Awa Pangɔ Kwa 5 - Fana Ngbangɔ 1987

Ananiasi na ya lo Safira akpili

¹ Mbanga kɔli kɔi ili lo Ananiasi, ili ya lo Safira. Ala mangbi ndo la Ananiasi aka yaka tɛ la na ngere.

² Lo ĩ kangbi ya faranga ni ko, lo bata mbanga na lo tɛ lo. Lo mu tanga faranga ni, lo nɔ lo hɛ̃ awa pangɔ kwa tɛ Yezo. Ya lo ahĩnga ni.

³ La Petro ahũnda lo ya: “Ananiasi, nda mɛ Satana ahanda mɔ, mɔ bata mbanga faranga ti yaka tɛ mɔ na lo tɛ mɔ, ko mɔ pa nvɛnɛ hɛ̃ Tɔrɔ Santo nɛ?

⁴ Uzu ti mɔ kangɔ yaka ni na ngere ko, ni ndo ti mɔ. Ngoi mɛ mɔ ka ni wɛ ko, faranga ni nga ti mɔ. Ta seni la ma? Ko nda mɛ mɔ li so nɛ? Nvɛnɛ ko la mɔ pa ko, ta mɔ pa ni hɛ̃ azi ma, kanda mɔ pa ni hɛ̃ Nzapa.”

⁵ Ananiasi ĩ ma so ko, lo ti, lo kpi. Kota mbɛtɔ agbɔ̃ ndo azi zu mɛ ama pa ni.

⁶ La aya kɔli aga agana kinda tɛ Ananiasi na bɔngɔ, amu ni, anɔ ahɔ.

⁷ Ĩ ɔ so pɛni saa nga ma ta ko, Safira aga ali ya da, ta lo hĩnga ye mɛ fɛrɛ asi uzu ti lo gangɔ ma.

⁸ Petro ahũnda lo ya: “Pa hɛ̃ mbi hĩ, yaka mɛ ndo ĩ ka na ngere ko, se faranga ni la?” Safira agbinya hɛ̃ Petro ya: “Seni la.”

⁹ La Petro ahũnda nga lo ya: “Nda mɛ ĩ mangbi, ko ĩ tara bɛ Tɔrɔ Santo tɛ Gbia nɛ? Wa ma la, azi mɛ fɛrɛ ahɔ kɔ mɔ ko, ala la ka nyɔ da, ko ala nga na yɔngɔ kinda tɛ mɔ ɔngɔ na ni.”

¹⁰ Bo na ngoi ni ko, Safira ati so gu gɛrɛ Petro, akpi. La aya kɔli ko ali ya da, ata wali ko akpi wɛ. Ala yɔ kinda tɛ lo aɔ na ni, anɔ ahɔ lo na tɔ̃nda kɔ lo.

¹¹ Kota mbɛtɔ agbɔ̃ ndo azi ti Eklezia zu, na azi zu mɛ ndo ama pa ni.

Awa pangɔ kwa tɛ Yezo ali aye ti kpɛnɛ ma wo ma

¹² Awa pangɔ kwa tɛ Yezo ndoli ndo akukuna ye na aye ti kpɛnɛ ma wo ma na gbɛlɛ azi. Awa yengɔ lo tɛ Yezo kwɛ zu ndobombi ndo tɛrɛ la ka ya gofa mɛ ili ni la “Gofa tɛ Salomɔ”.

¹³ Ta mbanga zo mɛ ndɛ̃ kɔi atara ndo lingɔ na li nɔ tɛ la ma, kanda azi ndogonda ndo la sĩ.

¹⁴ Ko akɔli na awe mɛ ndo aye lo tɛ Gbia Yezo ndobu ndo bungɔ.

¹⁵ Azi aga na awa ngã, adɔngɔ la na ndo tange, na ndo gbogbo na tɛrɛ lege ya, ngoi mɛ se Petro aga so ɔngɔ ko, be gɛgɛrɛ nyingɔ tɛrɛ lo avi ambanga awa ngã ni.

¹⁶ Azi gba alo ndo ka kɔdɔrɔ mɛ ndũ na Yeruzalɛmɛ, akpɛlɛ na awa ngã, na azi mɛ na siɔ tɔrɔ ya tɛrɛ la, agwe na la kai, la tɛrɛ la zu ahã wee!

