Awa Pangɔ Kwa 4 - Fana Ngbangɔ 1987

Petro na Yoa nɛ asi ka gbɛlɛ awa fangɔ ngbanga

¹ Ngoi mɛ ndo Petro na Yoanɛ ade na tɛnɛngɔ tɛnɛ hɛ̃ azi ko, awa lungɔ Nzapa na ye, na agbia tɛ awa batangɔ kota da Nzapa, nga na ambanga Asaduseo aga.

² Ngɔnzɔ agbɔ̃ ndo la sĩ, na lo mɛ ya, Petro na Yoanɛ ndoha ndo azi na tɛnɛ tɛ Yezo, ko ala ndopa nga ndo hɛ̃ la ya, azi mɛ ndokpili ko, ala so gbanda nga ma se mɛ Yezo aso na ni.

³ La ala gbɔ̃nɔ Petro na Yoanɛ, asa la bɔlɔkɔ, na lo mɛ ya, ndɔ ade ndo wɛ. Ala la ka ya bɔlɔkɔ bi kɔi.

⁴ Ko azi gba mɛ ndo ama tɛnɛ tɛ Yezo mɛ Petro na Yoanɛ atɛnɛ ko, ala ye lo ni. Azi mɛ aye lo tɛ Yezo adu ndo nga ma koto kɔ̃.

⁵ Ĩ la bu nda ĩ de ko, agbia tɛ Ayuda, na akangba ti kɔdɔrɔ, nga na awa hangɔ ndia tɛ Nzapa abombi tɛrɛ la ka Yeruzalɛmɛ. Ala ndo kwɛ zu awa fangɔ ngbanga.

⁶ Ambanga azi mɛ ndo aga nga kai lo mɛ: Anɛ mɛ kota gbia tɛ awa lungɔ Nzapa na ye, na asongo lo zu, na Kaifa, na Yoanɛ, nga na Alɛkizandrɛ.

⁷ Awa fangɔ ngbanga ato kwa hɛ̃ Petro na Yoanɛ ya ala ga. Ala ĩ ga ko, awa fangɔ ngbanga ahũnda la ya: “Zo mɛ ahɛ̃ ĩ nguru la ĩ sara na wa zɛ̃ olo na? Zo mɛ ĩ sara wa zɛ̃ olo na ili lo na?”

⁸ Ko Tɔrɔ Santo asa nguru tɛrɛ Petro, la Petro apa hɛ̃ la ya: “Ĩ agbia tɛ azi, na ĩ akangba ti kɔdɔrɔ,

⁹ ĩ hũnda e na olo mɛ na lo nzɔ̃ ye mɛ e li tɛrɛ wa nzɛ̃ olo, nga na se mɛ e sara na lo.

¹⁰ Nga ma la ĩ hũnda e so ko, ale ĩ na awa Izrayɛlɛ zu, ĩ hĩnga ya, kɔli olo mɛ asi gbɛlɛ ĩ na nzɔ̃ tɛrɛ ko, adu na lo nguru tɛ Yezo Kristo wa Nazarɛtɛ mɛ ndo ĩ gɔngɔ lo ndo krusi, ko Nzapa aso lo na pɛ kwá.

¹¹ Yezo lo zo mɛ ndo Buku tɛ Nzapa apa lo tɛ lo ya, lo nga ma: ‘Tɛ́nɛ mɛ ndo ĩ awa wangɔ da ĩ bi, La ati na olo mɛ tɛ́nɛ ti nda ngɔrɔ da.’

¹² Bo Yezo kɔi la ndoso azi, ta sanga ma, na le sese zu ko, ta Nzapa ato hɛ̃ e zo mɛ ndɛ̃ ya, e so na lo tɛ lo ma.”

¹³ Awa fangɔ ngbanga ĩ hũ kpengba be tɛ Petro na Yoanɛ ko, ala bema sĩ, ala hĩnga ndo ya, Petro na Yoanɛ adu agɛgɛrɛ azi, azi mɛ ta amanda mbɛti gba ma. Ko ala hĩnga nga ya, Petro na Yoanɛ na Yezo ndoɔ ndo ndoni kɔi.

¹⁴ Awa fangɔ ngbanga ĩ hũ kɔli mɛ zɛ̃ tɛ lo awe, ĩ lo na gɛrɛ lo so tɔ̃nda Petro na Yoanɛ ko, ta kɔdɛ mɛ ya, ala ti tɛnɛ tɛnɛ da ma.

¹⁵ La ala hɛ̃ nyɔ hɛ̃ Petro na Yoanɛ ya, ala lo so ya da ngbanga asi. Ala ĩ si we ko, awa fangɔ ngbanga ato nda bimbingɔ tɛnɛ na popo tɛ la.

¹⁶ Ala ndopa ya: “Ye mɛ e lengbi ti lingɔ na azi olo nɛ? Ta sanga ma, azi ti Yeruzalɛmɛ zu ahĩnga nzɔ̃ni ya, ala la ali kota ye ti kpɛnɛ olo, ko ta e lengbi ti bɛrɛngɔ lo ni ma.

¹⁷ Wa se ta e ye ya, pa ni afɔnɔ, agwe yɔngɔrɔni ma ko, e kɛ̃ hɛ̃ la kpengbani ya, ta ala ti pa tɛnɛ tɛ Yezo hɛ̃ zo kɔi ma.”

¹⁸ La awa fangɔ ngbanga aili Petro na Yoanɛ, ahɛ̃ la nyɔ kpengbani ya, ta ala tɛnɛ tɛnɛ tɛ Yezo, bere ala ha azi na lo tɛ lo ma.

