Awa Pangɔ Kwa 25 - Fana Ngbangɔ 1987

Polo aye singɔ ka gbɛlɛ kota gbia ti Roma

¹ Fɛstusi aga asi ka ndo ti gbia tɛ lo ka kɔdɔrɔ ti Sezarea. Lo ĩ li bi ta ko, lo lo so ndo ko, lo gwe ka Yeruzalɛmɛ.

² Lo ĩ si kai ko, agbia tɛ awa lungɔ Nzapa na ye, na Ayuda mɛ akota azi ati vɔ̃ to tɛrɛ Polo. Ala hũnda Fɛstusi ya,

³ se lo ye ko, lo hɛ̃ nyɔ, wa amu Polo ka Sezarea adiri na lo ge Yeruzalɛmɛ. Ala pa ndo so, ta sanga ma, ala nvɛni amangbi ndo ya, ani ho Polo ka lege.

⁴ La Fɛstusi agbinya hɛ̃ la ya: “Polo ade ka bɔlɔkɔ ka Sezarea, ko angbã yakere, mbi nvɛni mbi diri mbi gwe kai.”

⁵ Lo pa nga hɛ̃ la ya: “Se adu ya Polo ali ye mɛ siɔni ko, ale agbia tɛ ĩ aga, e na la, e gwe lege kɔi ka Sezarea, wa ala vɔ̃ to tɛrɛ Polo.”

⁶ Fɛstusi ala ndo ka Yeruzalɛmɛ bi nga ma miambe bere sui kɔi gɛgɛrɛ, la lo diri ka Sezarea. Ĩ la bu ndã ĩ de ko, lo li da ngbanga, lo hɛ̃ nyɔ ya aga na Polo.

⁷ Polo ĩ ga ko, Ayuda mɛ ndo alo ka Yeruzalɛmɛ aga aka lo kɛrɛrɛ. Ala kara ndo ló ma wo ma, nga na akota tɛnɛ tɛrɛ lo. Ko ala ha ndo fangɔ yango ya, adu biani gba.

⁸ La Polo abɛrɛ nyɔ lo ya: “Ta mbi li siɔ ye kɔi mɛ ako nyɔ ndia tɛ Ayuda ma. Ta mbi li siɔ ye ka ya kota da Nzapa ma. Ta mbi li nga siɔ ye kɔi na tɛrɛ kota gbia ti Roma ma.”

⁹ Fɛstusi aye ndo ya, ni li ye mɛ be Ayuda alengbi ti dengɔ na lo ni, la lo hũnda Polo ya: “Mɔ ye ya, mɔ gwe ka Yeruzalɛmɛ, wa afa ngbanga tɛ mɔ kai na gbɛlɛ mbi na lo tɛnɛ olo mɛ?”

¹⁰ Polo ĩ ma so ko, agbinya hɛ̃ lo ya: “Mbi na olo mɛ ge da ngbanga tɛ kota gbia ti Roma. Mbi ye bo ya, afa ngbanga tɛ mbi so ndo mɛ, nga ma se mɛ mɔ nvɛni mɔ hĩnga nzɔ̃ni ya, ta mbi li siɔ ye kɔi na tɛrɛ Ayuda ma.

¹¹ Se ngbanga ati na mbi, bere se mbi li siɔ ye mɛ alengbi ti hongɔ mbi na lo ni ko, mbi na yengɔ ya aho mbi. Kanda se ta bɛta lo adu na ya atɛnɛ mɛ ala vɔ̃ to tɛrɛ mbi na lo ni ma ko, ta zo kɔi alengbi ti hɛ̃ngɔ mbi hɛ̃ la ya, ala ho mbi ma. Ko mbi ye bo singɔ ka gbɛlɛ kota gbia ti Roma, ya lo fa ngbanga tɛ mbi.”

¹² Ngoi mɛ Fɛstusi na awa hɛ̃ngɔ lo wangɔ ĩ tɛnɛ tɛnɛ we ko, lo pa hɛ̃ Polo ya: “Oko mɔ ye ya, mɔ si ka gbɛlɛ kota gbia ti Roma, wa lo fa ngbanga tɛ mɔ ko, nɔ bo ka gbɛlɛ lo.”

Fɛstusi asi na tɛnɛ tɛ Polo ka gbɛlɛ Agripa na Berenisɛ

¹³ Ĩ la so pɛni yakere ko, gbia Agripa na nyita lo ti wali Berenisɛ aga ka Sezarea so balangɔ Fɛstusi.

¹⁴ Ala la ndo kai bi gba. La Fɛstusi asi na tɛnɛ tɛ Polo ka gbɛlɛ gbia Agripa. Lo pa hɛ̃ lo ya: “Felikisi azia ndo mbanga kɔli kɔi ge ya bɔlɔkɔ.

