Awa Pangɔ Kwa 19 - Fana Ngbangɔ 1987

Polo asi ka Efɛzɛ

¹ Ngoi mɛ ndo Apolɔsɛ ka kɔdɔrɔ ti Kɔrinto ko, Polo afangbi tɛ lo ti ndo hɔtɔ mɛ na lɛ sese ti kɔdɔrɔ ni ko, asi ka Efɛzɛ. Lo ĩ si kai ko, lo tã ambanga awa Kristo.

² Lo hũnda la ya: “Ngoi mɛ ndo ĩ ye lo tɛ Yezo ko, ĩ lua ndo Tɔrɔ Santo nga?” La ala gbinya hɛ̃ lo ya: “Ta e dɛ ndo e ma be fani kɔi ya, Tɔrɔ Santo da ma.”

³ Polo ĩ ma so ko, lo hũnda la ya: “Wa tɛ ĩ batisimɔ mɛ ndo ĩ mu nɛ?” Ala gbinya hɛ̃ lo ya: “E mu gi tɛrɛ batisimɔ mɛ ndo Yoanɛ ndohɛ̃ azi.”

⁴ La Polo apa hɛ̃ la ya: “Yoanɛ ndohɛ̃ ndo batisimɔ hɛ̃ azi ko la aye gbinyangɔ bɛ la, ko lo ndopa ndo hɛ̃ azi ya, mbanga zo kɔi na gangɔ pɛ ni, ili lo la Yezo, ale ĩ ye lo tɛ lo.”

⁵ Azi ti Efɛzɛ ĩ ma tɛnɛ ko wɛ ko, ala mu batisimɔ na ili Gbia Yezo.

⁶ Ngoi mɛ Polo ĩ kpã ti lo na ndo la ko, ala lua Tɔrɔ Santo. Ko ala to nda pangɔ tɛnɛ na yanga mɛ ta ala hĩnga ma, ala pa nga ndo nyɔ Nzapa hɛ̃ azi.

⁷ Azi ni ko zu ndo nga ma sui kɔi ndoni sɛ.

⁸ Polo ali ndo kai nzɛ̃ ta, lo ndonɔ ndo ka ya da sambela, ko lo ndotɛnɛ ndo tɛnɛ hɛ̃ azi na kpengba bɛ. Lo ndopa ndo lo ti lo Lɛngɔ Gbia tɛ Nzapa. Lo ndogi ndo kɔdɛ ya, ni wa azi mɛ ndoma ni, wa ala ye lo tɛ Yezo.

⁹ Ko ambanga azi ndoli ndo kpengba li, ala ndokɛ̃ ndo yengɔ lo tɛ Yezo, ala ndosamana nga ndo na lo ti lege tɛ Gbia Yezo na gbɛlɛ azi. Polo ĩ hũ so ko, lo dɔ la so ndo ko lo zia, lo mu awa Kristo, ala ɔ. Ko ngoi zu lo ndoha ndo azi na tɛnɛ tɛ Nzapa na ya da mɛ ili ni la da mbɛti tɛ Tiranusi.

¹⁰ Lo li ndo buru sɛ so ndo ko, so hangɔ Ayuda, na azi mɛ ta Ayuda ma ya, ala zu ama tɛnɛ tɛ Gbia Yezo.

Aya Seva ahanda tɛrɛ la nvɛni

¹¹ Polo ndoli ndo akokɛnɛ ye ti kpɛnɛ na lo nguru mɛ Nzapa ahɛ̃ lo.

¹² Azi ĩ hũ so ko, ala so ndolɔ bɔngɔ, bere kitambala mɛ ndo abɔrɔ tɛrɛ Polo, ala ndogwe na ni ya, akpã na ndo awa ngã, la tɛrɛ la ahã wee, asiɔ tɔrɔ mɛ ndo na ya tɛrɛ la asi nga.

¹³ Ambanga Ayuda mɛ ndo ndoɔ na ndo kɔi kɔi, ko ala so ndotoma asiɔ tɔrɔ na ya tɛrɛ awa ngã ko, ala mu nga ndo ili Yezo ya, ani toma na asiɔ tɔrɔ na ya tɛrɛ azi. Ala ĩ tã zo kɔi na asiɔ tɔrɔ ya tɛrɛ lo ko, ala pa hɛ̃ asiɔ tɔrɔ ni ya: “Na ili Yezo mɛ Polo ndopa ko, mbi hɛ̃ ĩ nyɔ ya ĩ si.”

¹⁴ Awa lingɔ ye ni ko ndo zu mbara mbara gi aya kɔli. Ala ndo aya wa Yuda mɛ kota gbia tɛ awa lungɔ Nzapa na ye, ili lo Seva.

