Awa Pangɔ Kwa 22 - Fana Ngbangɔ 1987

¹ Lo pa ya: “Ato mbi na ayata mbi, ĩ́ ma tɛnɛ mɛ mbi na tɛnɛngɔ hɛ̃ ĩ na olo so bɛrɛngɔ na nyɔ mbi lo mɛ.”

² Ala ĩ ma lo ĩ tɛnɛ tɛnɛ hɛ̃ la na yanga tɛ Ayuda ko, ala ti dunga ngĩ nvɛni. La lo pa ya:

³ “Mbi wa Yuda, adú mbi ka Tarsi, ka sese ti Silisia, kanda akã ndo mbi ge Yeruzalɛme. Wa hangɔ mbi na ye ndo la Gamaliɛlɛ. Mbi manda tɔndɔngɔ andia tɛ akotara e na seni na gbe ti lo. Mbi ndoli ndo kwa hɛ̃ Nzapa na gonvɛnɛ, nga ma se mɛ ĩ zu ĩ ndoli na olo mɛ.

⁴ Mbi hɛ̃ ndo pɛnɔ hɛ̃ azi mɛ amu lege tɛ Gbia Yezo, ko ambanga alua ndo kwa da, akpili. Mbi gbɔ̃nɔ nga ndo akɔli na awe, mbi sa la bɔlɔkɔ.

⁵ Kota gbia tɛ awa lungɔ Nzapa na ye, nga na azi ti li nɔ tɛ akangba ti kɔdɔrɔ alengbi ti yengɔ ya, tɛnɛ mɛ nyɔ mbi ko, adu bɛta tɛnɛ. Ala su ndo mbɛti hɛ̃ mbi, mbi nɔ na ni hɛ̃ ayata e Ayuda mɛ ka Damasi. La mbi nɔ ndo so gbɔ̃nɔngɔ awa Kristo mɛ kai ya, mbi ga na la ge Yeruzalɛme, wa ahɛ̃ la pɛnɔ.”

Polo akambisa se mɛ lo gbinya na bɛ lo hɛ̃ Yezo

⁶ “Mbi ndo so lege, ko ngoi mɛ mbi doli na Damasi, na ge tɛ bɛ kɔmbitɛ ko, bo ngoi kɔi, ye kɔi mɛ nga ma lá alo ka ndozu, asũ bai so gunda mbi.

⁷ Mbi hã mbi ti, ko mbi ma legɔ̃ Gbia so ndoili mbi ya: ‘Saulo, Saulo, nda mɛ mɔ ndohɛ̃ mbi pɛnɔ so nɛ?’

⁸ La mbi hũnda ya: ‘Gbia, mɔ na?’ Lo gbinya hɛ̃ mbi ya: ‘Mbi Yezo wa Nazarɛtɛ mɛ mɔ ndohɛ̃ mbi pɛnɔ la.’

⁹ Azi mɛ ndo mbi na la e gwe fɔnɔ ahũ ye mɛ ndosũ, kanda ta ala ma legɔ̃ zo mɛ ndotɛnɛ tɛnɛ hɛ̃ mbi ma.

¹⁰ La mbi ti hũnda ya: ‘Gbia, ye mɛ mɔ ye ya mbi li nɛ?’ La Gbia agbinya hɛ̃ mbi ya, mbi lo, mbi gwe ka Damasi. Na ngoi mɛ se mbi si kai ko, azi na parigɔ hɛ̃ mbi ye zu mɛ Nzapa aye ya, mbi li.

¹¹ Mbi ti ndo wa ziba na lo ti ye ko ndo asũ kpengbani, ko azi mɛ ndo mbi na la e gwe fɔnɔ ko, ala gbɔ̃ ti mbi, agwe na mbi ka Damasi.

¹² “Mbanga kɔli kɔi ndodu ka Damasi, ili lo la Ananiasi, lo ndohɛ̃ tɛrɛ lo so vɔrɔngɔ Nzapa, lo ndotɔndɔ nga ndia tɛ e, ko Ayuda ti Damasi zu ndogonda lo.

¹³ Lo ĩ ga ĩ tã mbi ko, lo dɔ, lo lo so gunda mbi, lo pa hɛ̃ mbi ya: ‘Saulo nyita mbi, lɛ mɔ azi be ma ke!’ Bo na ngoi ko lo ĩ tɛnɛ so ko, lɛ mbi azi ngbɛ̃, la mbi hũ lo.

¹⁴ Ko lo pa hɛ̃ mbi ya, Nzapa mɛ akotara e ndovɔrɔ apia ndo asara mbi akpa ya, mbi hĩnga ye mɛ lo ye, mbi hũ Zo mɛ bo lo kɔi la bɛta Zo, mbi ma nga tɛnɛ ti nyɔ lo nvɛni.

¹⁵ Ta sanga ma, ale mbi du temwɛ tɛ lo, wa ka gbɛlɛ azi zu ko, mbi pa alo mɛ mbi hũ, na atɛnɛ mɛ mbi ma.