¹⁵ Ngoi mɛ ndo mbi gwe ka Yeruzalɛmɛ ko, agbia tɛ awa lungɔ Nzapa na ye, nga na Ayuda mɛ akangba ti kɔdɔrɔ avɔ̃ to terɛ lo. Ala hũnda mbi ya, mbi fa ngbanga mbi bi li lo.

¹⁶ La mbi gbinya hɛ̃ la ya, na se li ye tɛ awa Roma, uzu ti ala fangɔ ngbanga bingɔ li zo ko, ale zo ko asi so gbɛlɛ awa vɔ̃ngɔ to tɛrɛ lo, abɛre nga nyɔ lo, wa ala fa ngbanga abi li lo.

¹⁷ Ala ĩ ma so ko, e na la e lo ka Yeruzalɛmɛ, e ga ndoni kɔi, e si ge Sezarea. Ĩ la bu ndã ĩ de ko, ta mbi gɛrɛ na ngoi ma, mbi li da ngbanga, mbi hɛ̃ nyɔ ya, aga na kɔli ko ge gbɛlɛ mbi.

¹⁸ Ngoi mɛ awa vɔ̃ngɔ to tɛrɛ lo ĩ si ge gbɛlɛ mbi ko, mbi da bɛ mbi ya, ala na vɔ̃ngɔ to tɛrɛ lo ya, lo li siɔ ye, kanda ta ala ti vɔ̃ to tɛrɛ lo na lo siɔ ye bɛ kɔi ma.

¹⁹ Ala na lo ndobimbi ndo bo tɛnɛ na lo ti ló Nzapa tɛ la nvɛni, nga na lo tɛ mbanga zo mɛ ili lo la Yezo. Yezo ni akpi ndo, ko Polo ndonɛ ya, lo so na pɛ kwa.

²⁰ Ta mbi hĩnga se mɛ ndo mbi lengbi ti bangɔ na nda tɛnɛ olo ma. Nda mɛ mbi hũnda Polo ya, se lo ye ko, lo gwe ka Yeruzalɛmɛ, wa afa ngbanga ni la.

²¹ Ko Polo aye tɛ lo ndo ya, ni si ka gbɛlɛ kota gbia ti Roma, wa lo fa ngbanga tɛ ni. Lo ye ndo nga ya, ni ngbã so ya bɔlɔkɔ, nga ka kota gbia ti Roma aba nda tɛnɛ tɛ ni hĩ wadila. La mbi hɛ̃ nyɔ ya, abata lo ka ya bɔlɔkɔ nga ka lá mɛ mbi to lo ka tɛ kota gbia ti Roma.”

²² Agripa ĩ ma so ko, apa hɛ̃ Fɛstusi ya: “Mbi ye ya, mbi nvɛni mbi ma nga nyɔ Polo.” La Fɛstusi agbinya hɛ̃ lo ya: “Na ndã wa mɔ ma nyɔ lo.”

²³ Ĩ la bu ndã ĩ de ko, gbia Agripa, na Berenisɛ, na agbia tɛ aturugu, nga na akota azi ti kɔdɔrɔ aga na azi butu butu so pɛko la, ali ka ya da ngbanga. La Fɛstusi ahɛ̃ nyɔ, aga na Polo.

²⁴ Ko Fɛstusi apa ya: “Gbia Agripa, na ĩ azi zu mɛ so ndo mɛ, í ba kɔli olo. Adu na lo tɛ lo la Ayuda aga ndo butu butu ka gbɛlɛ mbi ka Yeruzalɛmɛ, nga ka Sezarea ya, ani vɔ̃ to tɛrɛ lo, ko ala ndodɛrɛ ndo kɔngɔ ya, ale aho lo.

²⁵ Ko ta mbi hũ tɛ mbi siɔ ye mɛ lo li, ya aho lo na lo ni ma. Wa nga ma la lo nvɛni lo ye ya, ni si ka gbɛlɛ kota gbia ti Roma, wa lo fa ngbanga tɛ ni ko, mbi ye nga ya, mbi to lo ka tɛ kota gbia ti Roma.

²⁶ Ko ta mbi hĩnga tɛnɛ ngĩ mɛ mbi lengbi ti sungɔ tɛrɛ lo, wa mbi to hɛ̃ kota gbia ti Roma ma, nda mɛ mbi si na lo ge gbɛlɛ mɔ la. Wa mbi si na lo ge gbɛlɛ mɔ gbia Agripa, ya ngoi mɛ ndɛ e hũnda lo na ndo, wa mbi lua tɛnɛ, mbi su na mbɛti, mbi to hɛ̃ kota gbia ti Roma.

²⁷ Mbi hũ tɛ mbi ya, uzu ti tongɔ wa bɔlɔkɔ ka tɛ kota gbia ti Roma ko, nzɔ̃ni ale akambisa nda tɛnɛ tɛ lo yango, wadila ato lo.”