kanda na ngoi ko ndo ko, ta Abrahama adú ndo nyi ma.

⁶ Tɛnɛ mɛ ndo Nzapa apa hɛ̃ lo lo mɛ: ‘Atara mɔ adu gbanda kɔdɔrɔ ka sese tɛ awa ndɛ̃. Ala ti gbanda ambɛ kai, ko azi ahɛ̃ la gbanda pɛnɔ na pɛ buru ngbangbo siɔ.

⁷ Wa azi ti sese ko gbanda la abi atara mɔ ambɛ ko, mbi gbanda la mbi fa ngbanga tɛ la, ko atara mɔ azia gbanda sese ni ko, aga avɔrɔ mbi na ndo olo mɛ.’

⁸ So pɛni, Nzapa na Abrahama agbe ngbanga. Ko fangɔ ganza la afa ngbanga ni. Nda mɛ ndo ngoi mɛ Abrahama ĩ dú nyi lo Izaki, ĩ la so pɛni pɔsɔ kɔi ko, lo fa lo ganza la. Izaki afa ndo Yakobo ganza, ko akɔzo akotara e sui kɔi ndoni sɛ mɛ aya Yakobo ko, Yakobo afara ndo nga la ganza.

⁹ “Akɔzo akotara e ali ndo sɔbɛrɛ hɛ̃ Yozɛfu mɛ nyita la, aka lo na ngere ya, lo ti mbɛ ka sese ti Egipito. Kanda ta Nzapa azia ndo lo sɛrɛrɛ ma,

¹⁰ lo hã ndo pɛnɔ tɛ lo zu lo zi, lo li ndo so ya, gbia ti Egipito aye Yozɛfu nzɔ̃ni. Nzapa asa ndara bɛ Yozɛfu, na lo ni la gbia ti Egipito akpa Yozɛfu gbia ti ya ngbo tɛ lo, nga na ti sese ti Egipito.

¹¹ So pɛni ndo ko, gwɛ̃ aya na lɛ sese ti Egipito, nga na ti Kanana zu. Azi ahũ ndo pɛnɔ sĩ, ko ta akotara e alua ndo ye kɔi ti tɛngɔ ma.

¹² Ngoi mɛ Yakobo ĩ ma ya, le tɛ mɛ ili la ble ka Egipito ko, lo to akotara e kai. Adu ndo kɔzo tongɔ la kai la.

¹³ Ngoi mɛ ala ĩ nɔ ti fani sɛ ko, Yozɛfu afa tɛrɛ lo na ayata lo, ala hĩnga lo, la gbia ti Egipito ahĩnga nda se wa tɛ Yozɛfu.

¹⁴ Yozɛfu ato kwa ya, to ni Yakobo, na azi sui mbara mbara ndoni kɔ̃ ti nda se wa tɛ ni aga.

¹⁵ La Yakobo ana la anɔ ka Egipito, sese mɛ ndo lo na akotara e akpili da la.

¹⁶ Alɔ ndo kinda tɛ la, agwe na ni ka kɔdɔrɔ ti Sikɛmɛ, la ahɔ ni kai, na ya sende mɛ ndo Abrahama avɔ̃ na ti aya Emɔrɔ.

¹⁷ “Nzapa ako ndo kapa hɛ̃ Abrahama. Ko ngoi mɛ bi ti kapa ni ĩ doli ti lengbingɔ ko, azi tɛ e mɛ ka Egipito ati ma wo ma, ala so ndosu bo sungɔ.

¹⁸ So pɛni, mbanga fana gbia kɔi mɛ ndo ta ahĩnga Yozɛfu ma, ato nda lɛngɔ gbia ka Egipito.

¹⁹ Gbia ko ahanda ndo azi tɛ e, ahɛ̃ ndo akotara e pɛnɔ, ahɛ̃ ndo nga la nyɔ ya, ala dɔ aya la mɛ ade apɛsɛni, azia gegi, wa ala kpili.

²⁰ Na ngoi ko ndo ko, adú Mɔizɛ. Lo dɛ̃ ndo nyingambi ka lɛ Nzapa sĩ. Akã ndo lo nzɛ̃ ta ka ya ngbo tɛ to lo.

