Awa Pangɔ Kwa 21 - Fana Ngbangɔ 1987

Polo agwe ka Yeruzalɛmɛ

¹ Ngoi mɛ e zia akangba ti Eklezia ti Efɛzɛ so Milɛ ko, e mu masua, e gwe bo gwengɔ, e si ka Kɔsi. Nda ĩ de ko, e nɔ, e si ka kɔdɔrɔ ti Rodɛsi. So pɛni, e lo so ndo ko, e gwe ka kɔdɔrɔ ti Patara.

² Ngoi mɛ e si kai ko, e tã masua kɔi mɛ aga so gwengɔ ka sese ti Lenisia, la e ko ya ni e ɔ.

³ E nɔ e doli na zúa mɛ ili ni la Siprɛ, ko e du bo ge ya masua la e hũ zúa ni. E zia Siprɛ na ndo ti e ti ga, la e gwe ka sese ti Siria. E nɔ, e si ka kɔdɔrɔ kɔi mɛ ili ni la Tirɛ, la masua agbɔ̃ so nyɔ tungu so zungɔ na kumba.

⁴ E tã awa Kristo so ndo ko, e li pɔsɔ kɔi so tɛ la. Ko Tɔrɔ Santo atisa la ya, ala pa hɛ̃ Polo ya, ta lo nɔ ka Yeruzalɛmɛ ma.

⁵ Ngoi mɛ nda bi mɛ e li ka tɛ la ĩ kɔ, ko e hã nɔ ya e ɔ ko, awa Kristo zu, na awe la, nga na aya la agwe so sangɔ e. E na la e nɔ, e ɔ li kɔdɔrɔ. Ngoi mɛ e si ka nyɔ ngu ko, e kwɛ zu e kuku na li kuni e, e sambela.

⁶ So pɛni, e zeingbi tɛrɛ e, e mu masua, la ala diri tɛ la agwe.

⁷ Ngoi mɛ e lo so Tirɛ e gwe ko, e gbɔ̃ ka kɔdɔrɔ ti Pɛtolemaisi, la nda fɔnɔ tɛ e ti le ngu akɔ. E bala awa Kristo ti kɔdɔrɔ ni, e la so ndo ko bi kɔi.

⁸ Ndã ĩ de ko, e lo so ndo ko, e nɔ, e si ka kɔdɔrɔ ti Sezarea. Ngoi mɛ e si ka Sezarea ko, e li ya da tɛ Filipo mɛ wa pangɔ Nzɔ̃ Pa tɛ Yezo, la e la so tɛ lo. Lo du mbanga zo kɔi na popo tɛ azi mbara mbara ko ndo asara la ka Yeruzalɛmɛ akpã ya, ala ndokangbi azi na tɛ.

⁹ Lo na ayangambi tɛ lo ti wali siɔ mɛ amɔdo, ko ala ndopa nga nyɔ Nzapa.

¹⁰ E li so tɛ Filipo bi gba, ko mbanga kɔli kɔi ili lo la Agabusi, lo wa pangɔ nyɔ Nzapa, lo lo ndo ka sese ti Yudea la lo ga,

¹¹ lo tã e. Lo hã gba ti gu ya Polo, lo gbe na gɛrɛ lo nvɛni, nga na ti lo nvɛni, ko lo pa ya: “Ĩ ma tɛnɛ mɛ Tɔrɔ Santo atɛnɛ lo mɛ: Ĩ ba se mɛ Ayuda na gbengɔ na nvɛ̃ gba olo ka Yeruzalɛmɛ la. So pɛni, ala na kangɔ lo hɛ̃ awa ndɛ̃.”

¹² Ngoi mɛ e na awa Kristo ti Sezarea e ma so ko, e vɔrɔ tɛrɛ e hɛ̃ Polo ya, ta lo nɔ ka Yeruzalɛmɛ ma.

¹³ La Polo agbinya hɛ̃ e ya: “Nda to mɛ ĩ ndoto nɛ? Nda mɛ ĩ separa sangɔ mi bɛ mbi nɛ? Bɛ se agbɔ̃ mbi, aho mbi ka Yeruzalɛmɛ na lo tɛ Gbia Yezo ko, mbi ye.”

¹⁴ Ngoi mɛ e ha lo gba la, e zia vɔrɔngɔ tɛrɛ e hɛ̃ lo. La e pa ya: “Gbia ali bɛ ye mɛ bɛ lo aye ma ke!”

