Awa Pangɔ Kwa 2 - Fana Ngbangɔ 1987

Tɔrɔ Santo asa nguru tɛrɛ awa yengɔ lo tɛ Yezo

¹ Ĩ da ndo na lá yenga ti Pantɛkotɛ ko, nyɔ awa yengɔ lo tɛ Yezo ase ndo kɔi, la ala bombi tɛrɛ la kwɛ zu ndoni kɔi.

² Na ngoi ni ko, ala ma ye ndokpale ka lɛ ndozu. Ye ni ko ndokpale nga ma kpengba yá mɛ ndoya vuku vuku! Ye ni ko ndokpale ko, amu ya da mɛ ala da zu.

³ Ala hũ aye mɛ nga ma menga wá asi, ko ya ni akangbi, adunga na bɛ li la kɔi kɔi zu.

⁴ Tɔrɔ Santo asa nguru tɛrɛ la zu, la ala to nda tɛnɛngɔ tɛnɛ na yanga mɛ ta ala hĩnga ma. Ala tɛnɛ tɛnɛ ni nga ma se mɛ Tɔrɔ Santo ahɛ̃ la kɔdɛ ti tɛnɛngɔ na ni.

⁵ Na ngoi ni ko, ambanga Ayuda mɛ ndohɛ̃ tɛrɛ la so vɔrɔngɔ Nzapa ndo ka Yeruzalɛmɛ, ala lo ka lɛ sese zu la aga.

⁶ Ngoi mɛ ala ĩ ma kpalengɔ ti ye ni ko, ala ga butu butu abombi tɛrɛ la ndoni kɔi. Ala bema sĩ, ta sanga ma, zo kɔi kɔi ama tɛnɛ tɛ awa yengɔ lo tɛ Yezo na yanga tɛ lo nvɛni.

⁷ Ala bema sĩ, zema ahã nga la, ko ala pa ya: “Azi olo zu mɛ ndotɛnɛ tɛnɛ ko, ala awa Galilea,

⁸ wa nda mɛ zo kɔi kɔi na popo tɛ e ndoma tɛnɛ mɛ ala ndotɛnɛ na yanga ti kɔdɔrɔ tɛ lo nɛ?

⁹ Na popo tɛ e ndo mɛ ko, ambanga azi alo ka sese ti Partɛ, ti Media, ti Elamɛ, ti Mezopotamia, ti Yudea, ti Kapadɔsɛ, ti Pɔnti, ti Azia,

¹⁰ ti Frizia, ti Pamfilia, ti Egipito, nga ka mbanga sese ti Fibia mɛ ndũ na Sirɛnɛ. Ambanga alo ka Roma,

¹¹ ambanga adu abɛta Ayuda, ambanga agbinya bɛ la, ko ala ndovɔrɔ Nzapa tɛ Ayuda, ambanga mɛ ndɛ̃ nga adu azi ti sese ti Krɛtɛ nga na ti Arabia. Ko kɔdɛ mɛ e zu e ndoma tɛnɛ ti aye ti kpɛnɛ mɛ Nzapa ali, na yanga tɛ e ndɛ̃ ndɛ̃ ndɛ̃ sia?”

¹² Ala bema sĩ, ko ala hã nga zema ma ya ma. Ala tɛnɛ na popo tɛ la ya: “Oko alengbi na nɛ?”

¹³ Kanda azi mɛ ndɛ̃ so ndoe tɛ la awa yengɔ lo tɛ Yezo, so ndopa ya: “Kana agbɔ̃ la sĩ!”

Petro atɛnɛ kpɔ̃ tɛnɛ hɛ̃ azi

¹⁴ Petro na awa pangɔ kwa tɛ Yezo sui kɔi ndoni kɔi alonga ndozu, la Petro ato nda tɛnɛngɔ tɛnɛ kpengbani ya: “Ĩ Ayuda, na ĩ azi zu mɛ ĩ ndodu ge Yeruzalɛmɛ, ĩ ma tɛnɛ mɛ mbi na tɛnɛngɔ hɛ̃ ĩ nzɔ̃ni, ko ĩ hĩnga ya,

¹⁵ ta kana agbɔ̃ azi olo nga ma se mɛ ĩ ndoda na bɛ ĩ ma. Ta sanga ma, na olo ko, e bo na saa gumbaya ti nda perere.

