Awa Pangɔ Kwa 6 - Fana Ngbangɔ 1987

Asara azi mbara mbara ya ala za awa pangɔ kwa tɛ Yezo

¹ Na ngoi ko ndo ko, awa yengɔ lo tɛ Yezo ndobu gi bungɔ, la Ayuda mɛ ndotɛnɛ yanga tɛ azi ti Grɛsɛ, adema tɛrɛ la hɛ̃ Ayuda mɛ anvɛ̃ kɔdɔrɔ. Ala pa ya, lá kwɛ lá kwɛ, na ngoi ti kangbingɔ tɛ ko, ta andohɛ̃ tɛ hɛ̃ awe muã tɛ ani na seni ma.

² La azi sui kɔ ndoni sɛ mɛ awa pangɔ kwa tɛ Yezo, abombi awa yengɔ lo tɛ Yezo zu, apa hɛ̃ la ya: “Ta alengbi ya, e dɔ pangɔ tɛnɛ tɛ Nzapa e zia, ko e kangbi tɛ ma.

³ Aya bua, na lo ni ko, ale ĩ sara azi mbara mbara so popo tɛ ĩ mɛ pa ili la nzɔ̃ni, é hɛ̃ la kwa olo mɛ. Ale ala du azi mɛ na nguru tɛ Tɔrɔ Santo sĩ, ala du nga awa ndara,

⁴ wadila e hɛ̃ tɛrɛ e zu so vɔrɔngɔ Nzapa, nga so hangɔ tɛnɛ tɛ lo.”

⁵ La awa yengɔ lo tɛ Yezo ayeka da. Azi mɛ ndo asara la akpã lo mɛ: Etieni mɛ aye lo tɛ Nzapa sĩ, lo nga na nguru tɛ Tɔrɔ Santo sĩ, na Filipo, na Prɔkɔrɛ, na Nikanɔrɛ, na Timona, na Parmenasi, nga na Nikola wa Antiɔsɛ mɛ ndo agbinya bɛ lo, andovɔrɔ Nzapa tɛ Ayuda.

⁶ So pɛni, asi na la ka gbɛlɛ awa pangɔ kwa tɛ Yezo. La awa pangɔ kwa tɛ Yezo asambela Nzapa, akpã ti la ndo la ya, Nzapa sunu la.

⁷ Ko tɛnɛ tɛ Nzapa andogwe ndo bo uzu uzu. Awa yengɔ lo tɛ Yezo ati ndo gba ka Yeruzalɛmɛ, ko awa lungɔ Nzapa na ye ndo ma wo ma la aye nga lo tɛ Yezo.

Agbɔ̃ Etieni

⁸ Nzapa ali ndo nzɔ̃ bɛ hɛ̃ Etieni, asa nga nguru tɛrɛ lo. Na lo ni ko, Etieni ndoli ndo akota ye ti kpɛnɛ, nga na akukuna ye na gbɛlɛ azi.

⁹ Ko ta ambanga azi mɛ ndɛ̃ aye ndo lo ni hɛ̃ lo ma. Ei nɔ ti kɔi ndo la azi ti da sambela mɛ ili ni la “Ambɛ ati abɔrɔ.” Ala ndo Ayuda ti Sirɛnɛ na ti Alɛkizandria. Li nɔ ti sɛ ndo la Ayuda ti Silisia na ti Azia. Ala zu na Etieni ato nda bimbingɔ tɛnɛ.

¹⁰ Ala ha ndo ɔngɔ lo na tɛnɛ gba, ta sanga ma, lo ndotɛnɛ ndo tɛnɛ na ndara mɛ Tɔrɔ Santo ahɛ̃ lo.

¹¹ La azi ni ko ahɛ̃ faranga hɛ̃ azi mɛ ndɛ̃, wa azi ni ko akara ló tɛrɛ Etieni ya: “E ma ndo Etieni aguru Mɔizɛ na Nzapa!”

¹² Ala wa azi, na akangba ti kɔdɔrɔ, nga na awa hangɔ ndia ya, ala kɛ̃ Etieni. Ala ĩ wa azi wɛ ko, ala ti ndo Etieni, agbɔ̃ lo, agwe na lo ka gbɛlɛ awa fangɔ ngbanga.

¹³ Ala nɔ nga na awa karangɔ ló tɛrɛ Etieni, la awa karangɔ ló ni ko apa ya: “Kɔli olo ndotɛnɛ tɛnɛ siɔni ngoi zu na ili kota da Nzapa tɛ e mɛ santo, lo ndotɛnɛ nga siɔ tɛnɛ tɛrɛ ndia tɛ Mɔizɛ!

¹⁴ E ma ndo lo ndopa ya, Yezo wa Nazarɛtɛ na karangɔ kota da Nzapa, ko lo na gbinyangbingɔ se li ye mɛ ndo Mɔizɛ afa na e.”

¹⁵ Azi zu mɛ ndo ka ya da ngbanga aba Etieni toka toka, ko ala hũ ndo ya, lɛ lo agbinyangbi ati nga ma lɛ angelo.