Awa Pangɔ Kwa 3 - Fana Ngbangɔ 1987

Petro asara kɔli mɛ wa zɛ

¹ Mbanga lá kɔi, Petro ana Yoanɛ so ndogwe ka ya kota da Nzapa na lo ti sambela mɛ ndodu ha saa ti ta ti ndɔ.

² Ala ĩ si kai ko, ala hũ kɔli kɔi mɛ azɛ̃ na ngoi mɛ ndo lo dɛ nyingambi, lo so nyɔ ngise du. Andoili nyɔ ngise ni ya “Nzɔ̃ Nyɔ Ngise.” Lá kɔi kɔi, andoyɔ lo aga akpã so nyɔ ngise ni ko. Andoga ndo na lo, akpã so ndo ko ya, lo yɔ faranga na ti azi mɛ ndoli ka ya kota da Nzapa.

³ Kɔli ko ĩ hũ Petro na Yoanɛ mɛ aga so lingɔ ka ya kota da Nzapa ko, lo yɔ ndo na ti la.

⁴ Ko ala ba lo toka toka, la Petro apa hɛ̃ lo ya: “Ba e hĩ!”

⁵ Wa zɛ̃ ko aba la yɛkɛ, ta sanga ma, lo da ndo be lo ya, ala na hɛ̃ngɔ ni ye.

⁶ La Petro apa hɛ̃ lo ya: “Ta mbi na faranga ti hɛ̃ngɔ mɔ ma, kanda ye mɛ mbi na ni ko, mbi na hɛ̃ngɔ ni hɛ̃ mɔ. Ye ni lo mɛ: na ili Yezo Kristo wa Nazarɛtɛ, lo ndozu, mɔ dɔ nɔ!”

⁷ La Petro agbɔ̃ kɔti ti lo, aya lo ndozu. Bo na ngoi ni ko, gɛrɛ lo na kɔtɔ gɛrɛ lo ati kpengbani.

⁸ Lo hulu, lo lo na gɛrɛ lo, lo to nda dɔngɔ nɔ. La lo na Petro, na Yoanɛ abombi, ali ka ya kota da Nzapa. Lo so ndodɔ nɔ, so ndohulu, so ndogonda Nzapa.

⁹ Azi zu ahũ lo so ndodɔ nɔ, so ndogonda Nzapa.

¹⁰ Ko ala ĩ hĩnga ya, wa zɛ̃ mɛ ndo ndodu so nyɔ Nzɔ̃ Nyɔ Ngise ti kota da Nzapa so yɔngɔ ndo la ko, ala bema, zema ahã nga la, na lo mɛ ya, gɛrɛ lo ati nzɔ̃ni.

Petro atɛnɛ tɛnɛ hɛ̃ azi ka ya kota da Nzapa

¹¹ Ta kɔli ko aye ndo ziangɔ Petro na Yoanɛ sɛrɛrɛ ma. Azi ko zu ĩ hũ so ko, ala bema, akpɛlɛ anɔ ka tɔ̃nda la ka nyɔ gofa mɛ na nyɔ kota da Nzapa. Ili gofa ni la “Gofa tɛ Salomɔ.”

¹² Petro ĩ hũ so ko, lo nɛ hɛ̃ azi ko ya: “Ĩ awa Izrayɛlɛ, zɛ̃ tɛ kɔli olo awe, ko nda mɛ ĩ ndobema na lo ni so nɛ? Nda mɛ ĩ ndoba e toka toka nɛ? Ĩ da be ĩ ya, kɔli olo adɔ nɔ na lo nguru tɛ e, bere na lo mɛ ya, e hɛ̃ tɛrɛ e hɛ̃ Nzapa? Ta seni la ma!

¹³ Nzapa mɛ ndo Abrahama, na Izaki, na Yakobo, nga na akotara e ndovɔrɔ ko, lo hɛ̃ ndo ndima hɛ̃ Yezo mɛ wa kwa tɛ lo. Ĩ nvɛni ĩ hɛ̃ ndo lo hɛ̃ agbia kɔdɔrɔ. Ngoi mɛ ndo Pilato aye ya ni zi lo ko, ĩ kɛ̃ ndo.