²¹ Ngoi mɛ ndo adɔ lo azia gegi ko, mbanga nyi wali kɔi mɛ nyi gbia, aga amu lo, akã lo nga ma nyi lo nvɛni.

²² Na lo ni ko, aha ndo Mɔizɛ na ye zu mɛ andoha na awa Egipito, ko lo hĩnga ndo tɛnɛngɔ tɛnɛ nzɔ̃ni, lo ndoli ndo nga kwa kpuru kpuru.

²³ “Ngoi mɛ Mɔizɛ ĩ ti na buru sui siɔ ko, lo ye ndo ya, ni gwe ni ba asongo ni mɛ awa Izrayɛlɛ, la lo hã ndo nɔ lo ɔ.

²⁴ Ngoi mɛ lo so ndogwe ko, lo tã wa Egipito kɔi so ndosɔ̃ mbanga wa lzrayɛlɛ. Mɔizɛ ĩ hũ so ko, lo gbɔ̃ koko na ndo songo lo. Lo gɛ̃ kula tɛ lo, lo ho wa Egipito.

²⁵ Mɔizɛ ndoda ndo bɛ lo ya, asongo ni awa lzrayɛlɛ ahĩnga ya, Nzapa akpã ni ya, ni si na la na ya lo mbɛ tɛ la, kanda ta ala hĩnga ni ma.

²⁶ Ĩ la bu ndã ĩ de ko; Mɔizɛ ata awa lzrayɛlɛ sɛ so ndotiri to, ko lo ye ndo kangbingɔ ya la. La lo pa hɛ̃ la ya: ‘Aya bua, ĩ du ayata, ko nda mɛ ĩ ndotiri to na popo tɛ ĩ nɛ?’

²⁷ Ko zo mɛ asɔ̃ fɔ̃ lo, ayuru Mɔizɛ, apa hɛ̃ lo ya: ‘Zo mɛ akpa mɔ gbia ti ndo e na? Nda mɛ mɔ fa ngbanga tɛ e nɛ?

²⁸ Mɔ ye hongɔ mbi nga ma se mɛ biri mɔ ho na wa Egipito?’

²⁹ Mɔizɛ ĩ ma so ko, lo kpɛ, lo gwe lo du kɔdɔrɔ ka sese mɛ ili ni la Madiana, la lo dú aya kɔli sɛ kai.

³⁰ “Mɔizɛ ali ndo kai buru sui siɔ. Ko mbanga lá kɔi, ngoi mɛ lo ka bɛ ndo mɛ na tɔ̃ hɔtɔ ti Sinai ko, angelo asi gbɛlɛ lo. Angelo ni asi ndo na ya menga wá mɛ ndoza na ya sã.

³¹ Mɔizɛ ĩ hũ so ko, sasambe asa tɛrɛ lo. Ngoi mɛ lo ĩ i tɛrɛ lo ya, ni ba ni ko, lo ma legɔ̃ Gbia Nzapa apa hɛ̃ lo ya:

³² ‘Mbi Nzapa mɛ ndo akotara mɔ Abrahama, na Izaki, nga na Yakobo ndovɔrɔ la!’ Mɔizɛ ĩ ma so ko, mbɛtɔ agbɔ̃ lo, tɛrɛ lo adɔ kpu kpu kpu, ko ta lo ye ndo bangɔ ndo ni ko ma.

³³ La Gbia Nzapa apa hɛ̃ lo ya: ‘Hãna pɔrɔ gɛrɛ mɔ, ta sanga ma, ndo mɛ mɔ da ko, adu Santo.

³⁴ Mbi hĩnga pɛnɔ mɛ azi tɛ mbi ndohũ ka Egipito, mbi ma demangɔ tɛ la, la mbi ga ya, mbi zi la na ya lo mbɛ tɛ la. Wa ga na olo, mbi to mɔ ka Egipito.’

³⁵ “Awa Izrayɛlɛ akɛ̃ Mɔizɛ, ala hũnda lo ya: ‘Zo mɛ akpa mɔ gbia ti ndo e na? Nda mɛ mɔ fa ngbanga tɛ e nɛ?’ Ko nga bo lo la Nzapa ato lo ya, lo du gbia, lo du nga wa zingɔ awa Izrayɛlɛ na ya lo mbɛ tɛ la. Nzapa ato ndo kwa ni hɛ̃ lo na angelo mɛ asi gbɛlɛ lo ka ya sã.

