Awa Pangɔ Kwa 26 - Fana Ngbangɔ 1987

Polo abɛrɛ nyɔ lo ka gbɛlɛ Agripa

¹ Gbia Agripa apa hɛ̃ Polo ya: “Mbi hɛ̃ mɔ lege ya, mɔ bɛrɛ nyɔ mɔ.” La Polo aya ti lo ndozu, abɛrɛ nyɔ lo ya:

² “Gbia Agripa, bɛ mbi ade ma wo ma na lo nyɔ mbi mɛ mbi na bɛrɛngɔ ge gbɛlɛ mɔ na lá olo, na lo ti aye zu mɛ Ayuda avɔ̃ to tɛrɛ mbi na lo ni.

³ Ta sanga ma, sé du zu mɛ Ayuda na ni, na tɛnɛ zu mɛ ala ndobimbi ko, mɔ hĩnga ni nzɔ̃ni. Ko mbi vɔrɔ tɛrɛ mbi hɛ̃ mɔ ya, mɔ zi bɛ mɔ kpa, mɔ ma mbi.

⁴ “Ayuda zu ahĩnga sé du tɛ mbi, ato na ngoi mɛ ndo mbi dɛ nyi kɔli. Ala hĩnga se mɛ mbi to nda maingɔ ka popo tɛ azi tɛ mbi, na ngoi mɛ ndo mbi ka Yeruzalɛmɛ.

⁵ Ala hĩnga ndo mbi gã nvɛni, ko se ala ye ko, ala lengbi ti pangɔ hɛ̃ mɔ ya, mbi ndo zo ti li nɔ tɛ Afarizeo. Afarizeo adu azi mɛ ndotɔndɔ lo tɛ Nzapa na seni nvɛni.

⁶ Andotɛnɛ ngbanga tɛ mbi na olo, ta sanga ma, mbi ndokpã bɛ mbi na ndo kapa mɛ ndo Nzapa ako hɛ̃ akotara e.

⁷ Ale tɛ azi tɛ e ti Izrayɛlɛ sui kɔi ndoni se ndokpã bɛ la ndo kapa ni ya, ati na Seni na ngoi mɛ ani dɛ lɛ ani ngɛ̃, ko ala ndoli kwa kpuru kpuru hɛ̃ Nzapa bi na lá. Ae gbia! Adu na lo ti bɛ mbi mɛ mbi ndokpã na ndo kapa ko la Ayuda avɔ̃ to tɛrɛ mbi!”

⁸ La Polo apa nga hɛ̃ la ya: “Nda mɛ ĩ ndoda bɛ ĩ ya, ta Nzapa aso gbanda azi na pɛ kwá ma nɛ?

⁹ “Mbi nvɛni, ge ya be mbi ko, mbi ndogi ndo na se kɔdɛ zu ya, mbi gbanzi azi na yengɔ lo tɛ Yezo wa Nazarɛtɛ.

¹⁰ Ba ye mɛ ndo mbi ndoli ka Yeruzalɛmɛ la. Ko agbia tɛ awa lungɔ Nzapa na ye ahɛ̃ ndo mbi lege, mbi gbɔ̃nɔ awa Kristo ma wo ma, mbi sa la bɔlɔkɔ. Ngoi mɛ ndo afa ngbanga ya aho la ko, mbi ye ndo lo ni.

¹¹ Mbi hɛ̃ ndo la pɛnɔ fani sĩni ka ya da sambela zu mɛ mbi ndotã la da. Ko mbi tara ndo gbanzingɔ la ya, ala zia yengɔ lo tɛ Yezo. Ngɔnzɔ agbɔ̃ ndo mbi hɛ̃ la, ko mbi ndogwe nga ndo ka ya ambanga kɔdɔrɔ mɛ ndɛ̃ so hɛ̃ngɔ la pɛnɔ.”

Polo akambisa se mɛ lo gbinya na bɛ lo

¹² “Agbia tɛ awa lungɔ Nzapa na ye ahɛ̃ mbi nyɔ ya, mbi gwe ka Damasi, so hɛ̃ngɔ pɛnɔ hɛ̃ awa Kristo.

¹³ Gbia Agripa! Ngoi mɛ ndo mbi so lege mbi, ĩ ti na ge tɛ bɛ kɔmbitɛ ko, mbi hũ ye mɛ sũngɔ ni aɔ sũngɔ tɛ lá, alo ka ndozu, asũ so gunda mbi na afɔ̃ mbi mɛ ndo e na la e gwe fɔnɔ.

¹⁴ E zu e sa tise, ko mbi ma legɔ̃ Gbia so ndoili mbi na yanga tɛ Ayuda ya: ‘Saulo, Saulo, nda mɛ mɔ ndohɛ̃ mbi pɛnɔ so nɛ? Mɔ ndohɛ̃ pɛnɔ hɛ̃ tɛrɛ mɔ na lingɔ kpengba li, nga ma se mɛ bagara ndohɛ̃ pɛnɔ hɛ̃ tɛrɛ lo na ngoi mɛ se to gbia lo ayuru lo na kɛkɛ ko, lo kɛ̃.’

¹⁵ La mbi hũnda ya: ‘Gbia, mɔ na?’ La Gbia agbinya hɛ̃ mbi ya: ‘Mbi Yezo mɛ mɔ ndohɛ̃ mbi pɛnɔ la,

¹⁶ wa lo ndozu. Mbi si gbɛlɛ mɔ ya, mɔ ti wa kwa tɛ mbi, mɔ du nga temwɛ tɛ mbi, ko mɔ pa hɛ̃ azi se mɛ mɔ hũ na mbi na lá olo mɛ, mɔ pa nga hɛ̃ la ye mɛ mbi na fangɔ na mɔ fani mɛ ndɛ̃.