Abɛ̃ pɛnɔ hɛ̃ awa pangɔ kwa tɛ Yezo

¹⁷ Kota gbia tɛ awa lungɔ Nzapa na ye, na azi tɛ lo zu ali sɔbɛrɛ hɛ̃ awa pangɔ kwa tɛ Yezo. Azi ni ko adu azi ti li nɔ tɛ Asaduseo. La ala longa,

¹⁸ agbɔ̃nɔ awa pangɔ kwa tɛ Yezo, asa la bɔlɔkɔ.

¹⁹ Ĩ da na bi ko, angelo tɛ Gbia aga azizi nyɔ ngise ti da bɔlɔkɔ ni, asi na la, apa hɛ̃ la ya:

²⁰ “Ĩ nɔ ka ya kota da Nzapa, ĩ longa na gɛrɛ ĩ, ĩ pa hɛ̃ azi tɛnɛ zu mɛ ala lengbi ti luangɔ bɛta du na lo ni.”

²¹ Awa pangɔ kwa tɛ Yezo ama nyɔ angelo. Ĩ da na nda perere ko, ala nɔ ka ya kota da Nzapa, ato nda hangɔ azi na lo tɛ Yezo. Kota gbia tɛ awa lungɔ Nzapa na ye, na azi tɛ lo, abombi Ayuda zu mɛ akangba ti kɔdɔrɔ, ya ani fa ngbanga. So pɛni, ala to awa batangɔ nyɔ ghágbá tɛ kota gbia ka da bɔlɔkɔ ya, ala lɔ awa pangɔ kwa tɛ Yezo aga na la.

²² Ala ĩ si ka da bɔlɔkɔ ko, ta ala tã awa pangɔ kwa ma. La ala diri ka tɛ awa fangɔ ngbanga, apa hɛ̃ la ya:

²³ “Ngoi mɛ e nɔ, e si kai ko, e tã avĩ nyɔ da bɔlɔkɔ na seni. E tã nga awa batangɔ da bɔlɔkɔ zu na ndo tɛ la, ka nyɔ da. Ko ngoi mɛ e zizi nyɔ da ko, ta e tã zo kɔi ka ya ni ma.”

²⁴ Ngoi mɛ gbia tɛ awa batangɔ kota da Nzapa, na agbia tɛ awa lungɔ Nzapa na ye ĩ ma so ko, li la akpɛ, na lo mɛ ya, awa pangɔ kwa tɛ Yezo akpɛlɛ. Ko awa fangɔ ngbanga ahũndangbi tɛrɛ la na lo ye mɛ na singɔ gesi.

²⁵ La mbanga zo kɔi aga apa hɛ̃ la ya: “Ĩ ma la, azi mɛ biri ĩ sa la bɔlɔkɔ ko, ala ndoha azi na lo ka ya kota da Nzapa.”

²⁶ Gbia tɛ awa batangɔ nyɔ gbágbá ĩ ma so ko, lo nɔ na afɔ̃ lo, ala gbɔ̃nɔ awa pangɔ kwa tɛ Yezo, aga na la, kanda ta ala li ndo la na ye kɔi ma. Ta sanga ma, ala kpɛ ndo mbɛtɔ ya, so azi aboroka ani na tɛ́nɛ.

²⁷ Ngoi mɛ ala ĩ ga na la ka gbɛlɛ awa fangɔ ngbanga wɛ ko, kota gbia tɛ awa lungɔ Nzapa na ye ahũnda la ya:

²⁸ “E kɛ̃ ndo hɛ̃ ĩ kasa kasa ya, ta ĩ ti ha azi na lo tɛ zo kɔli ko ma. Ko ati li sia? Wa ye mɛ ĩ ha ko, alengbi na ya kɔdɔrɔ ti Yeruzalɛmɛ zu. Ko ĩ ye ya, ĩ kpa nda kwa tɛ lo tɛrɛ e?”

²⁹ La Petro na awa pangɔ kwa tɛ Yezo agbinya hɛ̃ la ya: “Na popo tɛ Nzapa na azi ko, ale e ma nyɔ Nzapa.