¹⁴ Ĩ kɛ̃ ndo Zo mɛ santo, Zo mɛ nga bɛta Zo, ko ĩ hũnda ndo Pilato ya, lo zi hɛ̃ ĩ wa kpɔngɔ azi.

¹⁵ Ĩ ho ndo Gbia mɛ ndohɛ̃ azi bɛta du. Kanda Nzapa aso ndo lo na pɛ kwá, ko e hũ lo na lɛ e nvɛni.

¹⁶ Kɔli olo mɛ ĩ ndoba lo, ĩ hĩnga nga lo ko, na lo nguru tɛ Yezo la lo lua nguru, na lo mɛ ya, lo ye lo tɛ Yezo. Na lo ti yengɔ lo tɛ Yezo mɛ ka bɛ lo la zɛ̃ tɛ lo awɛ buai, nga ma se mɛ ĩ zu ĩ hũ na lɛ ĩ.

¹⁷ “Aya bua, ngoi mɛ ndo ĩ na agbia tɛ ĩ, ĩ ka Yezo ko, mbi da bɛ mbi ya, ta ĩ hĩnga ndo ya lo la Mɛsia ma.

¹⁸ Kanda lo ni ko asi so fangɔ ya, tɛnɛ mɛ ndo Nzapa apia atɛnɛ hɛ̃ awa pangɔ nyɔ lo zu ati na seni. Tɛnɛ ni lo mɛ: Mɛsia mɛ ni na tongɔ lo ko, ale lo hũ pɛnɔ.

¹⁹ Na lo ni ko, í gbinya bɛ ĩ, í diri ka tɛ Nzapa, wa se mɛ lo ka le lo ndo siɔ ye tɛ ĩ la.

²⁰ Se ĩ li so ko, Gbia na hɛ̃ngɔ ngoi hɛ̃ atɔrɔ tɛrɛ ĩ ya, ala wɔ tɛrɛ la, ko lo na tongɔ hɛ̃ ĩ Mɛsia mɛ ndo lo pia lo sara lo kpã hɛ̃ ĩ, ili Mɛsia ni la Yezo.

²¹ Na olo ko, ale Yezo Kristo angbã ka yayu, nga ka gbanda Nzapa ali ya, ye kwɛ zu ati na seni, nga ma se mɛ ndo abɛta awa pangɔ nyɔ Nzapa apa na ni.

²² Mɔizɛ apa ndo ya: ‘Gbia Nzapa tɛ ĩ ato gbanda hɛ̃ ĩ wa pangɔ nyɔ lo, nga ma se tɛ mbi, lo du gbanda mbanga zo tɛ ĩ. Ale ĩ ma tɛnɛ zu mɛ gbanda lo tɛnɛ hɛ̃ ĩ.

²³ Azi zu mɛ gbanda ta ama lo ma ko, Nzapa ahãna gbanda la na popo tɛ azi tɛ lo azi, akpɔ nga la!’

²⁴ Ko awa pangɔ nyɔ Nzapa zu mɛ ndo atɛnɛ tɛnɛ gã, ato ka ndo Samuɛlɛ ko, zo kɔi kɔi apa nga ndo tɛnɛ na lo ti ngoi olo e da.

²⁵ Kapa mɛ ndo Nzapa ako ti ndo awa pangɔ nyɔ lo ko, adu na lo tɛ ĩ. Ngbanga mɛ ndo Nzapa na akotara ĩ agbe ko, adu nga na lo tɛ ĩ. Lo gbe ndo ngbanga ni na ngoi mɛ ndo lo pa hɛ̃ Abrahama ya: ‘Mbi na sunungɔ ale tɛ azi ti lɛ sese zu ti ndo atara mɔ.’

²⁶ Na lo ni la Nzapa amu ndo wa kwa tɛ lo Yezo, ato lo hɛ̃ ĩ uzu ya, se zo kɔi kɔi na popo tɛ ĩ azia siɔ ye tɛ lo, wadila Yezo asunu ĩ.”