Awa Pangɔ Kwa 20 - Fana Ngbangɔ 1987

Polo agwe ka Masedoanɛ nga ka Grɛsɛ

¹ Ngoi mɛ kɔdɔrɔ ĩ de wɛ ko, Polo abombi awa Kristo ndoni kɔi, asa nguru be la, azei la, so pɛni, amu lege, agwe ka sese ti Masedoanɛ.

² Na fangbingɔ lo ti lɛ sese ni ko, lo sa nguru bɛ awa Kristo, lo ha nga la na tɛnɛ tɛ Nzapa ma wo ma. So pɛni, lo gwe ka sese ti Grɛsɛ,

³ lo li kai nzɛ̃ ta. Ngoi mɛ lo ĩ ga so kongɔ ya masua so Grɛsɛ, ya ni gwe ka sese ti Siria ko, lo ma ya, Ayuda ndogbe lingo ti gbɔ̃ngɔ ni, la lo ye ya, ni diri, ko ni ɔ ti lɛ sese ti Masedoanɛ.

⁴ Azi mɛ ndo lo ana la anɔ lege kɔi lo mɛ: Sopatɛrɛ mɛ nyi Pirusi, Pirusi ni wa kɔdɔrɔ ti Berea, na Aristarkɛ na Sekundusi mɛ ala awa Tɛsalɔnikɛ, na Gayusi mɛ wa Dɛrbɛ, nga na Timɔte, na Tisikɛ, na Trofimɛ mɛ ala azi ti sese ti Azia.

⁵ Azi olo zu aɔ ndo uzu tɛ e, aku e ka kɔdɔrɔ mɛ ili ni la Troasi.

⁶ Ngoi mɛ yenga ti mapa mɛ ta yɔrɔ ti susungɔ na ni da ma ĩ ti wɛ ko, e mu masua so kɔdɔrɔ ti Filipɛ, e gwe, e li bi kɔ̃, la e tã la ka Troasi, e na la e li kai bi mbara mbara.

Ndangba fɔnɔ tɛ Polo ka Troasi

⁷ Ĩ ti na lá pɔsɔ na ndɔ ko, e bombi tɛrɛ e ndoni kɔi so tɛngɔ Tɛ tɛ Gbia, la Polo atɛnɛ tɛnɛ hɛ̃ azi. Lo ha azi na ye ngbĩi ati na bɛ bi, ta sanga ma, adu ndo ya, se ndã ade ko, lo ɔ.

⁸ E bombi tɛrɛ e na ya da kɔi mɛ ka ndozu, ko amɔinda ma wo ma ndoza ndo ka ya da ni.

⁹ Mbanga nyi kɔli kɔi, ili lo la Etisɛ, lo du tɛ lo ka nyɔ pula. Polo ĩ ha azi na lo tɛ Nzapa kpa kpa kpa ko, langɔ agbɔ̃ nyi kɔli ko, lo la, lɛ lo ada lɔpi lɔpi. Ngoi mɛ langɔ ĩ ɔ ndo lo ko, lo lo ka nyɔ pula ti ya da ti ota mɛ e ka da ka ndozu, lo ti. Azi ĩ si, ĩ ya lo ko, atã lo, lo kpi wɛ.

¹⁰ La Polo azu, anɔ awo tɛrɛ lo tise na ndo nyi kɔli ko, agbɔ̃ lo, afɔ̃ lo na tɛrɛ lo, apa hɛ̃ azi ko ya: “Ta bɛ ĩ sɔ ma, ta lo kpi ma!”

^11-12 La azi amu nyi kɔli ko lɛ lo ngɛ̃, agwe na lo, ko bɛ azi zu ade ndo sĩ. So pɛni, Polo ati ma kai, amu mapa, akongbi ya ni, atɛ. Lo ti tɛnɛ tɛnɛ ngbĩi ndã de lo, la lo mu lege, lo gwe.