¹⁵ La kɔli ko na asiɔ tɔrɔ ya tɛrɛ lo agbinya hɛ̃ la ya: “Mbi hĩnga Yezo, mbi hĩnga nga Polo. Wa ĩ tɛ ĩ ana?”

¹⁶ La kɔli ko na asiɔ tɔrɔ ya tɛrɛ lo ati ndo la, asɔ̃ la yombe! Lo fa ndo hɛ̃ la ya, nguru tɛ ni aɔ nguru tɛ la kwɛ zu. La ala lo ka ya da tɛ kɔli ko, akpɛlɛ, asi ndumbu, tɛrɛ la ada gi kã.

¹⁷ Azi ti Efɛzɛ kwɛ zu mɛ Ayuda, nga na ala mɛ ta Ayuda ma ama ndo pa ni, ko mbɛtɔ agbɔ̃ ndo la sĩ, la ala gonda ndo Gbia Yezo.

¹⁸ Azi ma wo ma so popo tɛ azi mɛ ati awa yengɔ lo tɛ Yezo ko, ala ga, aye lo siɔ ye tɛ la na gbɛlɛ azi zu.

¹⁹ Azi gba mɛ ndo awa hãngɔ biando, apa nga siɔ ye zu mɛ ndo ala li, aga na abuku ti biando tɛ la, azɔ ni so gbɛlɛ azi zu. Azi ĩ hũ abuku ni ko, ala hĩnga ya, abuku olo alengbi ti tingɔ faranga koto sui kɔ̃.

²⁰ Se mɛ ndo tɛnɛ tɛ Gbia alengbi na ndo zu, ko tɛnɛ ni ndofa ndo nguru tɛ lo yango la.

Azi atɔmbɔkɔ ka kɔdɔrɔ ti Efɛzɛ

²¹ Na pɛ aye ko zu ko, Polo asepara ndo fangbingɔ ti le sese ti Masedoanɛ, na ti Grɛsɛ, wa ni gwe ka Yeruzalɛmɛ. Lo pa ndo ya: “Ngoi mɛ gbanda mbi si kai ko, ale mbi si nga ka Roma.”

²² La lo hã azi sɛ na popo tɛ awa zangɔ lo, adu Timɔte na Erastɛ. Lo to la ka Masedoanɛ. Kanda lo nvɛni lo de tɛ lo ndo na pɛ ngoi yakere ka sese ti Azia.

²³ Na ngoi ko ndo ko, azi atɔmbɔkɔ na lo tɛnɛ mɛ ndo ala ma na lo ti lege tɛ Gbia Yezo.

²⁴ Ka kɔdɔrɔ ti Efɛzɛ ko, azi awa ndo da ti vɔrɔngɔ na mbanga nzapa wali mɛ ili lo la Artemisi. Mbanga kɔli kɔi ndo kai, ili lo la Demetriusi, kwa tɛ lo la mɛngɔ nwa na anzina ye. Lo na awa kwa tɛ lo ndomu ndo nwa, ndontɛ na anzina ye ni ko, ko ala ndolua ndo faranga da ma wo ma. Ko Demetriusi ndomu ndo faranga ni, lo futa na awa kwa tɛ lo.

²⁵ Lá kɔi ko, lo ili awa kwa tɛ lo, na azi mɛ ndɛ̃ mɛ ndoli nga gi tɛrɛ kwa ni ko, lo bombi la ndoni kɔi, lo pa hɛ̃ la ya: “Aya bua, ĩ hĩnga ya, e ndodu nzɔ̃ni bo na lo ti kwa mɛ e ndoli.

²⁶ Ko ĩ hũ ye mɛ zo kɔli mɛ ili lo la Polo ndoli, ĩ ma nga tɛnɛ mɛ lo ndotɛnɛ. Lo pa ya, anzapa mɛ azi ndolɛkɛ na ti la ko, ta adu abɛta anzapa ma. Lo ndogi ndo kɔdɛ ya, azi ma wo ma azia lege tɛ anzapa olo. Ta bo so ndo mɛ Efɛzɛ kɔi ma, kanda nga ka ya kɔdɔrɔ gba mɛ na lɛ sese ti Azia.

²⁷ Ko tɛnɛ mɛ lo ndotɛnɛ ko, ta na gbɛ̃ngɔ bo kwa tɛ e kɔi ma, kanda alengbi nga ti gbɛ̃ngɔ pa ili da sambela tɛ kota nzapa Artemisi. Ko nzapa wali Artemisi mɛ azi ti lɛ sese ti Azia, na azi ti le sese kwɛ zu ndovɔrɔ lo ko, ta lo na dtingɔ na ndima fani mɛ ndɛ̃ ka lɛ la ma.”