¹⁵ Bi mɛ e li so Milɛ yakere ko, e lɛkɛ tɛrɛ e, e hã nɔ, e gwe ka Yeruzalɛmɛ.

¹⁶ E na ambanga awa Kristo ti Sezarea la e nɔ ndo lege kɔi. Ala nɔ na e ka tɛ mbanga kɔli kɔi mɛ ili lo la Manazona, lo wa Siprɛ, e la ka tɛ lo. Lo ngbina zo mɛ ndo lo ye lo tɛ Yezo gã nvɛni.

Polo anɔ so bangɔ Zaki

¹⁷ Ngoi mɛ e si ka Yeruzalɛmɛ ko, awa Kristo ayamba e nzɔ̃ni na dengɔ bɛ.

¹⁸ Ĩ la bu ndã ĩ de ko, e na Polo e nɔ ka tɛ Zaki. Ko akangba ti Eklezia zu abombi tɛrɛ la so ndo ko.

¹⁹ Polo abala la, apa hɛ̃ la pa ti aye zu mɛ ndo lo li na nguru tɛ Nzapa ka popo tɛ azi mɛ ta Ayuda ma.

²⁰ Ala ĩ ma tɛnɛ tɛ lo wɛ ko, ala gonda Nzapa. So pɛni, ala pa hɛ̃ Polo ya: “Nyi bua, mɔ hũ nga! Ayuda ma wo ma la aye ndo lo tɛ Yezo. Ala zu ahɛ̃ tɛrɛ la bo so tɔndɔngɔ ndia mɛ ndo Mɔizɛ asu.

²¹ Azi apa hɛ̃ la ya, mɔ ndoha na Ayuda zu mɛ ndodu ka popo tɛ azi mɛ ta Ayuda ma ya, ala zia tɔndɔngɔ ndia tɛ Mɔizɛ, ta ala fara aya la ganza ma, ta ala tɔndɔ nga sé du tɛ Ayuda ma.

²² Wa ye mɛ e na lingɔ nɛ? Ta Sanga ma, ala na mangɔ bo ya, mɔ si ndo mɛ.

²³ Wa li bo ye mɛ e na pangɔ hɛ̃ mɔ. E na azi siɔ so ndo mɛ, ala ko ndo kapa hɛ̃ Nzapa.

²⁴ Mu la, ĩ nɔ, mɔ hɛ̃ faranga, wa ĩ na la ĩ bombi, ĩ li tɔrɔke ti onzingɔ ló tɛrɛ ĩ. So pɛni, ala kiɔ li la kuyu kuyu. Se mɔ li nga so ko, azi na hũngɔ ya, kanda tɛnɛ mɛ ndo ani ma na ili mɔ ko, adu kwɛ gi nvɛnɛ! Ko ala nga na hĩngangɔ ya, mɔ ndohɛ̃ tɛrɛ mɔ so tɔndɔngɔ ndia tɛ Mɔizɛ na seni.

²⁵ Azi mɛ ta Ayuda ma, la ala ye lo tɛ Yezo ko, e to ndo mbɛti hɛ̃ la na lo ti aye mɛ e mangbi ndoni ya: ale ta ala tɛ sa mɛ aho, alu na angbilondo ma, ale ta ala tɛ, bere anyɔ mɛnɛ tɛrɛ sa ma, ale ta ala tɛ sa mɛ asã gɔ̃ ni la akpi ma, ko ale ta ala li nga siɔ ye ti kamɛnɛ ma.”

²⁶ La Polo amu azi ko siɔ, ala ɔ. Ĩ la bu nda ĩ de ko, ala li tɔrɔke ti onzingɔ ló tɛrɛ la. So pɛni, ala nɔ ka ya kota da Nzapa, la ala ko bi mɛ nda tɔrɔke ni na kɔngɔ na ni, alengbi ya, bi mɛ aho na sa, ko alu na Nzapa na lo tɛ zo kɔi kɔi.

