Awa Pangɔ Kwa 18 - Fana Ngbangɔ 1987

Polo asi ka Kɔrinto

¹ So pɛni, Polo alo so Atɛnɛ, agwe ka Kɔrinto.

² Ngoi mɛ lo ĩ si kai ko, lo tã wa Yuda kɔi mɛ ili lo la Akilasi. Adu ndo lo ka sese ti Pɔnti. Akilasi na ya lo Prisiyɛ alo ndo ka Italia, aga asi so Kɔrinto, ko ta ala dɛ ndo ali bi gba ma. Ala ga ndo so ndo ko, na lo mɛ ya, kota gbia ti Roma mɛ ili lo la Klodɛ, ahɛ̃ ndo nyɔ hɛ̃ Ayuda zu ya, ala lo so Roma aɔ. Polo anɔ ata Akilasi na ya lo,

³ angbã so ndo tɛ la, na lo mɛ ya, lo nɔ la ndoli kwa kɔi. Ala ndo awa lɛkɛngɔ bɔngɔ mɛ andowa na gofa ti tandi. Lo ngba ndo ka tɛ la, ko ala zu ndoli ndo kwa ndoni kɔi.

⁴ Na lá ti wɔngɔ tɛrɛ kɔi kɔi ko, Polo ndotɛnɛ ndo tɛnɛ ka ya da sambela, ko Ĩo ndogi ndo ya, ni sa kɔdɛ bɛ Ayuda na azi ti Grɛsɛ, wa ala ye lo tɛ Yezo.

⁵ Ngoi mɛ ndo Silasi na Timɔte ĩ lo ka Masedoanɛ ĩ ga, ĩ tã Polo ko, Polo amu ngoi tɛ lo zu so hangɔ azi na tɛnɛ tɛ Yezo, ko lo ndopa nga ndo hɛ̃ Ayuda ya, Yezo lo Mɛsia biani.

⁶ Ko ngoi mɛ Ayuda ĩ kɛ̃ tɛnɛ tɛ lo, ĩ guru nga lo ko, lo dara mbuba ti tɛrɛ bɔngɔ tɛ lo hɛ̃ la. La lo pa hɛ̃ la ya: “Se ĩ yu lege tɛ Nzapa ko, ta nda ni tɛrɛ mbi ma, nda ni tɛrɛ ĩ nvɛni. Bo na olo ko, mbi zia ĩ, mbi nɔ ka tɛ azi mɛ ta Ayuda ma, ya mbi pa tɛnɛ tɛ Nzapa hɛ̃ la.”

⁷ La lo lo ndo ko, lo nɔ ka tɛ kɔli kɔi mɛ ili lo la Titiusi Yustusi, mɛ ndo wa vɔrɔngɔ Nzapa. Da tɛ lo ndo na mbage lɛ da sambela.

⁸ Krispusi mɛ gbia ti ya da sambela na nda se wa tɛ lo zu, aye ndo lo tɛ Gbia Yezo. Azi ti Kɔrinto ma wo ma mɛ ndo ama tɛnɛ tɛ Yezo mɛ Polo atɛnɛ ko, ala ye nga lo tɛ Yezo, la ala mu batisimɔ.

⁹ Mbanga bi kɔi ko, Polo ahũ Suma. Na ya suma ni ko, Gbia aga ka li lo, apa hɛ̃ lo ya: “Ta mbɛtɔ agbɔ̃ mɔ ma, kanda ha bo tɛnɛ tɛ mbi hangɔ. Ta mɔ zia ma,

¹⁰ ta sanga ma, mbi ndoni kɔi na mɔ. Ta zo kɔi na gbɔ̃ngɔ mɔ lingɔ mɔ siɔni ma, na lo mɛ ya, azi ma wo ma so ya kɔdɔrɔ olo adu azi tɛ mbi.”

¹¹ Polo ala ndo so Kɔrinto buru kɔi na nzɛ̃ mana. Lo ndoha ndo azi ti Kɔrinto na tɛnɛ tɛ Nzapa.

¹² Ko ngoi mɛ ndo Galiona mɛ wa Roma adu gbia tɛ leta ka sese ti Grɛsɛ ko, Ayuda abombi tɛrɛ la ndo Polo, agbɔ̃ lo, anɔ na lo ka da ngbanga.

¹³ Ala pa ya: “Zo kɔli olo ndogi ya, ni sa siɔ wangɔ bɛ azi, wa ala vɔrɔ Nzapa na se kɔdɛ mɛ ndia tɛ e akɛ̃.”

¹⁴ Polo aye ndo ya ni tɛnɛ tɛnɛ, la Galiona afa tɛnɛ nyɔ lo, apa hɛ̃ azi ya: “Ee! Ayuda, se adu ya, kɔli olo ali nyi siɔ ye, bere ali kota siɔ ye, wadila mbi gɛrɛ na ngoi tɛ mbi so mangɔ ĩ.

