Awa Pangɔ Kwa 17 - Fana Ngbangɔ 1987

Polo na Silasi asi ka Tɛsalɔnikɛ

¹ Ala lo ka kɔdɔrɔ ti Filipɛ, aɔ ti lɛ sese mɛ ili ni la Amfipolisi, na ti lɛ sese mɛ ili ni la Apolonia, la ala si ka Tɛsalɔnikɛ, kɔdɔrɔ mɛ ndo Ayuda awa na da sambela tɛ la da.

² La Polo anɔ ka ya da sambela, nga ma se mɛ lo ndoli na ni ka ya kɔdɔrɔ zu mɛ lo ndosi da. Polo na azi mɛ ndodu ka Tɛsalɔnikɛ amu ndo lá ti wɔngɔ tɛrɛ fani ta so bimbingɔ tɛnɛ na ndo tɛnɛ ti ya Buku tɛ Nzapa.

³ Lo tɔndɔ ndo nda ni hɛ̃ la, lo fa nga ndo la na se mɛ Buku tɛ Nzapa apa na ni ya, ale Mɛsia ahũ pɛnɔ, akpi, so pɛni wa lo so. Lo pa nga hɛ̃ la ya: “Yezo mɛ mbi ndopa lo tɛ lo hɛ̃ ĩ ko, lo la Mɛsia.”

⁴ Ambanga azi ĩ ma so ko, ala ye lo tɛ Yezo, la ala li na li nɔ tɛ Polo na Silasi. Se mɛ ndo azi ti Grɛsɛ ma wo ma mɛ ndovɔrɔ Nzapa, nga na awe ma wo ma mɛ awa nwa ati awa Kristo la.

⁵ Kanda Ayuda ali ndo sɔbɛrɛ. Ala ili ambanga awa buba mɛ ala tã la so lege, abombi la ndoni kɔi, asa siɔ wangɔ bɛ la. Ala tongbi azi ti kɔdɔrɔ, la kɔdɔrɔ ada hae hae. Awa buba ko anɔ ali ka ya da tɛ Yazona so gingɔ Polo na Silasi ya, ani gbɔ̃nɔ la, ko ani nɔ na la ka gbɛlɛ azi ti kɔdɔrɔ.

⁶ Ala ĩ gi Polo na Silasi gba ko, ala giɔ Yazona na ambanga awa Kristo mɛ ndɛ̃, agwe na la ka gbɛlɛ agbia kɔdɔrɔ, adɛrɛ kɔngɔ ya: “Akɔli olo asa siɔ wangɔ bɛ azi, ko kɔdɔrɔ zu ada ndo hae hae na lo tɛ la. Na olo ko, ala si nga ge tɛ e.

⁷ Ko Yazona abata la ka ya da tɛ lo! Azi olo zu ndoli ye mɛ ndia tɛ kota gbia ti Roma akɛ̃. Ta sanga ma, ala ndopa ya, kota gbia mɛ ndɛ̃ da, ili lo la Yezo.”

⁸ Tɛnɛ ni ko azɔ bɛ azi ma wo ma, azɔ nga bɛ agbia kɔdɔrɔ.

⁹ Ngoi mɛ Yazona na ambanga afɔ̃ lo ĩ tɔ̃ Polo na Silasi wɛ, la agbia azi la.

Polo na Silasi asi ka Berea

¹⁰ Bi ĩ vũ wɛ ko, awa Kristo apa hɛ̃ Polo na Silasi ya, ala gwe ka kɔdɔrɔ mɛ ili ni la Berea. Ngoi mɛ ala ĩ si kai ko, ala nɔ ka da sambela tɛ Ayuda.

¹¹ Ayuda ti Berea adu anzɔ̃ azi aɔ Ayuda ti Tɛsalɔnikɛ. Ala ma ndo tɛnɛ tɛ Nzapa, ko ala ye lo ni sĩ. Bi kɔi kɔi ko, ala ndogi ndo nda tɛnɛ ti ya Buku tɛ Nzapa, so hĩngangɔ ya, bere tɛnɛ mɛ Polo ndotɛne hɛ̃ ani adu na seni.