³⁰ Ĩ gɔngɔ ndo Yezo ndo krusi, lo kpi, la Nzapa mɛ ndo akotara e ndovɔrɔ lo, aso lo na pɛ kwa.

³¹ Nzapa aya lo ka yayu, akpã lo na ndo kɔti ti lo, akpa lo Gbia, akpã nga lo Wa songɔ azi. Lo li ndo so ya, Yezo azi lege hɛ̃ awa Izrayɛlɛ, ala gbinya bɛ la, wa Nzapa aka le lo ndo siɔ ye tɛ la.

³² E du atemwɛ ni, Tɔrɔ Santo mɛ Nzapa ahɛ̃ awa mangɔ nyɔ lo adu nga temwɛ ni.”

³³ Awa fangɔ ngbanga ĩ ma so ko, ngɔnzɔ agbɔ̃ la gati gati, ko ala ye ndo hongɔ awa pangɔ kwa tɛ Yezo.

³⁴ Kanda mbanga wa fangɔ ngbanga kɔi, lo Farizeo, ili lo Gamaliɛlɛ. Lo bɛta wa hangɔ ndia tɛ Nzapa, ko azi ndogonda ndo lo sĩ. Lo lo ndozu na popo tɛ awa fangɔ ngbanga, lo hɛ̃ nyɔ ya, asi na awa pangɔ kwa tɛ Yezo hĩ.

³⁵ Ĩ si na la wɛ ko, lo pa hɛ̃ awa fangɔ ngbanga ya: “Ĩ awa Izrayɛlɛ, ĩ bata li ĩ nzɔ̃ni na lo ye mɛ ĩ separa lingɔ na azi olo.

³⁶ Ta sanga ma, aɔ na olo bi yakere ko, mbanga kɔli kɔi aga ndo so ndo mɛ, ili lo Teudasi. Lo mu ndo tɛrɛ lo ya, ni kota zo. Ko azi aga ma ngbangbo siɔ aye ndo lo tɛ lo. Ngoi mɛ ndo aho lo ko, awa yengɔ lo tɛ lo zu adɔ lege tɛ lo azia, ada yenge yenge, la nda li nɔ tɛ la ati.

³⁷ Na pɛ kwá tɛ lo, ĩ da na ngoi ti dikɔngɔ azi ti kɔdɔrɔ ko, mbanga kɔli kɔi aga nga, ili lo Yudasi, lo wa Galilea. Azi gba aye nga ndo lo tɛ lo, ko aho nga ndo lo. Azi zu ko ndo aye lo tɛ lo ko, ala dɔ nga lege tɛ lo azia, ada yenge yenge.

³⁸ “Na olo ko, mbi pa hɛ̃ ĩ ya, ta ĩ ti kpã bɛ ĩ na ndo azi olo ma, ĩ zia la agwe. Ta sanga ma, aye mɛ ala ndoli, se adu ya, aye ni alo ge tɛ azi ti lɛ sese ko, nda la na tingɔ.

³⁹ Kanda se aye ni ko alo ka tɛ Nzapa biani ko, ta ĩ lengbi ti gbɛ̃ngɔ ni ma. I du na kpengba lɛ, so ĩ kɛ̃ lo mɛ Nzapa aye!” Awa fangɔ ngbanga ĩ ma so ko, ala yeka tɛnɛ mɛ Gamaliɛlɛ atɛnɛ hɛ̃ la.

⁴⁰ La ala ti ili awa pangɔ kwa tɛ Yezo. Ala ĩ ga ko, awa fangɔ ngbanga ahɛ̃ nyɔ, la asɔ̃ la na fimbo. So pɛni, awa fangɔ ngbanga agbanzi la ya, ta ala ti pa tɛnɛ tɛ Yezo hɛ̃ azi ma, la azi la, ala gwe.

⁴¹ Awa pangɔ kwa tɛ Yezo azia awa fangɔ ngbanga agwe na dengɔ bɛ, ta sanga ma, Nzapa aye ndo ya, ale ali la siɔni na lo tɛ Yezo.

⁴² Lá kɔi kɔi ko, ala ndopa Nzɔ̃ Pa tɛ Yezo Mɛsia hɛ̃ azi ka ya kota da Nzapa, nga ka ya da. Ta ala zia nga hangɔ tɛnɛ tɛ lo hɛ̃ la ma.