Awa Pangɔ Kwa 24 - Fana Ngbangɔ 1987

Ayuda avɔ̃ to tɛrɛ Polo

¹ Ĩ la so pɛni bi kɔ̃ ko, Ananiasi mɛ kota gbia tɛ awa lungɔ Nzapa na ye, na ambanga akangba ti kɔdɔrɔ, nga na Tɛrtulusi mɛ wa gbɔ̃ngɔ koko ti ngbanga, ala zu alo ka Yeruzalɛmɛ agwe ka Sezarea. Ko ala si ka gbɛlɛ felikisi mɛ gbia tɛ leta, so vɔ̃ngɔ to tɛrɛ Polo.

² Aili Polo, Polo aga, la Tɛrtulusi asi ka gbɛlɛ Felikisi, avɔ̃ to tɛrɛ Polo ya: “Malo gbia Felikisi! E ndodu siriri na lo tɛ mɔ, kɔdɔrɔ tɛ e ati nzɔ̃ni na lo ti ndara ti kwa mɛ mɔ na ni.

³ E hɛ̃ mɔ sia kɔli si na lo ye zu mɛ e ndolua ngoi zu nga na ndo kwɛ zu.

⁴ Gbia, ta mbi ye ya, mbi gɛrɛ na ngoi tɛ mɔ yɔngɔrɔni ma, ko mbi hũnda mɔ ya, na nzɔ̃ bɛ tɛ mɔ ko, mɔ ma e yakere hĩ.

⁵ E hũ ya, kɔli olo ko, lo bɛta siɔ zo. Ayuda mɛ na lɛ sese zu ndotɔmbɔkɔ na lo tɛ lo, ko lo nga gbia ti li nɔ tɛ azi mɛ andoili la ya: Anazereo.

⁶ Lo tara ndo gbɛ̃ngɔ ndima ti kota da Nzapa, la e gbɔ̃ lo. [E ye ndo ya, e fa ngbanga tɛ lo na se nyɔ ndia tɛ e,

⁷ la Lisiasi mɛ kota gbia tɛ aturugu aga, agbula lo ti e na nguru.

⁸ So pɛni, Lisiasi ahɛ̃ nyɔ hɛ̃ awa vɔ̃ngɔ to tɛrɛ lo ya, ala ga ge gbɛlɛ mɔ.] Se mɔ hũnda kɔli olo ko, mɔ nvɛni mɔ na hũngɔ ya, tɛnɛ zu mɛ e tɛnɛ tɛrɛ lo na ya to mɛ e vɔ̃ tɛrɛ lo ko, adu biani.”

⁹ Ayuda ĩ ma so ko, ala yeka da, ala pa ya: “Seni la, seni la.”

Polo abɛrɛ nyɔ lo ka gbɛlɛ Felikisi

¹⁰ Felikisi apɛ ti lo hɛ̃ Polo ya, lo tɛnɛ tɛnɛ, la Polo apa hɛ̃ lo ya: “Gbia, mbi hĩnga ya, mɔ wa fangɔ ngbanga ti kɔdɔrɔ olo mɛ, ko mɔ li kwa ni aɔ buru gba. Mbi na bɛrɛngɔ nyɔ mbi, kanda mbi kpã bo bɛ mbi ndo mɔ ya, mɔ na mangɔ mbi.

¹¹ Mbi si ndo ka Yeruzalɛmɛ so vɔrɔngɔ Nzapa, ko ali bi sui kɔi ndoni sɛ, ko bɛ se mɔ hũnda azi olo ko, ala na pangɔ hɛ̃ mɔ ya, seni la.

¹² Ta ala tã mbi e na azi tɛrɛ bimbingɔ tɛnɛ ka ya kota da Nzapa ma, ta ala tã mbi tɛrɛ wangɔ azi ka ya da sambela, bere ka mbanga ndo na ya kɔdɔrɔ, ya ala tɔmbɔkɔ ma.

¹³ Kanda se mɔ hũnda azi olo ya, ala fa siɔ ye mɛ mbi li, la ala vɔ̃ to tɛrɛ mbi na lo ni na olo mɛ ko, ta ala na fangɔ ni ma.

¹⁴ Wa ba bo ye mɛ mbi ye lo ni ge gbɛlɛ mɔ lo mɛ: mbi ndoli kwa hɛ̃ Nzapa mɛ ndo akotara e avɔrɔ, mbi mu nga lege tɛ Gbia Yezo, ko azi olo ndomu tɛ la lege ni ka lɛ la ya, ta adu beta lege ma. Kanda mbi ye lo zu ko la asu ka ya buku ti ndia, mbi ye nga nyɔ Nzapa mɛ ndo awa pangɔ nyɔ lo asu.