¹² Azi ma wo ma na popo tɛ la aye ndo lo tɛ Yezo. Na popo tɛ azi ti sese ti Grɛsɛ ko, awe ma wo ma mɛ na ndima, nga na akɔli ma wo ma aye nga ndo lo tɛ Yezo.

¹³ Ko ngoi mɛ Ayuda mɛ ka Tɛsalɔnikɛ ĩ ma ya, Polo ndopa nga tɛnɛ tɛ Nzapa ka Berea ko, ala lo kai aga, ato nda tongbingɔ azi, sangɔ siɔ wangɔ be la ya, ala kɛ̃ Polo.

¹⁴ Awa Kristo ĩ ma so ko, ala mu Polo bo na ngoi ni ko, anɔ azia lo ka lege mɛ agwe ka kota ngu ya, lo gwe, la lo gwe. Kanda Silasi na Timɔte angbã tɛ la so Berea.

¹⁵ Ambanga awa Kristo mɛ ndo anɔ so sangɔ Polo ko, ala nɔ ndo ngbĩi, asi ka kɔdɔrɔ mɛ ili ni la Atɛnɛ. Na diringɔ tɛ la ka Berea ko, Polo ato la na kwa hɛ̃ Silasi na Timɔte ya, ala ga hiɔ atã ni ka Atɛnɛ.

Polo asi ka Atɛnɛ

¹⁶ Ngoi mɛ Polo ndoku Silasi na Timɔte ka Atɛnɛ ko, lo hũ angbilondo amu le kɔdɔrɔ kwɛ zu, ko ngɔnzɔ agbɔ̃ lo sĩ nvɛni.

¹⁷ Polo na Ayuda, nga na azi mɛ ta Ayuda ma ndo la ndovɔrɔ Nzapa, ndobimbi nga tɛnɛ ka ya da sambela. Ko lá kwɛ lá kwɛ ko, lo na azi mɛ ndo lo ndotã la na be kɔdɔrɔ ndobimbi nga tɛnɛ.

¹⁸ Polo na ambanga awa hangɔ lo tɛ zo kɔli mɛ ili lo la Epikurɛ, na awa hangɔ lo tɛ Zenɔ mɛ ili la la Astoiseo atɛnɛ nga tɛnɛ. Ko ambanga so ndopa ya: “Tɛnɛ mɛ wa kpekpe olo aye tɛnɛngɔ nɛ?” Ambanga mɛ ndɛ̃ ndopa tɛ la ya: “Ali nga ma lo ndopa lo tɛ anzapa ti fanani.” Ala tɛnɛ ndo nga so, na lo mɛ ya, Polo ndopa ndo lo tɛ Yezo, ko lo ndopa nga ndo ya, azi na songɔ na pɛ kwá.

¹⁹ La ala mu lo, anɔ na lo ka ndo ti lingo mɛ ili ni la Areopazɛ. Ala pa hɛ̃ lo ya: “É ye hĩngangɔ fana lo mɛ mɔ ndopa.

²⁰ Ta sanga ma, tɛnɛ mɛ mɔ ndotɛnɛ ko, ta e dɛ e ma ni ma, la e separa hĩngangɔ nda ni.”

²¹ Azi ti Atɛnɛ zu, na awa ndɛ̃ mɛ ndodu ka Atɛnɛ ndomu ndo ngoi tɛ la zu bo so mangɔ, bere so pangɔ afana tɛnɛ hɛ̃ azi.

²² La Polo adɔ alo so ndo be ni, apa ya: “Ĩ azi ti Atɛnɛ, mbi hũ ge le mbi ya, ĩ du azi mɛ ĩ ye vɔrɔngɔ le anzapa ndɛ̃ ndɛ̃ ndɛ̃ ma wo ma.