¹⁶ Kanda ye mɛ ĩ ndohũ na olo mɛ ko, adu ye mɛ ndo Yoɛlɛ, wa pangɔ nyɔ Nzapa apia apa gã ya:

¹⁷ ‘Nzapa apa ya: Ĩ ba ye mɛ asi gbanda na ngoi mɛ sese adoli ti wɛngɔ lo mɛ. Mbi sa gbanda nguru tɛ Tɔrɔ Santo tɛ mbi tɛrɛ azi zu. Aya ĩ ti kɔli na ti wali apa gbanda nyɔ mbi, Apandara tɛ ĩ ahũ gbanda aye mɛ Nzapa na fangɔ na la, Ko abange tɛ ĩ ahũ nga gbanda Suma.

¹⁸ Biani na ngoi ni gbanda ko, mbi sa gbanda nguru tɛ Tɔrɔ Santo tɛ mbi Tɛrɛ awa kwa tɛ mbi ti kɔli nga na ti wali, Ko ala na pangɔ nyɔ mbi.

¹⁹ Mbi li gbanda akukuna ye ka lɛ ndozu nga na aye ti kpɛnɛ ge tise. Mɛnɛ tɛrɛ azi asa gbanda, wa aza gbanda, Guru agundu nga gbanda ka lɛ ndozu tuuu.

²⁰ Uzu ti kota lá ti gangɔ tɛ Gbia na ndima ko, Lá ati gbanda mbingo, nzɛ̃ abɛ gbanda ngba ngbã ngba nga ma mɛnɛ.

²¹ Wa azi zu ko gbanda la aili Gbia ya, lo za ani ko, Lo so gbanda la.’ ”

²² Petro apa nga ya: “Ĩ awa Izrayɛlɛ, ĩ́ ma tɛnɛ mɛ mbi na pangɔ hɛ̃ ĩ. Yezo wa Nazarɛtɛ, lo zo mɛ ndo Nzapa afa ĩ na lo gbia tɛ lo, na lo mɛ ya, na lo nguru tɛ Nzapa ko, Yezo ali ndo aye ti kpɛnɛ, nga na akukuna ye na gbɛlɛ ĩ, nga ma se mɛ ĩ nvɛni ĩ hĩnga na ni.

²³ Lo zo mɛ ndo ĩ ka lo hɛ̃ asiɔ azi, ala gɔngɔ lo ndo krusi, lo kpi, nga ma se mɛ ndo nyɔ Nzapa apia apa ya, aye ni ko na lingɔ lo.

²⁴ Kanda Nzapa ahã lo na ya pɛnɔ ti kwá, na lo mɛ ya, ta kwá alengbi ndo ti ɔngɔ Yezo na nguru ma.

²⁵ Davidi apa ndo tɛnɛ na lo tɛ Yezo ya: ‘Mbi ndohũ ndo Gbia so gbɛlɛ mbi ngoi zu, Lo na ndo kɔti ti mbi, Na lo ni ko, ta tɛrɛ mbi ndodɔ ma.

²⁶ Nda mɛ be mbi ndode sĩ, Ko mbi ndotɛnɛ nga tɛnɛ na dengɔ be sĩ la. Abɛ nga nguru awe tɛrɛ mbi zu ko, Mbi na kpãngɔ be mbi na ndo mɔ Gbia.

²⁷ Ta sanga ma, ta mɔ na ziangɔ tɔrɔ tɛrɛ mbi ya, Angbã ka ndo mɛ awa kwáni ndodu da ma. Ta mɔ ye nga gbanda ya, tɛrɛ zo tɛ mɔ azɔ̃ ma.

²⁸ Mɔ fa ndo mbi na lege ti songɔ na pɛ kwá. Ko bɛ mbi ndode sĩ, na lo mɛ ya, Ngoi zu mɔ ndodu ndoni kɔi na mbi!’ ”

²⁹ Petro apa nga ya: “Aya bua, mbi ye pangɔ tɛnɛ hɛ̃ ĩ yango na lo tɛ kotara e Davidi. Lo kpi ndo, ahɔ lo, sende tɛ lo ade na lá olo ge sese tɛ e.

³⁰ Lo ndo wa pangɔ kwa tɛ Nzapa, ko lo hĩnga ndo ya, Nzapa ako kapa hɛ̃ ni. Na kongɔ kapa ni ko, Nzapa anyɔ ngɛ na ili lo nvɛni ya: ‘Mbi kpã gbanda tara mɔ kɔi gbia nga ma se tɛ mɔ.’