¹⁵ Mbi ndokpã bɛ mbi na ndo Nzapa, nga ma se mɛ ala nvɛni ndokpã nga na bɛ la ya, anzɔ̃ azi na asiɔ azi mɛ akpili ko, ala so gbanda na pɛ kwá.

¹⁶ Nda mɛ mbi ndoli kpengbani ya, ale mbi du na vuru bɛ ngoi zu ka gbɛlɛ Nzapa, nga ka gbɛlɛ azi la.

¹⁷ “Buru aɔ gba, ta mbi ndodu ka Yeruzalɛmɛ ma, la mbi diri mbi nɔ kai ya, ambanga Ayuda mɛ azi tɛ mbi ko, mbi za la na faranga, ko mbi lu nga Nzapa na ye.

¹⁸ Ba ye mɛ ndo mbi dɛ na lingɔ ni, la ala ga atã mbi ka ya kota da Nzapa la. Mbi li ndo tɔrɔke ti onzingɔ ló, ko ta azi gba ndo so gunda mbi ma, ta azi ndogɔ̃ ndo nga ma.

¹⁹ Kanda ambanga Ayuda ti sese ti Azia ndo so ndo ko, ko se ala du ndo na tɛnɛ na ya la, ya ani vɔ̃ to tɛrɛ mbi na lo ni ko, ale ala ndo la alengbi ti gangɔ ge gbɛlɛ mɔ, vɔ̃ngɔ to ni tɛrɛ mbi.

²⁰ Bere ale azi mɛ so ndo mɛ apa hɛ̃ mɔ siɔ ye mɛ mbi li, na ngoi mɛ ndo mbi si ka gbɛlɛ awa fangɔ ngbanga.

²¹ Ba kɔtɛ tɛnɛ mɛ ndo mbi pa hɛ̃ la, na ngoi mɛ ndo mbi lo ka gbɛlɛ la, mbi tɛnɛ na kɔngɔ lo mɛ: ‘Ĩ ndofa ngbanga tɛ mbi na olo mɛ, na lo mɛ ya, mbi ndolɛndɛrɛ ya, azi mɛ akpili aso gbanda!’ ”

²² Felikisi ahĩnga ndo lo ti lege tɛ Gbia Yezo nzɔ̃ni nvɛni, la lo diri na bi ti onzingɔ ngbanga ni, lo pa hɛ̃ la ya: “Lisiasi mɛ kota gbia tɛ aturugu aga hĩ, wadila mbi ba nda tɛnɛ tɛ ĩ.”

²³ La Felikisi ahɛ̃ nyɔ hɛ̃ gbia tɛ aturugu mɛ ndobata Tolo ya: “Bata bo lo ka bɔlɔkɔ, hɛ̃ lo ngoi yakere, lo du na bɛ lo, ko mɔ hɛ̃ nga lege hɛ̃ afɔ̃ lo, aga aza lo.”

Felikisi na ya lo Drusiyɛ aga aba Polo

²⁴ Ĩ la so pɛni yakere ko, Felikisi na ya lo Drusiyɛ aga so bangɔ Polo. Ya lo Drusiyɛ adu wa Yuda. Ko Felikisi ato zo, anɔ aili Polo, Polo aga, la Polo apa lo ti lo yengɔ lo tɛ Yezo Kristo hɛ̃ Felikisi, lo ma.

²⁵ Ko ngoi mɛ Polo ĩ to nda pangɔ lo ti se nzɔ̃ du mɛ zo ndodu, na se mɛ zo alengbi ti fɔ̃ngɔ na bɛ lo, nga na lo ti fangɔ ngbanga tɛ azi mɛ gbanda Nzapa afa ko, mbɛtɔ agbɔ̃ Felikisi, la lo pa hɛ̃ Polo ya: “Diri mɔ gwe na olo mɛ. Se mbi lua ngoi wadila mbi ti mbi ili mɔ.”

²⁶ Felikisi nvɛni ndolɛndɛrɛ ndo ya, Polo na hɛ̃ngɔ ni faranga. Nda mɛ ndo Felikisi ndoili lo fani sĩni ya, ni na lo, ani tɛnɛ tɛnɛ la.

²⁷ Polo ali ndo buru se bo so ya bɔlɔkɔ. So pɛni, Porsiusi Fɛstusi ati gbia tɛ leta na se lɛ Felikisi, uzu ti kwa tɛ Felikisi wɛngɔ ko, lo dɔ Polo so ya bɔlɔkɔ lo zia. Lo li ndo nga so ya, bɛ Ayuda ade.