²³ Ta sanga ma, ngoi mɛ mbi ndofɔnɔ na le kɔdɔrɔ tɛ ĩ ko, mbi hũ angbilondo mɛ ĩ ndovɔrɔ. Mbi hũ nga mɛsa kɔi ti lungɔ Nzapa na ye, ko asu mbɛti ndo mɛsa ni ya: ‘Mɛsa tɛ nzapa mɛ ta e hĩnga lo ma.’ Wa ĩ ma hĩ! Nzapa mɛ ĩ ndovɔrɔ, ko ta ĩ hĩnga lo ma ko, mbi ga ya, mbi pa lo tɛ lo hɛ̃ ĩ.

²⁴ Nzapa mɛ wa lingɔ sese na aye zu mɛ ge lɛ ni ko, lo Gbia ti ndozu na ti tise. Ko ta lo ndodu na ya da mɛ azi awa so vɔrɔngɔ na anzapa mɛ ndɛ̃ ma.

²⁵ Ta lo ndodu na gwɛ̃ ti ye tɛ azi be fani kɔi ya, ala hɛ̃ ni ma. Ta sanga ma, na lo tɛ lo la azi ndodu le la ngɛ̃, ndowɔ mbo, ndolua aye zu.

²⁶ Lo li ndo bo zo kɔi, na ndo zo ni ko la lo li azi mɛ ndɛ̃ zu, la azi ni ko amu lɛ sese zu. Lo pia ndo lo ko bi tɛ la, lo fa nga maka ti ndo mɛ azi alengbi ti dungɔ da.

²⁷ Lo li nga so ya, se azi ali kpengbani, agi lege tɛ ni, wadila bere ala si ka tɛ ni. Biani, ta Nzapa yɔngɔrɔni na zo kɔi kɔi so popo tɛ e ma.

²⁸ Ta sanga ma, ‘Na lo tɛ lo la e ndodu lɛ e ngɛ̃, Na lo nguru tɛ lo la e ndodɔ nɔ, Nga bo lo la lo li e!’ Se mɛ ndo ambanga awa bia tɛ ĩ apa na ni la. Ala pa ndo ya: ‘E nga aya lo.’

²⁹ “Nga ma la e aya lo ko, ta e lengbi ti dungɔ na dangɔ bɛ ya, Nzapa nga ma angbilondo mɛ azi ndomu wɔrɔ, bere nwa, bere tɛ́nɛ alɛkɛ na ni na ti la, nga na kɔdɛ ti bɛ la ma.

³⁰ Ndo uzu ko, ta azi ahĩnga Nzapa ma, la ala ndovɔrɔ angbilondo, ko ta Nzapa ti de kpa bɛ lo na ndo ngoi ni ko ma. Kanda na olo ko, lo ndoili azi zu, na ndo kwɛ zu mɛ ge lɛ sese ya, ala gbinya bɛ la.

³¹ Lo ko ndo bi mɛ gbanda lo fa na ngbanga tɛ azi zu na seni. Zo mɛ na fangɔ ngbanga ni ko, lo sara nga lo, lo kpã wɛ. Ko lo fa ndo lo na azi zu, na ngoi mɛ ndo lo so zo ni ko na pɛ kwa!”

³² Ala ĩ ma Polo ĩ pa ya, azi aso gbanda na pɛ kwá ko, ambanga ae lo, ko ambanga mɛ ndɛ̃ apa hɛ̃ lo ya: “Polo, ku lá mɛ ndɛ̃ gbanda, wa e ma tɛnɛ ko la nyɔ mɔ.”

³³ Polo ĩ ma so ko, lo dɔ la so ndo ko lo zia, lo ɔ.

³⁴ Kanda ambanga azi aye ndo lo tɛ Yezo, la ala li na li nɔ tɛ Polo. So popo tɛ azi mɛ aye lo tɛ Yezo ko, ambanga azi mɛ ndo da lo mɛ: Denisi mɛ mbanga zo ti lingo ti Areopazɛ, na zo wali kɔi mɛ ili lo la Damarisi, nga na ambanga azi mɛ ndɛ̃.