³⁶ Mɔizɛ ndo la ahã awa lzrayɛlɛ ka Egipito, asi na la. Lo li ndo aye ti kpɛnɛ, na akukuna ye ka lɛ sese ti Egipito. Lo li nga ndo ni ka lɛ Bengba Ngu, nga ka bɛ ndo, na ngoi mɛ ndo ala li kai buru sui siɔ.

³⁷ Nga bo ndo Mɔizɛ la apa hɛ̃ awa Izrayɛlɛ ya: ‘Gbia Nzapa ato gbanda hɛ̃ ĩ wa pangɔ nyɔ lo mɛ nga ma se tɛ mbi. Lo gbanda wa Yuda, mbanga zo tɛ ĩ.’

³⁸ Mɔizɛ ndodu ndo ndoni kɔi na awa Izrayɛlɛ mɛ abombi tɛrɛ la ka bɛ ndo. Lo ndodu nga ndo ndoni kɔi na akotara e, nga na angelo mɛ ndo apa tenɛ hɛ̃ lo ka ndo hɔtɔ ti Sinai. Lo lua tɛnɛ tɛ Nzapa mɛ ndongbã kaka, ya ni pa hɛ̃ e.

³⁹ “Kanda ta akotara e aye ndo mangɔ nyɔ lo ma. Ala kɛ̃ ndo lo, ko ala ye ndo mungɔ lege ya, ani diri ka Egipito.

⁴⁰ La ala pa hɛ̃ Arona ya: ‘Eɛkɛ anzapa ti ngbilondo hɛ̃ e, wa ala ndodɔ nɔ gbɛlɛ e, ta sanga ma, ta e hĩnga ye mɛ ali Mɔizɛ mɛ ahã e ka sese ti Egipito, asi na ni ma!’

⁴¹ La ala lɛkɛ ngbilondo ti mbɔngu bagara, ala lu lo na ye. Ala saba ndo na lo ti ngbilondo mɛ ndo ala nvɛni alɛkɛ na ti la.

⁴² Kanda Nzapa adɔ ndo la azia ya, ala vɔrɔ atongolo ti lɛ ndozu, nga ma se mɛ asu na ni ka ya buku tɛ awa pangɔ nyɔ Nzapa ya: ‘Ĩ awa Izrayɛlɛ, asa na aye mɛ ndɛ̃ Mɛ ndo ĩ lu ka bɛ ndo na ya buru sui siɔ ko, Ta ĩ lu ndo na mbi ma.

⁴³ Ĩ yɔ ndo gofa tɛ nzapa mɛ ili lo Mɔlɔkɛ, Nga na ngbilondo ti tongolo mɛ ili lo Refana, ĩ fɔnɔ na ni. Ĩ lɛkɛ ndo angbilondo ni na ti ĩ ya, ĩ vɔrɔ ni. Nda mɛ mbi na hãngɔ ĩ na ndo olo mɛ, Ko mbi to ĩ yɔngɔrɔni ka pɛ sese ti Babilɔnɛ la.’ ”

⁴⁴ Etieni apa nga ya: “Ka bɛ ndo ko, akotara e ndo na gofa ti tandi. Gofa ni ndofa ya, Nzapa ndo ndoni kɔi na la. Alɛkɛ ndo ni nga ma se mɛ Nzapa ahɛ̃ na nyɔ lo hɛ̃ Mɔizɛ. Lo pa ndo hɛ̃ Mɔizɛ ya, lo lɛkɛ gofa ni bo nga ma se mɛ ni fa na lo.

⁴⁵ Akotara e ayɔ ndo gofa ni, afɔnɔ na ni ngbĩi, azia na yamba ti atara la mɛ ndo aga gesi. So pɛni, ngoi mɛ Yosue ĩ ti gbia tɛ la ko, ala mu sese tɛ azi mɛ ndo Nzapa atoma la da, la ala du so pɛnda azi ni ko. Ala gwe ndo na gofa ni, ko gofa ni aninga ndo ngbĩi, asi na ngoi mɛ Davidi ale na gbia tɛ lo.

