Awa Pangɔ Kwa 23 - Fana Ngbangɔ 1987

¹ Polo aba awa fangɔ ngbanga toka toka, apa hɛ̃ la ya: “Aya bua, mbi ndodu ndo na vuru bɛ ngoi zu ka gbɛlɛ Nzapa, ko vuru bɛ ni ade bo na lá olo kpɔ.”

² Kota gbia tɛ awa lungɔ Nzapa na ye mɛ ili lo Ananiasi ĩ ma so ko, lo hɛ̃ nyɔ hɛ̃ azi mɛ so gunda Polo ya, ala sɔ̃ nyɔ lo.

³ La Polo apa hɛ̃ lo ya: “Nzapa gbanda la asɔ̃ mɔ, mɔ du wa poroso! Mɔ du so ndo mɛ ya, mɔ fa ngbanga tɛ mbi, na se nyɔ ndia, ko mɔ ti mɔ hɛ̃ nyɔ ya, asɔ̃ mbi!”

⁴ Azi mɛ so tɔ̃nda Polo apa hɛ̃ Polo ya: “Ba mɔ ndoguru kota gbia tɛ awa lungɔ Nzapa na ye!”

⁵ La Polo agbinya hɛ̃ la ya: “Aya bua, ta mbi hĩnga fɛrɛ ya, lo kota gbia tɛ awa lungɔ Nzapa na ye ma. Biani, Buku tɛ Nzapa apa ya: ‘Ta mɔ tɛnɛ siɔ tɛnɛ na ili gbia tɛ mɔ ma.’ ”

^6-8 Polo ahĩnga ndo ya, na popo tɛ awa fangɔ ngbanga mɛ ndo adunga so ndo ko ko, ambanga ndo Asaduseo, ambanga mɛ ndɛ̃ Afarizeo. (Asaduseo adu azi mɛ ndonɛ ya, azi ko ndo la akpili wɛ ko, ta ala ti so gbanda na pɛ kwa ma. Ala ndonɛ nga ya, ta aangelo da ma, ta atɔrɔ nga da ma. Kanda Afarizeo aye tɛ la lo ni zu.) Na lo ni ndo la Polo ade kɔngɔ na gbɛlɛ la ya: “Aya bua, baba tɛ mbi lo Farizeo, mbi nga Farizeo. Mbi ndolɛndɛrɛ ya, azi mɛ akpili aso gbanda. Ko na lo ni la andotɛnɛ ngbanga tɛ mbi.” Lo ĩ tɛnɛ so wɛ ko, Afarizeo alonga mbage, Asaduseo alonga nga mbage, ala to nda pangɔ pa.

⁹ Azi agɔ̃ bɔzɔ bɔzɔ, ko ambanga awa hangɔ ndia mɛ na li nɔ tɛ Afarizeo ĩ ma so ko, ala longa ndozu, akɛ̃ hɛ̃ azi kpengbani ya: “Ta e hũ siɔ ye mɛ kɔli olo ali ma. Bere tɔrɔ, bere angelo la atɛnɛ tɛnɛ hɛ̃ lo!”

¹⁰ Ngoi mɛ pa ni ĩ ti kpengbani ko, mbɛtɔ agbɔ̃ kota gbia tɛ aturugu, ko lo da bɛ lo ya, ala na susurungɔ Polo kpua kpua. Na lo ni la lo hɛ̃ nyɔ hɛ̃ aturugu tɛ lo ya, ala nɔ ka popo tɛ azi, agbula Polo ka ti la, adiri na lo ka ya kpengba da tɛ aturugu.

¹¹ Ĩ ti na bi ni ko, Gbia Yezo asi gbɛlɛ Polo, apa hɛ̃ lo ya: “Kpengba na bɛ mɔ! Mɔ pa tɛnɛ tɛ mbi ge Yeruzalɛmɛ wɛ, ale mɔ pa nga ni ka Roma.”

Ambanga Ayuda amangbi so hongɔ Polo

¹² Ĩ la bu ndã ĩ de ko, ambanga Ayuda agbe lingo, anyɔ ngɛ ya, ta ani tɛ ye kɔi ma, ta ani nyɔ nga ye ma, nga ka ani ho Polo hĩ wadila.

¹³ Azi mɛ ndo agbe lingo ko, ala ndo sui siɔ ndoni da.

¹⁴ Ala nɔ atã agbia tɛ awa lungɔ Nzapa na ye, na akangba ti kɔdɔrɔ, apa hɛ̃ la ya: “E nyɔ ngɛ ya, ta e tɛ ye ma, ta e nyɔ nga ye ma, nga ka e ho Polo hĩ wadila.

¹⁵ Wa ĩ na awa fangɔ ngbanga zu, ĩ́ to zo na olo ka tɛ kota gbia tɛ aturugu, ĩ hũnda lo ya, lo ga na Polo. Ko ĩ́ li poroso ya, ĩ ye bangɔ nda tɛnɛ tɛ Polo fani mɛ ndɛ̃ na seni. E nvɛni, e lɛkɛ tɛrɛ e so hongɔ lo, uzu ti ala singɔ na lo ge.”

¹⁶ Kanda mbanga nyi kɔli kɔi ndo so ndo ko, nyita Polo ti wali la adú lo. Nyi kɔli ni ko ama ndo tɛnɛ ti lingo mɛ ala gbe. La lo hã nɔ, lo nɔ lo li ka ya kpengba da tɛ aturugu, lo tisa Polo na lo tɛnɛ mɛ lo ma.

¹⁷ Polo ĩ ma so ko, lo ili mbanga gbia tɛ aturugu, lo pa hɛ̃ lo ya: “Nɔ na nyi kɔli olo ka tɛ kota gbia tɛ aturugu, ta sanga ma, lo na tɛnɛ ti tɛnɛngɔ hɛ̃ lo.”