²⁸ Awa kwa ĩ ma so ko, ngɔnzɔ agbɔ̃ la sĩ, la ala to nda dɛrɛngɔ kɔngɔ ya: “Artemisi, lo kota nzapa wali tɛ azi ti Efɛzɛ!”

²⁹ Azi zu ti kɔdɔrɔ atɔmbɔkɔ. Azi agbɔ̃nɔ Gayusi na Aristarkɛ, ala zu sɛ adu awa Masedoanɛ mɛ ndo ana Polo alo ka Antiɔsɛ aga ka Efɛzɛ lege kɔi. Agiɔ la, agwe na la na kpɛ gburu gburu ka ndo ti wele.

³⁰ Polo aye nga ndo ya, ni si ka gbɛlɛ azi ka ndo ti wele, la awa Kristo agbanzi lo.

³¹ Ambanga agbia ti Azia mɛ afɔ̃ Polo, ato nga kwa hɛ̃ lo ya, ta lo si ka ndo ti wele ma.

³² Na ngoi ni ndo ko, azi mɛ abombi tɛrɛ la ka ndo ti wele ada ma tɛnɛ awa nyingɔ. Kɔngɔ mɛ ndo ala ndodɛre ko, ta nyɔ la ndose ndo kɔi ma. Na popo tɛ azi mɛ ndo aga ka ndo ti wele ko, ta ambanga gba ahĩnga ndo nda mɛ azi abombi na tɛrɛ la ma.

³³ Ambanga azi akambisa tɛnɛ ni hɛ̃ zo kɔli mɛ ili lo la Alɛkizandrɛ, la Ayuda ayuru lo ya, lo si ka gbɛlɛ azi, lo tɔndɔ nda tɛnɛ ni. Alɛkizandrɛ ĩ si ka gbɛlɛ azi ko, lo pɛpɛ ti lo hɛ̃ la ya, ala dunga kpɔ, wa ni kambisa nda tɛnɛ ni hɛ̃ la.

³⁴ Kanda ngoi mɛ azi ĩ hĩnga ya, lo wa Yuda ko, ala kɛ̃ mangɔ tɛnɛ tɛ lo, ko ala mu saa nga ma sɛ, ala zu nyɔ la kɔi aderɛ kɔngɔ ndoni kɔi ya: “Artemisi lo kota nzapa wali tɛ azi ti Efɛzɛ!”

³⁵ So pɛni, wa sungɔ ndia ti kɔdɔrɔ ti Efɛzɛ agbanzi la ya, ta ala tɛnɛ tɛnɛ ma, la ala kai, ko lo pa hɛ̃ la ya: “Ĩ azi ti Efɛzɛ, azi zu ahĩnga ya, kɔdɔrɔ ti Efɛzɛ la ndobata da ti vɔrɔngɔ na kota nzapa wali Artemisi, andobata nga pɛnzɛ tɛ́nɛ ti limɔ ti tɛrɛ lo mɛ ndo alo ka ndozu ati ge tise.

³⁶ Ta zo ti dɛngɔ kitɛ ni da ma. Wa ĩ zu na bɛ ĩ, ta ĩ li ye na ndo li ĩ ma.

³⁷ Azi olo ĩ gbɔ̃nɔ la, ĩ ga na la ge ko, ta ala nzĩ ye ti ya ada ti vɔrɔngɔ na anzapa ma, ta ala guru nga nzapa wali tɛ e ma.

³⁸ Se Demetriusi na awa kwa tɛ lo aye vɔ̃ngɔ to tɛrɛ zo ko, ala ku lá mɛ awa fangɔ ngbanga ndotɛnɛ na ngbanga, wa ala ga. Ko ĩ ba se mɛ ala lengbi ti vɔ̃ngɔ to tɛrɛ zo la!

³⁹ Se ĩ du na mbanga tɛnɛ mɛ ndɛ̃ ko, na lɛkɛngɔ ni na se nyɔ ndia, na ngoi mɛ azi ti kɔdɔrɔ zu ndobombi na tɛrɛ la.

⁴⁰ Biani, ye mɛ e li na lá olo ko, agbia alengbi ti vɔ̃ngɔ to tɛrɛ e ya, e tɔmbɔkɔ. Bombingɔ tɛrɛ e mɛ e bombi ndo mɛ ko, ta e hĩnga nda ni ma. Se azi ahũnda e na lo tɛnɛ olo ko, ta e hĩnga se mɛ e kambisa na nda ni mbiri mbiri hɛ̃ la ma.”

⁴¹ Wa sungɔ ndia ĩ tɛnɛ so wɛ ko, lo pa hɛ̃ azi ko zu ya, ala gwe.