Awa Pangɔ Kwa 16 - Fana Ngbangɔ 1987

Polo na Silasi nga na Timɔte aɔ ndoni kɔi

¹ Polo asi ndo ka kɔdɔrɔ mɛ ili ni la Dɛrbɛ. So pɛni, lo lo ndo ko, lo gwe ka kɔdɔrɔ mɛ ndɛ̃ mɛ ili ni la Listrɛ. Lo ĩ si kai ko, lo tã kɔli kɔi mɛ aye lo tɛ Yezo, ili kɔli ni la Timɔte. Ta Timɔte mɛ wa dúngɔ Timɔte ndo wa Yuda mɛ aye lo tɛ Yezo. Ko to Timɔte tɛ lo ndo zo ti sese ti Grɛsɛ.

² Azi ti Eklezia mɛ ka Listrɛ, na ala mɛ ka Ikɔniɔmɛ ndogonda ndo Timɔte sĩ.

³ Polo ĩ ma so ko, lo ye ya, ni na Timɔte ani ɔ ndoni kɔi, la lo mu lo. Uzu ti ala ɔngɔ ko, Polo afa Timɔte ganza, so kpɛngɔ mbɛtɔ tɛ Ayuda mɛ ndodu ka sese ni ko. Ta sanga ma, ala zu ahĩnga ndo ya, ta to Timɔte wa Yuda ma. Ngoi mɛ Polo ĩ fa Timɔte ganza wɛ la, ala ɔ.

⁴ Na ya kɔdɔrɔ kɔi kɔi mɛ ndo ala ndoɔ da ko, ala mu nyɔ awa pangɔ kwa tɛ Yezo, na nyɔ akangba ti Eklezia mɛ ka Yeruzalɛmɛ, apa hɛ̃ awa Kristo. Ala ndopa nga hɛ̃ la ya, ala tɔndɔ nyɔ ni na seni.

⁵ Nguru agbɔ̃ ndo azi ti Eklezia, ko bi kɔi kɔi ko, ala ndobu ndo bo bungɔ.

Polo ahũ Suma

⁶ Tɔrɔ Santo agbanzi ndo Polo na Timɔte ya, ta ala pa tɛnɛ tɛ Nzapa ka sese ti Azia ma, nda mɛ ndo ala fangbi ti sese ti Frizia na ti Galatia la.

⁷ Ala ĩ doli ti singɔ ka sese mɛ ili ni la Misia ko, ala ye ndo gwengɔ ka sese mɛ ili ni la Bitinia, la Tɔrɔ tɛ Yezo agbanzi la ya, ta ala si kai ma.

⁸ La ala fangbi ti sese ti Misia, ala si ka nyɔ kota ngu ti kɔdɔrɔ mɛ ili ni la Troasi.

⁹ Bi ĩ vũ ko, Polo ahũ suma. Na ya suma ni ko, lo hũ kɔli kɔi wa Masedoanɛ so ndolo. La kɔli ko agbɔ̃ gɛrɛ lo ya: “Ga ka Masedoanɛ, mɔ za e!”

¹⁰ Bo so pɛ suma ni, Polo ĩ zingɔ ko, e gi lege hiɔ ti gwengɔ ka Masedoanɛ, ta sanga ma, e hĩnga ndo ya, Nzapa aili e ya, e nɔ e pa Nzɔ̃ Pa hɛ̃ azi mɛ kai.

Lidia aye lo tɛ Gbia Yezo

¹¹ E mu masua so Troasi, e fa ngu, e si ka ya zúa kɔi mɛ ili ni la Samotrasɛ, e la so ndo ko bi kɔi. Ĩ la bu ndã ĩ de ko, e mu masua so ndo ko, e gwe ka Neapolisi.

¹² E ti e lo so ndo ko, e gwe ka kɔdɔrɔ mɛ ili ni la Filipɛ. Ko e la so ndo ko bi gba. Adu kɔdɔrɔ mɛ ndo na gbe ti awa Roma. Kɔdɔrɔ ni ndo kota kɔdɔrɔ kɔi ka sese ti Masedoanɛ.

¹³ Ĩ da na lá ti wɔngɔ tɛrɛ tɛ Ayuda ko, e lo so ya kɔdɔrɔ ni ko ya, e gwe ka nyɔ ngu. Ko e da bɛ e ya, ndo mɛ Ayuda ndosambela da la. Ngoi mɛ e si kai ko, e tã awe abombi tɛrɛ la so ndo ko. E dunga tise, e tɛnɛ tɛnɛ hɛ̃ la.