¹⁹ La Petro na Yoanɛ agbinya hɛ̃ la ya: “E lengbi ti mangɔ nyɔ ĩ bere e lengbi ti mangɔ nyɔ Nzapa? Ye mɛ nzɔ̃ni ka lɛ Nzapa nɛ? Wa ĩ fa ngbanga ni ko ĩ nvɛni!

²⁰ Kanda ye mɛ e hũ na lɛ e, nga na tɛnɛ mɛ e ma na ma e ko, ta e lengbi ti ziangɔ pangɔ tɛnɛ ni ma.”

²¹ Awa fangɔ ngbanga ati kɛ̃ ló hɛ̃ Petro na Yoanɛ kasa kasa. Ala gi ndo kɔdɛ ti hɛ̃ngɔ pɛnɔ hɛ̃ Petro na Yoanɛ gba, ta sanga ma, azi zu ndogonda ndo Nzapa na lo ti ye mɛ Petro na Yoanɛ ali tɛrɛ wa zɛ̃ ko, la ala zi la.

²² Wa zɛ̃ mɛ ndo Petro na Yoanɛ asara lo na lege ti lingɔ ye ti kpɛnɛ ko, lo ndo na buru sui siɔ ndoni da.

Awa yengɔ lo tɛ Yezo asambela Nzapa

²³ Ngoi mɛ ndo ala ĩ zi Petro na Yoanɛ we ko, Petro na Yoanɛ agwe ka tɛ afɔ̃ la, apa hɛ̃ la tɛnɛ kwɛ zu mɛ ndo agbia tɛ awa lungɔ Nzapa na ye, nga na akangba ti kɔdɔrɔ atɛnɛ hɛ̃ la.

²⁴ Awa yengɔ lo tɛ Yezo ĩ ma so ko, nyɔ la ase kɔi, la ala to nda sambelangɔ Nzapa ya: “Gbia, mɔ la mɔ li yayu, na sese, na ngu, nga na aye kwɛ zu.

²⁵ Na nguru tɛ Tɔrɔ Santo ko, mɔ kpã ndo tɛnɛ na nyɔ Davidi mɛ kotara e, lo mɛ nga wa kwa tɛ mɔ ya, lo pa ya: ‘Nda mɛ azi ti lɛ sese ndoli ye na yakɛ so nɛ? Nda mɛ ala ndoda bɛ la na ye mɛ ta ala lengbi ti lingɔ ma nɛ?

²⁶ Agbia ti lɛ sese abombi tɛrɛ la, Alɛkɛ nga tɛrɛ la so tiringɔ to na Nzapa nga na Mɛsia tɛ lo.’

²⁷ Ta sanga ma, adu biani ya, Erodɛ na Pɔnsɛ Pilato, na Ayuda, nga na awa ndɛ̃ abombi ndo tɛrɛ la so ya kɔdɔrɔ olo ti Yeruzalɛmɛ ya, ani ho bɛta wa kwa tɛ mɔ Yezo mɛ ndo mɔ sara lo mɔ kpã ya, lo du Mɛsia.

²⁸ Na lo nguru tɛ mɔ, nga na lo dangɔ bɛ tɛ mɔ ko, ala li ye kwɛ mɛ ndo mɔ pia, mɔ pa lo ni.

²⁹ Na olo mɛ ko, Gbia, ba se mɛ andogia na bɛ awa kwa tɛ mɔ, wa hɛ̃ la nguru ya, ala pa tɛnɛ tɛ mɔ na kpengba bɛ.

³⁰ Hɛ̃ nga la nguru tɛ mɔ ya, na ili bɛta wa kwa tɛ mɔ Yezo ko, ala sara awa nga, ala li akukuna ye, nga na aye ti kpɛnɛ.”

³¹ Ngoi mɛ sambela tɛ la ĩ we ko, ndo mɛ ala bombi tɛrɛ la da ayingi kpu kpu kpu! Tɔrɔ Santo asa nguru tɛrɛ la zu, la ala to nda pangɔ tɛnɛ tɛ Nzapa na kpengba bɛ.

Awa yengɔ lo tɛ Yezo akangbi aye tɛ la na popo tɛ la

³² Azi gba mɛ ndo aye lo tɛ Yezo ndodu ndo bo bɛ la kɔi, ndomangbi ndo nga nzɔ̃ni. Ta zo kɔi na popo tɛ la ndopa ndo ya, ye tɛ ni bo ti ni kɔi ma. Kanda ye tɛ la zu ndodu ndo na lo tɛ la zu.

³³ Awa pangɔ kwa tɛ Yezo ndopa ndo na nguru zu ya, Gbia Yezo aso na pɛ kwa. Ko Nzapa ali ndo kota nzɔ̃ bɛ hɛ̃ la zu.

³⁴ Ye mɛ ndo ala lengbi ti dungɔ na ni ko, ta zo kɔi na popo tɛ la azanga ndo ni ma. Ta sanga ma, azi zu mɛ ndo na yaka, bere na da ko, ala ka ndo ni na ngere, amu faranga ni,

³⁵ ahɛ̃ awa pangɔ kwa tɛ Yezo, ko ala kangbi ndo faranga ni na popo tɛ la, nga ma se mɛ zo kɔi kɔi mɛ azanga, alengbi ti luangɔ ni.

^36-37 Mbanga zo mɛ ndo aka ye tɛ lo la Yozɛfu. Lo ka yaka tɛ lo na ngere, lo mu faranga ni, lo hɛ̃ awa pangɔ kwa tɛ Yezo. Lo ndo mbanga zo mɛ na ale tɛ Levi. Adú ndo Yozɛfu ka ya zúa mɛ ili ni la Siprɛ. Awa pangɔ kwa tɛ Yezo ahɛ̃ ndo lo mbanga ili mɛ ndɛ̃ ya Barnabasi. (Nda ili ni ko ya: “Wa hɛ̃ngɔ nzɔ̃ wangɔ.”)