Awa Pangɔ Kwa 28 - Fana Ngbangɔ 1987

Polo asi ka ya zua mɛ ili ni la Maltɛ

¹ Ngoi mɛ ndo e ko nzɔ̃ni ka gegi wɛ ko, azi apa ya, zúa mɛ e si da ko, ili ni la Maltɛ.

² Azi ti ya zúa ko ato ndo wá, so ndoza lau lau ya ani yamba na e, ta sanga ma, ngu ani ndo, ko de ndoya nga ndo kpengbani. Ala ili e zu, e nɔ, e ka wá ni kɛrɛrɛ.

³ Polo amu gba nzanze, ya ni bi ka lɛ wá. Ngoi mɛ baba wá ĩ gbɔ̃ gba nzanze ko, ngbɔ alo ka ya ni, atɛ ti lo, agwa da.

⁴ Azi ti ya zúa ko ĩ hũ ya, ngbɔ agwa ti Polo ko, ala tɛnɛ na popo tɛ la ya: “Kɔli olo bo wa hongɔ azi biani, ta sanga ma, be lo so kwá ti kota ngu wɛ ko, ‘nzapa bɛta ló’ aye bo ya, lo kpi.”

⁵ Polo afĩ ti lo, la ngbɔ ni ahã, ati ya wá, kanda ta kã ni asɔ tɛrɛ lo ma.

⁶ Ambanga azi ndomasi ya, tɛrɛ lo na susungɔ, bere lo na tingɔ, kpingɔ bo na ngoi ni ko. Ala ĩ masi ngbĩi, ala ĩ hũ nga ya, ta ye kɔi na lingɔ lo ma ko, ala diri na nyɔ la, apa ya: “Zo olo mɛ lo nzapa.”

⁷ E ndo ndũ na ndo tɛ Publiusi mɛ gbia ti ya zúa ni. Lo yamba e nzɔ̃ni, ko e la ka tɛ lo bi ta.

⁸ E tã ndo to lo so ndo tange se, na lo mɛ ya, tɛrɛ lo ndogbi ndo gambu gambu, ko ya lo ndosasa ndo nga lo. Polo anɔ aba lo, asambela Nzapa, akpã ti lo ndo lo, la tɛrɛ lo ahã.

⁹ So pɛni, ambanga awa ngã mɛ ndɛ̃ ti ya zúa ko, aga nga ka tɛ Polo, la Polo asara la zu.

¹⁰ Azi ti ya zúa ko ahɛ̃ ndo e ye sĩ so gondangɔ na e. Ĩ ti ndo na ngoi mɛ e ga so kongɔ ya masua ɔngɔ ko, ala hɛ̃ e ye zu mɛ alengbi ti zangɔ e na ngoi ti fɔnɔ tɛ e.

Poto asi ka Roma

¹¹ E li ndo so ya zúa ti Maltɛ nzɛ̃ ta. E tã ndo masua kɔi mɛ ili ni la “Anzapa mɛ asi angbɔ”. Masua ni ko alo ndo ka Alɛkizandria, aga so gwengɔ ka Roma, ko angbã ndo so ndo ko, so kungɔ ya, ngoi ti de aɔ hĩ, wa ni hã nɔ. Ko ngoi ti de ĩ ɔ wɛ ko, e ko ya ni, e ɔ.

¹² E nɔ, e si ka kɔdɔrɔ kɔi mɛ ili ni la Sirakuzɛ, e li so ndo ko bi ta.

¹³ Ko e lo so ndo ko, e ɔ bo ti tɛrɛ nyɔ ngu, la e si ka kɔdɔrɔ mɛ ili ni la Regio. Ĩ la bu nda ĩ de, na ngoi mɛ e so ndogwe ko, yá alo mbongo, ato nda yangɔ, ko e li bi sɛ, la e si ka kɔdɔrɔ mɛ ili ni la Puzɔlɛ.

¹⁴ Ngoi mɛ e si so ya kɔdɔrɔ ni ko, e tã awa Kristo, ko ala hũnda e ya, e la so tɛ ani pɔsɔ kɔi. Se mɛ ndo e gwe na ni ka Roma la.

¹⁵ Awa Kristo mɛ ka Roma ĩ ma pa tɛ e ko, ala ngoro e ngbĩi, atã e na ndo mɛ ili ni la “Ngere tɛ Apiusi,” nga na ndo mɛ ili ni la “Da Ta tɛ Awa Fɔnɔ”. Polo ĩ hũ la ko, lo hɛ̃ sia kɔli hɛ̃ Nzapa, la nguru agbɔ̃ nga lo.

Polo aha azi na tɛnɛ tɛ Nzapa ka Roma

¹⁶ Ngoi mɛ ndo e si ka Roma ko, ahɛ̃ lege hɛ̃ Polo ya, lo ndola ka ya da na kunɛ lo. Kanda ahɛ̃ ndo turugu kɔi ya, lo ndobata lo.

¹⁷ Ĩ la so pɛni bi ta ko, Polo asɔrɔ agbia tɛ Ayuda mɛ ndodu ka Roma ya, ala ga ka tɛ ni. Ngoi mɛ ala ĩ bombi tɛre la ko, Polo apa hɛ̃ la ya: “Aya bua, ta mbi li siɔ ye kɔi na tɛrɛ awa tɛ e ma, ta mbi kɛ̃ nga tɔndɔngɔ sé du tɛ akotara e ma. Abɛ nga so ko, ambanga Ayuda agbɔ̃ mbi ka Yeruzalɛmɛ, aka mbi hɛ̃ azi ti Roma.