¹⁴ Mbanga wali kɔi so popo tɛ la, ili lo la Lidia. Lo lo ndo ka kɔdɔrɔ mɛ ili ni la Tiatirɛ, la lo ga. Lo wa kangɔ bengba bɔngɔ mɛ ndoti ngere ma wo ma, ko lo ndovɔrɔ nga ndo Nzapa. Lo ndoma ndo e, la Gbia Nzapa azi kɔdɛ li lo ya, lo zi ma lo, wa lo ma tɛnɛ mɛ Polo ndotɛnɛ.

¹⁵ So pɛni, ahɛ̃ lo batisimɔ, ahɛ̃ nga hɛ̃ nda se wa tɛ lo zu. La lo pa hɛ̃ e ya, se e hĩnga ya, ni ye lo tɛ Gbia biani ko, e ga, e la ka tɛ ni. Lo ye ndo bo ya, ale e ga ka tɛ ni, la e nɔ ka tɛ lo.

Asa Polo na Silasi bɔlɔkɔ

¹⁶ Mbanga lá kɔi, e ndogwe ndo ka ndo ti sambela, la e na mbanga wa kwa ti wali kɔi e tengbi. Siɔ tɔrɔ asa ndo tɛrɛ lo, ahɛ̃ lo nguru ti pangɔ lo mɛ na singɔ. Na lo ni ko, lo ndolua ndo faranga ma wo ma hɛ̃ ato gbia lo.

¹⁷ Ngoi mɛ e so ndogwe ko, lo ga pɛ e na Polo, lo so ndodɛrɛ kɔngɔ ya: “I ba awa kwa tɛ Nzapa mɛ ka yayu lo mɛ! Ala ndopa hɛ̃ ĩ se mɛ Nzapa alengbi ti songɔ ĩ.”

¹⁸ Bi kɔi kɔi zu ndo la lo ndotɛnɛ tɛnɛ ni ko. Ko ngɔnzɔ agbɔ̃ Polo, la Polo agi tɛrɛ lo, apa hɛ̃ siɔ tɔrɔ ko ya: “Na ili Yezo Kristo, mbi hɛ̃ mɔ nyɔ ya, mɔ lo ka ya tɛrɛ zo wali olo mɔ si!” Bo na ngoi ko nvɛni la siɔ tɔrɔ ko alo ka ya tɛrɛ zo wali ko asi.

¹⁹ Ato gbia lo ĩ hũ ya, siɔ tɔrɔ alo ka ya tɛrɛ lo asi wɛ, ko ta se mɛ ya, ani ti lua na faranga da ma ko, ala gbɔ̃nɔ Polo na Silasi, agiɔ la, agwe na ni ka bɛ kɔdɔrɔ, ka gbɛlɛ awa Roma mɛ agbia ti kɔdɔrɔ ni.

²⁰ Ato gbia zo wali ko ĩ fa Ia na agbia wɛ ko, ala pa nga hɛ̃ agbia ni ya: “Azi olo adu Ayuda, ala gbɛ̃ kɔdɔrɔ tɛ e,

²¹ ko ala ndoha sé du mɛ ndia tɛ e agbanzi ya, ta e awa Roma e ye, bere e tɔndɔ ma.”

²² Azi ĩ ma so ko, ngɔnzɔ agbɔ̃ la hɛ̃ Polo na Silasi. Agbia ahɛ̃ nyɔ hɛ̃ azi ya, ala hãna bɔngɔ tɛrɛ Polo na Silasi, asɔ̃ la na fimbo. La azi ko ali na se nyɔ agbia.

²³ Ĩ sɔ̃ la wɛ ko, asa la bɔlɔkɔ. La agbia ahɛ̃ nyɔ hɛ̃ wa batangɔ da bɔlɔkɔ ya, lo bata la nzɔ̃ni.

²⁴ Wa batangɔ da bɔlɔkɔ ĩ ma so ko, lo lɔ la, lo li na ni ka ya da kɔi mɛ ka nda da bɔlɔkɔ, lo kwe la na holongbo.

²⁵ Ĩ da na nɔ tɛ bɛ bi ko, Polo na Silasi asambela, aye bia so gondangɔ na Nzapa. Ko awa bɔlɔkɔ mɛ ndɛ̃ so ndoma la.