Polo alo so Troasi agwe fɔnɔ ka Milɛ

¹³ E mu masua so Troasi, e ɔ uzu tɛ Polo, e gwe ka kɔdɔrɔ mɛ ili ni la Asosi, ndo mɛ ndo se Polo aga atã e da, wa e mu lo na ya masua, e ɔ na ni la. Se nyɔ lo mɛ ndo lo nvɛni lo pa hɛ̃ e la, ta sanga ma, lo ye ndo ya, ni gwe ka Asosi ti gegi, na gɛrɛ ni.

¹⁴ Ngoi mɛ lo ĩ tã e so Asosi ko, e mu lo na ya masua, e gwe ka kɔdɔrɔ mɛ ili ni la Mitilɛnɛ.

¹⁵ E lo so Mitilɛnɛ e ɔ, ndã ĩ de la e si ka kɔdɔrɔ ti Sio, kanda ta masua agbɔ ndo so ndo ko ma. Ngoi mɛ e ɔ Kiɔsi wɛ ko, e nɔ, e li bi kɔi, la e si ka Samɔsi. So pɛni, e zia Samɔsi, e ti e li bi kɔi so lɛ ngu, ndã ĩ de la e nɔ, e va so nyɔ tungu ti Milɛ.

¹⁶ Ta Polo aye ndo ya ni dɔ ni lo so Efɛzɛ ma, ta sanga ma, so ngoi tɛ ni agere sanga sanga so sese ti Azia. Lo ndogwe ndo hiɔ hiɔ ya, se alengbi ko, yenga ti Pantɛkotɛ ati ni ka Yeruzalɛmɛ.

Polo ato kwa hɛ̃ akangba ti Efɛzɛ

¹⁷ Polo adu so Milɛ, ato kwa hɛ̃ akangba ti Eklezia mɛ ka Efɛzɛ ya, ala ga atã ni so ndo ko.

¹⁸ Ngoi mɛ ala ĩ ga ĩ tã lo ko, lo pa hɛ̃ la ya: “Ato bo na lá ko ndo mbi si ka sese ti Azia, nga na ngoi zu mɛ ndo mbi ka popo tɛ ĩ ko, ĩ hĩnga ndo se li ye tɛ mbi.

¹⁹ Ta mbi li ndo kwa hɛ̃ Gbia Yezo na yakɛ bɛ fani kɔi ma. Mbi li ndo kwa ni na ngulɛ lɛ mbi, mbi li ni nga na ya pɛnɔ mɛ ndo mbi ndohũ na lo ti lingo mɛ ndo Ayuda ndogbe so hongɔ mbi.

²⁰ Ĩ hĩnga ya, ye mɛ alengbi ti zangɔ ĩ ko, ta mbi hɔndɛ ĩ na ni bɛ fani kɔi ma. Mbi tɛnɛ tɛnɛ zu hɛ̃ ĩ, mbi ha ĩ na ye na gbɛlɛ azi, nga ka ya da tɛ ĩ.

²¹ Mbi pa hɛ̃ Ayuda, na azi mɛ ta Ayuda ma ya, ala gbinya bɛ la hɛ̃ Nzapa, ko ala ye nga lo tɛ Gbia tɛ e Yezo.

²² Na olo mɛ, mbi na gwengɔ ka Yeruzalɛmɛ, nga ma se mɛ Tɔrɔ Santo ato mbi ya, ale mbi nɔ kai. Ta mbi hĩnga ye mɛ na lingɔ mbi kai ma.

²³ Kanda ye mɛ mbi hĩnga bo la, Tɔrɔ Santo atisa mbi ya, na ya kɔdɔrɔ kɔi kɔi mɛ mbi na singɔ da ko, mbi na lingɔ bɔlɔkɔ, ko mbi nga na hũngɔ pɛnɔ.

²⁴ Ko mbi ndohũ tɛ mbi du tɛ mbi ge lɛ mbi gɛgɛre. Kɔtɛ lo mɛ ndosɔ bɛ mbi la, ale mbi nɔ na kwa tɛ mbi ngbĩi mbi kɔ nda ni, ko mbi onzi nga kwa mɛ ndo Gbia ahɛ̃ mbi. Kwa ni la, pangɔ Nzɔ̃ Pa ti nzɔ̃ bɛ tɛ Nzapa.