¹⁸ Akota azi ti Roma ahũnda mbi na ndo, ko ala ye ndo zingɔ mbi, ta sanga ma, ta ala hũ ndo nda mɛ alengbi ti gbɔ̃ngɔ mbi, hongɔ mbi ma.

¹⁹ Ko Ayuda akɛ̃ bo kɛ̃ngɔ ya, ta azi mbi ma. La mbi hũnda agbia ya, mbi ye bo singɔ ge gbɛlɛ kota gbia ti Roma, wa lo fa ngbanga tɛ mbi. Wa ta mbi ga ge so vɔ̃ngɔ to tɛrɛ awa tɛ e ma.

²⁰ Ĩ ba nda mɛ mbi ili ĩ ya, ĩ si ge tɛ mbi, ko e tɛnɛ nga tɛnɛ la. Wa mbi ti wa bɔlɔkɔ na lo tɛ Zo mɛ Ayuda ndolɛndɛrɛ lo ya, lo na gangɔ.”

²¹ La agbia tɛ Ayuda mɛ ka Roma apa hɛ̃ lo ya: “Ta e lua mbɛti kɔi mɛ azi ti Yudea ato na lo tɛ mɔ ma. Ta mbanga wa tɛ e alo nga kai, aga apa tɛnɛ, bere atɛnɛ tɛnɛ siɔni na ili mɔ hɛ̃ e ma.

²² Kanda e ye ya, e hĩnga dangɔ be tɛ mɔ, ta sanga ma, e hĩnga ya, na ndo kwɛ zu ko, azi ndokɛ̃ lo tɛ azi mɛ mɔ li na li nɔ tɛ la.”

²³ La ala na Polo ako bi mɛ ala na tengbingɔ na ni, ya ani tɛnɛ tɛnɛ. Ngoi mɛ bi ni ĩ lengbi ko, ala ga ma wo ma, ata lo ka ndo mɛ lo ndola da. Polo ato nda tenɛngɔ tɛnɛ na nda perere, atɛnɛ ngbĩi ndɔ ade lo so tɛrɛ ni. Lo pa ndo hɛ̃ la lo Lɛngɔ Gbia tɛ Nzapa. Lo ndogi ndo kɔdɛ ya, ni pa tɛnɛ tɛ Yezo hɛ̃ la. Lo di atɛnɛ ti ndia tɛ Mɔizɛ, lo di nga abuku mɛ ndo awa pangɔ nyɔ Nzapa asu. Lo li ndo so ya, se ala ma tɛnɛ ni, wa ala ye lo tɛ Yezo.

²⁴ Ambanga Ayuda mɛ ndo ama tɛnɛ mɛ lo tɛnɛ ko, ala ye lo ni, kanda ambanga mɛ ndɛ̃ akɛ̃ tɛ la lo ni.

²⁵ Ta nyɔ la zu ase ndo kɔi ma, ko ngoi mɛ ala hã nɔ ya ani gwe ko, Polo apa bo tɛnɛ olo hɛ̃ la ya: “Tɛnɛ mɛ ndo Tɔrɔ Santo atɛnɛ, na ngoi mɛ ndo lo tɛnɛ na tɛnɛ hɛ̃ akotara ĩ ti ndo Ezai, wa pangɔ nyɔ Nzapa ko, lo tɛnɛ ndo na seni!

²⁶ Tɔrɔ Santo apa ndo ya: ‘Nzapa apa ya, Nɔ ka tɛ azi ko, mɔ pa hɛ̃ la ya, Ala ma gbanda tɛnɛ nzɔ̃ni, Kanda ta ala hĩnga gbanda nda ni ma. Ala ba gbanda ndo nzɔ̃ni, Kanda ta ala hũ gbanda ye kɔi ma.

²⁷ Ta sanga ma, azi ko akɛ̃ dungɔ na kɔdɛ ya, so ani hĩnga ndo. Ala vĩ ma la ya, so ani ma tɛnɛ. Ala vĩ lɛ la ya, so ani hũ ndo, So ani gbinya bɛ ani, ani ye mbi, ko mbi sara ani.’ ”

²⁸ La Polo apa nga hɛ̃ la ya: “Ĩ hĩnga ya, Nzapa ato kwa hɛ̃ azi mɛ ta Ayuda ma ya, ni na songɔ la, ko ala la na yengɔ lo ni!” [

²⁹ Polo ĩ tɛnɛ so wɛ ko, Ayuda ahã nɔ agwe. Ngoi mɛ ala so lege ko, ala so ndobimbi tɛnɛ kpengbani na popo tɛ la.]

³⁰ Polo ali ndo buru sɛ zu so ya da mɛ lo ndofuta. Lo ndoyamba ndo azi zu mɛ ndoga so bangɔ lo.

³¹ Lo ndopa ndo lo Lɛngɔ Gbia tɛ Nzapa hɛ̃ la, ko lo ndoha ndo nga la na lo tɛ Gbia Yezo Kristo na kpengba bɛ. Ko ta azi agia ndo lo ma.