³¹ Davidi apia ndo ahĩnga ye mɛ gbanda na singɔ, la lo pa lo ti songɔ tɛ Mɛsia na pɛ kwá. ‘Ta Nzapa azia ndo tɔrɔ tɛrɛ lo, Angbã ka ndo mɛ awa kwáni ndodu da ma. Ko ta tɛrɛ lo azɔ̃ nga ndo ma.’ ”

³² Petro apa nga ya: “Yezo mɛ mbi ndopa lo tɛ lo hɛ̃ ĩ ko, Nzapa aso ndo lo na pɛ kwá, ko e hũ nga ndo lo na le e nvɛni.

³³ Nguru tɛ To lo Nzapa aya ndo lo ka ndozu, ko Nzapa ahɛ̃ lo Tɔrɔ Santo mɛ ndo lo ko kapa ni. Ko Yezo ahɛ̃ nga e Tɔrɔ Santo ni, nga ma se mɛ ĩ ndohũ na ni, nga na se mɛ ĩ ndoma na ni na olo mɛ.

³⁴ Ta Davidi nvɛni ndo la ama ka yayu ma, kanda lo pa ndo ya: ‘Gbia Nzapa apa hɛ̃ Gbia tɛ mbi ya: Du na ndo kɔti ti mbi,

³⁵ Nga ka gbanda mbi nwɔ awa kɛ̃ngɔ mɔ.’

³⁶ “Ĩ awa Izrayɛlɛ zu, ale ĩ hĩnga biani ya, Yezo mɛ ndo ĩ gɔngɔ lo ndo krusi ko, nga bo lo la Nzapa akpã lo Gbia, akpã nga lo Mɛsia!”

³⁷ Ala ĩ ma so ko, bɛ la asɔ sĩ. La ala hũnda Petro na ambanga awa pangɔ nyɔ Yezo ya: “Aya bua, ye mɛ e lengbi ti lingɔ nɛ?”

³⁸ Petro agbinya hɛ̃ la ya: “Ale ĩ gbinya be ĩ, ko zo kɔi kɔi amu batisimɔ na ili Yezo Kristo, wa Nzapa aka lɛ lo ndo siɔ ye tɛ ĩ, ahɛ̃ nga ĩ Tɔrɔ Santo.

³⁹ Ta sanga ma, Nzapa ako ndo kapa hɛ̃ ĩ, na aya ĩ, nga na azi mɛ ndodu ka yɔngɔrɔ ndo, azi zu mɛ gbanda Gbia Nzapa tɛ e aili la!”

⁴⁰ Petro apa nga hɛ̃ la ambanga tɛnɛ gba ya, ni tɔndɔ nda ni nzɔ̃ni hɛ̃ la, ko ni wa la, wa ala ye lo tɛ Yezo. Lo pa hɛ̃ la ya: “Ĩ zia gwengɔ na pɛ azi mɛ ayu lege tɛ Nzapa, wa Nzapa aso ĩ!”

⁴¹ Azi gba na popo tɛ la aye lo tɛ Petro, la ala mu batisimɔ. Na lá ni ko, azi nga ma koto ota ali na li nɔ tɛ awa yengɔ lo tɛ Yezo.

⁴² Ala kpã ma la na ndo ló mɛ awa pangɔ kwa tɛ Yezo ndoha na la. Ala na awa yengɔ lo tɛ Yezo ndobombi tɛrɛ la ndoni kɔi, ala ndotɛ Tɛ tɛ Gbia Yezo ndoni kɔi, ala ndosambela nga Nzapa ndoni kɔi.

Du tɛ awa yengɔ lo tɛ Yezo

⁴³ Awa pangɔ kwa tɛ Yezo ndoli ndo aye ti kpɛnɛ, nga na akukuna ye ma wo ma. Na lo ni ko, mbɛtɔ agbɔ̃ ndo azi zu.

⁴⁴ Awa yengɔ lo tɛ Yezo zu abombi tɛrɛ la, akpã aye tɛ la zu ndoni kɔi ya, adu na lo tɛ ani zu.

⁴⁵ Ala ka aye tɛ la na ngere, akangbi faranga ni na popo tɛ la zu. Ala kangbi ya ni nga ma se mɛ ale zo kɔi kɔi alengbi ti luangɔ ni.

⁴⁶ Lá kɔi kɔi, nyɔ la ndose kɔi, ko ala ndobombi tɛrɛ la ka ya kota da Nzapa. Ala ndotɛ ye ka ya da tɛ la ndoni kɔi na dengɔ bɛ, ta ala ndoyakɛ tɛrɛ la ma.

⁴⁷ Ala ndogonda Nzapa, la bɛ azi ndode na lo tɛ la. Lá kɔi kɔi, Gbia ndoso azi, ko lo ndosa la na li nɔ tɛ azi mɛ aye lo tɛ Yezo.