²⁵ “Mbi fɔnɔ ndo na popo tɛ ĩ zu, so hangɔ ĩ na lo Lɛngɔ Gbia tɛ Nzapa. Kanda mbi hĩnga na olo mɛ ya, ta zo kɔi na popo tɛ ĩ ti hũ gbanda mbi ma.

²⁶ Nda mɛ mbi pa hɛ̃ ĩ na lá olo ya, se zo kɔi na popo tɛ ĩ ti yu lege tɛ Nzapa ko, ta nda ni tɛrɛ mbi ma,

²⁷ na lo mɛ ya, ta mbi hɔndɛ ĩ na lo kɔi ma, kanda mbi pa lo tɛ Nzapa zu hɛ̃ ĩ.

²⁸ Ale ĩ bata tɛrɛ ĩ nvɛni nzɔ̃ni, ko ĩ bata nga awa Kristo zu mɛ ndo Tɔrɔ Santo ahɛ̃ ĩ ya, ĩ bata la, nga ma se mɛ wa batangɔ angasã ngbaga ndobata na angasã ngbaga tɛ lo. Ale ĩ bata azi ti Eklezia tɛ Nzapa mɛ ndo lo tɔ̃ la na lege ti kwa tɛ Nyi lo nvɛni.

²⁹ Mbi hĩnga ya, ngoi mɛ mbi na hãngɔ so ndo mɛ ɔngɔ ko, asiɔ azi na gangɔ pɛko mbi, lingɔ na popo tɛ ĩ, ko ala na hɛ̃ngɔ ĩ pɛnɔ, nga ma se mɛ zɛ̃ ndohɛ na pɛnɔ hɛ̃ asa.

³⁰ Bɛ so popo tɛ ĩ nvɛni ko, ambanga azi na pangɔ tɛnɛ ti nvɛnɛ, ya awa Kristo agwe pɛ ani.

³¹ Ale ĩ bata tɛrɛ ĩ, ĩ hĩnga ya, buru ta mɛ ndo mbi li so popo tɛ ĩ ko, ta mbi ndonzɛ̃ ndo ma, mbi ndotisa ndo zo kɔi kɔi so popo tɛ ĩ bi na lá, na ngulɛ le mbi.

³² “Na olo mɛ, mbi zia ĩ na yamba ti Nzapa, ko tɛnɛ mɛ ndo ĩ ma na lo ti nzɔ̃ bɛ tɛ lo na batangɔ ĩ. Lo lengbi ti sangɔ nguru bɛ ĩ, lo lengbi nga ti hɛ̃ngɔ ĩ anzɔ̃ ye mɛ lo bata na lo tɛ azi tɛ lo zu.

³³ Ta mbi ndo na gwɛ̃ ti faranga, bere na gwɛ̃ ti bɔngɔ tɛ zo ma.

³⁴ Kanda ĩ nvɛni ĩ hĩnga ya, mbi li nga ndo kwa na ti mbi nvɛni, so luangɔ ye mɛ ndo alengbi ti zangɔ mbi na afɔ̃ mbi.

³⁵ Mbi fa ndo ĩ na se kɔdɛ zu ya, ale ĩ li kwa, wadila ĩ za awa yɛlɛ. Ko é da nga bɛ e na tɛnɛ mɛ ndo Gbia Yezo nvɛni atɛnɛ ya: ‘Bɛ wa hɛ̃ngɔ ye ndode aɔ tɛ wa luangɔ ye.’ ”

³⁶ Polo ĩ tɛnɛ tɛnɛ ko wɛ ko, lo na la zu akuku, la lo sambela Nzapa.

³⁷ Azi ko zu ato to, abɔmbɔ Polo, azei lo.

³⁸ Vundu agbɔ̃ ndo la ma wo ma, na lo mɛ ya, lo pa ndo hɛ̃ la ya, ta ni ti hũ gbanda la ma. La ala nɔ asa lo ka ya masua.