¹⁸ La gbia tɛ aturugu amu nyi kɔli ko, anɔ na lo ka tɛ kota gbia tɛ aturugu, apa hɛ̃ lo ya: “Wa bɔlɔkɔ mɛ ili lo Polo avɔrɔ tɛrɛ lo hɛ̃ mbi ya, mbi ga na nyi kɔli olo ge tɛ mɔ, ta sanga ma, lo na tɛnɛ ti tɛnɛngɔ hɛ̃ mɔ.”

¹⁹ La kota gbia tɛ aturugu agbɔ̃ ti nyi kɔli ko, agwe na lo ka katɛ, ahũnda lo ya: “Tɛnɛ mɛ mɔ ye tɛnɛngɔ hɛ̃ mbi nɛ?”

²⁰ Nyi kɔli ko agbinya hɛ̃ lo ya: “Ambanga Ayuda amangbi ya, ani ga, ani hũnda mɔ, mɔ si na Polo na ndã ka gbɛlɛ awa fangɔ ngbanga, ko nga bo ala la ali poroso ya, awa fangɔ ngbanga apa ya, ani ti ye bangɔ nda tɛnɛ tɛ Polo na seni.

²¹ Ko ta mɔ ye tɛnɛ tɛ la ma, ta sanga ma, na popo tɛ Ayuda ko, azi sui siɔ ndoni da na berengɔ so gbɔ̃ngɔ Polo. Ala nyɔ ngɛ ya, ta ani tɛ ye kɔi ma, ta ani nyɔ nga ye ma, nga ka ani ho Polo hĩ wadila. Ala lɛkɛ tɛrɛ la na olo mɛ, ko ala ndomasi bo nyɔ mɔ.”

²² Kota gbia apa hɛ̃ nyi kɔli ko ya: “Ta mɔ pa tɛnɛ olo hɛ̃ zo kɔi ma.” La kota gbia ahɛ̃ lo lege, lo gwe.

Ato Polo ka tɛ Felikisi mɛ gbia tɛ leta

²³ Nyi kɔli ko ĩ diri ko, kota gbia tɛ aturugu aili ambanga gbia tɛ aturugu sɛ, apa hɛ̃ la ya: “Ĩ hã aturugu ngbangbo sɛ, na aturugu sui mbara mbara mɛ awa kpɛngɔ na mbarata, nga na aturugu ngbangbo sɛ mɛ awa ganangɔ to, ĩ bombi la ndoni kɔi, ko ĩ zu ĩ lɛkɛ tɛrɛ ĩ, se ati na saa gumbaya ti bi ko, ĩ gwe ka kɔdɔrɔ ti Sezarea.

²⁴ Ĩ mu nga ambarata ya, ala yɔ Polo, ĩ bata lo nzɔ̃ni, ko ĩ nɔ na lo ka tɛ Felikisi mɛ gbia tɛ leta.”

²⁵ La kota gbia tɛ aturugu asu mbɛti so tongɔ hɛ̃ Felikisi. Tɛnɛ mɛ lo su lo mɛ:

²⁶ “Malo Felikisi, gbia tɛ leta, mbi Klodɛ Lisiasi mbi bala mɔ.

²⁷ Ayuda agbɔ̃ ndo kɔli olo, ale ala ho lo, ko ngoi mɛ mbi ma ya, lo wa Roma, la mbi mu aturugu, e na la, e nɔ e gbula lo ka ti la.

²⁸ Mbi ye ndo ya, mbi hĩnga nda to mɛ Ayuda avɔ̃ tɛrɛ lo, nda mɛ ndo mbi si na lo ka gbɛlɛ awa fangɔ ngbanga tɛ la la.

²⁹ Ko mbi hũ ya, ala vɔ̃ to tɛrɛ lo na lo ti ndia tɛ la nvɛni mɛ ta lo tɔndɔ ma. Kanda ta mbi hũ siɔ ye mɛ lo li ya, agbɔ̃ lo, abi lo bɔlɔkɔ, bere aho lo na lo ni ma.

³⁰ Ngoi mɛ mbi ma ya, ala ndogbe lingo ya, ani gbɔ̃ lo, ani ho lo, la mbi to lo hiɔ ka gbɛlɛ mɔ, mbi pa hɛ̃ la ya, ala nvɛni anɔ ka gbɛlɛ mɔ, avɔ̃ to tɛrɛ lo.”

³¹ Aturugu ama nyɔ kota gbia tɛ la, la ala mu Polo, anɔ na lo na bi, asi ka kɔdɔrɔ mɛ ili ni la Antipatrisi.

³² Ĩ la bu nda ĩ de ko, aturugu mɛ awa kpɛngɔ na mbarata amu Polo, aɔ na ni, kanda aturugu mɛ awa gɛrɛ angbã tɛ la so Antipatrisi, adiri ka ya kpengba da tɛ aturugu.

³³ Aturugu mɛ awa kpɛngɔ na mbarata ĩ si ka Sezarea ko, ala hɛ̃ mbɛti ni hɛ̃ Felikisi mɛ gbia tɛ leta, ala zia nga Polo hɛ̃ lo.

³⁴ Gbia tɛ leta adi mbɛti ni, ko lo hũnda Polo ya: “Sese tɛ mɔ nɛ?” La Polo agbinya hɛ̃ lo ya: “Sese tɛ mbi la Silisia.”

³⁵ Gbia ĩ ma so ko, lo pa hɛ̃ Polo ya: “Mbi na hũndangɔ mɔ na ndo, na ngoi mɛ se awa vɔ̃ngɔ to tɛrɛ mɔ asi ge.” La lo hɛ̃ nyɔ ya, abata Polo ka ya kota da mɛ ndo Erodɛ awa.