⁴⁶ Nzapa ali ndo nzɔ̃ bɛ hɛ̃ Davidi, ko Davidi ahũnda ndo lo ya, se lo ye ko, ni wa da kɔi hɛ̃ lo Nzapa mɛ ndo Yakobo ndovɔrɔ.

⁴⁷ Ko nyi lo Salomɔ ndo la awa da ni hɛ̃ Nzapa.

⁴⁸ “Kanda ta Nzapa mɛ ka yayu ndodu na ya da mɛ azi ndowa ma, nga ma se mɛ ndo zo kɔi mɛ wa pangɔ nyɔ Nzapa apa na ni ya:

⁴⁹ ‘Nzapa apa ya: Yayu adu ngɛndɛ gbia tɛ mbi, Sese adu mbara mɛ mbi ndokpã gɛrɛ mbi ndoni. Ta mbi ye ya, ĩ wa da hɛ̃ mbi ma, Ta mbi na gwɛ̃ ti ndo ya, mbi wɔ tɛrɛ mbi da ma.

⁵⁰ Aye ko zu ko, mbi nvɛni la mbi li ni!’ ”

⁵¹ Etieni apa nga ya: “Aa, ĩ awa kpengba li, ĩ azi mɛ ĩ kɛ̃ kpãngɔ bɛ ĩ na ma ĩ na ndo tɛnɛ tɛ Nzapa, ĩ du azi mɛ ĩ ndokɛ̃ nyɔ Tɔrɔ Santo ngoi zu! Ĩ du nga ma akotara ĩ!

⁵² Akotara ĩ ahɛ̃ ndo pɛnɔ hɛ̃ awa pangɔ nyɔ Nzapa zu! Ala ho ndo azi mɛ ndo apia apa lo ti gangɔ tɛ zo mɛ bo lo kɔi la bɛta Zo. Na olo ko, bɛta Zo ni aga wɛ. Lo ndo la ĩ ka lo na ngere, ĩ ho nga lo.

⁵³ Ĩ mɛ ndo ĩ lua ndia tɛ Nzapa ti ndo aangelo ko, ta ĩ tɔndɔ ndo ni na seni ma.”

Kwa tɛ Etieni

⁵⁴ Ngoi mɛ awa fangɔ ngbanga ĩ ma so ko, ngɔnzɔ agbɔ̃ la hɛ̃ Etieni sĩ, la ala tɛrɛkɛ gu tɛ̃ la kɔrrr kɔrrr!

⁵⁵ Ko Etieni mɛ na nguru tɛ Tɔrɔ Santo sĩ ĩ ya le lo ndozu ko, lo hũ ndima tɛ Nzapa, lo hũ nga Yezo so lo na ndo kɔti ti Nzapa.

⁵⁶ La Etieni apa hɛ̃ la ya: “Ĩ ma la, mbi hũ lɛ yayu azi yango! Ko mbi hũ nga Nyi Zo alo na ndo kɔti ti Nzapa.”

⁵⁷ Ala ĩ ma so ko, ala dɛrɛ kɔngɔ kpengbani, ala mu ti la, avi na ma la. Ala zu anɔ hiɔ, agbɔ̃ lo,

⁵⁸ agiɔ lo so ya kɔdɔrɔ asi na lo, aboroka lo na tɛ́nɛ ya, ani ho lo. Azi ko ndo avɔ̃ to tɛrɛ lo uzu ko, ala hãna kota bɔngɔ tɛ la, ahɛ̃ nyi kɔli kɔi ya, lo bata ni hɛ̃ ani. Ili nyi kɔli ni la Saulo.

⁵⁹ Ngoi mɛ ala so ndoboroka Etieni ko, Etieni so ndosambela Nzapa ya: “Gbia Yezo, wa mu tɔrɔ tɛrɛ mbi!”

⁶⁰ So pɛni, lo kuku, lo dɛ kɔngɔ kpengbani ya: “Gbia, ta mɔ kpã nda siɔ ye olo tɛrɛ la ma!” Lo ĩ kɔ nda tɛnɛ ni ko, lo kpi.