Agbɔ̃ Polo ka ya kota da Nzapa

²⁷ Ngoi mɛ bi ko mbara mbara ĩ doli ti wɛngɔ ko, Ayuda ti sese ti Azia ahũ Polo ka ya kota da Nzapa. Ala wa azi ma wo ma, ko azi ni atɔmbɔkɔ, la Ayuda nvɛni agbɔ̃ Polo,

²⁸ adɛrɛ kɔngɔ ya: “Awa Izrayɛlɛ ee, ĩ́ ga oo! Zo mɛ agbe pa ili awa Izrayɛlɛ na ndo zu nga na gbɛlɛ azi zu lo ge oo! Lo pa nga ya, lo ndia tɛ Mɔizɛ, na lo kota da Nzapa adu kwɛ gɛgɛrɛ. Ko na olo ko, lo mu azi mɛ ta Ayuda ma, lo li na la ge ya kota da Nzapa. Ko lo gbɛ̃ da Nzapa mɛ adu ndo mɛ santo.”

²⁹ (Ala tɛnɛ ndo nga so, na lo mɛ ya, ala hũ ndo Trofimɛ mɛ wa Efɛzɛ ndoni kɔi na Polo ka le kɔdɔrɔ, ko ala ndoda ndo bɛ la ya, Polo ali na lo ka ya kota da Nzapa.)

³⁰ Tɛnɛ ni azɔ bɛ azi ti ya kɔdɔrɔ zu, ko ala lo ndo kwɛ, akpɛlɛ aga. Ala gbɔ̃ Polo ka ya kota da Nzapa, agiɔ lo, asi na lo gegi, la ala mu anyɔ ngise ti da Nzapa kpu avĩ.

³¹ Ngoi mɛ ala so ndogi kɔdɛ ya, ani ho Polo ko, kota gbia tɛ aturugu ti Roma ama ya, awa Yeruzalɛmɛ zu atɔmbɔkɔ.

³² Bo na ngoi ni ko la lo mu ambanga agbia tɛ aturugu, na aturugu, ala kpɛlɛ anɔ ka ndo mɛ azi da butu butu. Azi ĩ hũ kota gbia tɛ aturugu, na aturugu so ndoga ko, ala zia sɔ̃ngɔ Polo.

³³ La kota gbia tɛ aturugu ai tɛrɛ lo ka gunda Polo, ahɛ̃ nyɔ, la azi agbe lo na ngo nwa sɛ. So pɛni, lo hũnda Polo ya: “Mɔ na? Ye mɛ mɔ li nɛ?”

³⁴ Ko so popo tɛ azi ko butu butu ko, azi ndodɛrɛ ndo le kɔngɔ ndɛ̃ ndɛ̃ ndɛ̃. Kota gbia tɛ aturugu ĩ hũ ya, azi ndogɔ̃ bɔzɔ bɔzɔ, ko ta kɔdɛ mɛ ya, ni ma na tɛnɛ ni kpa da ma ko, lo hɛ̃ nyɔ ya, anɔ na Polo ka ya kpengba da tɛ aturugu.

³⁵ Ala ĩ si na Polo ka gbe nyɔ da ko, aturugu ayɔ lo, na lo mɛ ya, azi ndohɛ̃ ndo lo pɛnɔ sĩ.

³⁶ Azi zu mɛ ndo anɔ nda li lo, adɛrɛ kɔngɔ ya: “Aho bo lo! Aho bo lo!”

Polo abɛrɛ nyɔ lo

³⁷ Ngoi mɛ aga ti lingɔ na Polo ka ya kpengba da tɛ aturugu ko, lo hũnda kota gbia tɛ aturugu ya: “Mɔ lengbi ti mangɔ mbi yakere nga?” Gbia ĩ ma so ko, ahũnda Polo ya: “Mɔ hĩnga tɛnɛngɔ yanga tɛ azi ti Grɛsɛ?

³⁸ Mɔ wa Egipito mɛ mɔ wa azi, ko ala tɔmbɔkɔ bo biri biri, so pɛni, mɔ gbɔ awa hongɔ azi koto siɔ, mɔ gwe na la ka be ndo, ta mɔ lo mɛ ma?”

³⁹ La Polo agbinya hɛ̃ lo ya: “Mbi wa Yuda, adú mbi ka kɔdɔrɔ mɛ ili ni la Tarsi, ka sese ti Silisia, mbi nyi kota kɔdɔrɔ. Wa mbi hũnda mɔ ya, se mɔ ye ko, mɔ hɛ̃ mbi lege, mbi tɛnɛ tɛnɛ hɛ̃ azi hĩ.”

⁴⁰ La kota gbia tɛ aturugu aye. La Polo alo so gbe nyɔ da, apɛpɛ ti lo hɛ̃ azi. Ala ĩ kai ngĩ ko, lo tɛnɛ tɛnɛ hɛ̃ la na yanga tɛ Ayuda.