¹⁷ Mbi na batangɔ mɔ ya, ta Ayuda na azi mɛ ndɛ̃ mɛ mbi na tongɔ mɔ ka tɛ la, ali mɔ siɔni ma.

¹⁸ Mbi to mɔ ka tɛ la ya, mɔ zi lɛ la, mɔ hã la na ya mbingo, mɔ kpã la na ya vuru ndo, mɔ hã nga la na gbe ti Satana, ko mɔ hɛ̃ la hɛ̃ Nzapa. Wa Nzapa aka lɛ lo ndo siɔ ye tɛ la, ahɛ̃ nga la ndo na popo tɛ azi tɛ lo, na lo mɛ ya, ala ye lo tɛ mbi.’ ”

Polo apa se mɛ ndo lo li na kwa tɛ lo

¹⁹ “Gbia Agripa, na lo ni ko, ye mɛ ndo mbi hũ ka ndozu na ya suma ko, ta mbi kɛ̃ ndo lingɔ ni ma.

²⁰ Kanda mbi pa ndo tɛne tɛ Nzapa uzu hɛ̃ azi ti Damasi, na ti Yeruzalɛmɛ. So pɛni, mbi pa hɛ̃ azi ti sese ti Yudea zu, mbi pa nga hɛ̃ azi ti sese mɛ ndɛ̃ ya, ala gbinya bɛ la, ati azi tɛ Nzapa, ko ala li kwa mɛ afa ya, ala gbinya bɛ la biani.

²¹ Na lo ni ndo la Ayuda agbɔ̃ mbi na ngoi mɛ ndo mbi ka ya kota da Nzapa, ko ala gingisa ndo ya, ani ho mbi.

²² Kanda Nzapa abata ndo mbi na ti la ya, ta ala li mbi na ye ma. Ko mbi dɛ na lá olo lɛ mbi ngɛ̃ ya, mbi pa ye mɛ mbi hũ hɛ̃ ambumbusɛ azi, mbi pa nga hɛ̃ akota azi. Mbi ndopa bo lo mɛ ndo awa pangɔ nyɔ Nzapa, na Mɔizɛ apa ya, na singɔ.

²³ Ala pa ndo ya, ale Mɛsia ahũ pɛnɔ, lo du kɔzo zo mɛ na songɔ na pɛ kwá. Ko Mɛsia ni na pangɔ ya, Nzapa aso gbanda Ayuda mɛ azi tɛ e, na azi ti sese mɛ ndɛ̃. Ko songɔ azi ni adu gbanda nga ma se mɛ lá ndosũ ko atoma mbingo.”

Polo apa hɛ̃ gbia Agripa ya lo ye lo tɛ Yezo

²⁴ Ngoi mɛ Polo so ndobɛrɛ nyɔ lo ko, Fɛstusi agbo ndo lo ya: “Polo, nyingɔ ya li mɔ! Mbɛti mɛ mɔ di ma wo ma la ahɛ̃ mɔ nyingɔ so!”

²⁵ La Polo agbinya hɛ̃ lo ya: “Malo gbia, ta nyingɔ ya li mbi ma. Tɛnɛ mɛ mbi ndotɛnɛ adu bɛta tɛnɛ, ko ta adu tɛnɛ ti nyingɔ ma.

²⁶ Gbia Agripa ahĩnga tɛnɛ olo zu, ko na olo ko, mbi ndotɛnɛ ni na kpengba bɛ ge gbɛlɛ lo. Mbi hĩnga nzɔ̃ni ya, lo hĩnga atɛnɛ olo kɔi kɔi, ta sanga ma, ta tɛnɛ olo asi ndo na gbe mbingo ma.

²⁷ Gbia Agripa, mɔ ye lo tɛnɛ ko ndo awa pangɔ nyɔ Nzapa apa ni? Mbi hĩnga ya, mɔ ye lo ni!”

²⁸ Agripa apa hɛ̃ Polo ya: “Polo, mbi hũ ya, mɔ ndogi kɔdɛ ya, mbi ye lo tɛ Yezo bo na olo mɛ!”

²⁹ La Polo agbinya hɛ̃ lo ya: “Abɛ na olo, abɛ gbanda ngbĩi ko, mbi ndovɔrɔ Nzapa ya, ta adu bo mɔ Agripa kɔi wa mɔ ti nga ma se tɛ mbi ma, kanda ale adu ĩ azi zu mɛ ĩ ma mbi na lá olo mɛ. Ko ta mbi ye ya, agbele ĩ na ngo nwa nga ma se mɛ agbe na mbi ma!”

³⁰ Polo ĩ tɛnɛ so wɛ ko, gbia Agripa na Berenisɛ mɛ nyita lo ti wali, na Fɛstusi mɛ gbia tɛ leta, nga na azi zu mɛ ndo so gunda la,

³¹ alonga aɔ, atɛnɛ ka popo tɛ la nvɛni ya: “Ta kɔli olo ali siɔ ye kɔi mɛ alengbi ti hongɔ lo, bere alengbi ti bingɔ lo bɔlɔkɔ na lo ni ma.”

³² La gbia Agripa apa hɛ̃ Fɛstusi ya: “Se ta adu ya, kɔli olo aye singɔ ka gbɛlɛ kota gbia ti Roma ya, lo fa ngbanga tɛ ni ma ko, ale azi lo. Wa oko lo ye ya, ni si ka gbɛlɛ kota gbia ti Roma ko, e zia lo, lo nɔ.”