¹⁶ La Ananiasi apa hɛ̃ mbi ya: ‘Na olo mɛ ko, ta mɔ ti ku ma. Lo ndozu, vɔrɔ tɛrɛ mɔ hɛ̃ Nzapa, wa lo hã siɔ ye ka bɛ mɔ lo zi, ko mɔ mu batisimɔ.’ ”

Polo akambisa se mɛ Nzapa ato na lo ka tɛ azi mɛ ta Ayuda ma

¹⁷ “Mbi diri ndo ka Yeruzalɛmɛ, ko ngoi mɛ mbi ndosambela ka ya kota da Nzapa ko, mbi hũ suma.

¹⁸ Ko na ya suma ni ko, mbi hũ Gbia, lo pa hɛ̃ mbi ya: ‘Li hiɔ, mɔ lo so Yeruzalɛmɛ mɔ ɔ, ta sanga ma, ta awa kɔdɔrɔ olo na yengɔ tɛnɛ tɛ mbi mɛ mɔ na pangɔ hɛ̃ la ma.’

¹⁹ La mbi gbinya hɛ̃ lo ya: ‘Gbia, ala hĩnga nzɔ̃ni ya, mbi ndogwe ndo ka ya da sambela tɛ Ayuda, mbi ndogbɔ̃nɔ ndo awa yengɔ lo tɛ mɔ, mbi ndosa la bɔlɔkɔ, ko mbi ndosɔ̃ nga ndo la.

²⁰ Ngoi mɛ ndo aho na Etieni mɛ temwɛ tɛ mɔ ko, mbi nga ndo da. Mbi ye ndo lo ni hɛ̃ awa hongɔ lo, ko mbi bata ndo akota bɔngɔ tɛ la.’

²¹ La Gbia apa hɛ̃ mbi ya: ‘Gwe, ta sanga ma, mbi na tongɔ mɔ yɔngɔrɔni ka tɛ azi mɛ ta Ayuda ma.’ ”

Asi na Polo ka gbɛlɛ kota gbia tɛ aturugu

²² Azi butu butu ĩ ma tɛnɛ mɛ Polo ĩ tɛnɛ ngbĩi, ĩ si na ndo mɛ lo ĩ pa ya, Nzapa na tongɔ ni ka tɛ azi mɛ ta Ayuda ma ko, ala dɛrɛ kɔngɔ ya: “Aho lo! Ta gi tɛrɛ zo nga so alengbi ti ngbãngɔ lɛ lo ngɛ̃ ma!”

²³ Ala dɛrɛ kɔngɔ, ayingi bɔngɔ tɛ la, afu butu, asa ka lɛ ndozu so fangɔ ya, ngɔnzɔ agbɔ̃ ani.

²⁴ La kota gbia tɛ aturugu ahɛ̃ nyɔ ya, ali na Polo ka ya kpengba da tɛ aturugu, asɔ̃ lo na fimbo, nga ka lo pa nda mɛ azi ndodɛrɛ kɔngɔ li lo.

²⁵ Ngoi mɛ ala ĩ gbe lo ya, ani sɔ̃ lo ko, Polo apa hɛ̃ gbia tɛ aturugu ya: “Wa Roma mɛ ta ade afa ngbanga tɛ lo ma ko, ta mɔ lengbi ti sɔ̃ngɔ lo ma!”

²⁶ Gbia tɛ aturugu ĩ ma so ko, lo nɔ lo tisa kota gbia tɛ aturugu ya: “Kɔli olo, lo wa Roma, ko ye mɛ mɔ na lingɔ na lo nɛ?”

²⁷ Kota gbia tɛ aturugu ĩ ma so ko, lo hã nɔ, lo nɔ ka gunda Polo, lo hũnda lo ya: “Polo, mɔ wa Roma?” La Polo agbinya hɛ̃ lo ya: “Ĩi.”

²⁸ La kota gbia tɛ aturugu apa hɛ̃ lo ya: “Mbi futa ndo faranga ma wo ma hɛ̃ leta ti Roma, la mbi ti wa Roma.” Polo agbinya hɛ̃ lo ya: “Tɛ mbi ko, to mbi na ta mbi adu awa Roma nvɛni.”

²⁹ Azi mɛ fɛrɛ aga ya, ani sɔ̃ lo, ala ĩ ma lo ĩ tɛnɛ so ko, bo na ngoi ni ko, ala dɔ lo azia, aɔ. Ko ngoi mɛ kota gbia tɛ aturugu ĩ hĩnga ya, kanda Polo wa Roma, la ni hɛ̃ fɛrɛ nyɔ ya, agbe lo na ngo nwa ko, mbɛtɔ agbɔ̃ lo.

Asi na Polo ka gbɛlɛ awa fangɔ ngbanga

³⁰ Ĩ la bu ndã ĩ de ko, kota gbia tɛ aturugu aye ya, ale ni hĩnga nda mɛ Ayuda avɔ̃ to tɛrɛ Polo ngĩ nvɛni. Na lo ni la lo pa ya, azara ngo nwa mɛ biri agbe na Polo, lo hɛ̃ nga nyɔ ya, agbia tɛ awa lungɔ Nzapa na ye, na awa fangɔ ngbanga zu abombi tɛrɛ la, ko ani ba nda tɛnɛ tɛ Polo. La lo ga na Polo, lo kpa lo so gbɛlɛ la.