²⁶ Bo na ngoi ni ko, sese ayingi kpengbani nvɛni, la gu gɛrɛ da bɔlɔkɔ abukana. Nyɔ ngise kwɛ zu azizi, kpu nwa mɛ agbele na ti awa bɔlɔkɔ nga na gɛrɛ la afara.

²⁷ Wa batangɔ da bɔlɔkɔ azingɔ. Lo ĩ hũ ya, nyɔ ngise kwe zu agbã gapo ko, lo hã zabe tɛ lo ya, ni ho na tɛrɛ ni. Ta sanga ma, lo da ndo bɛ lo ya, awa bɔlɔkɔ akpɛlɛ.

²⁸ Polo ĩ hũ so ko, lo dɛ kɔngɔ hɛ̃ lo kpengbani ya: “Ta mɔ ho tɛrɛ mɔ ma! E kwɛ zu lo mɛ!”

²⁹ La wa batangɔ da bɔlɔkɔ apa ya, aga na wá hɛ̃ ni. Ĩ ga na wá hɛ̃ lo wɛ ko, lo gana tɛrɛ lo ka ya da mɛ awa bɔlɔkɔ da. Tɛrɛ lo so ndodɔ kpu kpu kpu, la lo kuku na gbɛlɛ Polo na Silasi.

³⁰ So pɛni, lo zi la, ala si. La lo lo hũnda la ya: “Apakala, ye mɛ mbi lengbi ti lingɔ, wa Nzapa aso mbi nɛ?”

³¹ La ala gbinya hɛ̃ lo ya: “Ye lo tɛ Gbia Yezo, wadila Nzapa aso mɔ, aso nga nda se wa tɛ mɔ.”

³² La ala pa tɛnɛ tɛ Gbia Yezo hɛ̃ lo, apa nga hɛ̃ azi zu mɛ ndola ka tɛ lo.

³³ Wa batangɔ da bɔlɔkɔ amu Polo na Silasi bo na ngoi ni ko, akpo lɛ kã tɛ la. So pɛni, ala hɛ̃ lo batisimɔ, ala hɛ̃ nga batisimɔ hɛ̃ asongo lo zu.

³⁴ La lo pa hɛ̃ Polo na Silasi ya, ala li ka ya da tɛ ni. Ala ĩ li kai ko, lo hɛ̃ la ye, ala tɛ. Bɛ kɔli ko na bɛ azi ti nda se wa tɛ lo zu ade sĩ, na lo mɛ ya, ala ye lo tɛ Nzapa.

³⁵ Ĩ la bu ndã ĩ de ko, agbia ato kwa hɛ̃ wa batangɔ da bɔlɔkɔ ya, lo zi Polo na Silasi.

³⁶ Wa batangɔ da bɔlɔkɔ anɔ apa hɛ̃ Polo ya: “Agbia ato kwa ya, mbi zi ĩ. Wa ĩ si, ko ĩ gwe nzɔ̃ni.”

³⁷ La Polo apa hɛ̃ lo ya: “E awa Roma. Ta ala dɛ ndo afa ngbanga tɛ e ma, ko ala hɛ̃ nyɔ, asɔ̃ e na gbɛlɛ azi zu. So pɛni, ala sa e bɔlɔkɔ. Ko na olo mɛ ko, ala ti ye ya, asi na e na gbɛ mbingo? Ipɔ, oko ta alengbi ma! Ale ala nvɛni aga azi e!”

³⁸ Awa nɔngɔ kwa anɔ apa tɛnɛ ni ko hɛ̃ agbia. Agbia ĩ ma ya, Polo na Silasi adu awa Roma ko, mbɛtɔ agbɔ̃ la.

³⁹ La ala nɔ ahũnda Polo na Silasi ya: “Se ĩ ye ko, ĩ ka lɛ ĩ ndo siɔ ye mɛ e li tɛrɛ ĩ.” So pɛni, agbia azi Polo na Silasi, ahũnda la ya: “Se ĩ ye ko, ĩ́ lo so ya kɔdɔrɔ olo ĩ gwe.”

⁴⁰ Polo na Silasi ĩ lo ka ya bɔlɔkɔ ĩ si wɛ ko, ala nɔ ka tɛ Lidia. Ala ĩ ba awa Kristo, ala ĩ hɛ̃ nga la nzɔ̃ wangɔ wɛ ko, ala hã nɔ agwe.