¹⁵ Wa oko adu na lo tɛnɛ mɛ ĩ ndobimbi na lo ti ili zo, nga na lo ti ndia tɛ ĩ nvɛni ko, oko aba ĩ nvɛni. Ta mbi ye ya, mbi fa ngbanga ti gi tɛrɛ aye nga so ma!”

¹⁶ La Galiona atoma la ka ya da ngbanga, ala asi ka gegi.

¹⁷ Ala ĩ si ko, ala hũ kɔli kɔi, ili lo la Sɔstɛnɛ, lo gbia ti ya da sambela. Ala gbɔ̃ lo, asɔ̃ lo so gbɛlɛ da ngbanga. Ko Galiona so ndoba ka lɛ lo wawa.

Polo adiri anɔ ka Antiɔsɛ

¹⁸ Polo ati la ndo ka Kɔrinto bi gba. Ko uzu ti lo longɔ so ndo ko ɔngɔ ko, lo kiɔ li lo ngoro ngoro ka mbanga ya kɔdɔrɔ ti Kɔrinto kɔi mɛ ili ni la Sanserea, ta sanga ma, lo ko ndo kapa hɛ̃ Nzapa. Ko Polo azia awa Kristo ti kɔdɔrɔ ni ko so ndo ko, la lo na Akilasi, nga na Prisiyɛ mɛ ya Akilasi, ako ya masua so gwengɔ ka Siria.

¹⁹ Ngoi mɛ ala ĩ si ka Efɛzɛ ko, Polo azia Akilasi na ya lo Prisiyɛ, anɔ ka ya da sambela, lo na Ayuda abimbi tɛnɛ.

²⁰ Ala vɔrɔ tɛrɛ la hɛ̃ Polo ya, lo la so tɛ ani bi gba, la Polo akɛ̃.

²¹ Ngoi mɛ Polo ĩ ga so ɔngɔ ko, lo zei la ya: “Mbi ɔ, wa se Nzapa aye ko, mbi diri mbi ga ge tɛ ĩ.” La lo lo so Efɛzɛ, lo ko ya masua, lo ɔ.

²² Polo ĩ gwe ĩ si ka Sezarea ko, lo zia ɔngɔ ti lɛ ngu, lo mu lege ti gegi, lo gwe ka Yeruzalɛmɛ ya, ni bala azi ti Eklezia. Lo ĩ bala la wɛ ko, lo gwe ka kɔdɔrɔ mɛ ili ni la Antiɔsɛ.

²³ Lo ĩ la kai bi yakere ko, lo mu lege lo gwe, lo si ka sese ti Galatia, nga ka sese ti Frizia, ko lo so ndopa tɛnɛ tɛ Yezo hɛ̃ awa Kristo mɛ kai ya, nguru agbɔ̃ la.

Apolɔsɛ asi ka kɔdɔrɔ ti Efɛzɛ nga ka Kɔrinto

²⁴ Wa Yuda kɔi, ili lo la Apolɔsɛ, mɛ adu lo ka Alɛkizandria, lo ga ndo ka Efɛzɛ. Lo ndotɛnɛ ndo tɛnɛ ngbɛrɛ ngbɛrɛ, lo hĩnga nga ndo tɛnɛ ti ya Buku tɛ Nzapa ma wo ma.

²⁵ Aha ndo lo na lo ti lege tɛ Gbia Yezo, ko lo nga ndo wa gonvɛnɛ sĩ. Lo ndopa ndo tɛnɛ tɛ Yezo, ko lo ndoha ni na seni. Kanda tɛ lo ko, ye mɛ ndo lo hĩnga bo la lo batisimɔ tɛ Yoanɛ.

²⁶ Ko lo li ka ya da sambela, lo to nda tɛnɛngɔ tɛnɛ na kpengba bɛ. Ngoi mɛ Prisiyɛ na kɔ lo Akilasi ĩ ma tɛnɛ mɛ lo ĩ tɛnɛ ko, ala mu lo, agwe na lo ka tɛ la, akambisa nda tɛnɛ tɛ Nzapa na seni nvɛni hɛ̃ lo.

²⁷ So pɛni ndo la Apolɔsɛ aye ya, ni gwe ka sese ti Grɛsɛ. Awa Kristo mɛ so Kɔrinto ĩ ma so ko, ala sa nguru bɛ lo ya lo nɔ. Ala su mbɛti hɛ̃ lo ya, lo nɔ na ni hɛ̃ awa Kristo mɛ ka Akai, wadila ala li lo nzɔ̃ni. Ngoi mɛ ndo lo ĩ si kai ko, lo za azi ma wo ma mɛ ati awa Kristo na lo nzɔ̃ bɛ mɛ Nzapa ali hɛ̃ la.

²⁸ Ta sanga ma, lo fa ndo na gbɛlɛ azi zu ya, Ayuda ayu lege tɛ Nzapa. Lo fa nga ndo la na lege ti Buku tɛ Nzapa ya, Yezo lo Mɛsia. Na lo tɛnɛ mɛ lo tɛnɛ ko, ta azi ati gbinya bɛ tɛnɛ kɔi hɛ̃ lo ma.